Herderswerk saam met ons Grootse Skepper

“Die HERE is my herder; niks sal my ontbreek nie. Hy verkwik my siel; Hy lei my in die spore van geregtigheid, om sy Naam ontwil.”—PSALM 23:1, 3.

1. Watter liefdevolle verkwikking voorsien Jehovah aan ons?

DIE 23ste Psalm, “’n psalm van Dawid”, het baie vermoeide siele al verkwik. Dit het hulle aangemoedig om die vertroue te hê waarvan Ps 23 vers 6 praat: “Net goedheid en guns sal my volg al die dae van my lewe; en ek sal in die huis van die HERE bly in lengte van dae.” Is dit jou begeerte om vir altyd in Jehovah se huis van aanbidding te bly, verenig met sy volk wat nou uit alle nasies van die aarde versamel word? “Die Herder en Opsiener van julle siele”, ons Grootse Skepper, Jehovah God, sal jou help om daardie doel te bereik.—1 Petrus 2:25.

2, 3. (a) Hoe lei Jehovah sy volk as ’n liefdevolle herder? (b) Hoe het Jehovah se “kudde” dramaties vermeerder?

² Die Skepper van “nuwe hemele en ’n nuwe aarde” is ook die Organiseerder en Opperopsiener van die Christengemeente, “God se huisgesin” (2 Petrus 3:13; 1 Timotheüs 3:15, NW). Hy stel opreg daarin belang om sy volk as herder te lei, soos Jesaja 40:10, 11 duidelik sê: “Kyk, die Here HERE sal kom as ’n Sterke, en sy arm al heers; kyk, sy loon is by Hom, en sy beloning is voor sy aangesig. Hy sal sy kudde laat wei soos ’n herder; Hy sal die lammers in sy arm vergader en aan sy bors [“boesem”, NW] dra; die lammerooie sal Hy saggies lei.”

³ In ’n uitgebreide sin sluit hierdie “kudde” diegene in wat lank reeds in die Christelike waarheid wandel sowel as “lammers” wat heel onlangs versamel is—soos die talle wat nou in Afrika en Oos-Europa gedoop word. Jehovah se sterk, beskermende arm vergader hulle aan sy boesem. Hoewel hulle soos verlore skape was, het hulle nou ’n intieme verhouding met hulle geliefde God en Skepper verkry.

Jehovah se mede-Herder

4, 5. (a) Wie is “die goeie herder”, en hoe het profesieë op hom gewys? (b) Oor watter skeidingswerk hou Jesus toesig, en met watter uitstekende resultate?

⁴ “Die goeie herder”, Jesus Christus, wat aan die regterhand van sy Vader in die hemel dien, skenk ook medelydende aandag aan die “skape”. Hy het sy lewe opgeoffer sodat hy eerstens die “klein kuddetjie” van gesalfdes kan bevoordeel, en dan vandag ook die groot menigte van sy “ander skape” (Lukas 12:32; Johannes 10:14, 16). Die Groot Herder, Jehovah God, rig hom tot al hierdie skape en sê: “Kyk, hier is Ek, en Ek sal oordeel . . . tussen skape en skape. En Ek sal een enkele herder oor hulle verwek, en hy sal hulle laat wei, naamlik my kneg Dawid; hy sal hulle laat wei, en hy sal vir hulle ’n herder wees. En Ek, die HERE, Ek sal vir hulle ’n God wees, en my kneg Dawid ’n vors in hulle midde. Ek, die HERE, het dit gespreek.”—Esegiël 34:20-24.

