Hulle toevlug—’n leuen!

“Ons het ’n leuen ons toevlug gemaak en in bedrog het ons ons verberg.”—JESAJA 28:15, NW.

1, 2. (a) Watter organisasie moet vandag ag slaan op wat met die eertydse koninkryk van Juda gebeur het? (b) Watter misplaaste vertroue het Juda gehad?

IS DAARDIE woorde vandag net so van toepassing op die Christendom as wat dit op die eertydse tweestammeryk van Juda van toepassing was? Beslis! En daardie ooreenkoms hou niks goeds vir die hedendaagse Christendom in nie. Dit beteken dat ’n ramp daardie afvallige godsdiensorganisasie binnekort gaan tref!

² Ten noorde van Juda was die tienstammeryk van Israel. Toe Israel ontrou was, het Jehovah toegelaat dat Assirië hom in 740 v.G.J. verower. Sy susterryk, Juda, het hierdie tragedie aanskou maar het klaarblyklik gedink dat so iets nooit met hom sou gebeur nie. ‘Kyk’, het hulle leiers gespog, ‘is Jehovah se tempel dan nie in Jerusalem nie? Is ons nie God se begunstigde volk nie? Spreek ons priesters en profete nie in Jehovah se naam nie?’ (Vergelyk Jeremia 7:4, 8-11.) Daardie godsdiensleiers was oortuig dat hulle veilig was. Maar hulle het dit mis gehad! Hulle was net so troueloos soos hulle noordelike volksgenote. Wat met Samaria gebeur het, sou derhalwe ook met Jerusalem gebeur.

3. Waarom voel die Christendom vol vertroue wat die toekoms betref, maar is daar goeie rede vir hulle vertroue?

³ Die Christendom beweer eweneens dat hulle ’n besondere verhouding met God het. ‘Kyk!’, spog hulle, ‘ons het tienduisende kerke en professionele geestelikes, asook honderdmiljoene lidmate. Ons besit ook die Bybel, en ons gebruik die naam van Jesus in ons aanbidding. God begunstig ons beslis!’ Maar wat met eertydse Jerusalem gebeur het, is ’n ernstige waarskuwing. Ondanks buitengewone, onlangse gebeure weet ons dat Jehovah binnekort beslissend teen die Christendom en alle ander valse godsdiensstelsels sal optree.

‘’n Verbond met die Dood’

4. Watter verbond het Juda volgens sy mening gemaak?

⁴ Eertydse ontroue Jerusalem het baie waarskuwings deur God se ware profete ontvang, maar wou dit nie glo nie. Inteendeel, hy het gespog dat die dood hom nie na Sjeool, die graf, sou neem soos wat dit die noordelike koninkryk Israel geneem het nie. Die profeet Jesaja het onder inspirasie aan Juda gesê: “Daarom, hoor die woord van Jehovah, julle grootpraters, julle heersers van hierdie volk wat in Jerusalem is: Omdat julle gesê het: ‘Ons het ’n verbond gesluit met die Dood, en met Sjeool het ons ’n visioen tot stand gebring; in geval die oorstromende stortvloed deurtrek, sal hy ons nie bereik nie, want ons het ’n leuen ons toevlug gemaak en in bedrog het ons ons verberg.’”—Jesaja 28:14, 15, NW.

5. (a) Wat was Juda se sogenaamde verbond met die dood? (b) Watter waarskuwing wat tot koning Asa gerig was, het Juda vergeet?

⁵ Ja, Jerusalem se leiers het gedink dat hulle as ’t ware ’n ooreenkoms met die dood en met Sjeool het sodat hulle stad bewaar sou word. Maar het Jerusalem se sogenaamde verbond met die dood beteken dat hy berou oor sy sondes gehad het en op Jehovah vertrou het vir redding? (Jeremia 8:6, 7). Geensins nie! Hy het hom eerder tot menslike politieke heersers vir hulp gewend. Maar sy vertroue in wêreldse bondgenote was ’n illusie, ’n leuen. Die wêreldlinge op wie hy vertrou het, kon hom nie red nie. En omdat hy Jehovah verlaat het, het Jehovah Jerusalem verlaat. Dit het presies gebeur soos die profeet Asarja koning Asa gewaarsku het: “Die HERE is met julle as julle met Hom is, en as julle Hom soek, sal Hy Hom deur julle laat vind; maar as julle Hom verlaat, sal Hy julle verlaat.”—2 Kronieke 15:2.

6, 7. Watter stappe het Juda gedoen om sy veiligheid te verseker, maar wat was die uiteinde?

