Ragab—Regverdig verklaar deur werke van geloof
STEL jou voor! ’n Hoer wat in God se oë regverdig verklaar is. “Onmoontlik!” sou baie uitroep. Maar dit is wat met die prostituut Ragab van Jerigo, ’n eertydse Kanaänitiese stad, gebeur het.
Die Bybelskrywer Jakobus skryf: “Julle sien dat ’n mens regverdig verklaar word deur werke, en nie deur geloof alleen nie. Is Ragab, die hoer, nie ook net so deur werke regverdig verklaar nadat sy die boodskappers gasvry ontvang en hulle met ’n ander pad weggestuur het nie? Ja, soos die liggaam sonder gees dood is, so is ook geloof sonder werke dood” (Jakobus 2:24-26, NW). Waarom is Ragab regverdig verklaar? Wat het sy gedoen om so ’n bevoorregte posisie voor God te verkry?
Die Israeliete kom!
Kom ons gaan terug na die jaar 1473 v.G.J. Stel jou die toneel voor. Jerigo is goed verskans. Bo-op die stadsmure is die huis van Ragab die hoer. Van hier af kan sy waarskynlik ooswaarts kyk in die rigting van die Jordaanrivier wat sy walle oorstroom (Josua 3:15). Op die oostelike oewer sien sy dalk die Israeliete se kamp met ’n strydmag van meer as 600 000. Hulle is net ’n paar kilometer daarvandaan!
Ragab het van Israel se oorwinnings op die gevegsfront gehoor. Sy het ook van Jehovah se magtige dade gehoor, veral van hoe hy vir die Israeliete ’n pad deur die Rooi See, of Skelfsee, oopgemaak het waarlangs hulle kon ontsnap. Dan sal die vloedwaters van die Jordaan hulle tog sekerlik nie stuit nie. Dit is ’n krisistyd! Hoe gaan Ragab optree?
Ragab neem haar standpunt in
Kort voor lank kry Ragab twee onverwagte besoekers—verkenners uit die Israelitiese kamp. Hulle soek blyplek, en sy laat hulle in haar huis inkom. Maar die koning van Jerigo kom van hulle teenwoordigheid te hore. Hy stuur onmiddellik sy geregsdienaars om hulle in hegtenis te neem.—Josua 2:1, 2.
Wanneer die koning se dienaars daar aankom, het Ragab reeds haar standpunt vir Jehovah God ingeneem. “Lewer die manne uit wat na jou gekom het”, eis die koninklike afgevaardigdes. Ragab het die verkenners onder die vlasstoppels weggesteek wat op haar dak oopgegooi was om droog te word. Sy sê: “Seker, die manne het na my gekom; maar ek het nie geweet waar hulle vandaan was nie. En toe die [stads]poort met donker gesluit moes word, het die manne uitgegaan; ek weet nie waar die manne heengegaan het nie; jaag hulle gou agterna, want julle sal hulle inhaal” (Josua 2:3-5). Die koning se manne het dit toe gedoen—maar dit was tevergeefs.
Ragab het die vyande uitoorlê. Sy doen onmiddellik verdere stappe wat haar geloof in Jehovah deur werke toon. Sy klim op na die dak en sê vir die verkenners: “Ek weet dat [Jehovah] die land aan julle gegee het.” Ragab erken dat al die inwoners van die land bevrees is omdat hulle gehoor het dat God 40 jaar vantevore “die water van die Skelfsee” voor die Israeliete “laat opdroog het”. Die inwoners weet ook dat die Israeliete twee Amoritiese konings vernietig het. “Toe ons dit hoor”, sê Ragab, “het ons hart gesmelt, sodat daar by niemand enige moed meer oorgebly het teenoor julle nie; want [Jehovah] julle God, Hy is God in die hemel daarbo en op die aarde hieronder.”—Josua 2:8-11.
Ragab pleit: “Sweer dan nou tog vir my by [Jehovah] dat, terwyl ek aan julle ’n guns bewys het, julle ook aan my familie ’n guns sal bewys; en gee my ’n betroubare teken dat julle die lewe van my vader en my moeder en my broers en my susters en almal wat aan hulle behoort, sal spaar en ons siele sal red van die dood.”—Josua 2:12, 13.
Die manne stem in en vertel Ragab wat sy moet doen. Sy moet die rooi tou, waarmee sy die verkenners buite die mure van Jerigo laat afsak het, by haar venster laat uithang. Sy moet haar familie in haar huis byeenbring, waar hulle vir beskerming moet bly. Ragab gee die verkenners met hulle vertrek nuttige inligting oor die roete wat hulle moet volg en vertel hulle hoe hulle hulle agtervolgers kan ontduik. Die verkenners kom veilig weg. Nadat Ragab die rooi tou vasgemaak het en haar familielede in haar huis byeengebring het, wag sy op verdere gebeure.—Josua 2:14-24.
Wat het Ragab gedoen? Wel, sy het bewys dat sy geloof in die almagtige God, Jehovah, stel! Sy sal volgens sy standaarde lewe. Ja, en sy sal regverdig verklaar word op grond van sulke werke van geloof.
Die mure val!
’n Paar weke gaan verby. Israelitiese krygsmanne, vergesel van priesters—sommige met ramshorings en ander wat die verbondsark dra—loop om Jerigo. Hulle doen dit nou al ses dae lank, een keer per dag. Maar op die sewende dag het hulle reeds ses keer om die stad geloop. Daar gaan hulle weer!
