’n Nuwe wêreld is ophande!

STAATSMANNE het al baie gesê oor ’n nuwe wêreldorde wat hulle tot stand gaan bring. Hulle sê dat hulle die wêreld gaan bevry van vrese en versperrings wat samewerking tussen mense en state belemmer. Maar berus dit by die mens om ’n nuwe wêreld tot stand te bring?

Die mens het eeue gehad waarin hy ’n wêreld van vrede en veiligheid tot stand kon bring. Talle was ongetwyfeld baie opreg in hulle pogings om só ’n wêreld te bewerkstellig. Maar watter regeringstrukture ook al deur die mens ontwerp is om sulke doelwitte te bereik, die Bybel se woorde is waar bewys: ‘Dit behoort nie aan ’n man om te loop en sy voetstappe te rig nie.’—Jeremia 10:23.

’n Nuwe wêreld word beloof

Tog gee dieselfde geïnspireerde Woord van God die versekering dat daar ’n nuwe wêreld sal wees. Nadat die Christenapostel Petrus die einde van ’n ou stelsel van dinge voorspel het, het hy gesê: “Ons verwag volgens sy belofte nuwe hemele en ’n nuwe aarde waarin geregtigheid woon.”—2 Petrus 3:10-13.

Wie se belofte is dit? Dit word gegee deur niemand anders nie as Jehovah, ‘die Allerhoogste oor die hele aarde’ (Psalm 83:19). Hy sal vermag wat die mens nie kan nie. Ja, Jehovah God sal ’n nuwe wêreld tot stand bring. Maar wanneer?

’n Nuwe wêreld is baie naby!

Voor God se beloofde nuwe wêreld volkome verwesenlik kan word, moet die huidige “wêreld” of “stelsel van dinge” eers tot ’n einde kom. Jesus Christus se dissipels het aangaande hierdie einde gevra: “Vertel ons, wanneer sal hierdie dinge wees, en wat is die teken van u koms en van die voleinding van die wêreld?” (Mattheüs 24:3). Soos die akkurater New World Translation dit stel, het Jesus se volgelinge gevra: “Sê ons: Wanneer sal hierdie dinge gebeur, en wat sal die teken wees van u teenwoordigheid en van die voleinding van hierdie stelsel van dinge?”

In antwoord hierop het Jesus baie kenmerke voorspel van die teken van sy onsigbare teenwoordigheid as ’n geespersoon in hemelse Koninkryksmag (1 Petrus 3:18, NW). Hy het byvoorbeeld gesê: ‘Die een nasie sal teen die ander opstaan en die een koninkryk teen die ander; en daar sal hongersnode wees en aardbewings op verskillende plekke.’ “Hierdie geslag” wat deur Jesus geïdentifiseer is, het van “’n begin van die smarte” in 1914 af voortdurende oorlog, hongersnode en aardbewings ondervind as deel van die teken van sy onsigbare teenwoordigheid.—Mattheüs 24:7, 8, 34.

Oorlog het hierdie geslag sedert 1914 op ongeëwenaarde wyse geteister. Volgens skatting het die Eerste Wêreldoorlog 14 miljoen lewens geëis. Gedurende die Tweede Wêreldoorlog is 55 miljoen soldate en burgerlikes gedood. Trouens, sedert 1914 het oorlog meer as 100 miljoen lewens geëis! Dit maak ongetwyfeld deel uit van die teken van Jesus se teenwoordigheid.

Hongersnode, wat ook deur Christus voorspel is, het baie lande ná elkeen van die twee wêreldoorloë geteister. Ondanks wetenskaplike vooruitgang ly amper ’n kwart van die wêreld se bevolking vandag honger. Elke jaar sterf miljoene kinders en ander as gevolg van wanvoeding. The World Book Encyclopedia sê: “Die meeste van die ontwikkelende nasies in Afrika, Asië en Latyns-Amerika het nouliks genoeg kos vir hulle mense. Miljoene in hierdie lande ly honger. Wanneer voedselproduksie of -invoer om die een of ander rede afneem, kan hongersnood toeslaan en duisende of miljoene mense kan sterf.”

Aardbewings het gedurende hierdie geslag wat “die tyd van die einde” aandui geweldig baie lewens geëis (Daniël 12:4). Skattings van sterfgevalle weens aardbewings verskil. Maar sedert 1914 het verwoesting deur aardbewings oor die hele aarde toegeneem, en hulle het die lewe van honderdduisende geëis. Die Yorkshire Post van 19 Oktober 1989 het net twee van hierdie aardbewings bespreek en gesê: “In 1920 het ’n aardbewing in China se Kiangsoe-provinsie 180 000 gedood, en op 28 Julie 1976 is China deur die ergste aardbewing in sy hedendaagse geskiedenis getref. Minstens 240 000 het gesterf toe die noordoostelike stad Tangsjan amper heeltemal gelykgemaak is deur ’n aardbewing wat 7,8 op die . . . Richterskaal geregistreer het.” Die koerant het nog 30 ander groot aardbewings in die 20ste eeu opgenoem.

