Hou aan waarsku aangaande Jehovah se ongewone werk
“Jehovah sal opstaan net soos by die berg Perasim, en hy sal in beroering kom net soos in die laagvlakte naby Gibeon.”—JESAJA 28:21, NW.
1, 2. Watter ongewone werk het Jehovah in Dawid se dag ten behoewe van Sy volk verrig?
’NVREEMDE daad! ’n Uiters ongewone werk! Dit is wat Jehovah destyds in die 11de eeu v.G.J. ten behoewe van sy volk verrig het. En hierdie vreemde daad was ’n patroon vir ’n selfs ongewoner werk wat hy in die nabye toekoms gaan verrig. Wat was daardie daad in die ou tyd? Kort nadat Dawid as koning in Jerusalem bevestig is, het die naburige Filistyne Israel aangeval, en dít het tot Jehovah se vreemde daad aanleiding gegee. Eers het die Filistyne begin met ’n strooptog in die dal Refaim. Dawid het Jehovah geraadpleeg oor wat hom te doen staan, en hy is beveel om tot die aanval oor te gaan. Dawid het na Jehovah se woord geluister en het die magtige Filistynse leër deeglik verslaan by Baäl-Perasim. Maar die Filistyne wou nie toegee dat hulle verslaan is nie. Kort daarna het hulle teruggekeer om die dal Refaim nog verder te stroop en te verwoes, en Dawid het weer eens Jehovah se leiding gevra.
2 Hierdie keer is hy aangesê om met sy troepe agter die Filistyne stelling in te neem. Jehovah het gesê: “As jy ’n geruis van voetstappe in die toppe van die balsembosse hoor, moet jy gou maak, want dan het die HERE voor jou uitgetrek om die leër van die Filistyne te verslaan.” En dit is wat gebeur het. Dawid het gewag totdat Jehovah die geruis van voetstappe in die top van die balsembosse—moontlik deur middel van ’n sterk wind—voortgebring het. Dawid en sy soldate het dadelik uit hulle skuilplek gestorm en die verwarde Filistyne aangeval en hulle in ’n groot slagting verslaan. Die afgodsbeelde wat deur die Filistyne op die slagveld agtergelaat is, is bymekaargemaak en vernietig.—2 Samuel 5:17-25; 1 Kronieke 14:8-17.
3. Waarom was Jehovah se vreemde daad vir die Jode in Jesaja se dag van belang, en waarom moet dit vir die Christendom vandag van belang wees?
3 Dit was ’n ongewone werk, ’n vreemde daad, wat Jehovah teen die Filistyne en ten behoewe van sy gesalfde koning verrig het. Hierdie merkwaardige daad is van besondere belang, aangesien die profeet Jesaja gewaarsku het dat Jehovah iets net so vreemds en magtigs aan die geestelike dronkaards van Juda sou doen. Die ontroue godsdiensleiers van Jesaja se dag moes dus ag slaan op sy woorde. Die Christendom moet vandag ook ag slaan op sy woorde, want wat met Juda gebeur het, is ’n patroon van wat die Christendom se uiteinde gaan wees.
“Die bed sal te kort wees”
4, 5. (a) Hoe het Jesaja die ongemaklike situasie van godsdiensleiers in sy dag treffend geïllustreer? (b) Wat is die rede vir die Christendom se ongemak vandag?
4 Jesaja het eers die feit aan die lig gebring dat die verdrae waarop daardie eertydse geestelike dronkaards vertrou het ’n bedrog, ’n leuen, was. Toe het hy die uiters ongemaklike situasie van diegene wat hulle hoop op daardie leuen gestel het treffend geïllustreer. Hy het gesê: “Die bed sal te kort wees dat iemand hom daarop kan uitrek, en die kombers te smal dat iemand hom daarin kan toedraai” (Jesaja 28:20). Iemand wat hom op ’n bed uitrek wat te kort is, sal vind dat sy voete in die koue uitsteek. As hy andersyds sy knieë optrek omdat die bed te kort is, sal die kombers te smal wees en ’n groot deel van sy liggaam sal nog oop wees. Al probeer hy ook hoe om hom toe te kry, ’n deel van hom sal nog in die koue uitsteek.
