Koninkryksverkondigers berig
Eerlikheid beveel ons bediening aan
EERLIKHEID is ’n basiese vereiste vir Christene. Die apostel Paulus het in Hebreërs 13:18 geskryf: “Ons vertrou dat ons ’n eerlike gewete het, omdat ons ons in alle dinge eerlik wil gedra” (NW). Ons eerlike optrede ‘versier die leer van God, ons Verlosser, in alles’ (Titus 2:10). Die eerlikheid, asook die Koninkryksprediking van twee Christene in die Suidseekoninkryk van Tonga, gee ’n kragtige getuienis. Die Wagtoringgenootskap se takkantoor in Westelike Samoa berig:
“Jare lank het ’n Getuiepaartjie sonder enige merkbare resultate met die mense in die vier dorpies op hulle eiland oor God se Koninkryk gepraat. Toe, terwyl haar man siek was, moes die vrou na hulle plantasie omsien en die klapper, wat hulle enigste bron van inkomste was, sny en droog. Toe die tyd aanbreek dat die klapper deur die kopers geïnspekteer moes word, het iemand anders se sak met haar vyf sakke deurmekaargeraak. Die dorpenaars het haar aangemoedig om die ekstra sak te hou en dit as ’n seën van God te beskou. Die suster het egter geweier, en selfs toe sy vir ses sakke betaal is, het sy slegs die bedrag aanvaar waarop sy geregtig was. Haar eerlikheid is opgemerk.
“Later, toe die man ’n ander eiland sou besoek, het die winkeleienaar gevra dat hy ’n paar items vir hom koop. Die Getuie het gedoen wat die man hom gevra het en die kleingeld vir hom teruggebring. Die man was verstom. Hy het gesê dat dit die eerste keer was dat iemand die kleingeld vir hom terugbring. Ander vir wie hy gevra het om dinge te koop het altyd die kleingeld gehou. Op ’n ander geleentheid toe die Getuie iets uit hierdie man se winkel nodig gehad het, het die man vir hom die winkel se sleutel gegee en vir hom gesê om te vat wat hy nodig het en die geld in die winkel te los. Ander wat teenwoordig was, wou van die winkeleienaar weet waarom hy die winkelsleutel vir die Getuie gee en nie vir hulle nie. Die eienaar het verduidelik dat die Getuie die enigste een in die dorp was wie hy kon vertrou.
“Die goeie gedrag van hierdie egpaar word onder die dorpenaars bespreek. Die Getuies is bekend vir hulle eerlikheid, hulle neutrale politieke standpunt en hulle getuieniswerk aangaande God se Koninkryk wat die verskille tussen die dorpenaars se opvattings en die leerstellings van die Bybel uitwys. Wanneer vrae nou oor die Bybel geopper word, nader die mense dikwels die Getuies vir antwoorde. Die man moes al selfs in die nag uit die bed opstaan, na ’n dorpsvergadering gaan en vrae beantwoord oor ’n Bybelonderwerp wat geopper is. Wanneer hy begrafnisse op die dorp bywoon, is hy al dikwels gevra om vir hulle te wys wat die Bybel oor die dood sê, en hulle het sy verduideliking aanvaar.”
Die eerlikheid van hierdie Getuiepaartjie en hulle Koninkryksverkondiging gee dus ’n goeie getuienis op hierdie pragtige Suidsee-eiland. Hulle hoop dat ander die Bybel sal studeer en hulle standpunt vir die waarheid sal inneem. As hulle dit doen, sal Jehovah God hulle sekerlik seën.—Johannes 8:32.