⁵ Die benaming “my kneg Dawid” wys profeties op Christus Jesus, die “saad” wat Dawid se troon beërwe (Psalm 89:35, 36, NW). In hierdie tyd waarin die nasies geoordeel word, gaan Jehovah se mede-Herder en Koning, Christus Jesus, die Seun van Dawid, voort om die “skape” onder die mense te skei van diegene wat beweer dat hulle “skape” is, maar wat in werklikheid “bokke” is (Mattheüs 25:31-33). Hierdie ‘een herder’ word verwek om ook die skape te laat wei. Wat ’n wonderlike vervulling sien ons tog vandag van hierdie profesie! Terwyl politici daarvan praat dat hulle die mensdom deur ’n nuwe wêreldorde gaan verenig, verenig die een Herder in werklikheid die skape in al die nasies deur middel van ’n veeltalige getuieniskampanje soos net God se organisasie op aarde ooit kan onderneem.

6, 7. Hoe het “die getroue en verstandige dienskneg” toegesien dat “voedsel op tyd” aan die skape beskikbaar gestel word?

⁶ Namate die Koninkryksboodskap voortdurend in nuwe gebiede verkondig word, sien “die getroue en verstandige dienskneg” van gesalfde Christene, wat hulle opdrag van die een Herder ontvang het, toe dat alle voorsorg getref word om die “voedsel op tyd” uit te stuur (Mattheüs 24:45). Baie van die Wagtoringgenootskap se 33 takkantore oor die aarde heen wat drukwerk doen, het hulle produksie vermeerder om in die vraag na meer en beter Bybelhandboeke en -tydskrifte te voorsien.

⁷ Die Bestuursliggaam van Jehovah se Getuies ontsien geen moeite nie om die gehalte van die vertaling in ongeveer 200 tale te verbeter en om vertaalwerk in bykomende tale te begin wat nodig is om die hele wêreldveld te dek. Dit is ter ondersteuning van die opdrag wat Jesus sy dissipels in Handelinge 1:8 gegee het: “Julle sal krag ontvang wanneer die Heilige Gees oor julle kom, en julle sal my getuies wees . . . tot aan die uiterste van die aarde.” Daarbenewens word die New World Translation of the Holy Scriptures, wat reeds in sy geheel of gedeeltelik in 14 tale gedruk is, nou in 16 ander tale van Europa, Afrika en die Ooste vertaal.

Geniet “die vrede van God”

8. Hoe is die skape ryklik geseën deur die verbond van vrede wat Jehovah met hulle gesluit het?

⁸ Deur sy een Herder, Christus Jesus, sluit Jehovah met Sy welgevoede skape ’n “vredeverbond” (Jesaja 54:10). Omdat die skape geloof stel in Jesus se vergote bloed, word hulle die geleentheid gebied om in die lig te wandel (1 Johannes 1:7). Hulle geniet ‘die vrede van God, wat alle verstand te bowe gaan en wat hulle harte en sinne bewaar in Christus Jesus’ (Filippense 4:7). Soos Esegiël 34:25-28 voorts verduidelik, lei Jehovah sy skape na ’n geestelike paradys, ’n genotvolle toestand van veiligheid, verkwikkende voorspoed en vrugbaarheid. Hierdie liefdevolle Herder sê van sy skape: “Wanneer Ek die juk wat op hulle gedruk het, stukkend breek en hulle red uit die mag van dié wat slawe wou maak van hulle, sal hulle besef dat Ek die Here is. Hulle sal nie weer die buit van ander nasies word nie . . . Hulle sal veilig woon en vir niemand hoef bang te wees nie.”—NAV.

9. Watter geleenthede het die verbreking van die “juk” vir God se volk geskep?

⁹ In onlangse jare het Jehovah se Getuies in baie lande reeds ondervind dat hulle “juk” verbreek is. Hulle is vry om te preek soos nog nooit tevore nie. En mag ons almal, in elke land, die veiligheid wat Jehovah voorsien goed gebruik namate ons voortgaan om die werk te volbring. Watter versekering gee Jehovah ons tog terwyl ons die tyd nader van die grootste verdrukking wat die mens nog sal sien!—Daniël 12:1; Mattheüs 24:21, 22.

10. Wie het Jehovah voorsien om die Goeie Herder, Christus Jesus, te help, en hoe het Paulus party van hulle toegespreek?

