Kan jy gelukkig wees al het jy baie om te doen?
DIE meeste van ons het ’n baie besige, dikwels uiters gejaagde, lewe. Die meedoënlose druk van die hedendaagse lewe eis dat ons ons voortdurend moet inspan net om by te bly. Mans en vaders moet dringende verpligtinge teenoor hulle gesin, hulle werkgewer en ander nakom. Vrouens en moeders moet na hulle gesin se behoeftes tuis omsien en moet dikwels ook sekulêre werk doen. Jongmense is ook onder druk om bepaalde gesinsverpligtinge na te kom terwyl hulle nog besig is met hulle skoolopleiding wat hulle vir ’n produktiewe rol in die gemeenskap sal voorberei.
Maar wat van dié van ons wat ons lewe aan Jehovah God toegewy het en wat sy gedoopte Getuies is? Benewens al die ander eise wat aan ons gestel word, het ons ook hierdie vermaning van die apostel Paulus: “My geliefde broeders, wees standvastig, onbeweeglik, altyd oorvloedig in die werk van die Here, omdat julle weet dat julle arbeid in die Here nie tevergeefs is nie” (1 Korinthiërs 15:58). Ja, die vereistes vir ware aanbidding behels talle verdere verantwoordelikhede. Hoe kan ons al hierdie verpligtinge nakom en gemoedsrus en ’n gelukkige lewensbeskouing hê?
Welslae bring geluk
Geluk—’n gevoel van behaaglikheid of tevredenheid—hang grootliks af van die welslae waarmee ons die verantwoordelikhede van die lewe behartig. As ons ons daaglikse verpligtinge op ’n redelik doeltreffende wyse kan nakom en dinge betyds en op ’n ordelike wyse gedoen kry, het ons ’n gevoel van welslae en tevredenheid. Dít is hoe dit behoort te wees, en die resultaat dra tot ons geluk by.
Dit was nooit Jehovah God se doel dat die nakoming van ons verantwoordelikhede ’n neerdrukkende las moes wees nie. Inteendeel, hy wou nog altyd hê dat ons ‘ons moet verheug en die goeie moet sien vir al ons harde werk’ (Prediker 3:12, 13, NW). Wanneer ons gelukkig in ons werk is, is ons gewoonlik produktief; gehoorsaam ons geredelik ’n opdrag en kom ons in vrede met ander oor die weg. As ons ongelukkig is, word ons werk daarenteen gewoonlik sloofwerk—iets wat eentonig, vervelig en selfs emosioneel uitputtend is. Dit lei tot onproduktiewe werkgewoontes en ’n negatiewe gesindheid. Die lewe word ’n daaglikse stryd terwyl ons probeer om aan al die eise wat aan ons gestel word te voldoen. Maar as ons ’n manier kan vind om ons geluk te behou in die dinge wat ons doen, het ons ’n beter kans om ’n lonende en bevredigende lewenswyse te ervaar.
Wees gebalanseerd
Om gelukkig te wees, selfs al het ons baie om te doen, moet ons gebalanseerd wees. En wat is balans? Dit is “geestes- en gemoedsbestendigheid”. ’n Gebalanseerde mens probeer om ordelik in sy bedrywighede te wees. Hy beplan vooruit, stel nie uit nie en is matig in sy gewoontes. Hy lê selfbeheersing aan die dag wat voedsel, drank, ontspanning, stokperdjies en vermaak betref. Hy lê in werklikheid “selfbeheersing in alle dinge” aan die dag!—1 Korinthiërs 9:24-27, NW; vergelyk Titus 2:2.
