Jehovah se Getuies in alle wêrelddele—die Filippynse Republiek

DIE 7 083 ruie tropiese eilande wat die Filippynse Republiek uitmaak, is die boonste deel van ’n bergreeks onder die see.a En die 62 000 000 inwoners van die Filippyne gesels graag oor bykans enige onderwerp. Hierdie vriendelike gesindheid het ’n vrugbare veld vir die Koninkryksgetuieniswerk tot gevolg.

Getuieniswerk in die skool

Op die eiland Masbate kon ’n jong hoërskoolleerling tydens ’n “waar of onwaar”-toets vir haar onderwyseres en klas getuig. Sy sê:

“Die stelling was: ‘As God my liefhet, sal hy nie vir my probleme veroorsaak of my laat ly nie.’ Toe my onderwyseres ons vraestelle nagesien het, het sy gesien dat almal behalwe ek waar geantwoord het. My onderwyseres het toegelaat dat ek aan die klas verduidelik waarom ek onwaar geantwoord het. Ek het gesê dat dit nie God is wat vir ons probleme veroorsaak nie, hoewel hy lyding toelaat en toelaat dat ons beproewinge verduur. Ek het met behulp van my Bybel wat ek altyd skool toe neem met die klas oor die woorde in 1 Johannes 4:8, ‘God is liefde’, geredeneer. Ná my verduideliking was my onderwyseres oortuig, en sy het op haar lessenaar getik en gesê: ‘Marilou is reg.’ Net ek het hierdie vraag reg geantwoord en het die hoogste punte behaal.”

Die Koninkryksboodskap is oral

Terwyl ’n gewone pionier (’n voltydse verkondiger van die goeie nuus) in ’n ander deel van die Filippyne aan die bediening van huis tot huis deelgeneem het, het sy die ma van drie klein kindertjies ontmoet. Die vrou het baie in die Koninkryksboodskap belanggestel, en daarom was dit maklik om ’n Bybelstudie met haar te begin. Hoewel haar man nie daarvan gehou het dat sy Bybelonderrigting ontvang nie, veral nie van Jehovah se Getuies nie, is die studie voortgesit.

Die man het met sy gesin na ’n ander stad verhuis omdat hy gedink het dat dit sy vrou se assosiasie met die Getuies sou beëindig. Maar hulle het hierdie vrou kort voor lank opgespoor, en sy het haar Bybelstudie voortgesit. Dit is onnodig om te sê dat haar man baie ontsteld was. Hy het kwaad werk toe gegaan en aan ’n klant wie se motor hy herstel het, vertel hoe verontwaardig hy is. Die man het nie geweet dat hierdie klant een van Jehovah se Getuies is nie.

Die Getuie het verduidelik dat dit vir die hele gesin baie nuttig sou wees as die vrou met haar Bybellesse aanhou. Dan kon sy sommer tuis al begin om Bybelbeginsels toe te pas. Daar is ook vir die man gesê dat hy self daarby baat kan vind as hy van God se Koninkryk leer.

Wat was die resultaat van hierdie bespreking? Die man se vrou het meer vryheid gehad om die Bybel te bestudeer, en hy het besluit om sy gesin na hulle oorspronklike tuiste terug te neem. Daar het die vrou geestelik vooruitgang gemaak en het sy ’n ongedoopte Koninkryksverkondiger geword. Haar man het ook ’n Bybelstudie aanvaar, en die hele gesin het die Christelike vergaderinge begin bywoon.

[Voetnoot]

[Venster op bladsy 8]

OORSIG 1993-diensjaar

VERKONDIGERHOOGTEPUNT: 116 576

VERHOUDING: 1 Getuie vir elke 549

GEDENKMAALOPKOMS: 357 388

GEMIDDELDE PIONIERVERKONDIGERS: 22 705

GEMIDDELDE BYBELSTUDIES: 94 370

AANTAL GEDOOP: 7 559

AANTAL GEMEENTES: 3 332

TAKKANTOOR: MANILA

[Prent op bladsy 9]

Getuieniswerk op die markplein lewer goeie resultate

[Prent op bladsy 9]

Wagtoringgenootskap se takkantoor in Manila