Koninkryksverkondigers berig
Respek vir die heiligheid van lewe
DIE Bybel toon dat bloed kosbaar in God se oë is en dat hy die misbruik daarvan veroordeel (Levitikus 17:14; Handelinge 15:19, 20, 28, 29). Vanweë hierdie Bybelriglyne aanvaar Jehovah se Getuies nie bloedoortappings nie.
Om dokters en hospitaalpersoneellede te help om die godsdiensstandpunt van Jehovah se Getuies oor hierdie saak te verstaan en hulle te help besef dat die Getuies alternatiewe behandeling sal aanvaar, het die Wagtoringgenootskap Hospitaalskakelkomitees (HSK) in verskillende lande gestig. Lede van hierdie komitees besoek hospitale om met mediese personeellede te praat. Daar is onlangs in 12 stede in Pole meer as 200 vergaderinge gehou waarby oor die 500 dokters, hoofsaaklik hoofde van klinieke of van hospitaalsale, betrokke was. Die volgende het tydens so ’n besoek plaasgevind:
“’n Vergadering by die Kardio-Chirurgiese Kliniek in Zabrze was ’n groot sukses. Die span by die kliniek voer reeds sedert 1986 operasies sonder bloed op ons broers uit. Tot op hede is daar al 40 van hierdie operasies uitgevoer. Die kliniek is bereid om pasiënte van oor die hele Pole asook uit die buiteland op te neem. Ná ’n bespreking van 50 minute het ’n onderhoof van ’n saal lede van die HSK aan ’n groep pasiënte voorgestel en gesê: ‘Hierdie mense is Getuies van Jehovah. Hulle gee hulle samewerking aan ons kliniek, en hulle help ons. Dit is nie net hulle medegelowiges wat uit hulle hulp voordeel trek nie, maar alle ander pasiënte ook. Danksy Jehovah se Getuies is ons nou oortuig dat groot hartoperasies sonder bloed gedoen kan word.
“‘Ons het byvoorbeeld sonder bloed op hierdie dame geopereer [terwyl hy na een van sy pasiënte gewys het], en Maandag word sy ontslaan. Ek wil net sê dat ons bloed baie minder as voorheen gebruik omdat dit gevaarlik is. Dit hou verband met HIV, hepatitis en ’n stadige herstel.
“‘Ek is ’n Katoliek, maar in ons huis was ons nog altyd verdraagsaam teenoor ander se sienswyse. Ek het eenkeer saam met my kinders deur die Slaski-stadion gestap. Hierdie stadion was voorheen verwaarloos, maar ons het opgelet dat dit nou onherkenbaar verander het. Ek het een van die werkers gevra hoe hierdie verandering plaasgevind het. Hy het gesê dat die bestuur amper moed opgegee het om die stadion te herstel, maar dat dit aan Jehovah se Getuies verhuur is en hulle dit opgeknap het.
“‘Hulle is dus mense by wie ons almal baie kan leer. Ek dink dat ons in hierdie saal verdraagsaam moet wees teenoor ander se sienswyse.’ Toe het hy na ’n Getuie gewys wat binne ’n paar dae ’n operasie sou ondergaan en gesê: ‘Hierdie dame is een van Jehovah se Getuies, en sy sal sonder bloed geopereer word.’”
Jehovah se Getuies probeer nie hulle geloof aan ander opdwing nie, maar volg die apostels se voorbeeld en ‘is aan God meer gehoorsaam as aan die mense’ (Handelinge 5:29). Dit sluit respek vir bloed in. Hulle waardeer dit wanneer ander hulle godsdiensoortuiging in hierdie saak respekteer.