Vrae van lesers

Waarom sê die Bybel, aangesien die eertydse priester Melgisedek ’n werklike persoon was, dat hy “sonder geslagsregister” was?

Dit staan in Hebreërs 7:3. Kyk na die vers in sy konteks:

“Want hierdie Melgisedek was koning van Salem, priester van God, die Allerhoogste, wat vir Abraham tegemoetgegaan het by sy terugkeer toe hy die konings verslaan het, en hom geseën het; aan wie Abraham ook ’n tiende deel van alles gegee het—hy was in die eerste plek, volgens uitleg, koning van die geregtigheid en dan ook koning van Salem, dit is koning van vrede; sonder vader, sonder moeder, sonder geslagsregister, sonder begin van dae of lewenseinde, maar gelykgestel aan die Seun van God, bly hy priester altyddeur.”—Hebreërs 7:1-3.

Soos gemeld is, was Melgisedek ’n werklike persoon, so werklik soos Abraham, met wie hy regstreeks te doen gehad het (Genesis 14:17-20; Hebreërs 7:4-10). Aangesien dit die geval was, moes Melgisedek ouers, ’n vader en ’n moeder, gehad het en het hy moontlik nakomelinge gehad. As ’n mens het hy dus ’n geslagsregister, of stamboom, gehad. Sy fisiese lewe het ook geëindig. Melgisedek het in die een of ander stadium gesterf, in ooreenstemming met die apostel Paulus se woorde in Romeine 5:12, 14. Maar aangesien ons nie weet wanneer Melgisedek gesterf het en sodoende as priester opgehou dien het nie, het hy as ’t ware eindeloos gedien.

Paulus het in Hebreërs van Melgisedek gepraat toe hy Jesus Christus se rol as ’n groter Hoëpriester bespreek het. Paulus het na Melgisedek as ’n sinnebeeld, of ’n model, van Jesus in hierdie priesterlike rol verwys en gesê: ‘Jesus het volgens die orde van Melgisedek ’n hoëpriester geword’ (Hebreërs 6:20). In watter opsig?

Paulus moes besef het dat die Bybelverslag geen besonderhede oor Melgisedek se geslagslyn—sy voorvaders of enige moontlike nakomelinge—gee nie. Daardie inligting kom eenvoudig nie in die Bybelverslag voor nie. Met die oog op wat Paulus geweet het of wat ons weet, kon daar dus tereg gesê word dat Melgisedek “sonder geslagsregister” was (Afrikaanse Bybel; New World Translation of the Holy Scriptures), sonder “afstamming” (Nuwe Afrikaanse Vertaling) of “sonder stamboom”.—J. B. Phillips.

In watter opsig was dit met Jesus die geval? Ons weet weliswaar dat Jehovah God Jesus se Vader was en dat Maria van die stam van Juda sy aardse moeder was. Tog was daar ’n ooreenkoms tussen Melgisedek en Jesus. Hoe so? Jesus is nie in die stam van Levi, die stam vir priesters in die nasie Israel, gebore nie. Nee, Jesus het nie deur menslike afstamming ’n priester geword nie. Melgisedek ook nie, want hy het nie ’n priester “kragtens die wet van ’n vleeslike gebod” geword nie, dit wil sê deur in ’n priesterlike stam en familie gebore te word nie (Hebreërs 7:15, 16). Pleks van ’n priester te word deur ’n aardse vader wat self ’n priester was, is Jesus “deur God genoem ’n hoëpriester volgens die orde van Melgisedek”.—Hebreërs 5:10.

Jesus het ook geen nakomelinge of opvolgers ten opsigte van sy priesterskap gehad nie. In hierdie opsig was hy ook sonder geslagsregister. Hy sal sy priesterlike diens vir ewig as ’n behulpsame onderrigter uitvoer. Paulus het oor hierdie ewigdurende diens kommentaar gelewer en gesê:

“[Jesus], omdat Hy vir ewig bly, besit ’n priesterskap wat nie op ander oorgaan nie. Daarom kan Hy ook volkome red die wat deur Hom tot God gaan, omdat Hy altyd leef om vir hulle in te tree.”—Hebreërs 7:24, 25.

Ons bespreking van Paulus se woorde in Hebreërs 7:3 moet dus meer wees as ’n brokkie kennis wat ons in ons hoof wegbêre. Dit moet ons waardering laat verdiep vir die liefdevolle voorsiening wat Jehovah God gemaak het sodat ons vir ewig vergifnis van sonde kan verkry en vir die wyse waarop hy gereël het dat ons vir ewig hulp en leiding kan ontvang.