Gebed speel ’n deurslaggewende rol daarin om ’n Christelike balans te behou. ’n Kneg van Jehovah kan tot God bid dat Hy hom sy heilige gees gee en kan sy hemelse Vader se hulp vra om die vrug van die gees, waaronder selfbeheersing, aan te kweek (Lukas 11:13; Galasiërs 5:22). ’n Christen moet veral in gebed op God vertrou wanneer hy deur beproewinge geteister word wat dreig om sy balans te versteur. “Laat jou weg aan die HERE oor en vertrou op Hom, en Hy sal dit uitvoer”, het die psalmdigter Dawid gesê (Psalm 37:5). Ons sal soms miskien soos Dawid moet bid toe hy gesmeek het: “O God, handel tog gou vir my. U is my hulp en die Een wat aan my ontkoming verskaf. O Jehovah, wees nie te laat nie” (Psalm 70:5, NW). Moet nooit vergeet nie dat ons deur gebed ons balans kan behou, en ‘die vrede van God’ kan geniet ‘wat alle verstand te bowe gaan en wat ons harte en sinne bewaar’.—Filippense 4:6, 7.
’n Gebalanseerde Christen is gesond van verstand omdat hy op Jehovah vertrou en die vrede van God geniet (Titus 2:11, 12, NW). Dit is te danke aan die feit dat hy ’n goeie begrip van Bybelbeginsels het en hulle in sy lewe navolg. So ’n mens is nie geveins nie, en hy is ook nie haastig om te oordeel nie. Redelikheid verhoed dat hy eiewys of onversetlik is. Hy behou ’n beskeie dunk van homself en sy bekwaamhede, en dit stel hom in staat om met ander saam te werk (Miga 6:8). Dit is opmerklik dat die hoedanighede wat ’n mens help om gebalanseerd te wees ook onder die hoedanighede is wat van diegene vereis word wat as opsieners in die Christengemeente dien.—1 Timotheüs 3:2, 3.
Ons kan grootliks tot ons geluk bydra deur meer gebalanseerd in ons daaglikse bedrywighede te probeer wees. Deur die hoedanighede aan die dag te lê wat met goeie balans gepaard gaan, kan ons noodsaaklike dinge sonder kwaai fisiese of emosionele spanning gedoen kry. Ons leefwyse sal groter bestendigheid weerspieël, en ons sal meer uitrig. Ander sal ons geselskap meer geniet, en ons sal groter tevredenheid en vreugde ervaar. Maar wat is enkele praktiese maniere om ons balans te behou?
Praktiese maniere om ons balans te behou
Om ons balans te behou, moet ons ons persoonlike sake stiptelik en op ’n georganiseerde wyse probeer behartig. Ons moet vooruit beplan en dinge op ’n ordelike, sistematiese wyse doen. Diegene wat nie goed georganiseerd is nie en wat geneig is om dinge uit te stel, bemoeilik net hulle lewe met verhoogde spanning en kommer. Welslae in hierdie opsig sal ons help om te voel dat ons in beheer is en nie dat ons magtelose slagoffers van die omstandighede is nie.
Ons moet nie probeer om alles self te doen nie. Diegene wat nie bereid is om hulp van ander aan te neem nie, betaal dikwels ’n groot prys in die vorm van uitputting en frustrasie. Daar is verskeie take waarna ander kan omsien. Dit is dus verstandig om gebruik te maak van die bekwaamhede van diegene wat gewillig is om jou te help. Benewens dat dit ons eie las kan verlig, kan dit ook aanmoedigend wees vir diegene wat graag nader aan ons wil kom.
Dit is onverstandig om onsself te vergelyk met diegene wat meer kan doen. As ons probeer om soos diegene te wees wat blykbaar meer as ons gedoen kan kry, is dit ontmoedigend, en dit laat ons minderwaardig en onwaardig voel. Sulke denke is vernietigend, en dit ondermyn ons vasbeslotenheid en selfvertroue. “Laat elkeen sy eie werk op die proef stel”, het Paulus geskryf, “en dan sal hy grond vir roem hê alleen wat homself betref en nie wat die ander betref nie” (Galasiërs 6:4). Onthou, die werker wat die meeste waardeer word, is die een wat instruksies uitvoer, bestendig en betroubaar is en wat werk van goeie gehalte lewer. As ons so ’n werker is, sal ons dienste waardeer word en in aanvraag wees.—Spreuke 22:29.