5 Dit was, simbolies gesproke, die situasie van diegene in Jesaja se dag wat ’n leuen hulle toevlug gemaak het. Dit is ook die ongemaklike situasie van diegene vandag wat die Christendom se leuen hulle toevlug maak. Hulle is as ’t ware buite in die koue. Dit is nie nou die tyd om gemak in wêreldse reëlings vir vrede en veiligheid te soek nie. In die skadu van die komende oordeelsdade van God sal die bondgenootskappe met politieke heersers geen warme gemak vir die Christendom verskaf nie.
Jehovah se vreemde daad
6. Hoe sou Jehovah teen Juda optree, en hoe sal hy teen die Christendom optree?
6 Nadat Jesaja die ongemaklike situasie van ontroue Jerusalem van sy dag—en van die hedendaagse ontroue Christendom—aanskoulik beskryf het, het hy gesê: “Jehovah sal opstaan net soos by die berg Perasim, en hy sal in beroering kom net soos in die laagvlakte naby Gibeon, om sy daad te verrig—sy daad is vreemd—en om sy werk te doen—sy werk is ongewoon” (Jesaja 28:21, NW). Ja, Jesaja het gewaarsku dat Jehovah binnekort sou opstaan soos hy by Baäl-Perasim gedoen het. Maar hierdie keer sou hy teen sy ontroue volk optree en hy sou dit doen soos ’n onkeerbare watervloed wat deur ’n gat in ’n damwal uitbreek. Jerusalem se verbond met die dood sou dan van nul en gener waarde wees. Jehovah sal in die nabye toekoms op soortgelyke wyse teen die Christendom optree, en hulle sal vind dat al hulle dronkmakende ooreenkomste met hierdie wêreld niks beteken nie. Hulle ontsaglike organisasie sal vernietig word en hulle volgelinge sal verstrooi word. Hulle valse gode sal heeltemal verbrand word.
7. Waarom is Jehovah se voornemens ten opsigte van Juda as “vreemd” en “ongewoon” bestempel?
7 Waarom noem Jesaja Jehovah se daad teen Jerusalem ’n vreemde en ongewone werk? Wel, Jerusalem was die setel van Jehovah se aanbidding en die stad van Jehovah se gesalfde koning (Psalm 132:11-18). As hierdie setel was Jerusalem nooit tevore vernietig nie. Sy tempel is nog nooit afgebrand nie. Die koninklike huis van Dawid, wat eens in Jerusalem gesetel was, is nooit omvergewerp nie. Sulke dinge was ondenkbaar. Dit was baie ongewoon dat Jehovah dit sou oorweeg om toe te laat dat sulke dinge gebeur.
8. Watter waarskuwing het Jehovah aangaande sy komende ongewone daad gegee?
8 Maar Jehovah het hulle deur sy profete deeglik gewaarsku dat skokkende dinge inderdaad sou gebeur (Miga 3:9-12). Die profeet Habakuk, wat in die sewende eeu v.G.J. geleef het, het byvoorbeeld gesê: “Aanskou onder die nasies en merk op, en staan verstom, verstom; want Ek gaan iets in julle dae doen wat julle nie sal glo as dit vertel word nie. Want kyk, Ek gaan die Chaldeërs opwek, daardie kwaai en onstuimige nasie wat trek deur die wydtes van die aarde, om wonings in besit te neem wat aan hom nie behoort nie. Verskriklik en gedug is hy.”—Habakuk 1:5-7.
