Jehovah—die waaragtige en lewende God

FARAO van Egipte het uittartend en met veragting gevra: “Wie is Jehovah?” (Exodus 5:2, NW). Soos in die vorige artikel getoon is, het daardie gesindheid plae en die dood oor die Egiptenaars gebring, asook ’n watergraf vir Farao en sy leër.

In eertydse Egipte het Jehovah God getoon dat hy bo valse gode verhewe is. Maar daar is veel meer om oor hom te leer. Wat is party aspekte van sy persoonlikheid? En wat verwag hy van ons?

Sy naam en roem

Toe Moses eise aan Egipte se Farao gestel het, het hy nie gesê: ‘Die Here sê so en so’ nie. Farao en die ander Egiptenaars het hulle talle valse gode as heres beskou. Nee, Moses het die Goddelike naam, Jehovah, gebruik. Hy het dit self uit die hemel gehoor toe hy by die brandende bos in die land Midian was. Die geïnspireerde verslag sê:

“En God het met Moses gespreek, en vir hom gesê: Ek is [Jehovah] . . . Ék het ook gehoor die gekerm van die kinders van Israel wat deur die Egiptenaars in slawerny gehou word, en Ek het aan my verbond gedink. Daarom, sê aan die kinders van Israel: Ek is [Jehovah], en Ek sal julle onder die harde arbeid van die Egiptenaars uitlei en julle red uit hulle slawerny, en Ek sal julle verlos deur ’n uitgestrekte arm en deur groot strafgerigte. En Ek sal julle as my volk aanneem en vir julle ’n God wees. En julle sal erken dat Ek [Jehovah] julle God is wat julle uitlei onder die harde arbeid van die Egiptenaars uit. En ek sal julle bring in die land [Kanaän] waaromtrent Ek my hand opgehef het, om dit aan Abraham, aan Isak en aan Jakob [julle voorvaders] te gee; en Ek sal dit aan julle as ’n besitting gee, Ek, [Jehovah].”—Exodus 6:1-8, vgl. NW.

Dit is presies wat Jehovah gedoen het. Hy het die Israeliete van slawerny in Egipte bevry en hulle in staat gestel om die land van Kanaän in besit te neem. Soos dit beloof is, het God al hierdie dinge laat gebeur. Hoe gepas! Sy naam, Jehovah, beteken “Hy laat word”. Die Bybel praat van Jehovah deur titels soos “God”, “Soewereine Heer”, “Skepper”, “Vader”, “die Almagtige” en “die Allerhoogste” te gebruik. Tog identifiseer sy naam Jehovah hom as die ware God wat sy grootse voornemens progressief tot uitvoering bring.—Jesaja 42:8, NW.

As ons die Bybel in sy oorspronklike tale sou lees, sou ons God se naam duisende kere vind. In Hebreeus word dit voorgestel deur die vier medeklinkers Jod He Vau He (יהוה), wat die Tetragrammaton genoem word, en van regs na links gelees word. Diegene wat Hebreeus gepraat het, het die vokaalklanke voorsien, maar mense is vandag nie seker wat hulle was nie. Hoewel party ten gunste van die spelwyse Jahweh is, is die vorm Jehovah bekend en identifiseer dit ons Skepper op gepaste wyse.

Die gebruik van die naam Jehovah onderskei God ook van die een wat “my Here” genoem word in Psalm 110:1, waar dit sê: “Die HERE [Hebreeus, יהוה] het tot my Here gespreek: Sit aan my regterhand, totdat Ek u vyande maak ’n voetbank vir u voete.” Vanweë sy erkenning van God se naam hier in die Hebreeuse teks lees die New World Translation: “Die uitspraak van Jehovah tot my Heer is: ‘Sit aan my regterhand, totdat ek u vyande tot ’n voetbank vir u voete stel.’” Daardie woorde van Jehovah God is in ’n profetiese sin op Jesus Christus van toepassing, wat deur die skrywer “my Heer” genoem is.

Jehovah het in Farao se dag vir Hom ’n naam gemaak. Deur Moses het God vir daardie hardvogtige heerser gesê: “Hierdie keer sal Ek my plae in jou hart stuur, en teen jou dienaars en jou volk, dat jy kan weet dat daar niemand op die hele aarde is soos Ek nie. Want anders sou Ek my hand uitgestrek en jou en jou volk met die pes getref het, en jy sou van die aarde verdelg gewees het; maar juis hierom het Ek jou nog laat bestaan, dat Ek jou my krag kan toon, en dat hulle my Naam op die hele aarde kan verkondig.”—Exodus 9:14-16.

Aangaande Israel se uittog uit Egipte en die val van sekere Kanaänitiese konings het die vrou Ragab van Jerigo vir twee Hebreeuse spioene gesê: “Ek weet dat [Jehovah] die land aan julle [die Israeliete] gegee het en dat die skrik vir julle op ons geval het en dat al die inwoners van die land vir julle bewe; want ons het gehoor dat [Jehovah] die water van die Skelfsee voor julle by jul uittog uit Egipte laat opdroog het en wat julle die twee konings van die Amoriete, Sihon en Og, oorkant die Jordaan aangedoen het, dat julle hulle met die banvloek getref het. Toe ons dit hoor, het ons hart gesmelt, sodat daar by niemand enige moed meer oorgebly het teenoor julle nie; want [Jehovah] julle God, Hy is God in die hemel daarbo en op die aarde hieronder” (Josua 2:9-11). Ja, Jehovah se naam het oral bekend geraak.

