Vrae van lesers
Moet ons uit Job 1:8 verstaan dat Job gedurende sy leeftyd die enigste mens was wat aan Jehovah getrou was?
Nee. Ons vind geen grond vir so ’n gevolgtrekking in Job 1:8 nie, wat sê:
“Die HERE vra vir die Satan: Het jy ag gegee op my kneg Job? Want daar is niemand op die aarde soos hy nie: ’n man vroom en opreg, godvresend en wat afwyk van die kwaad.” In Job 2:3 het God Job net so hoog aangeslaan en vir Satan gevra: “Het jy ag gegee op my kneg Job? Want daar is niemand op die aarde soos hy nie: ’n man vroom en opreg, godvresend en wat afwyk van die kwaad.”
Die boek Job toon self dat Job nie die enigste mens was wat destyds in God se oë getrou was nie. Van hoofstuk 32 af aan lees ons van Elihu. Hoewel Elihu ’n jonger man was, het hy Job oor sy verkeerde beskouing tereggewys en die ware God verheerlik.—Job 32:6–33:6, 31-33; 35:1–36:2.
God se opmerking dat ‘daar niemand op die aarde soos Job was nie’, moet derhalwe beteken dat Job in die besonder as ’n man van opregtheid uitgeblink het. Job het moontlik gelewe gedurende die tydperk ná die dood van Josef in Egipte en vóór Moses met sy diens as God se profeet begin het. Gedurende daardie tydperk het daar ’n groot aantal Israeliete in Egipte gewoon. Ons het geen rede om te dink dat hulle almal ontrou en onaanneemlik vir God was nie; daar was seker baie van hulle wat op Jehovah vertrou het (Exodus 2:1-10; Hebreërs 11:23). Maar nie een van hulle het so ’n belangrike rol gespeel soos Josef nie, en hulle het ook nie as aanbidders in ware aanbidding uitgemunt soos Moses toe hy later die nasie van Israel uit Egipte uitgelei het nie.
Maar daar het elders ’n man gewoon wat merkwaardige onkreukbaarheid aan die dag gelê het. “Daar was ’n man in die land Us wie se naam was Job; en dié man was vroom en opreg en godvresend en een wat afgewyk het van die kwaad.”—Job 1:1.
Jehovah kon dus na Job verwys as ’n opvallende of noemenswaardige voorbeeld van geloof en toegewydheid. In ’n terugblik het die Bybelskrywers Esegiël en Jakobus Job insgelyks uitgesonder as iemand wat ’n voorbeeld gestel het in geregtigheid en volharding.—Esegiël 14:14; Jakobus 5:11, NW.