9. Hoe het Jehovah uitvoering gegee aan sy waarskuwing teen Jerusalem?
9 In 607 v.G.J. het Jehovah uitvoering aan sy waarskuwing gegee. Hy het toegelaat dat die Babiloniese leërs teen Jerusalem optrek en dat hulle die stad en die tempel geheel en al vernietig (Klaagliedere 2:7-9). Daarbenewens het hy toegelaat dat Jerusalem ’n tweede keer vernietig word. Waarom? Wel, berouvolle Jode is ná 70 jaar in ballingskap toegelaat om na hulle tuisland terug te keer, en mettertyd is ’n ander tempel in Jerusalem gebou. Maar die Jode het weer eens van Jehovah af weggedrywe. In die eerste eeu G.J. het Paulus die woorde van Habakuk vir die Jode van sy dag aangehaal en sodoende getoon dat die profesie ’n toekomstige toepassing sou hê (Handelinge 13:40, 41). Jesus het self spesifiek gewaarsku dat Jerusalem en sy tempel vernietig sou word vanweë die Jode se gebrek aan geloof (Mattheüs 23:37–24:2). Het daardie eerste-eeuse Jode daarop ag geslaan? Nee. Hulle het net soos hulle voorvaders Jehovah se waarskuwing heeltemal verwerp. Jehovah het gevolglik sy vreemde werk herhaal. Jerusalem en sy tempel is in 70 G.J. deur die Romeinse krygsmagte vernietig.
10. Hoe sal Jehovah in die nabye toekoms teen die Christendom optree?
10 Waarom sal iemand dan dink dat Jehovah nie iets dergeliks in ons dag sal doen nie? Feit is dat hy sy voorneme sal uitvoer al lyk dit ook vreemd en ongewoon vir die twyfelaars. Hierdie keer sal sy daad gemik wees teen die Christendom wat, net soos eertydse Juda, beweer dat hulle God aanbid maar hopeloos verdorwe geraak het. Jehovah sal die Christendom se “Filistyne” deur sy Grotere Dawid, Christus Jesus, oorval in ’n uur wanneer hulle dit nie verwag nie. Hy sal sy ongewone werk verrig totdat hy die laaste spoor van die Christendom se godsdiensstelsels uitgewis het.—Mattheüs 13:36-43; 2 Thessalonicense 1:6-10.
Waarskuwing van Jehovah se daad
11, 12. Hoe het Jehovah se Getuies ’n waarskuwing gegee aangaande Jehovah se komende oordele?
11 Jehovah se Getuies waarsku nou reeds baie jare lank aangaande hierdie komende oordeelsdaad van Jehovah. Hulle wys daarop dat die vernietiging van Jerusalem en sy tempel in 607 v.G.J. en weer in 70 G.J. profetiese waarskuwings is van wat oor die Christendom gaan kom. Hulle het ook getoon dat die Christendom, vanweë hulle afvalligheid, ’n deel van die wêreldryk van valse godsdiens, Babilon die Grote, geword het. Gevolglik sal God se oordele oor Babilon die Grote in die besonder aan die Christendom voltrek word, omdat hulle die aanspreeklikste deel van daardie sataniese mengelmoes is.—Openbaring 19:1-3.
12 Jehovah se Getuies het die aandag gevestig op die Bybel se profetiese waarskuwing dat Babilon die Grote se politieke minnaars op Jehovah se aangewese tyd teen haar sal draai. Openbaring stel hulle sinnebeeldig voor as die tien horings van ’n skarlakenrooi wilde dier en waarsku: “En die tien horings wat jy op die dier gesien het, hulle sal die hoer [Babilon die Grote] haat en haar verlate maak en naak, en haar vlees eet en haar met vuur verbrand” (Openbaring 17:16). Godsdienstige Christendom sal saam met alle ander valse godsdiens verbrand en vernietig word. Dit sal Jehovah se vreemde daad, sy ongewone werk, vir ons dag wees.