Jehovah en sy eienskappe

Die psalmis het hierdie innige begeerte uitgespreek: “Sodat mense kan weet dat U, wie se Naam Jehovah is, alleen die Allerhoogste oor die hele aarde is” (Psalm 83:18, NW). Aangesien Jehovah se soewereiniteit universeel is, kon Jesus se vervolgde volgelinge bid: “[Soewereine Heer], U is die God wat die hemel en die aarde en die see en alles wat daarin is, gemaak het” (Handelinge 4:24). En hoe bemoedigend is dit tog nie om te weet dat Jehovah die “Hoorder van die gebed” is nie!—Psalm 65:3.

Jehovah se vernaamste eienskap is liefde. Trouens, “God is liefde”—die absolute beliggaming van hierdie eienskap (1 Johannes 4:8). Daarbenewens is daar “by Hóm . . . wysheid en mag”. Jehovah is alwys en almagtig, maar hy misbruik nooit sy mag nie (Job 12:13; 37:23). Ons kan ook seker wees dat Jehovah altyd regverdig met ons sal handel, want “geregtigheid en reg is die grondslag van sy troon” (Psalm 97:2). As ons ’n misstap begaan, maar berouvol is, kan ons bemoedig word deur die wete dat Jehovah ’n “barmhartige en genadige God, lankmoedig en groot van goedertierenheid en trou” is (Exodus 34:6). Geen wonder dat ons vreugde uit ons diens aan Jehovah kan put nie!—Psalm 100:1-5.

Die weergalose hemelse Koning

Jehovah se Seun, Jesus Christus, het gesê: “God is Gees” (Johannes 4:24). Daarom is Jehovah onsigbaar vir mense-oë. Trouens, Jehovah het vir Moses gesê: “Jy kan my aangesig nie sien nie, want geen mens kan My sien en bly lewe nie” (Exodus 33:20). Hierdie hemelse Koning is so glorieryk dat mense dit nie sou kon verduur as hulle hom moes sien nie.

Hoewel Jehovah onsigbaar is vir ons oë is daar volop bewys van sy bestaan as die almagtige God. Trouens, “sy onsigbare [“eienskappe”, NW] kan van die skepping van die wêreld af in sy werke verstaan en duidelik gesien word, naamlik sy ewige krag en goddelikheid” (Romeine 1:20). Die aarde—met sy gras, bome, vrugte, groente en blomme—getuig van Jehovah se godheid. In teenstelling met afgode gee Jehovah reën en vrugbare seisoene (Handelinge 14:16, 17). Kyk na die sterre in die naglug. Watter groot bewys van Jehovah se godheid en organisasievermoë!

Jehovah het ook sy heilige, intelligente geesskepsele in die hemel georganiseer. Hulle doen God se wil as ’n eensgesinde organisasie, soos die psalmis sê: “Loof [Jehovah], sy engele, kragtige helde wat sy woord volbring, in gehoorsaamheid aan die stem van sy woord! Loof [Jehovah], al sy leërskare, sy dienaars wat sy welbehae doen” (Psalm 103:20, 21). Jehovah het ook sy volk op die aarde georganiseer. Die nasie Israel asook die vroeë volgelinge van God se Seun was goed georganiseer. Jehovah het vandag eweneens ’n wêreldwye organisasie van ywerige Getuies wat die goeie nuus verkondig dat sy Koninkryk op hande is.—Mattheüs 24:14.

Jehovah is die waaragtige en lewende God

Jehovah se godheid is al op baie maniere gedemonstreer! Hy het Egipte se valse gode verneder en die Israeliete veilig in die Beloofde Land ingebring. Die skepping voorsien oorvloedige bewys van Jehovah se godheid. En daar is eenvoudig geen vergelyking tussen hom en die nuttelose afgode van valse godsdiens nie.

Die profeet Jeremia het getoon watter groot kontras daar tussen Jehovah, die lewende God, en lewelose mensgemaakte afgode is. Daardie kontras word goed uitgedruk in Jeremia hoofstuk 10. Jeremia het onder andere geskryf: “[Jehovah] is waarlik God, Hy is die lewende God en ’n ewige Koning” (Jeremia 10:10). Die lewende en waaragtige God, Jehovah, het alles geskape. Hy het die Israeliete verlos wat in slawerny in Egipte gekwyn het. Niks is vir hom onmoontlik nie.

Jehovah, “die Koning van die eeue”, sal die gebed verhoor: “Onse Vader wat in die hemele is, laat u Naam geheilig word; laat u koninkryk kom; laat u wil geskied, soos in die hemel net so ook op die aarde” (1 Timotheüs 1:17; Mattheüs 6:9, 10). Die hemelse Messiaanse Koninkryk, wat reeds in die hande van Jesus Christus is, sal binnekort optree teen die goddelose en al Jehovah se vyande vernietig (Daniël 7:13, 14). Daardie Koninkryk sal ook ’n nuwe wêreld van eindelose seëninge vir gehoorsame mense tot stand bring.—2 Petrus 3:13.

Daar is veel meer wat ons oor Jehovah en sy voornemens kan leer. Waarom stel jy jou dit nie ten doel om sulke kennis in te neem en in ooreenstemming daarmee op te tree nie? As jy dit doen, sal jy bevoorreg wees om ewige lewe in ’n aardse paradys onder Koninkryksheerskappy te geniet. Jy sal leef wanneer droefheid, pyn en selfs die dood verbygegaan het en die kennis van Jehovah die aarde vul (Jesaja 11:9; Openbaring 21:1-4). Dit kan jou toekoms wees as jy die Bybelgebaseerde antwoorde op die vraag: “Wie is Jehovah?” soek, vind en in ooreenstemming daarmee optree.

[Foto-erkenning op bladsy 7]

Pictorial Archive (Near Eastern History) Est.