¹⁰ Ter voorbereiding van daardie dag van sy wraak teen die goddeloses het Jehovah onderherders voorsien om die Goeie Herder, Christus Jesus, te help om na die kudde om te sien. Hulle word in Openbaring 1:16 beskryf as ’n volkome getal, “sewe sterre”, in Jesus se regterhand. In die eerste eeu het die apostel Paulus ’n verteenwoordigende liggaam van hierdie onderherders toegespreek en gesê: “Gee dan ag op julleself en op die hele kudde waaroor die Heilige Gees julle as opsieners aangestel het om as herders die gemeente van God te versorg, wat Hy deur sy eie bloed verkry het” (Handelinge 20:28). Vandag is daar tienduisende onderherders wat in die 69 558 gemeentes oor die wêreld heen dien.

Onderherders op die voorgrond!

11. Hoe neem party herders met welslae die leiding in gebiede wat dikwels gedek word?

¹¹ In baie plekke moet hierdie herders die leiding neem in gebiede wat tydens hierdie laaste dae herhaaldelik gedek is. Hoe kan hulle die kudde geesdriftig hou? Die herders het reeds baie goed gevaar, en een van die maniere waarop hulle welslae behaal het, was om mense aan te spoor om die hulp- en gewone pionierdiens te betree. Baie herders het al self aan hierdie werk deelgeneem, en selfs die verkondigers wat dit nie kon doen nie, het die pioniergees geopenbaar deur met die soort vreugde te dien wat help om onverskilligheid in die gebied te bowe te kom (Psalm 100:2; 104:33, 34; Filippense 4:4, 5, NW). Terwyl goddeloosheid en anargie ’n algemene verskynsel in die wêreld word, word talle skaapgeaardes van die Koninkrykshoop bewus gemaak.—Mattheüs 12:18, 21; Romeine 15:12.

12. Watter ernstige probleem bestaan in gebiede wat vinnig groei, en hoe word dit soms die hoof gebied?

¹² ’n Ander probleem is dat daar dikwels nie genoeg bekwame herders is wat na die kudde kan omsien nie. Waar die groei vinnig plaasvind, soos in Oos-Europa, is daar talle nuwe gemeentes wat geen aangestelde ouere manne het nie. Gewillige skape dra die las, maar hulle is baie onervare, en hulp is nodig om die skape op te lei wat na die gemeentes stroom. In lande soos Brasilië, Mexiko en Zaïre, waar die groei baie vinnig plaasvind, moet betreklik jong Getuies gebruik word om die diens te reël en ander nuwelinge op te lei. Pioniers verleen uitstekende hulp, en dit is ’n gebied waarop susters nuwe susters kan oplei. Jehovah seën die resultate deur sy gees. Die vermeerdering hou net aan.—Jesaja 54:2, 3.

13. (a) Aangesien die oes so groot is, wat moet alle Getuies in gebed vra? (b) Hoe is die gebede van God se volk voor en gedurende die Tweede Wêreldoorlog verhoor?

¹³ In lande waar die predikingswerk goed gevestig is, in lande waar beperkings onlangs opgehef is en in nuwe gebiede geld Jesus se woorde in Mattheüs 9:37, 38 steeds: “Die oes is wel groot, maar die arbeiders min. Bid dan die Here van die oes, dat Hy arbeiders in sy oes mag uitstuur.” Ons moet ook bid dat Jehovah meer herders sal voorsien. Hy het al getoon dat hy dit kan doen. Wrede diktators het, soos die Assiriërs, Jehovah se Getuies voor en tydens die Tweede Wêreldoorlog probeer uitwis. Maar in antwoord op hulle gebede het Jehovah hulle organisasie gereinig deur dit waarlik teokraties te maak, en hy het die nodige “herders” voorsien.a Dit was in ooreenstemming met die profesie: “Wanneer Assur in ons land kom en hy ons paleise wil betree, sal ons teenoor hom sewe herders stel, ja, agt vorste uit die mense”—selfs meer as genoeg toegewyde ouere manne om die leiding te neem.—Miga 5:4.