Ons moet ons gesondheid goed oppas. Dit is een van ons kosbaarste besittings, want sonder gesondheid kan ons baie min doen. Daarom moet ons ’n gesonde dieet probeer volg deur voedsame voedselsoorte te eet. Ons moet die nodige rus kry deur teen ’n redelike tyd saans bed toe te gaan. Wanneer ons baie uitgeput is of voel dat ons ’n siekte onder lede het, moet ons ons nie aanhou dryf nie; dit kan ons duur te staan kom.
Dit is belangrik dat ons op ons hoede moet wees om nie ’n klaaggees te ontwikkel nie. As ons negatiewe denke vrye teuels gee, kan ons met feitlik alles en almal iets verkeerd vind. Dit is ’n gewisse manier om onsself en ander van vreugde te beroof. Ons moet nie skinder of kla oor dinge wat na ons mening nie reg is nie, maar ons moet dit liewer aan diegene meld wat vir die hantering van die saak verantwoordelik is en dit dan aan hulle oorlaat om dinge reg te stel. (Vergelyk 1 Korinthiërs 1:10-12.) Ons is verstandig as ons ’n positiewe lewensbeskouing behou en altyd soek, en verwag, om iets goeds in ander en in die gebeurtenisse wat ons lewe vorm te vind.—Vergelyk Judas 3, 4, 16.
Wanneer ons ons werksaamhede beplan, moet ons onthou dat ’n dolle pas wel rekords kan opstel, maar dat dit selde volgehou kan word. Voortdurende ooreising lei nie net tot uitputting nie, maar dit kan ook moedeloosheid veroorsaak wat ons vasbeslotenheid om aan te hou kan ondermyn. Laat ons dus ’n pas stel wat ons onbepaald kan volhou. Dit is byvoorbeeld goed om ’n praktiese rooster op te stel vir gereelde deelname aan die predikingswerk van huis tot huis en ander aspekte van die Christelike bediening. Ons moet tyd toelaat vir ontspanning en opbouende afleiding. En ons sal vind dat dit nuttig is om met ouer mense te gesels wat dekades se ondervinding het, want hulle het moontlik geleer hoe om noodsaaklike dinge gedoen te kry sonder om hulle fisies of emosioneel uit te put.
Lê goeie oordeel aan die dag
Dit is reg dat ons ’n verpligting voel en ’n begeerte het om al ons aangewese verantwoordelikhede, waaronder dié binne die gemeente van Jehovah se volk, na te kom. God het ’n welbehae in ywerige, betroubare werkers. (Vergelyk Mattheüs 25:21; Titus 2:11-14.) Maar die Skrif spoor ons aan: “Beveilig praktiese wysheid en denkvermoë” (Spreuke 3:21, NW). Die toepassing van Bybelse wysheid sal ons baat, en ons moet gesonde verstand en goeie oordeel aan die dag lê deur dinge sorgvuldig te beplan en altyd binne die perke van ons krag te bly.
Die vermaning om altyd oorvloedig te wees in die werk van die Here moet gebalanseer word met die versigtigheid wat Prediker 9:4 aanraai. Daar lees ons: “’n Lewendige hond is beter as ’n dooie leeu.” Ja, ’n lewendige hond, al word hy deur sommige mense verag, is beter daaraan toe as ’n dooie leeu, ’n dier wat deur baie as ’n koning beskou word. As ons balans aan die dag lê en behoorlik vir ons gesondheid sorg, sal ons lewe en kan ons aanhou om dinge te doen. Die dooies kan niks meer doen nie. Goeie oordeel kan ons help om ’n redelike balans te vind wat ons in staat stel om noodsaaklike dinge gedoen te kry sonder om ons vreugde te verloor.
Die feit dat ons baie te doen het, beteken dus nie dat ons nie gelukkig kan wees nie. Die besigste mense kan onder die gelukkigstes wees indien hulle redelik is, ’n goeie lewensbeskouing behou en goeie oordeel gebruik sodat hulle goed gebalanseerd kan bly. Ons kan die grootste geluk moontlik ervaar indien ons wysheid aan die dag lê, goeie werke doen en ons hoop op Jehovah God stel.—1 Timotheüs 6:17-19.