⁶ Weens hulle vertroue in hulle politieke bondgenootskappe was Jerusalem se leiers oortuig dat geen “oorstromende stortvloed” van invallende leërs naby hulle sou kom om hulle vrede en veiligheid te versteur nie. Toe ’n bondgenootskap tussen Israel en Sirië hom bedreig, het Juda hom tot Assirië gewend vir hulp (2 Konings 16:5-9). Later, toe die krygsmagte van Babilon ’n bedreiging vir hom was, het Jerusalem by Egipte om hulp gaan aanklop en Farao het daarop gereageer deur ’n leër te stuur om hom te gaan help.—Jeremia 37:5-8; Esegiël 17:11-15.

⁷ Maar Babilon se krygsmagte was te sterk, en Egipte se troepe moes terugval. Jerusalem het ’n fout gemaak toe hy sy vertroue in Egipte gestel het, en in 607 v.G.J. het Jehovah die stad oorgegee aan die vernietiging wat hy voorspel het. Jerusalem se heersers en priesters het dit dus mis gehad! Hulle vertroue in wêreldse bondgenootskappe vir vrede en veiligheid was “’n leuen” wat deur die stortvloed van Babiloniese krygsmagte weggespoel is.

Die “beproefde steen” word verwerp

8. Hoe het die Christendom ’n standpunt ingeneem wat baie ooreenstem met dié van eertydse Juda?

⁸ Is daar vandag ’n situasie wat hiermee ooreenkom? Ja, daar is. Die geestelikes van die Christendom meen ook dat geen ramp hulle sal oorval nie. Hulle sê in werklikheid soos Jesaja voorspel het: “Ons het ’n verbond gesluit met die Dood; en met Sjeool het ons ’n visioen tot stand gebring; in geval die oorstromende stortvloed deurtrek, sal hy ons nie bereik nie, want ons het ’n leuen ons toevlug gemaak en in bedrog het ons ons verberg” (Jesaja 28:15, NW). Net soos eertydse Jerusalem stel die Christendom hulle vertroue in wêreldse bondgenootskappe vir veiligheid, en hulle geestelikes weier om Jehovah hulle toevlug te maak. Trouens, hulle gebruik selfs nie eers sy naam nie, en hulle spot en vervolg diegene wat daardie naam eer. Die Christendom se geestelikes het presies gedoen wat die Joodse hoëpriesters in die eerste eeu gedoen het toe hulle Christus verwerp het. Hulle het in der waarheid gesê: “Ons het geen koning behalwe die keiser nie.”—Johannes 19:15.

9. (a) Wie waarsku die Christendom vandag net soos Jesaja Juda gewaarsku het? (b) Tot wie moet die Christendom hulle wend?

⁹ Vandag waarsku Jehovah se Getuies dat ’n vloed van skerpregterleërs binnekort die Christendom gaan oorstroom. Daarbenewens wys hulle op die ware toevlugsoord teen daardie vloed. Hulle haal Jesaja 28:16 aan, wat sê: “Dit is wat die Soewereine Heer Jehovah gesê het: ‘Kyk, ek lê as fondament in Sion ’n steen, ’n beproefde steen, die kosbare hoek van ’n vaste fondament. Niemand wat geloof beoefen, sal paniekbevange raak nie’” (NW). Wie is hierdie ‘kosbare hoeksteen’? Die apostel Petrus het hierdie woorde aangehaal en hulle op Jesus Christus toegepas (1 Petrus 2:6). As die Christendom vrede met Jehovah se Koning, Jesus Christus, nagestreef het, sou hulle die komende stortvloed vrygespring het.—Vergelyk Lukas 19:42-44.

10. By watter verwikkelinge het die Christendom betrokke geraak?

¹⁰ Maar hulle het dit nie gedoen nie. In hulle soeke na vrede en veiligheid, wurm hulle hulle eerder in by die politieke leiers van die nasies—ondanks die Bybel se waarskuwing dat vriendskap met die wêreld vyandskap met God is (Jakobus 4:4). Daarbenewens het hulle die Volkebond in 1919 sterk voorgestaan as die mensdom se beste hoop op vrede. Sedert 1945 stel hulle hulle hoop op die Verenigde Nasies. (Vergelyk Openbaring 17:3, 11). Hoe groot is hulle betrokkenheid by hierdie organisasie?