Nadat hulle die sewende keer om die stad geloop het, vul lang horingstote die lug. Die Israeliete skreeu uit alle mag. Toe laat Jehovah Jerigo se beskermende mure met ’n donderende gedreun ineenstort. Net die deel waarop Ragab se huis is, bly staan. Die res van die stad en sy inwoners word vernietig. Omdat sy haar geloof deur werke bewys het, word die berouvolle prostituut saam met haar familie bewaar, en sy begin onder Jehovah se volk woon.—Josua 6:1-25.
’n Kykie na Ragab se eienskappe
Ragab het nie ledig rondgesit nie, want op haar dak was daar vlasstoppels wat in die son gedroog is. Vlasvesels is gebruik om linne van te weef. Daar was ook ’n voorraad rooi tou in Ragab se huis (Josua 2:6, 18). Sy het dus moontlik linne geweef en geweet hoe om stowwe te kleur. Ja, Ragab was ’n vlytige vrou. Bowenal het sy ’n eerbiedige vrees vir Jehovah ontwikkel.—Vergelyk Spreuke 31:13, 19, 21, 22, 30.
Wat van Ragab se ander beroep? Sy het nie net herberg verskaf nie. Nee, die Skrif identifiseer haar deur Hebreeuse en Griekse woorde te gebruik wat prostituut beteken. Die Hebreeuse woord zoh·nahʹ dui byvoorbeeld altyd op ’n ongeoorloofde verhouding. Terloops, onder die Kanaäniete was prostitusie nie as iets slegs beskou nie.
Die feit dat Jehovah ’n hoer gebruik het, toon sy groot barmhartigheid. Uiterlike voorkoms kan ons om die bos lei, maar God “sien die hart aan” (1 Samuel 16:7). Daarom kan prostitute wat ’n regte harttoestand het en wat oor hulle hoerery berou het Jehovah God se vergifnis ontvang. (Vergelyk Mattheüs 21:23, 31, 32.) Ragab self het haar van sonde bekeer tot ’n regverdige weg wat God se goedkeuring weggedra het.
Die Israelitiese verkenners het volgens God se Wet geleef, dus het hulle nie om onsedelike redes in Ragab se huis oornag nie. Hulle het moontlik daar oornag omdat hulle teenwoordigheid in ’n prostituut se huis minder agterdog sou wek. Die huis se ligging op die stadsmuur sou dit ook makliker maak om te ontsnap. Jehovah het hulle blykbaar na ’n sondaar gelei wie se hart so gunstig geraak is deur berigte van God se handelinge met die Israeliete dat sy berou gehad het en haar lewenswyse verander het. God se bevel dat Israel die Kanaäniete weens hulle onsedelike gebruike moes verdelg, en sy seën op Ragab en die verowering van Jerigo, toon dat die verkenners hulle nie aan onsedelikheid skuldig gemaak het nie.—Levitikus 18:24-30.
Wat van Ragab se misleidende woorde aan die verkenners se agtervolgers? God het haar optrede goedgekeur. (Vergelyk Romeine 14:4.) Sy het haar lewe in gevaar gestel om sy knegte te beskerm en het sodoende haar geloof bewys. Hoewel kwaadwillige leuens in Jehovah se oë verkeerd is, is ’n mens nie verplig om juiste inligting aan mense te gee wat nie daarop geregtig is nie. Selfs Jesus Christus het nie volle besonderhede of direkte antwoorde gegee as dit onnodige probleme kon veroorsaak nie (Mattheüs 7:6; 15:1-6; 21:23-27; Johannes 7:3-10). Die feit dat Ragab die vyandelike beamptes op ’n dwaalspoor gebring het, moet dus in hierdie lig beskou word.
Ragab se beloning
Hoe is Ragab vir haar geloof beloon? Die feit dat sy tydens Jerigo se vernietiging behoue gebly het, was beslis ’n seëning van Jehovah af. Later is sy met Salmon (Salma) getroud, die seun van die woestynvors Nagson van die stam van Juda. As die ouers van godvrugtige Boas het Salmon en Ragab ’n skakel gevorm in die afstammelingslyn wat na koning Dawid van Israel gelei het (1 Kronieke 2:3-15; Rut 4:20-22). Van groter betekenis is die feit dat die voormalige prostituut Ragab een van slegs vier vroue is wat in Mattheüs se geslagsregister van Jesus Christus genoem word (Mattheüs 1:5, 6). Wat ’n seëning van Jehovah af!
Hoewel Ragab nie ’n Israeliet was nie en sy voorheen ’n prostituut was, is sy ’n voortreflike voorbeeld van ’n vrou wat deur haar werke bewys het dat sy volle geloof in Jehovah gehad het (Hebreërs 11:30, 31). Sy sal soos ander, waaronder sommige wat ’n lewe van prostitusie laat vaar het, nóg ’n beloning ontvang—’n opstanding uit die dood tot lewe op ’n paradysaarde (Lukas 23:43). Ragab het, vanweë haar geloof wat deur werke gerugsteun is, die goedkeuring van ons liefdevolle en vergewensgesinde hemelse Vader ontvang (Psalm 130:3, 4). En haar goeie voorbeeld is beslis ’n aanmoediging vir alle liefhebbers van geregtigheid om op Jehovah God te vertrou vir die ewige lewe.
[Prent op bladsy 23]
Ragab is regverdig verklaar omdat haar werke bewys het dat sy geloof gehad het
[Prente op bladsy 24]
Argeoloë het oorblyfsels van eertydse Jerigo ontdek, wat ’n klein gedeelte van ’n vroeë muur insluit
[Erkenning]
Pictorial Archive (Near Eastern History) Est.