14. Wat is dringend in die organisasie nodig, en wat word broers aangespoor om te doen?

¹⁴ Dit is uiters belangrik dat alle gedoopte Getuiemans daarna strewe om aan die vereistes vir meer verantwoordelikhede te voldoen (1 Timotheüs 3:1, NW). Dit is dringend. Die einde van hierdie stelsel kom vinnig nader. Habakuk 2:3 sê: “Die gesig sal nog duur tot op die vasgestelde tyd; maar dit spoed na die einde en sal nie teleurstel nie. . . . Alte seker sal dit kom en nie versuim nie.” Broers, kan julle—voor die einde kom—daarna strewe om vir meer voorregte in hierdie herderswerk te kwalifiseer?—Titus 1:6-9.

Teokratiese herderswerk

15. In watter opsig is Jehovah se volk ’n teokrasie?

¹⁵ Ten einde ’n volle aandeel aan die uitbreiding van Jehovah se organisasie te hê, moet sy volk ’n teokratiese beskouing van sake hê. Hoe is dit moontlik? Wel, wat beteken die term “teokraties”? Webster’s New Twentieth Century Dictionary definieer “teokrasie” as “die regering van ’n staat deur God”. Dit is in dié sin dat Jehovah se “heilige volk” ’n teokrasie is (1 Petrus 2:9; Jesaja 33:22). As lede of metgeselle van daardie teokratiese nasie, moet ware Christene in ooreenstemming met God se Woord en beginsels lewe en dien.

16. Hoe kan ons toon dat ons waarlik teokraties is?

¹⁶ Die apostel Paulus verduidelik hoe Christene teokraties moet wees. Eerstens sê hy moet hulle hulle “met die nuwe mens [“persoonlikheid”, NW] . . . beklee wat na God geskape is in ware geregtigheid en heiligheid”. Die Christen se persoonlikheid moet gevorm word na God se regverdige beginsels wat in sy Woord uiteengesit is. Hy moet lojaal teenoor Jehovah en Sy wette wees. Nadat Paulus verduidelik het hoe dit gedoen kan word, spoor hy ons aan: “Wees dan navolgers van God soos geliefde kinders” (Efesiërs 4:24–5:1). Ons moet God navolg soos gehoorsame kinders. Dit is ware teokrasie in werking en toon dat God werklik oor ons regeer!—Sien ook Kolossense 3:10, 12-14.

17, 18. (a) Watter hoofeienskap van God volg teokratiese Christene na? (b) Hoe het Jehovah in sy woorde aan Moses die aandag gevestig op Sy hoofeienskap, maar watter waarskuwing het Hy bygevoeg?

¹⁷ Wat is God se hoofeienskap wat ons moet navolg? Die apostel Johannes gee die antwoord in 1 Johannes 4:8 wanneer hy sê: “God is liefde.” Agt verse verder, in vers 16, herhaal hy hierdie lewensbelangrike beginsel: “God is liefde; en hy wat in die liefde bly, bly in God, en God in hom.” Die Groot Herder, Jehovah, is die verpersoonliking van liefde. Teokratiese herders volg hom na deur innige liefde aan Jehovah se skape te betoon.—Vergelyk 1 Johannes 3:16, 18; 4:7-11.

¹⁸ Die Groot Teokraat het homself aan Moses geopenbaar as “[Jehovah, Jehovah], barmhartige en genadige God, lankmoedig en groot van goedertierenheid en trou; wat die goedertierenheid bewaar vir duisende, wat ongeregtigheid en oortreding en sonde vergewe, maar nooit ongestraf laat bly nie; wat die ongeregtigheid van die vaders besoek aan die kinders en aan die kindskinders, aan die derde en aan die vierde geslag” (Exodus 34:6, 7, vgl. NW). Jehovah het gevolglik die aandag gevestig op verskeie fasette van sy vernaamste teokratiese eienskap, liefde, terwyl hy ferm gewaarsku het dat hy oortreders sal straf as hulle dit verdien.