11. Hoe word godsdiens in die VN verteenwoordig?

¹¹ ’n Onlangse boek gee ’n idee wanneer dit sê: “Niks minder nie as vier-en-twintig Katolieke organisasies word by die VN verteenwoordig. Etlike godsdiensleiers van die wêreld het die internasionale organisasie al besoek. Die gedenkwaardigste was die besoeke van Sy Heiligheid pous Paulus VI gedurende die Algemene Vergadering in 1965 en van pous Johannes Paulus II in 1979. Talle godsdienste het spesiale smeekbedes, gebede, gesange en dienste vir die Verenigde Nasies. Die belangrikste voorbeelde is dié van die Katolieke, die Unitariese Universaliste-, die Baptiste- en die Bahaïs-geloof.”

Tevergeefse verwagtinge van vrede

12, 13. Waarom is Jehovah se Getuies vol vertroue dat hulle waarskuwings waar is, ondanks algemene verwagtinge dat vrede voor die deur lê?

¹² Een van die wêreld se magtigste politieke leiers het die verwagtinge van baie mense beaam toe hy gesê het: “Hierdie geslag mense op aarde sal dalk die koms van ’n onherroeplike tydperk van vrede in die geskiedenis van die beskawing belewe.” Was hy reg? Beteken onlangse verwikkelinge dat die waarskuwings wat Jehovah se Getuies bekend gemaak het oor Jehovah se voltrekking van oordeel aan die nasies nie bewaarheid sal word nie? Het Jehovah se Getuies dit mis?

¹³ Nee, hulle het dit nie mis nie. Hulle weet dat hulle die waarheid vertel omdat hulle hul vertroue stel in Jehovah en in die Bybel, wat God se eie Woord van waarheid is. Titus 1:2 sê: ‘God kan nie lieg nie.’ Wanneer ’n Bybelprofesie derhalwe sê dat iets sal gebeur, dan is hulle vol vertroue dat dit vir seker sal gebeur. Jehovah sê self: “So sal my woord wees wat uit my mond uitgaan: dit sal nie leeg na My terugkeer nie, maar doen wat My behaag en voorspoedig wees in alles waartoe Ek dit stuur.”—Jesaja 55:11.

14, 15. (a) Wat het die leiers van Juda verkondig kort voor Jerusalem se vernietiging in 607 v.G.J.? (b) Wat sou volgens Paulus se voorspelling uitgeroep word voor skielike vernietiging oor hierdie wêreld kom? (c) Wat kan ons verwag wanneer die uitroep wat in 1 Thessalonicense 5:3 voorspel word sy klimaks bereik?

¹⁴ In die jare net voor die vernietiging van Jerusalem in 607 v.G.J. het die leiers, volgens Jeremia, uitgeroep: “Vrede, vrede!” (Jeremia 8:11). Maar dit was ’n leuen. Jerusalem is vernietig ter vervulling van die geïnspireerde waarskuwings van Jehovah se ware profete. Die apostel Paulus het gewaarsku dat iets dergeliks in ons dag sal gebeur. Hy het gesê dat die mense “Vrede en veiligheid” sal uitroep. Maar dan, het hy gesê, “oorval ’n skielike verderf hulle”.—1 Thessalonicense 5:3.

¹⁵ Toe ons die negentigerjare betree het, het koerante en tydskrifte oral gesê dat die Koue Oorlog verby is en dat wêreldvrede uiteindelik in sig is. Maar toe het ’n skietoorlog in die Midde-Ooste uitgebreek. Die wêreldsituasie sal egter vroeër of later die stadium bereik waar die uitroep van “Vrede en veiligheid” wat in 1 Thessalonicense 5:2, 3 voorspel word ’n klimaks sal bereik. Omdat ons verwagtinge stewig op God se Woord gegrond is, weet ons dat God se oordele vinnig en sekuur voltrek sal word wanneer daardie klimaks bereik word. Geen haastige verklarings van vrede en veiligheid moet ons laat dink dat die voorspelde vernietiging deur God nie sal kom nie. Jehovah se oordele is onveranderlik opgeteken in sy Woord die Bybel. Die Christendom, asook alle ander valse godsdienste, sal vernietig word. En dan sal Jehovah se vernietigende oordele aan die res van Satan se wêreld voltrek word (2 Thessalonicense 1:6-8; 2:8; Openbaring 18:21; 19:19-21). Aangesien Jehovah se Getuies vol vertroue is dat Jehovah sy woord sal vervul, waak hulle steeds onder leiding van die “getroue en verstandige dienskneg”-klas en let hulle noukeurig op hoe wêreldgebeure ontwikkel (Mattheüs 24:45-47). Inderdaad, geen pogings van die mens om vrede te bewerkstellig, moet ons laat dink dat Jehovah van sy voorneme afgesien het om ’n stortvloed van vernietiging te bring oor die Christendom wat van sonde deurtrek is nie.

