Onthou jy?

Het jy gevind dat onlangse nommers van Die Wagtoring praktiese waarde het? Toets gerus jou geheue met die volgende:

▫ Wat was ’n vername doel van Jesus se genesings?

Dit het, ter aanmoediging van die hedendaagse groot menigte skaapgeaardes getoon dat Armageddonoorlewendes betreklik kort na Armageddon genees sal word (Jesaja 33:24; 35:5, 6).—12/15, bladsy 12.

▫ Waarom moet ons voortdurend daaraan herinner word om ‘in die gebed te volhard’? (Romeine 12:12).

Die druk en verantwoordelikhede van die lewe kan ons soms so beswaar dat ons kan vergeet om te bid. Of probleme kan ons oorweldig en maak dat ons ons nie meer in die Koninkrykshoop verbly nie en dat ons selfs ophou bid. Ons het dus herinnerings nodig wat ons aanspoor om te bid en sodoende al hoe nader aan Jehovah te kom.—12/15, bladsy 14.

▫ Wat bewys dat die Vloed van Noag se dag ’n onuitwisbare indruk op die mensdom gemaak het?

Volgens skatting is daar ruim 500 Vloedlegendes wat deur meer as 250 stamme en volke vertel word. Sekere basiese ooreenkomste word in al hierdie legendes aangetref.—1/15, bladsy 5.

▫ Hoe is hedendaagse valse profete soos dié in Jeremia se dag?

Hedendaagse valse profete beweer dat hulle God verteenwoordig, maar hulle steel God se woorde deur dinge te verkondig wat mense weglok van dit wat die Bybel werklik sê. Dit is veral waar wat die leerstelling van die Koninkryk betref (Jeremia 23:30).—2/1, bladsy 4.

▫ Wat gee dit te kenne wanneer iemand in die naam van die heilige gees gedoop word?

Dit gee te kenne dat die een wat gedoop word vasbeslote is om met die gees saam te werk en niks sal doen om die heilige gees se werking onder Jehovah se volk te verhinder nie. Derhalwe moet daardie een met die getroue en verstandige dienskneg en met die oueremanreëling in die gemeente saamwerk (Hebreërs 13:7, 17; 1 Petrus 5:1-4).—2/1, bladsy 18.

▫ Waarom is beelde-aanbidding so skadelik vir die aanbidder?

Die Bybel toon dat Jehovah God beelde verafsku en hulle kan hulle aanbidders glad nie help om nader aan God te kom nie (Deuteronomium 7:25; Psalm 115:4-8). Satan die Duiwel het die mense se “sinne verblind” sodat die waarheid “op hulle nie sou skyn nie” (2 Korinthiërs 4:4). Wanneer ’n mens derhalwe ’n beeld vereer, dien jy in werklikheid die belange van die demone (1 Korinthiërs 10:19, 20).—2/15, bladsye 6-7.

▫ Waarom is skape in Bybeltye as ’n waardevolle bate beskou?

Die wol was ’n bate wat homself hernieu het en kon gebruik word om klere vir die gesin te maak of kon verkoop word. Die ramme se horings is gebruik om die Jubeljaar aan te kondig of kon gebruik word om alarm te blaas of om krygsbewegings te lei. Aangesien skape onder die rein diere was wat die Israeliete kon eet, het ’n kudde skape ’n mens van ’n voedselbron verseker, en dit was ’n gereelde bron van melk wat gedrink kon word of gebruik kon word om kaas te maak.—3/1, bladsye 24-5.

▫ Waarvoor vra liefhebbers van God wanneer hulle bid dat God se Koninkryk moet kom? (Mattheüs 6:10).

Hulle vra dat God se hemelse Koninkryk beslissend moet optree deur mensgemaakte regeringstelsels te vernietig wat in gebreke gebly het om hulle belofte na te kom om ware vrede en voorspoed te bring (Daniël 2:44).—3/15, bladsy 6.

▫ Wie was die Apologete, en het hulle die Drie-eenheidsleer geleer?

Die Apologete was kerkvaders wat in die tweede helfte van die tweede eeu geleef het. Hulle het geskryf om die Christelike leer wat hulle geken het te beskerm teen vyandige filosofieë wat algemeen in die Romeinse wêreld voorgekom het. Nie een van hulle het die Drie-eenheidsleer geleer nie.—4/1, bladsy 24-9.

▫ Is Sagaria, die vader van Johannes die Doper, doof sowel as stom gemaak, soos Lukas 1:62 oënskynlik te kenne gee?

Gabriël het gesê dat Sagaria se spraak, nie sy gehoor nie, aangetas sou word (Lukas 1:18-20). Lukas 1:64 sê: “Onmiddellik is sy [Sagaria se] mond geopen en het sy tong losgeraak, en het hy gepraat.” Let op dat daar nie gesê word dat sy gehoor enigsins aangetas is nie. Die feit dat Lukas 1:62 van “beduie” praat, kan beteken dat die een of ander gebaar gemaak is om uit te vind wat Sagaria se besluit was.—4/1, bladsy 31.