By watter tafel sit jy aan?
“Julle kan nie deel hê aan die tafel van die Here en ook aan die tafel van die duiwels nie.”—1 KORINTHIËRS 10:21.
1. Watter tafels is voor ons gedek, en watter waarskuwing gee die apostel Paulus daaromtrent?
HIERDIE geïnspireerde woorde van die apostel Paulus toon dat daar twee figuurlike tafels voor die mensdom gedek is. Elke tafel word geïdentifiseer deur die soort simboliese voedsel wat daarop neergesit word, en ons almal eet by die een of by die ander. Maar as ons God wil behaag, kan ons nie by sy tafel aansit en terselfdertyd aan die tafel van die duiwels peusel nie. Die apostel Paulus het gewaarsku: “Die heidene wat dit offer, [offer] aan duiwels . . . en nie aan God nie. En ek wil nie hê dat julle met die duiwels gemeenskap moet hou nie. Julle kan nie die beker van die Here drink en ook die beker van die duiwels nie. Julle kan nie deel hê aan die tafel van die Here en ook aan die tafel van die duiwels nie.”—1 Korinthiërs 10:20, 21.
2. (a) Watter tafel van Jehovah het in die dae van eertydse Israel bestaan, en wie het in die gemeenskapsoffers gedeel? (b) Wat beteken dit om vandag aan Jehovah se tafel deel te hê?
2 Paulus se woorde laat ons aan die gemeenskapsoffers dink wat die eertydse Israeliete onder Jehovah se Wet geoffer het. Die altaar van God is ’n tafel genoem, en daar is gesê dat die een wat die dier gebring het om geoffer te word gemeenskap met Jehovah en die priesters gehou het. In watter sin? Eerstens het Jehovah aan die offerande deel gehad omdat die bloed op sy altaar gesprinkel en die vet deur die vlamme daaronder verteer is. Tweedens het die priester daaraan deel gehad omdat hy (en sy gesin) die gebraaide bors en regterboud van die geofferde dier geëet het. En derdens het die een wat die offerande gebring het daaraan deel gehad deur die res te eet (Levitikus 7:11-36, NW). As ons vandag aan Jehovah se tafel deel het, beteken dit dat ons hom die soort aanbidding gee wat hy verlang, soos Jesus en sy apostels gedoen het. Om dít te doen, moet ons die geestelike voedsel inneem wat Jehovah deur sy Woord en organisasie voorsien. Die Israeliete, wat spesiale gemeenskap met Jehovah aan sy tafel gehou het, is verbied om aan duiwels offerandes aan hulle tafel te bring. Dieselfde Goddelike verbod geld vir geestelike Israeliete en hulle metgeselle, die “ander skape”.—Johannes 10:16.
3. Hoe kan iemand hom in ons dag daaraan skuldig maak om aan die tafel van die duiwels deel te hê?
3 Hoe kan iemand hom in ons dag daaraan skuldig maak om aan die tafel van die duiwels deel te hê? Deur die belange te bevorder van enigiets wat in stryd met Jehovah is. Die tafel van die duiwels sluit alle demoniese propaganda in, wat daarop gemik is om ons te mislei en ons van Jehovah af weg te lok. Wie sal sy hart en verstand met sulke gif wil voed? Ware Christene weier om deel te hê aan die offerandes wat die meeste mense vandag aan die gode van oorlog en rykdom bring.—Mattheüs 6:24.
Vermy “die tafel van die duiwels”
4. Watter vraag moet ons almal beantwoord, en waarom sal ons nie doelbewus aan die tafel van die duiwels deel wil hê nie?
4 Die vraag wat ons almal moet beantwoord, is: By watter tafel sit ek aan? Ons moet die feit onder die oë sien dat ons verplig is om by die een of by die ander tafel aan te sit. (Vergelyk Mattheüs 12:30.) Ons sal nie doelbewus by die tafel van die duiwels wil aansit nie. As ons dít doen, sal ons die enigste ware en lewende God, Jehovah, se guns verloor. As ons daarenteen slegs aan Jehovah se tafel voedsel inneem, lei dit tot ons ewige lewe in geluk! (Johannes 17:3). Daar word gesê dat ’n mens is wat jy eet. Enigeen wat fisies en verstandelik gesond wil bly, moet dus sy eetgewoontes dophou. Net soos vetryke kafkos, hoewel dit met chemiese bymiddels smaaklik voorberei word, nie daartoe bydra dat ons fisies gesond bly nie, is die propaganda van hierdie wêreld wat met demoniese idees geurig opgedis word figuurlik gesproke nadelige kafkos wat ons verstand sal verderf.