‘God is ons toevlug’

16, 17. Hoe reageer Jehovah se Getuies as party mense aanstoot neem aan die vrymoedigheid van hulle boodskap?

¹⁶ Party mense sal dalk aanstoot neem aan die vrymoedigheid van Jehovah se Getuies wanneer hulle die dinge verkondig. Maar wanneer hulle sê dat die Christendom se godsdiensleiers hulle toevlug tot ’n leuenagtige reëling geneem het, sê hulle maar net wat die Bybel sê. Wanneer hulle sê dat die Christendom strafskuldig is omdat hulle ’n deel van die wêreld geword het, verkondig hulle maar net wat God self in die Bybel sê (Filippense 3:18, 19). Boonop stel die Christendom hulle vertroue in die skemas wat deur hierdie wêreld gebied word, en sodoende ondersteun hulle in werklikheid die god van hierdie wêreld, Satan die Duiwel, wat deur Jesus die vader van die leuen genoem is.—Johannes 8:44; 2 Korinthiërs 4:4.

¹⁷ Jehovah se Getuies sê derhalwe: Wat ons betref, ons wakker nie valse verwagtinge van wêreldvrede aan as gevolg van die veranderende politieke toneel nie. Ons maak eerder die woorde van die psalmdigter ons eie: “God is vir ons ’n toevlug. . . . Die seuns van die aardse mens is ’n asemtog, die menseseuns is ’n leuen. Wanneer hulle op die weegskaal gelê word, is hulle almal saam ligter as ’n asemtog” (Psalm 62:8, 9, NW). Menseskemas om die Christendom te ondersteun en in stand te hou is ’n bedrog, ’n leuen! Hulle almal saam is net so magteloos om Jehovah se voornemens te dwarsboom as ’n mondvol warm lug!

18. Watter waarskuwing van die psalmis is vandag gepas?

¹⁸ Jehovah se Getuies haal ook Psalm 33, verse 17 tot 19, aan wat sê: “Vir redding is die perd [van Egipte, wat oorlogvoering simboliseer] niks anders as bedrog nie, en deur die oorvloed van sy daadkrag verskaf hy geen ontkoming nie. Kyk! Die oog van Jehovah is op die wat hom vrees, op die wat op sy liefderyke goedheid wag, om hulle siel van die dood self te bevry, en hulle tydens hongersnood in die lewe te hou” (NW). Ware Christene vertrou vandag op Jehovah en op sy hemelse Koninkryk, die enigste reëling wat blywende vrede kan bring.

Die Christendom ‘sal vertrap word’

19. Waarom is vertroue in politieke organisasies om wêreldvrede te bring ’n bedrog?

¹⁹ As ’n mens op enige mensgemaakte plaasvervanger vir God se Koninkryk vertrou, maak ’n mens van daardie plaasvervanger ’n beeld, ’n voorwerp van aanbidding (Openbaring 13:14, 15). Dus is enige aanmoediging om op staatkundige instellinge, soos die Verenigde Nasies, te vertrou om vrede en veiligheid te bring ’n bedrog, ’n leuen. Wat sulke voorwerpe van valse verwagtinge betref, sê Jeremia: “Sy gegote beeld is ’n leuen, en daar is geen gees in hulle nie. Nietige afgode is hulle, werk vir spotterny; in die tyd van hulle besoeking gaan hulle tot niet” (Jeremia 10:14, 15). Gevolglik sal die strydperde van antitipiese Egipte, dit wil sê, die militêr-politiese mag van die nasies van vandag, nie die godsdiensryk van die Christendom in sy dag van krisis beskerm nie. Die bondgenootskap van die Christendom se godsdienste met hierdie wêreld sal beslis nie daarin slaag om hulle te beskerm nie.

20, 21. (a) Wat het met die Volkebond gebeur, en waarom sal die Verenigde Nasies glad nie beter vaar nie? (b) Hoe het Jesaja getoon dat die Christendom se bondgenootskappe met die wêreld haar nie sal red nie?

