Onthou jy?

Het jy noukeurige aandag geskenk aan onlangse nommers van Die Wagtoring? Indien wel, sal jy dit waarskynlik interessant vind om jou weer aan die volgende te herinner:

◻ Hoe gee die Bybel se verslag van Jehovah se oorloë ons vertroue terwyl ons die “groot verdrukking” nader? (Mattheüs 24:21).

Jehovah, wat altyd in beheer is, het getoon dat hy sy vyande kan uitoorlê en omstandighede tot redding van sy volk kan bewerkstellig.—8/15, bladsy 27.

◻ Wat moet ouers bereid wees om te doen om kommunikasie tussen hulle en hul kinders te handhaaf?

Ouers moet tyd saam met hulle kinders deurbring. Hulle moet ook bereid wees om opofferings te maak ter wille van hulle kinders se emosionele, fisiese en geestelike groei.—9/1, bladsy 22.

◻ Watter betekenis het Jesus se gedaanteverandering vir ons vandag? (Markus 9:2-4).

Die gedaanteverandering kan ons geloof in Jehovah se profetiese woord opbou en ons oortuiging versterk dat Jesus Christus God se Seun en die beloofde Messias is. Dit kan ook ons oortuiging versterk dat Jesus tot geeslewe opgewek is en ons geloof in God se regering vergroot.—9/15, bladsy 23.

◻ Wat is die betekenis van “’n ruk lank” in Jesaja 11:6?

’n Noukeurige vertaling van die vers toon dat die wolf en die lam nie heeltyd bymekaar sal wees in die nuwe wêreld nie. Sulke diere sal waarskynlik steeds hulle afsonderlike blyplekke hê en dus nog as ‘vee en wilde diere’ geklassifiseer word, net soos destyds in die oorspronklike Paradys (Genesis 1:24). Diere sal egter in vrede en sonder gevaar kan saamlewe.—9/15, bladsy 31.

◻ Wat is die sleutel tot ware Christelikheid?

Liefde is die sleutel tot ware Christelikheid. Geloof, werke en die regte omgang is onontbeerlik, maar sonder liefde is hulle waardeloos. Dit is omdat Jehovah by uitstek ’n God van liefde is (1 Korinthiërs 13:1-3; 1 Johannes 4:8).—10/1, bladsy 20.

◻ Ondersteun die uitdrukking “’n tyd om gebore te word en ’n tyd om te sterwe” in Prediker 3:2 die gedagte dat God ons sterfdag vooraf bepaal het?

Nee. Salomo het bloot die onvolmaakte mensdom se onophoudelike kringloop van die lewe en die dood bespreek. Prediker 7:17 sê: “Wees nie alte goddeloos, en wees nie dwaas nie: waarom sou jy sterwe voor jou tyd?” Watter sin sou hierdie raad hê as ’n mens se sterfdag vooraf bepaal is?—10/15, bladsye 5-6.

◻ Watter feite is strydig met die gedagte dat die apostel Petrus die eerste biskop van Rome was?

Daar is geen bewys dat Petrus ooit die stad Rome besoek het nie; en Petrus het ook nêrens na homself verwys as enigiets meer as een van Christus se apostels nie (2 Petrus 1:1).—10/15, bladsy 8.

◻ Is dit in orde vir Christene om blomme vir ’n begrafnis te stuur?

As dit algemeen bekend is dat ’n gebruik (of ’n ontwerp, soos ’n kruis) in die omgewing waar jy woon tans ’n godsdienstige betekenis het, moet dit vermy word. Christene sal dus nie blomme in die vorm van ’n kruis stuur of hulle op ’n formele manier wat beslis ’n valse godsdienstige betekenis het, gebruik nie. Die gebruik om blomme te stuur sonder dat dit enige godsdienstige betekenis dra, is tans in baie lande ’n algemene gebruik. Sommige Christene stuur blomme om ’n hartseer geleentheid ’n bietjie op te vrolik en om meegevoel en besorgdheid te betoon.—10/15, bladsy 31.

◻ Wat blyk duidelik uit amptelike beskrywings van die Drie-eenheid?

Hulle stel dit duidelik dat die Drie-eenheidsleer nie ’n eenvoudige begrip is nie. Inteendeel, dit is ’n ingewikkelde stel begrippe wat oor etlike eeue heen saamgebring en met mekaar verbind is. Baie geleerdes, met inbegrip van Trinitariërs, gee toe dat die Bybel in werklikheid nie die Drie-eenheidsleer bevat nie.—11/1, bladsye 21-22.

◻ Waarom is 29 G.J. ’n spiljaartal in die Bybelgeskiedenis?

Deur duidelike Bybelse inligting te kombineer met die datering van Tiberius se regering volgens sekulêre bronne kan Bybelstudente vasstel dat Johannes se bediening in die lente van 29 G.J. begin het, en dat Johannes Jesus ses maande later, in die herfs van 29 G.J., gedoop het.—11/15, bladsy 31.

◻ Wat het “aanbidding” vir Hebreeussprekendes beteken, en hoe geld dit vandag vir Jehovah se Getuies?

Die Hebreeuse ekwivalent vir die woord “aanbidding” kan met “diens” vertaal word. Vir Hebreërs het aanbidding dus diens beteken. Dit is wat dit vandag vir Jehovah se volk beteken, met die gevolg dat die godvrugtige predikingswerk ’n uiters belangrike kenmerk van die ware godsdiens is.—12/1, bladsy 19.