19. Hoe moet Christenherders, in teenstelling met die Fariseërs, op ’n teokratiese manier optree?

¹⁹ Wat beteken dit vir diegene in die organisasie wat posisies van verantwoordelikheid het om teokraties te wees? Jesus het van die skrifgeleerdes en Fariseërs in sy dag gesê: “Hulle bind pakke saam wat swaar en moeilik is om te dra, en sit dit op die skouers van die mense, maar self wil hulle dit nie met hulle vinger verroer nie” (Mattheüs 23:4). Hoe onderdrukkend en liefdeloos tog! Ware teokrasie, oftewel Godsregering, vereis dat die herders die kudde lei deur die Bybel se liefdevolle beginsels toe te pas en nie deur die skape met eindelose mensgemaakte reëls te belas nie. (Vergelyk Mattheüs 15:1-9.) Teokratiese herders moet God terselfdertyd navolg deur fermheid by hulle liefde te voeg sodat die reinheid van die gemeente behou kan word.—Vergelyk Romeine 2:11; 1 Petrus 1:17.

20. Watter organisatoriese reëlings word deur teokratiese herders erken?

²⁰ Ware herders erken dat Jesus gedurende hierdie laaste dae sy getroue en verstandige dienskneg oor al sy besittings aangestel het en dat die heilige gees hierdie dienskneg rig om ouere manne aan te stel wat as herders die skape lei (Mattheüs 24:3, 47; Handelinge 20:28). Om teokraties te wees, behels gevolglik dat ’n mens diepe eerbied moet hê vir hierdie dienskneg, vir die organisatoriese reëlings wat die dienskneg ingestel het en vir die oueremanreëling in die gemeente.—Hebreërs 13:7, 17.

21. Watter goeie voorbeeld het Jesus vir onderherders gestel?

²¹ Jesus self het ’n goeie voorbeeld gestel, aangesien hy hom voortdurend tot Jehovah en Sy Woord gewend het vir leiding. Hy het gesê: “Ek kan uit Myself niks doen nie. Soos Ek hoor, oordeel Ek; en my oordeel is regverdig, omdat Ek nie my wil soek nie, maar die wil van die Vader wat My gestuur het” (Johannes 5:30). Onderherders van die Here Jesus Christus moet ’n soortgelyke nederige gesindheid aankweek. As ’n ouere man hom altyd tot God se Woord wend vir leiding, soos Jesus gedoen het, is hy waarlik teokraties.—Mattheüs 4:1-11; Johannes 6:38.

22. (a) Op watter manier moet almal daarna streef om teokraties te wees? (b) Watter vriendelike uitnodiging rig Jesus aan die skape?

²² Julle gedoopte manne, streef daarna om aan die vereistes te voldoen om voorregte in die gemeente te behartig! Al julle dierbare skape, neem julle voor om teokraties te wees deur soos God en Christus liefde te betoon! Mag herders en kudde hulle verheug omdat hulle ag geslaan het op Jesus se uitnodiging: “Kom na My toe, almal wat vermoeid en belas is, en Ek sal julle rus gee. Neem my juk op julle en leer van My, want Ek is sagmoedig en nederig van hart, en julle sal rus vind vir julle siele; want my juk is sag en my las is lig.”—Mattheüs 11:28-30.

[Voetnoot]

Kan jy verduidelik?

◻ Wat is Jehovah se “kudde”, en wie sluit dit in?

◻ Hoe het Jesus in die eerste eeu as “die goeie herder” opgetree, en hoe doen hy dit vandag?

◻ Watter sleutelrol speel onderherders in die versorging van die kudde?

◻ Wat is die grondbetekenis van die woord “teokrasie”?

◻ Hoe moet ’n Christen—veral ’n onderherder—optree om teokraties te wees?

[Prent op bladsy 20]

Jehovah sorg, soos ’n toegewyde herder, vir sy kudde

[Prent op bladsy 23]

Die navolging van Jehovah God se eienskap van liefde is teokrasie in werking