Jongmense—Sal julle die toets van Christelike lojaliteit slaag?

“JY DINK nie aan onsedelike gedrag as dislojaliteit nie. Jy het mos net pret. Jy weet weliswaar dat as jou ouers of die ouere manne dit moes uitvind dit hartseer en baie probleme sal veroorsaak. Maar wanneer jy pret het, dink jy eenvoudig nie aan daardie dinge nie.”

Die jong man wat pas aangehaal is, het lank in die geheim hoerery gepleeg. Hy het ’n dubbele lewe gelei en sy ouers en die Christengemeente mislei. Min het hy op daardie tydstip geweet dat hy ’n toets van Christelike lojaliteit gefaal het.

Duisende Christenjeugdiges het soortgelyke toetse van lojaliteit gefaal. En dit is geen wonder nie! Satan die Duiwel ‘voer oorlog’ teen God se volk, en hy doen alles in sy vermoë om hulle hulle onkreukbaarheid te laat prysgee (Openbaring 12:17). Hy maak veral jongmense die teiken vir sy “listige aanslae” (Efesiërs 6:11, NAV). Dit verg dus ware inspanning en vasbeslotenheid om lojaal te bly.

Maar wat is lojaliteit? In die Hebreeuse Geskrifte dui die woord vir “lojaliteit” in die oorspronklike taal op ’n liefdevolle gehegtheid aan ’n persoon met ’n doel voor oë (Psalm 18:25, NW). Dit beskryf nie die een of ander swak band wat maklik verbreek kan word nie, maar ’n gehegtheid wat ongeskonde bly totdat sy doel in verband met daardie persoon bereik is. In die Griekse Geskrifte bevat die woord vir “lojaliteit” in die oorspronklike taal die gedagte van heiligheid, regverdigheid of ontsag.

Lojaliteit behels dus ’n regte verhouding met God. Efesiërs 4:24 sê vir ons om “ons met die nuwe persoonlikheid te beklee wat . . . geskape is in ware regverdigheid en lojaliteit” (NW). Wil jy aan Jehovah lojaal wees? Dan moet jy ’n lojale gehegtheid aan hom aankweek, ’n onverbreekbare band, ’n vasbeslotenheid om hom in al jou weë te behaag. Jy moet by Jehovah se regverdige standaarde bly—ongeag hoe aanloklik dit mag wees om die teenoorgestelde te doen!

Die druk om dislojaal te wees

Dit is prysenswaardig dat die meeste jongmense onder Jehovah se Getuies daarna strewe om lojaal te bly, en hulle het gevolglik ’n skoon gewete. Die apostel Paulus het nietemin geprofeteer dat dislojaliteit gedurende “die laaste dae” ’n algemene kenmerk onder mense sou wees (2 Timotheüs 3:1, 2, vgl. NW). Dit is jammer dat sommige Christenjeugdiges toegelaat het dat hierdie dislojale wêreld ‘hulle in sy eie vorm druk’ (Romeine 12:2, Phillips). Hoe het Satan dit reggekry?

Portuurdwang is een kragtige instrument van Satan. Die meeste mense wil hê dat ander ’n goeie opinie van hulle moet hê, en Satan weet hoe om hierdie natuurlike begeerte uit te buit. Omdat sommige Christenjeugdiges wou hê dat ander hulle as normaal moet beskou, het hulle betrokke geraak by onheilsame gesprekke, onsedelike gedrag, rokery, dronkenskap—selfs dwelmmisbruik—net om deur hulle portuurs aanvaar te word.

Satan wil hê dat ons ‘in die begeerlikhede van ons vlees moet wandel en die wil van die vlees moet doen’ (Efesiërs 2:3). Hy weet goed hoe sterk die geslagsdrang gedurende die “bloei van die jeug” kan wees (1 Korinthiërs 7:36, NW). En hy wil hê dat jy aan daardie drange moet toegee. Party Christenjeugdiges bevorder sy planne onwetend deur pornografiese lektuur te lees, na pornografiese rolprente en video’s te kyk of deur masturbasie te beoefen. Hierdie dinge lei op hulle beurt dikwels tot ernstige dislojale dade. Het Satan se wêreld jou op sommige van hierdie gebiede ‘in sy vorm gedruk’?