²⁰ Die Christendom het hulle hoop gestel op die Volkebond, maar dit is omvergewerp selfs sonder dat Armageddon gekom het. Nou het hulle trou gesweer aan die Verenigde Nasies. Maar hulle sal binnekort voor “die groot dag van die almagtige God” te staan kom en hulle sal dit nie oorleef nie (Openbaring 16:14). Selfs ’n herrese VN kan nooit vrede en veiligheid bring nie. God se profetiese Woord toon dat die organisasie van die Verenigde Nasies met sy lidnasies “teen die Lam [Christus in Koninkryksmag] oorlog [sal] voer, en die Lam sal hulle oorwin—want Hy is die Here van die here en die Koning van die konings”.—Openbaring 17:14.

²¹ Jehovah se Getuies sê vol vertroue dat die Christendom se bondgenootskappe met Satan se wêreld geen redding vir hulle inhou nie. En wanneer hulle dit sê, wys hulle maar net op wat die Bybel self sê. Jesaja 28:17, 18 haal Jehovah se woorde aan: “En Ek sal die reg tot ’n riglyn maak, en die geregtigheid tot ’n skietlood; en die hael sal die leuendak wegruk en die water die skuilplek wegspoel. En julle verbond met die dood sal uitgewis word, en julle verdrag met die doderyk nie standhou nie; as die golwende gésel [“oorstromende stortvloed”, NW] deurtrek, sal julle deur hom vertrap word.”

22. Wat sal die gevolge wees wanneer oordeel volgens volmaakte geregtigheid aan die Christendom voltrek word?

²² Wanneer Jehovah sy geregtelike beslissing vel, sal dit volgens volmaakte geregtigheid geskied. En die Christendom se grondslag vir vertroue, hulle “verbond met die dood”, sal heeltemal uitgewis word asof ’n oorstromende stortvloed dit weggespoel het. Jesaja sê verder: “Môre vir môre sal hy deurtrek, by dag en by nag. En dit sal net verskrikking wees om so ’n openbaring te verneem” (Jesaja 28:19). Hoe skrikwekkend sal dit tog wees vir diegene wat die volle mag van Jehovah se oordeel aanskou! Hoe verskriklik sal dit wees vir die Christendom se geestelikes en hulle volgelinge om te láát uit te vind dat hulle hulle vertroue in ’n leuen gestel het!

Jehovah se naam is “’n sterk toring”

23, 24. Wat sal Jehovah se Getuies eerder doen as om veiligheid in hierdie wêreld te soek?

²³ Maar wat van Jehovah se Getuies? Ondanks internasionale haat en vervolging bly hulle afgeskeie van die wêreld. Hulle vergeet nooit dat Jesus van sy volgelinge gesê het nie: “Hulle is nie van die wêreld nie, net soos Ek nie van die wêreld is nie” (Johannes 17:16). Deur hierdie laaste dae heen het hulle hulle vertroue op Jehovah se Koninkryk gevestig, nie op menseskemas nie. Daarom sal die onheil wat die Christendom gaan tref Jehovah se Getuies nie verskrik nie. Soos Jesaja voorspel het: “Niemand wat geloof beoefen, sal paniekbevange raak nie.”—Jesaja 28:16, NW.

²⁴ Spreuke 18:10 sê: “Die Naam van die HERE is ’n sterk toring; die regverdige hardloop daarin en word beskut.” Ons nooi dus alle sagmoedige mense om hulle toevlug tot Jehovah en tot sy Koninkryk deur Christus te neem. As ’n toevlug is Jehovah geen bedrog nie! Sy Koninkryk deur Christus is geen leuen nie! Die Christendom se toevlug is ’n leuen, maar ware Christene se toevlug is die waarheid.

Kan jy verduidelik?

◻ Hoe het eertydse Juda ’n leuen sy toevlug gemaak?

◻ Hoe het die Christendom hulle in bedrog probeer verberg?

◻ Hoe het Jesaja Juda gewaarsku, en hoe gee Jehovah se Getuies vandag ’n soortgelyke waarskuwing?

◻ Hoe sal die Christendom uitvind dat hulle vertroue misplaas is?

◻ Watter standpunt behou Jehovah se Getuies vandag in teenstelling met die Christendom?

[Venster op bladsy 17]

HOË VERWAGTINGE WAT VIR DIE VERENIGDE NASIES UITGESPREEK WORD

“Die internasionale gemeenskap is vir die eerste keer sedert die Tweede Wêreldoorlog verenig. Die leierskap van die Verenigde Nasies, wat eens net ’n verwagte ideaal was, doen nou sy stigters se visioen gestand. . . . Die wêreld kan derhalwe hierdie geleentheid aangryp om die langverwagte belofte van ’n nuwe wêreldorde te verwesenlik.”—President Bush van die Verenigde State in sy Uniestaatboodskap aan die nasie, 29 Januarie 1991