13. Hoe was die reaksies op Jehovah se waarskuwings vandag soortgelyk aan dié wat Jesaja teëgekom het?
13 Jehovah se Getuies word dikwels spottend uitgelag wanneer hulle die waarskuwing aangaande hierdie naderende ramp bekend maak. Mense wonder wie hulle dink hulle is om sulke dinge te sê. Die Christendom lyk so stabiel, so goed gevestig. Party dink selfs die Christendom se posisie is besig om te verbeter. Van die nasies wat voorheen die Christendom onderdruk het, het onlangs aan hulle groter vryheid van handeling toegestaan. Maar die Christendom behoort inderdaad ag te slaan op Jesaja se raad: “Gedra julle dan nou nie soos spotters, dat julle bande nie vaster word nie; want ek het van die Here HERE van die leërskare gehoor ’n verdelging wat vas besluit is, oor die hele aarde.”—Jesaja 28:22; 2 Petrus 3:3, 4.
14. Hoe sal die Christendom se bande sterker en stewiger word?
14 Die Christendom sal grotendeels aanhou om die Koning en die Koninkryk vyandiggesind te wees (2 Thessalonicense 2:3, 4, 8, NAV). Terselfdertyd word hulle bande egter sterker en stewiger. Met ander woorde, hulle vernietiging word al hoe gewisser. Jehovah sal nie van sy besluit afsien om die Christendom te laat vernietig nie, net so min as wat hy afgesien het van sy besluit om toe te laat dat Jerusalem en sy tempel in 607 v.G.J. vernietig word.
“Gaan uit haar uit”
15. Hoe kan regskape mense die lot van die Christendom vryspring?
15 Hoe kan iemand die lot van die Christendom vryspring? In die dae van Israel het Jehovah getroue profete gestuur om regskapenes na reine aanbidding terug te bring. Vandag het hy sy Getuies, wat reeds miljoene sterk is, vir ’n soortgelyke doel verwek. Hulle stel onverskrokke die geestelik dooie toestand van die Christendom aan die kaak. Sodoende verkondig hulle getrou die plaagagtige boodskappe van die engele se basuinstote wat in Openbaring hoofstukke 8 en 9 beskryf word. Daarbenewens maak hulle ywerig die waarskuwing bekend wat in Openbaring 18:4 opgeteken staan: “Gaan uit haar uit, my volk, sodat julle nie . . . van haar plae ontvang nie.” Die “haar”, wat hier gemeld word, is Babilon die Grote, die wêreldryk van valse godsdiens, waarvan die belangrikste deel die Christendom is.
16. In watter opsig het miljoene uit valse godsdiens gevlug?
16 Sedert 1919, en veral sedert 1922, het ’n groeiende menigte sagmoediges gehoor gegee aan daardie waarskuwing en uit Babilon die Grote uitgekom. Eers het duisende, toe honderdduisende en nou miljoene hulle van valse godsdiens, die Christendom in die besonder, afgeskei en na reine aanbidding gevlug (Jesaja 2:2-4). Hulle weet dat hulle, slegs deur uit Babilon die Grote te gaan, haar plae kan vermy wat die hoogtepunt sal bereik in haar vernietiging wanneer die tyd aanbreek vir die volvoering van Jehovah se ongewone werk.
17, 18. Hoe het Jehovah ’n sierlike kroon en ’n pragtige krans vir sy volk geword?
17 Die profeet Jesaja beskryf die vreugdevolle situasie van diegene wat hulle standpunt vir reine aanbidding inneem. Hy sê: “In dié dag sal die HERE van die leërskare wees tot ’n sierlike kroon en ’n pragtige krans vir die oorblyfsel van sy volk, en tot ’n gees van strafgerig vir hom wat sit oor die gereg, en tot ’n sterkte vir hulle wat die geveg terugdring na die poort toe.”—Jesaja 28:5, 6.