’n Dubbele lewe

Hoewel ’n growwe oortreding soos hoerery op sigself ’n ernstige saak is, vererger sommige jongmense hulle probleme. Hulle is soos die “mense van onwaarheid” waarvan Psalm 26:4 praat “wat verberg wat hulle is” (NW). Sulke jongmense lei ’n dubbele lewe en tree op een manier op wanneer hulle saam met hulle ouers of ander volwasse Christene is en op ’n ander manier wanneer hulle saam met hulle portuurs is.

Maar dit is selfverydelend en gevaarlik om ’n dubbele lewe te lei. Verkeerde dade wat ongehinderd voortgaan, lei byna altyd tot ander verkeerde dade. En hoewel ’n mens se gewete jou miskien aanvanklik pla, sal dit jou al hoe minder pla hoe langer jy in ’n oortreding volhard. ’n Mens kan letterlik “ongevoelig” vir verkeerde dade word.—Efesiërs 4:19.

Op hierdie stadium word dit baie moeilik om ’n mens se oortreding te bely en hulp te vra. Dit is veral die geval as ander Christenjeugdiges by die oortreding betrokke is. ’n Misplaaste lojaliteitsgevoel is dikwels oorheersend. Die jongmens wat aan die begin aangehaal is, het verduidelik: “Jy besef wat jy doen, en jy weet dat dit verkeerd is. Maar sodat die ander wat daarby betrokke is nie in die moeilikheid kom nie, stem jy in om niemand te vertel nie.”

Hoewel iemand dalk vir sy ouers of die gemeente kan ‘verberg wat hy is’, kan hy dit nie vir Jehovah verberg nie. “Daar is geen skepsel onsigbaar voor Hom nie, maar alles is oop en bloot voor die oë van Hom met wie ons te doen het” (Hebreërs 4:13). Die Bybel gee ons dié versekering: “Hy wat sy oortredinge bedek, sal nie voorspoedig wees nie” (Spreuke 28:13). Die oortreding sal mettertyd openbaar word. ’n Mens kan Jehovah eenvoudig nie om die bos lei nie. Spreuke 3:7 sê: “Wees nie wys in jou eie oë nie; vrees die HERE en wyk af van die kwaad.” Jy moet ook onthou ‘die oë van die HERE is op elke plek, en hulle beskou opmerksaam die slegtes en die goeies’.—Spreuke 15:3.

Die jongmens wat aan die begin genoem is, tesame met verskeie ander wat in die geheim oortree het, se oortredinge het aan die lig gekom en hy en sy maats moes uit die Christengemeente gesit word. Hulle het later geestelik weer vordering gemaak en is in die gemeente herstel. Dit was nietemin ’n harde manier om te leer wat lojaliteit beteken!

‘Stel sake reg’ met God

Maar sê nou iemand was reeds op die een of ander manier dislojaal, miskien deur iets verkeerds te doen. Dit is maklik om jouself om die bos te lei en om te ontken dat jy sake moet regstel. Een jongmens wat in die geheim hoerery gepleeg het, het gesê: “Ek het meer velddiens gedoen en gedink dat dit die oortreding op die een of ander manier sou bedek.” Die weerspannige nasie Israel het op soortgelyke wyse probeer om Jehovah met offerandes tevrede te stel. Maar Jehovah het sulke skynheilige toegewydheid verwerp. Hy het hulle aangespoor: “Was julle, reinig julle, neem die boosheid van julle handelinge voor my oë weg, hou op om kwaad te doen.” Jehovah sou hulle offerandes aanvaar net as hulle ‘sake met hom regstel’ (NW). Dieselfde geld vandag vir enigiemand wat dalk by iets verkeerds betrokke is.—Jesaja 1:11, 15-18.

