Paulus versus Plato oor die opstanding
DIE apostel Paulus het in 1 Korinthiërs 15:35-58 en 2 Korinthiërs 5:1-10 oor die opstanding geskryf. Het hy daardeur die idees van Plato en die Griekse filosowe oor die onsterflike siel gevolg, of strook sy woorde met die lering van Jesus en die res van die Skrif?
Die boekie Immortality of the Soul or Resurrection of the Individual: St. Paul’s View with Special Reference to Plato, wat in 1974 geskryf is en deur die aartsbiskop van die Grieks- Ortodokse Kerk van Noord- en Suid-Amerika onderskryf is, gee ’n insiggewende antwoord. Nadat die skrywer die aard van die opstanding in die bogenoemde tekste en die Hellenistiese invloede van daardie tyd bespreek het, kom hy tot die volgende gevolgtrekking:
“Plato leer dat die siel, apart van die liggaam, eindeloos en vir ewig bly voortbestaan. Die siel is vir Plato inherent en wesenlik onsterflik . . . St. Paulus leer geensins so ’n opvatting nie en hy beweer ook nie dat hy dit doen nie . . .
“Die apostel Paulus bespreek nie die onsterflikheid van die psige of gees as aparte en afsonderlike dele nie, maar die opstanding van die hele saamgestelde liggaam van die mens, wat uit die siel en gees bestaan, as die gevolg van Christus se opstanding. Paulus se beskouing van die opstandingsliggaam het niks te doen met die herlewing van lyke uit die graf nie.
“Sy beskouing van die opstandingsliggaam kan eerder beskryf word as die transformasie, herskepping en hersamestelling, deur die krag van God, van die hele mens se eenheid, van dieselfde persoon, van die persoonlikheid, van die psigosomatiese organisme, van die ware psigofisiese individu. Ons toekomstige opstanding sal nie plaasvind asof dit ons eie natuurlike besitting is nie, maar as die koninklike gawe van God af.”
Ja, onsterflikheid is nie ’n inherente besitting van enige mens nie. Dit is eerder ’n kosbare en genadige gawe van Jehovah deur ons Here Jesus Christus aan diegene wat die gesalfde Christengemeente uitmaak.—1 Korinthiërs 15:20, 57; Filippense 3:14, NW.
[Prent op bladsy 9]
Griekse filosoof Plato
[Erkenning]
Vatican Museum photograph