Die Koninkrykspredikingswerk is ook as een van die kenmerke van die teken van Jesus se onsigbare teenwoordigheid voorspel. In antwoord op ’n vraag van sy dissipels het hy gesê: “Hierdie evangelie van die koninkryk sal verkondig word in die hele wêreld tot ’n getuienis vir al die nasies; en dan sal die einde kom” (Mattheüs 24:14). Soos Jesus voorspel het, word hierdie predikingswerk nou wêreldwyd in 212 lande deur meer as 4 000 000 Getuies van Jehovah gedoen.

Die teenswoordige vervulling van hierdie en ander profesieë bewys dat ons inderdaad in “die laaste dae” lewe (2 Timotheüs 3:1-5). Die “groot verdrukking” wat ook deur Jesus Christus voorspel is, is nou ophande. Dit sal ’n klimaks bereik met “die oorlog van daardie groot dag van die almagtige God” by Armageddon en dit sal ’n einde maak aan die huidige goddelose stelsel van dinge (Mattheüs 24:21; Openbaring 16:14-16). Dan sal God se beloofde nuwe wêreld ’n werklikheid word.a

Seëninge wat die mens nie kan bewerkstellig nie

Staatsmanne spog met ’n nuwe wêreldorde wat hulle self tot stand gaan bring. Maar Jehovah, die God van die hemel en aarde, het die mens nooit gevra om die huidige stelsel met ’n nuwe wêreld te vervang nie. Hy sal dit self doen op die dag en uur waarvan net hy weet (Mattheüs 24:34, 36). Die bejaarde apostel Johannes het hierdie voorskouing gehad van wat God, nie die mens nie, gaan doen:

“Ek het ’n nuwe hemel en ’n nuwe aarde gesien, want die eerste hemel en die eerste aarde het verbygegaan; en die see was daar nie meer nie. En ek, Johannes, het die heilige stad, die nuwe Jerusalem, sien neerdaal van God uit die hemel, toeberei soos ’n bruid wat vir haar man versier is. En ek het ’n groot stem uit die hemel hoor sê: Kyk, die tabernakel van God is by die mense, en Hy sal by hulle woon, en hulle sal sy volk wees; en God self sal by hulle wees as hulle God. En God sal al die trane van hulle oë afvee, en daar sal geen dood meer wees nie; ook droefheid en geween en moeite sal daar nie meer wees nie, want die eerste dinge het verbygegaan. En Hy wat op die troon sit, het gesê: Kyk, Ek maak alles nuut. En Hy het aan my gesê: Skryf, want hierdie woorde is waaragtig en betroubaar.”—Openbaring 21:1-5.

Die “nuwe hemele” is die hemelse Koninkryk van Jesus Christus. Die “nuwe aarde” is nie ’n ander aardbol nie, maar dit is ’n nuwe gemeenskap van mense op hierdie planeet—wat almal gehoorsame onderdane van Christus se Koninkryk is, sonder rasse-, nasionale of taalverdeeldhede. (Vergelyk Psalm 96:1.) Die huidige simboliese hemele en aarde—die Duiwel se stelsel van dinge met sy regeringstrukture wat deur Satan en sy demone beïnvloed word—sal dan vernietig wees (1 Johannes 5:19). Hoewel letterlike seë sal voortbestaan, sal die figuurlike see van rustelose, goddelose mense nie meer daar wees nie. Jesus se medeheersers in die hemel sal die Nuwe Jerusalem uitmaak en sal saam met hom ’n hooforganisasie vorm wat oor die regverdige mensegemeenskap sal heers. God se “tent” sal op ’n verteenwoordigende basis “met” die gehoorsame mensdom wees terwyl hulle gedurende die duisendjarige Oordeelsdag ten volle met hom deur Christus versoen word.—Openbaring 14:1-4; 20:6.

Onder die Koninkryksheerskappy sal daar baie redes tot blydskap wees. Droefheid, geween en pyn as gevolg van siekte, hartseer en soortgelyke dinge sal ondervindinge van die verlede wees. Selfs die dood wat deur ons eerste ouer, die sondige Adam, na die mensdom versprei is, sal nie meer daar wees nie (Romeine 5:12). Watter vreugde sal daar tog wees wanneer hierdie wêreldwye oorsaak van trane vir ewig uit die weg geruim is!

Dit is nie sterflike mense nie, maar God self wat ’n waarborg aangaande hierdie seëninge gee. Hy is die Een wat sê: “Kyk, Ek maak alles nuut.” Ja, en Jehovah God het vir die apostel Johannes gesê: “Skryf, want hierdie woorde is waaragtig en betroubaar.”

