Die geslag van 1914—Waarom betekenisvol?

“Ons lesers weet dat ons nou reeds etlike jare lank verwag dat hierdie Eeu aan ’n einde gaan kom met ’n verskriklike tyd van swaarkry, en ons verwag dat dit, nie lank na Oktober 1914 nie, skielik en met geweld sal uitbreek.”—Geneem uit The Watch Tower and Herald of Christ’s Presence, 15 Mei 1911.

SEDERT 1879 het die tydskrif wat toe bekend was as The Watch Tower and Herald of Christ’s Presence (nou bekend as Die Wagtoring kondig Jehovah se Koninkryk aan) dikwels op 1914 gewys as ’n keerdatum in Bybelprofesieë. Namate dié jaar nader gekom het, is lesers daaraan herinner dat hulle “’n verskriklike tyd van swaarkry” te wagte kan wees.

Hierdie inligting is wyd en syd bekend gemaak deur Christene wat dit gegrond het op hulle begrip van die “sewe tydperke” en “die tye van die nasies” wat in die Bybel gemeld word.a Hulle het verstaan dat hierdie tydperk 2 520 jaar sou duur—dat dit met die omverwerping van die eertydse Dawidiese koninkryk in Jerusalem begin het en in Oktober 1914 sou eindig.b—Daniël 4:16, 17; Lukas 21:24.

Op 2 Oktober 1914 het Charles Taze Russell, wat toe president was van die Wagtoring Bybel- en Traktaatgenootskap, sonder huiwering aangekondig: “Die tye van die nasies het geëindig; die konings het hulle dag gehad.” Hoe waar was sy woorde tog nie! Onsigbaar vir die menseoog het ’n belangrike gebeurtenis, wat ’n omwenteling in menseaangeleenthede beteken het, in Oktober 1914 in die hemel plaasgevind. Jesus Christus, die permanente Erfgenaam van “die troon van Dawid”, het as Koning oor die hele mensdom begin regeer.—Lukas 1:32, 33; Openbaring 11:15.

‘Maar’, vra jy dalk, ‘as Christus in 1914 begin heers het, waarom het toestande op die aarde dan versleg?’ Omdat die mensdom se onsigbare vyand, Satan, nog bestaan het. Satan het tot in 1914 toegang tot die hemel gehad. Daardie situasie het met die oprigting van God se Koninkryk in 1914 verander. “Daar het oorlog in die hemel gekom” (Openbaring 12:7). Satan en sy demone is verslaan en is na die aarde neergewerp met katastrofiese gevolge vir die mensdom. Die Bybel het voorspel: “Wee die bewoners van die aarde en die see, want die duiwel het na julle neergedaal met groot woede, omdat hy weet dat hy min tyd het.”—Openbaring 12:12.

In die eerste eeu G.J. het Jesus gesê dat sy onsigbare teenwoordigheid as die aarde se nuwe Koning deur ’n sigbare teken gekenmerk sou word. Sy dissipels het hom gevra: “Wat is die teken van u koms [“teenwoordigheid”, NW] en van die voleinding van die wêreld?” Sy antwoord? “Die een nasie sal teen die ander opstaan en die een koninkryk teen die ander; en daar sal hongersnode wees en pessiektes en aardbewings op verskillende plekke. Maar al hierdie dinge is ’n begin van die smarte.”—Mattheüs 24:3, 7, 8.

In ooreenstemming hiermee het die oorlog wat in 1914 uitgebreek het, gepaardgegaan met verskriklike hongersnood, aangesien normale voedselproduksie meer as vier jaar lank onderbreek is. Wat van “aardbewings op verskillende plekke”? In die dekade ná 1914 het meer as 350 000 mense in nie minder nie as tien vernietigende aardbewings omgekom. (Sien venster.) Die geslag van 1914 het inderdaad “’n begin van die smarte” beleef. En sedertdien het smarte gereeld voorgekom in die vorm van natuurrampe, hongersnode en tallose oorloë.

Die nuus van die oprigting van God se Koninkryk in 1914 is nietemin goeie nuus omdat daardie Koninkryk hierdie aarde van verwoesting sal red. Hoe? Dit sal alle valse, skynheilige godsdienste, korrupte regerings en die goddelose invloed van Satan verwyder (Daniël 2:44; Romeine 16:20; Openbaring 11:18; 18:4-8, 24). Bowendien sal dit ’n nuwe wêreld inlui waarin “geregtigheid [sal] woon”.—2 Petrus 3:13.

Kort na die Eerste Wêreldoorlog het opregte Bybelstudente, soos Jehovah se Getuies toe bekend was, hulle voorreg ten opsigte van ’n ander aspek van die teken van Jesus se teenwoordigheid as Koning begin onderskei. Jesus Christus het voorspel: “Hierdie evangelie van die koninkryk sal verkondig word in die hele wêreld tot ’n getuienis vir al die nasies; en dan sal die einde kom.”—Mattheüs 24:14.

Van ’n klein begin in 1919 het Jehovah se Getuies sonder ophou voortgegaan om “hierdie evangelie” te verkondig. As gevolg daarvan word miljoene mense in meer as 200 lande nou ingesamel as onderdane van God se Koninkryk. En watter seëninge wag daar nie op hierdie onderdane nie! Die Koninkryk sal oorlog, hongersnood, misdaad en onderdrukking uit die weg ruim. Dit sal selfs siekte en die dood oorwin!—Psalm 46:10; 72:7, 12-14, 16; Spreuke 2:21, 22; Openbaring 21:3, 4.

Voordat die geslag van 1914 verbygaan, sal die verkondiging van die Koninkryk sy doel bereik het. “Dan”, het Jesus voorspel, “sal daar groot verdrukking wees soos daar van die begin van die wêreld af tot nou toe nie gewees het en ook nooit sal wees nie. En as daardie dae nie verkort was nie, sou geen vlees gered word nie; maar ter wille van die uitverkorenes sal daardie dae verkort word.”—Mattheüs 24:21, 22.

Moenie dieselfde fout begaan as die geslag voor 1914 nie. Dinge sal nie altyd wees soos dit tans is nie. Verstommende veranderinge lê voor die deur. Maar vir diegene wat verstandig optree, is daar wonderlike vooruitsigte.

Gee dus gehoor aan die woorde van die eertydse profeet: “Soek die HERE, o alle ootmoediges van die land . . . Soek geregtigheid, soek ootmoedigheid—miskien sal julle verborge bly op die dag van die toorn van die HERE” (Sefanja 2:3). Hoe kan ons hierdie raad toepas? Die volgende artikels sal ons help om daardie vraag te beantwoord.

[Voetnote]

[Tabel op bladsy 7]

Aardbewings gedurende die dekade wat op 1914 gevolg het

Datum: Plek: Sterftes:

13 Januarie 1915 Avezzano, Italië 32 600

21 Januarie 1917 Bali, Indonesië 15 000

13 Februarie 1918 Kwantoengprovinsie, China 10 000

11 Oktober 1918 Puerto Rico (westelike) 116

3 Januarie 1920 Veracruz, Mexiko 648

7 September 1920 Réggio di Calábria, Italië 1 400

16 Desember 1920 Ningxiaprovinsie, China 200 000

24 Maart 1923 Szechwanprovinsie, China 5 000

26 Mei 1923 Iran (noordoostelike) 2 200

1 September 1923 Tokio-Jokohama, Japan 99 300

Geneem uit ’n tabel “Beduidende aardbewings van die wêreld” in die boek Terra Non Firma, deur James M. Gere en Haresh C. Shah.