Onthou jy?

Het jy gevind dat onlangse nommers van Die Wagtoring praktiese waarde het? Toets gerus jou geheue met die volgende.

◻ Watter feite dui aan dat dit verkeerd sou wees om die plek waar Jesus na bewering gebore is te vereer?

Die Bybel maak nie melding van die presiese plek van Jesus se geboorte nie. Die Evangelieverslae van Mattheüs en Lukas noem net die hooftrekke (Mattheüs 2:1, 5; Lukas 2:4-7). Johannes 7:40-42 toon dat mense oor die algemeen onkundig was oor sy geboorteplek en dat sommige gedink het dat hy in Galilea gebore is. Jesus het ook nooit die besonderhede van sy geboorte gedurende sy aardse lewe algemeen bekend gemaak nie.—12/15, bladsy 5.

◻ Hoe kan ’n Christen sy vreugde behou terwyl hy beproewinge soos fisiese siekte, depressie en ekonomiese ontbering moet verduur?

God se Woord bied die nodige vertroosting en leiding. Dit kan baie verkwikkend wees om die psalms te lees of daarna te luister. Dawid het ons die volgende raad gegee: “Werp jou sorg op die HERE, en Hý sal jou onderhou.” Hy het ons ook die versekering gegee dat Jehovah waarlik die “Hoorder van die gebed” is (Psalm 55:23; 65:3). Jehovah se organisasie staan altyd gereed om ons, deur middel van sy publikasies en gemeentelike ouere manne, met ons probleme te help.—1/1, bladsye 14-15.

◻ Wat het Jesus bedoel toe hy, op pad om aan die paal genael te word, gesê het: “As hulle hierdie dinge doen wanneer die boom vogtig is, wat sal dan gebeur wanneer hy verdor is?” (Lukas 23:31, NW).

Jesus het gepraat van die boom van die Joodse nasie. Vanweë Jesus se teenwoordigheid en ’n oorblyfsel Jode wat in hom geglo het, het die nasie nog ’n bietjie lewensvog besit. Maar wanneer hulle almal uit die nasie geneem is, sou daar net ’n geestelik dooie boom oorbly, ’n verdorde nasionale organisasie.—1/15, bladsy 9.

◻ Hoe kan “die wat rein van hart is”, van wie daar in Mattheüs 5:8 gepraat word, “God sien”?

Hulle “sien God” wanneer hulle opmerk hoe hy ten behoewe van handhawers van onkreukbaarheid optree. (Vergelyk Exodus 33:20; Job 19:26; 42:5.) Maar die Griekse woord wat in Mattheüs 5:8 met “sien” vertaal word, beteken ook “om met die verstand te sien, te begryp, te weet”. Aangesien Jesus God se persoonlikheid volmaak weerspieël het, het insig in daardie persoonlikheid “die wat rein van hart is” in staat gestel om ‘God te sien’ (Johannes 14:7-9).—1/15, bladsy 16.

◻ Waarom kom ons tot die gevolgtrekking dat Jesus die aartsengel Migael is?

God se Woord meld net een aartsengel, en dit praat van daardie engel met verwysing na die verrese Heer Jesus: “Die Here self sal van die hemel neerdaal met ’n geroep, met die stem van ’n aartsengel en met geklank van die basuin van God” (1 Thessalonicense 4:16). In Judas 9 sien ons dat hierdie aartsengel se naam Migael is.—2/1, bladsy 17.

◻ Wat is vier gebiede waarop ons eer aan ander kan betoon?

Ons moet eer betoon aan politieke heersers, aan werkgewers, aan lede van ons gesin en aan diegene in die gemeente.—2/1, bladsye 20-2.

◻ Watter goeie voorbeeld het Jesus kort voor sy dood vir diegene met bejaarde ouers gestel?

Terwyl Jesus nog in ondraaglike pyn aan die folterpaal gehang het, het hy voorsorg getref vir die fisiese en geestelike welsyn van sy moeder deur haar aan die sorg van sy geliefde apostel Johannes toe te vertrou (Johannes 19:25-27).—2/15, bladsy 8.

◻ Waarom moes Jesus ly?

Jesus se lyding het die geskil ten opsigte van die onkreukbaarheid van God se knegte besleg. Dit het hom ook toegerus vir sy rol as barmhartige Hoëpriester vir die mensdom (Hebreërs 4:15).—2/15, bladsye 14-15.

◻ Watter lewensbelangrike geskille is deur die opstand in Eden geopper?

Kan die mens homself met welslae sonder God regeer? Is dit regverdig van God om onderwerping aan sy soewereiniteit te vereis? By uitbreiding, sou enigiemand onselfsugtig kies om God vrywillig te dien?—3/1, bladsy 6.

◻ Waarom het sommige verkeerdelik die Gedenkmaalembleme gebruik?

Sommige onvolwasse Christene het moontlik nog nie ’n gebalanseerde begrip van God se voornemens nie. Hulle erken dalk nie dat salwing ‘nie van die een wat wil of van die een wat loop, afhang nie, maar van God’ (Romeine 9:16). Dit berus nie by die persoon om te besluit dat hy of sy graag deel van die nuwe verbond wil uitmaak en ’n mede-erfgenaam saam met Christus wil word nie. Dit is Jehovah se keuse wat tel, en sy gees getuig van daardie keuse (Romeine 8:16; 1 Korinthiërs 12:18).—3/15, bladsy 21.

◻ Wat is die “suiwer taal” waarvan Sefanja 3:9, (NW) praat?

Dit is ’n behoorlike begrip van die waarheid aangaande God en sy voornemens.—4/1, bladsye 21-2.