Jou afgestorwe dierbares—Sal jy hulle weer sien?
JOHN was net nege toe sy ma gesterf het. Later het hy vertel wat by die roukamer gebeur het: “Ek het vir haar ’n prentjie geteken en ’n kort briefie daarop geskryf waarin ek haar gevra het om in die hemel op ons almal te wag. Ek het dit aan Pappa gegee om dit saam met haar in die doodskis te plaas, en hoewel sy dood was, dink ek graag dat sy daardie laaste boodskap van my gekry het.”—How It Feels When a Parent Dies, deur Jill Krementz.
Daar kan geen twyfel wees dat John sy ma innig liefgehad het nie. Nadat hy haar goeie eienskappe beskryf het, het hy gesê: “Miskien wil ek net nie die slegte dinge onthou nie, maar ek kan aan niks slegs omtrent haar dink nie. Sy was die mooiste vrou wat ek in my hele lewe gesien het.”
Soos John het baie mense goeie herinneringe van hulle afgestorwe dierbares en erken hulle dat hulle ’n emosionele behoefte het om hulle weer te sien. Edith, wie se 26-jarige seun aan kanker gesterf het, het gesê: “Ek wil glo dat my seun êrens bestaan, maar ek weet nie waar nie. Sal ek hom weer sien? Ek weet nie, maar ek hoop ek sal.”
Die mens se liefdevolle Skepper is beslis nie ongevoelig vir hierdie normale menslike begeerte nie. Dit is waarom hy beloof het dat die tyd sal aanbreek wanneer miljoene met hulle afgestorwe dierbares herenig sal word. God se Woord bevat talle verwysings na hierdie belofte van ’n komende opstanding van die dooies.—Jesaja 26:19; Daniël 12:2, 13; Hosea 13:14; Johannes 5:28, 29; Openbaring 20:12, 13.
Wie word na die hemel opgewek?
Kom ons kyk na John wat hoop dat sy geliefde moeder in die hemel op hom wag. Baie kerkgangers het hierdie hoop of beskouing. In ’n poging om sulke opvattings te steun, pas geestelikes en sommige maatskaplike werkers Bybeltekste verkeerd toe.
’n Deskundige op die gebied van hulp aan bedroefde mense, dr. Elisabeth Kübler-Ross, het byvoorbeeld in haar boek On Children and Death gesê: “Wanneer ons sterf, beteken dit net dat ons ons liggaam weggooi soos ons ’n ou, verslete jas sal weggooi of uit een vertrek na ’n ander vertrek loop. In Prediker 12:7 lees ons: ‘Die stof sal na die aarde terugkeer soos dit gewees het, en die gees sal na God terugkeer wat dit gegee het.’ Jesus het gesê: ‘Ek gaan om vir julle plek te berei, sodat julle ook kan wees waar Ek is.’ En aan die dief aan die kruis: ‘Vandag sal jy saam met My in die Paradys wees.’”
Beteken die tekste hierbo werklik dat ons afgestorwe dierbares nou lewe en in die hemel op ons wag? Laat ons die tekste van naderby beskou deur met Prediker 12:7 te begin. Die wyse man wat hierdie woorde geskryf het, wou natuurlik nie dít weerspreek wat hy reeds in dieselfde Bybelboek gesê het nie: “Die lewendes weet dat hulle moet sterwe, maar die dooies weet glad niks nie” (Prediker 9:5). Hy het die dood van die mensdom oor die algemeen bespreek. Is dit redelik om te glo dat alle erkende ateïste en geharde misdadigers by hulle dood na God terugkeer? Hoegenaamd nie. Trouens, dit kan nie van een van ons gesê word nie, ongeag of ons meen dat ons goed of sleg is. Hoe kan daar gesê word dat ons na God terugkeer, aangesien nie een van ons al saam met hom in die hemel was nie?
Wat het die Bybelskrywer dan bedoel deur te sê dat “die gees na God terugkeer” by die dood? Deur die Hebreeuse woord te gebruik wat met “gees” vertaal word, het hy nie na iets unieks verwys wat een mens van ’n ander onderskei nie. Dieselfde geïnspireerde Bybelskrywer verduidelik eerder in Prediker 3:19 dat mense en diere ‘almal slegs een gees het’ (NW). Hy het klaarblyklik bedoel dat “gees” die lewenskrag in die selle is waaruit die fisiese liggame van mense en diere bestaan. Ons het nie hierdie gees direk van God af ontvang nie. Dit is tydens bevrugting, en toe ons later gebore is, deur ons menseouers aan ons oorgedra. Hierdie gees reis ook nie letterlik deur die buitenste ruimte om by die dood na God terug te keer nie. Die uitdrukking ‘die gees keer na God terug’ is beeldspraak wat beteken dat ’n dooie mens se vooruitsig op ’n toekomstige lewe nou by God berus. Dit is hy wat sal besluit wie hy sal onthou en uiteindelik sal opwek. Kyk self hoe duidelik die Bybel dit in Psalm 104:29, 30 (NW) toon.
Jehovah God het bepaal dat ’n beperkte getal getroue navolgers van Christus, slegs 144 000, tot hemelse lewe as geesseuns van God opgewek sal word (Openbaring 14:1, 3). Hulle vorm saam met Christus ’n hemelse regering tot seëning van die mensdom op aarde.