’n Mens kan nie sake met Jehovah regstel deur bloot een van jou portuurs in jou vertroue te neem nie. Portuurs gee vir eers nie altyd die beste hulp nie, aangesien hulle dikwels ewemin lewenservaring het. Nog belangriker, hulle kan jou nie jou sonde vergewe nie. Net God kan dit doen. ‘Stort dus jou hart uit’ voor hom in belydenis (Psalm 62:9). Hoewel jy miskien baie skaam voel oor jou gedrag kan jy seker wees Jehovah “vergeef menigvuldiglik”.—Jesaja 55:7.

Jy sal bykomende hulp nodig hê. “Vertel jou ouers, vertel die ouere manne dadelik—reg aan die begin”, spoor een jong Christen aan wat by sulke hulp baat gevind het. Ja, jou ouers is waarskynlik in ’n goeie posisie om jou te help. ‘Gee hulle jou hart’, en vertel hulle die volle omvang van jou probleme (Spreuke 23:26). Hulle kan reël dat die gemeentelike ouere manne jou verder help as dit nodig is.—Jakobus 5:14, 15.

Openbaar ware lojaliteit—Hoe?

Dit sal natuurlik die beste wees om jou in die eerste plek nie aan dislojale gedrag skuldig te maak nie. Psalm 18:25 sê vir ons: “Teenoor iemand wat lojaal is, sal u [Jehovah] lojaal handel; teenoor die onberispelike, sterk man sal u onberispelik handel” (NW). Jehovah seën diegene ryklik wat hoë gedragstandaarde lojaal handhaaf.

Maar daar is ander maniere waarop jou lojaliteit op die proef gestel kan word. Veronderstel byvoorbeeld dat ’n vriend van jou ’n verkeerde weg ingeslaan het. Sal jy toelaat dat misplaaste lojaliteit teenoor daardie vriend groter is as jou lojaliteit teenoor Jehovah? Dit sal liefdevol wees om na daardie vriend te gaan en hom aan te moedig om sy ouers of die ouere manne van die saak te vertel. Sê vir jou vriend dat as hy dit nie binne ’n redelike tydperk doen nie jy dit self sal moet doen. Spreuke 27:5 sê: “Openlike teregwysing is beter as verborge liefde.” Deur jou vriend só te help, toon jy nie net die opregtheid van jou vriendskap nie, maar ook die diepte van jou lojaliteit teenoor Jehovah.

Wat ook al die toets, die krag om lojaal te wees spruit voort uit ’n sterk persoonlike verhouding met Jehovah. Sinvolle gebed en ywerige persoonlike studie is noodsaaklik as ons so ’n verhouding wil geniet. Dit is interessant dat al die voorgenoemde jongmense wat oortredings begaan het, erken het dat hulle gebede en persoonlike studiegewoontes iets alledaags geword het—en later heeltemal opgehou het. Jehovah was nie meer vir hulle werklik nie en onrein gedrag het kort daarna gevolg. Versterk jy, deur persoonlike studie en gebed, jou verhouding met Jehovah sodat jy lojaal kan bly?

Jy sal weliswaar dalk soms wonder of jy ’n lekker tyd misloop. “Soms lyk dit asof wêreldse mense pret het”, het een jong vrou gesê. “Maar wanneer jy in die situasie vasgevang word, sien jy dat dit glad nie pret is nie.” Sy het uit ondervinding gepraat omdat sy haar aan geslagsonsedelikheid skuldig gemaak het wat op swangerskap en aborsie uitgeloop het. “Dit is ’n beskerming om in die waarheid te wees”, sê sy nou—’n les wat sy op die harde manier geleer het. Psalm 119:165 herinner ons daaraan dat ‘die wat God se wet liefhet groot vrede het’.

Doen derhalwe jou bes om lojaal te bly. Werk daaraan om ’n blywende verhouding met Jehovah op te bou. Verafsku wat sleg is en hang die goeie aan (Romeine 12:9). Psalm 97:10 sê vir ons: “o Liefhebbers van die HERE, haat die kwaad! Hy bewaar die siele van sy gunsgenote, Hy red hulle uit die hand van die goddelose.” Ja, as Christenjeugdige sal jy baat vind by Jehovah se beskerming, en jy sal die ewige lewe geniet as jy die toets van Christelike lojaliteit slaag.