18 Omdat hulle aan die waarheid lojaal bly, is Jehovah die onverwelklike kroon van heerlikheid vir lede van die “getroue en verstandige dienskneg”-klas. Dit geld veral van 1926 af. In daardie jaar het The Watch Tower van 1 Januarie ’n aangrypende artikel bevat met die opskrif “Wie sal Jehovah eer?” wat beklemtoon het hoe belangrik dit is om Jehovah se naam te verheerlik. Sedertdien het gesalfde Christene soos nooit tevore nie daardie naam wêreldwyd bekend gemaak. In 1931 het hulle hulle selfs nog duideliker met Jehovah en sy naam vereenselwig deur die naam Jehovah se Getuies aan te neem. Daarbenewens het ’n groot menigte ander skape ook uit die Christendom en die res van Babilon die Grote uitgekom. Hulle het ook God se naam aangeneem. Die gevolg? Jehovah self—pleks van die een of ander tydelike volksvryheid—het ’n sierlike kroon en ’n pragtige krans vir meer as viermiljoen mense in sowat 212 lande en eilande van die see geword. Wat ’n eer is dit tog vir hulle om die naam van die enigste lewende en ware God te dra!—Openbaring 7:3, 4, 9, 10; 15:4.
“Op Hom sal die Gees van die HERE rus”
19. Wie is die een wat sit om reg te spreek, en hoe het Jehovah ’n gees van geregtigheid vir hom geword?
19 Vir Jesus, die een “wat sit om reg te spreek”, het Jehovah “’n gees van geregtigheid” geword. Toe Jesus op die aarde was, het hy nie toegelaat dat die bedwelmende gees van wêreldse bondgenootskappe hom oorweldig nie. Vandag, as Jehovah se gekroonde Koning, is hy gevul met heilige gees, en dit lei hom om gebalanseerde, skerpsinnige beslissings te vel. Op Jesus is Jesaja se profesie vervul: “En op Hom sal die Gees van die HERE rus, die Gees van wysheid en verstand, die Gees van raad en sterkte, die Gees van kennis en van die vrees van die HERE” (Jesaja 11:2). Deur Jesus sal Jehovah inderdaad “die reg tot ’n riglyn maak, en die geregtigheid tot ’n skietlood” (Jesaja 28:17). Terwyl geestelik dronk vyande in vernietiging weggevoer sal word, sal reg geskied aan Jehovah se heilige naam en universele soewereiniteit.
20, 21. Hoe raak die woorde van Jesaja 28:1-22 jou?
20 Watter luisterryke betekenis hou hierdie profesie van Jesaja hoofstuk 28 tog dan vir ons vandag in! As ons die Christendom se geestelike dronkaards vermy en reine aanbidding aanhang, sal ons beskerming geniet wanneer Jehovah sy vreemde daad en sy ongewone werk verrig. Hoe verheug ons ons tog in hierdie wete! En hoe bly is ons tog om te dink dat wanneer hierdie dinge gebeur almal gedwing sal word om te weet dat dit Jehovah van die leërskare is wat deur Jesus Christus ten behoewe van sy getroue volk en vir sy eie regverdiging opgetree het!—Psalm 83:17, 18, NW.
21 Mag alle ware Christene dan onverskrokke aanhou om die waarskuwing van Jehovah se vreemde daad bekend te maak. Laat hulle daarmee volhou om van sy ongewone werk te vertel. Laat hulle terselfdertyd aan almal verkondig dat hulle onwankelbare hoop gevestig is op God se Koninkryk onder sy gekroonde Koning. Mag hulle ywer, vasberadenheid en lojaliteit ons almagtige God, Jehovah, vir ewig tot lof strek.—Psalm 146:1, 2, 10.
Kan jy onthou?
◻ Waarom is die Christendom in ’n ongemaklike situasie?
◻ Wat was Jehovah se voorneme ten opsigte van Jerusalem, en waarom was dit “vreemd” en “ongewoon”?
◻ Watter waarskuwing aangaande die Christendom het Jehovah se Getuies bekend gemaak, en watter reaksie het hulle teëgekom?
◻ Hoe kan mense die Christendom se lot vryspring?
[Prent op bladsy 24]
Jehovah sal sy vreemde daad herhaal, hierdie keer teen die Christendom