Die eerstes wat hiervan te wete gekom het, was Jesus se getroue apostels, aan wie hy gesê het: “In die huis van my Vader is daar baie wonings; as dit nie so was nie, sou Ek dit vir julle gesê het. Ek gaan om vir julle plek te berei. En as Ek gegaan en vir julle plek berei het, kom Ek weer en sal julle na My toe neem, sodat julle ook kan wees waar Ek is” (Johannes 14:2, 3). Daardie apostels en ander vroeë Christene het gesterf en moes in ’n toestand van onbewustheid in die dood wag totdat Jesus sou kom om hulle met ’n hemelse opstanding te beloon.
Opstanding tot die lewe op die aarde
Maar wat van Jesus se belofte aan die misdadiger wat langs hom gesterf het? Soos baie Jode van daardie tyd het hierdie man geglo dat God ’n Messias sou stuur wat ’n koninkryk sou oprig en vrede en veiligheid vir die Joodse nasie op die aarde sou herstel. (Vergelyk 1 Konings 4:20-25 met Lukas 19:11; 24:21 en Handelinge 1:6.) Daarbenewens het die kwaaddoener die geloof uitgespreek dat Jesus dié Een is wat deur God gekies is om die Koning te wees. Jesus se naderende dood as ’n veroordeelde man het dit egter op daardie tydstip onwaarskynlik laat lyk. Dit is waarom Jesus die misdadiger gerusgestel het deur Sy belofte met hierdie woorde in te lei: “Voorwaar, ek sê vir jou vandag: Jy sal saam met my in die Paradys wees.”—Lukas 23:42, 43, NW.
Bybelvertalings wat ’n komma voor die woord “vandag” invoeg, skep ’n probleem vir mense wat Jesus se woorde wil verstaan. Jesus het nie daardie selfde dag na enige paradys toe gegaan nie. Hy was eerder drie dae lank in ’n toestand van onbewustheid in die dood tot God hom opgewek het. Selfs ná Jesus se opstanding en hemelvaart moes hy aan sy Vader se regterhand wag tot die tyd vir hom aangebreek het om as Koning oor die mensdom te heers (Hebreërs 10:12, 13). Binnekort sal Jesus se Koninkryksheerskappy vir die mensdom verligting bring en die hele aarde in ’n paradys omskep (Lukas 21:10, 11, 25-31). Dan sal hy sy belofte aan daardie misdadiger vervul deur hom tot die lewe op die aarde op te wek. En Jesus sal saam met die man wees in die sin dat Hy hom sal help deur in al sy behoeftes te voorsien, waaronder die behoefte om sy lewenswyse in ooreenstemming met God se regverdige wette te bring.
Baie sal ’n opstanding kry
Soos met daardie berouvolle misdadiger sal die opstanding van die meeste mense hier op die aarde plaasvind. Dit is in ooreenstemming met God se voorneme toe hy die mens geskep het. Die eerste man en vrou is in ’n paradystuin geplaas en aangesê om die aarde te onderwerp. As hulle gehoorsaam aan God gebly het, sou hulle nooit oud geword en gesterf het nie. Op God se bestemde tyd sou die hele aarde onderwerp en deur Adam en sy volmaakte nakomelinge in ’n wêreldwye paradys omskep gewees het.—Genesis 1:28; 2:8, 9.
Maar omdat Adam en Eva moedswillig gesondig het, het hulle die dood oor hulleself en hulle toekomstige nakomelinge gebring (Genesis 2:16, 17; 3:17-19). Dit is waarom die Bybel sê: ‘Deur een mens [Adam] het die sonde in die wêreld ingekom en deur die sonde die dood, en so het die dood tot alle mense deurgedring, omdat almal gesondig het.’—Romeine 5:12.
Daar was nog net een mens wat sonder oorgeërfde sonde gebore is. Dit was die volmaakte Seun van God, Jesus Christus, wie se lewe uit die hemel na die baarmoeder van ’n Joodse maagd, Maria, oorgeplaas is. Jesus het sondeloos gebly en het dit nie verdien om doodgemaak te word nie. Sy dood het dus waarde as ’n losprys ten behoewe van “die sonde van die wêreld” (Johannes 1:29; Mattheüs 20:28). Dit is waarom Jesus kon sê: “Ek is die opstanding en die lewe; wie in My glo, sal lewe al het hy ook gesterwe.”—Johannes 11:25.
Ja, jy kán derhalwe die vooruitsig koester om met jou afgestorwe dierbares herenig te word, maar dit vereis dat jy geloof in Jesus as jou Verlosser beoefen en hom as God se aangestelde Koning gehoorsaam. Binnekort sal God se Koninkryk alle boosheid van die aarde af verwyder. Alle mense wat weier om hulle aan die heerskappy daarvan te onderwerp, sal vernietig word. Maar onderdane van God se Koninkryk sal dit oorleef en hulle besig hou met die werk om hierdie aarde in ’n paradys te omskep.—Psalm 37:10, 11; Openbaring 21:3-5.
Dan sal die opwindende tyd aanbreek vir die opstanding om te begin. Sal jy daar wees om die dooies terug te verwelkom? Dit hang alles af van wat jy nou doen. Wonderlike seëninge wag op almal wat hulle nou aan die heerskappy van Jehovah se Koninkryk deur sy Seun, Jesus Christus, onderwerp.