Basiese behoeftes ten volle bevredig

In die nuwe wêreld wat God tot stand gaan bring, sal die aarde uiteindelik ’n paradys word. Dit sal gewis gebeur, want Jesus het ’n berouvolle kwaaddoener wat langs hom gehang het, belowe: “Voorwaar, ek sê vir jou vandag: Jy sal saam met my in die Paradys wees” (Lukas 23:43, NW). Onder paradystoestande sal daar ten volle in die mens se behoeftes, soos voedsel en verblyf, voorsien word.

Hongersnode eis vandag miljoene lewens. Hoe edel die pogings ook al is om dié wat honger ly te voed, hebsug en ander faktore verhinder dat die mens sulke probleme kan oplos. Die Saturday Star, ’n koerant van Johannesburg, sê byvoorbeeld: “Politieke verskille, stygende brandstofkoste en ’n algemene satheid vir Afrika se oënskynlik oneindige konflikte veroorsaak dat noodleniging vertraag word . . . In die Soedan, een van die lande wat die ergste getref is, staar hongersnood tussen 5 miljoen en 6 miljoen mense in 1991 in die gesig.” Maar hongersnood sal in God se nuwe wêreld vergete wees. Onder die Koninkryksheerskappy sal ‘daar volop graan in die land wees, dit sal selfs bo-op die bergtoppe wuif’.—Psalm 72:16, NAV.

Verblyf is ’n ander behoefte van die mens wat vir baie in ons dag glad nie toereikend voorsien word nie. Miljoene leef in blote krotte of is heeltemal haweloos. Volgens The New York Times kom 20-jarige werknemers by ’n elektronikafirma in een Oosterse land op “’n waglys van 73 jaar indien hulle ’n huis wil hê”, en ’n regeringsverslag dui aan dat sommige “in pakhuise, kantore of selfs toilette” moet bly. Maar hoe anders sal dit tog in die nuwe wêreld wees! In die toekomstige Paradys sal “hulle huise bou en dit bewoon, en wingerde plant en die vrug daarvan eet: hulle sal nie bou dat ’n ander dit bewoon nie; hulle sal nie plant dat ’n ander dit eet nie; want die dae van my volk sal wees soos die dae van die bome, en my uitverkorenes sal die werk van hulle hande self geniet”.—Jesaja 65:21, 22.

Ekologiese probleme sal in God se beloofde nuwe wêreld verdwyn. Lugbesoedeling, wat die mens se gesondheid en oeste bedreig, sal nie meer bestaan nie. Besoedeling en vernietiging van die habitat wat tallose plant- en diersoorte nou in gevaar stel, sal dan nie meer ’n bedreiging wees nie. En faktore soos die vernietiging van die osoonlaag sal nie meer die lewe op aarde in gevaar stel nie. Ons kan seker wees dat Jehovah God al hierdie probleme sal oplos, want sy Woord verseker ons dat hy binnekort ‘die verderwers van die aarde gaan verderf’.—Openbaring 11:18.

In die nuwe wêreld sal oorlog ook iets van die verlede wees, maar nie omdat staatsmanne daarin geslaag het om die nasies te ontwapen nie. God sal eerder optree waar politieke regeerders gefaal het. Hy sal vrede vir die gehoorsame mensdom bewerkstellig in ooreenstemming met hierdie woorde van die psalmis: “Kom, aanskou die dade van die HERE, wat verskriklike dinge oor die aarde bring, wat die oorloë laat ophou tot by die einde van die aarde, die boog verbreek en die spies stukkend slaan, die strydwaens met vuur verbrand” (Psalm 46:9, 10). In God se beloofde nuwe wêreld wat só naby is, sal mense nie meer oorlog voer nie, maar hulle sal ware vrede en veiligheid geniet.—Miga 4:2-4.

Sal jy daar wees?

Jy kan vertroue hê in hierdie nuwe wêreld wat deur Jehovah God beloof word. Hy lieg nie (Hebreërs 6:17, 18). Sy Woord, die Bybel, is waar, en wat dit beloof, gebeur altyd.—Johannes 17:17.

Jehovah se Getuies streef daarna om die goeie nuus van wonderlike seëninge vir die gehoorsame mensdom aan alle opregte mense mee te deel. Jy moet jou nou inspan om kennis van die goddelike voorneme op te doen en om met die oog op die wonderlike beloftes wat in die Heilige Skrif gevind word, op te tree. Hierdie optrede kan tot eindelose lewe lei, want Jesus het gesê: “Dit is die ewige lewe, dat hulle U ken, die enige waaragtige God, en Jesus Christus wat U gestuur het” (Johannes 17:3). Dan sal jy bevoorreg wees om die heuglike tye wat voor die deur is te geniet, want God se nuwe wêreld is ophande!

[Voetnoot]