5. Hoe kan ons vandag voorkom dat ons demoniese leringe inneem?
5 Die apostel Paulus het voorspel dat mense gedurende die laaste dae deur die “leringe van duiwels” mislei sou word (1 Timotheüs 4:1). Sulke demoniese leringe word nie net in valse godsdiensopvattings aangetref nie, maar word ook op ander maniere wyd en syd versprei. Ons moet byvoorbeeld noukeurig let op die boeke en tydskrifte wat ons en ons kinders lees sowel as op die televisieprogramme, toneelstukke en rolprente waarna ons kyk (Spreuke 14:15). As ons fiksie vir ontspanning lees, moet ons ons afvra of dit sinlose geweld, ongeoorloofde seks of okkulte gebruike bevat. As ons nie-fiksie lees om ons kennis te verbreed, moet ons ons afvra of dit ’n filosofie of lewenswyse bevorder wat “nie volgens Christus” is nie (Kolossense 2:8). Bevat dit sinlose bespiegelinge of staan dit betrokkenheid by wêreldse maatskaplike bewegings voor? Moedig dit die vasbeslotenheid aan om baie ryk te word? (1 Timotheüs 6:9). Is dit ’n publikasie wat op ’n subtiele manier verdelende, onchristelike leringe aanbied? As die antwoord ja is en ons aanhou om sulke materiaal te lees of daarna te kyk, loop ons gevaar om by die tafel van die duiwels aan te sit. Vandag is daar honderdduisende publikasies wat wêreldse filosofieë bevorder wat oënskynlik so insiggewend en aktueel is (Prediker 12:12). Maar niks van hierdie propaganda is werklik nuut nie; dit strek ook nie tot ’n mens se voordeel en vooruitgang nie, net soos dit wat Satan op so ’n listige wyse aan Eva gesê het ook nie tot haar vooruitgang gelei het nie.—2 Korinthiërs 11:3.
6. Hoe moet ons reageer as Satan ons nooi om aan sy demoniese kafkos te proe?
6 Hoe moet ons dus reageer as Satan ons nooi om aan sy demoniese kafkos te proe? Net soos Jesus gereageer het toe hy deur Satan versoek is om klippe in brood te verander. Jesus het geantwoord: “Daar is geskrywe: Die mens sal nie van brood alleen lewe nie, maar van elke woord wat deur die mond van God uitgaan.” En toe die Duiwel Jesus “al die koninkryke van die wêreld en hulle heerlikheid” aangebied het as hy sou neerval en Satan aanbid, het Jesus geantwoord: “Gaan weg, Satan! want daar is geskrywe: Die Here jou God moet jy aanbid en Hom alleen dien.”—Mattheüs 4:3, 4, 8-10.
7. Waarom bedrieg ons onsself as ons dink dat ons met goeie gevolg by Jehovah se tafel sowel as by die tafel van die duiwels kan aansit?
7 Jehovah se tafel en die tafel wat deur sy demoniese vyande gedek word, kan nooit met mekaar versoen word nie! O ja, daar is al probeer om dit te doen. Dink aan die eertydse Israeliete in die dae van die profeet Elia. Die volk het gesê dat hulle Jehovah aanbid, maar het geglo dat ander gode, soos Baäl, voorspoed sou bring. Elia het die volk genader en gesê: “Hoe lank hink julle op twee gedagtes? As die HERE God is, volg Hom na; en as Baäl dit is, volg hom na!” Dit is duidelik dat die Israeliete “eers op die een been en dan op die ander” gehink het (1 Konings 18:21, The Jerusalem Bible). Elia het die Baälpriesters uitgedaag om die goddelikheid van hulle god te bewys. Die God wat vuur uit die hemel op ’n offerande kon laat neerdaal, sou die ware God wees. Ondanks groot inspanning het die Baälpriesters in hulle pogings misluk. Toe het Elia bloot gebid: “HERE, antwoord my, sodat hierdie volk kan erken dat U, HERE, God is.” Dadelik het vuur van Jehovah uit die hemel neergedaal en die diereoffer wat met water deurweek was, verteer. Die volk is deur die oortuigende vertoning van Jehovah se Godheid aangevuur om Elia te gehoorsaam en al 450 Baälprofete dood te maak (1 Konings 18:24-40). Vandag moet ons Jehovah eweneens as die ware God erken en vasbeslote wees om slegs by sy tafel te gaan aansit as ons dit nie reeds doen nie.
‘Die getroue dienskneg’ bedien aan Jehovah se tafel
8. Watter dienskneg het Jesus voorspel sou hy tydens sy teenwoordigheid gebruik om sy dissipels geestelik te voed, en wie is hierdie dienskneg?
8 Die Heer Jesus Christus het voorspel dat ’n “getroue en verstandige dienskneg” gedurende sy teenwoordigheid geestelike voedsel aan sy dissipels sou voorsien: “Gelukkig is daardie dienskneg vir wie sy heer, as hy kom, op hierdie manier besig sal vind. Voorwaar Ek sê vir julle, hy sal hom oor al sy besittings aanstel” (Mattheüs 24:45-47). Hierdie dienskneg is nie die een of ander individu nie, maar die klas toegewyde, gesalfde Christene. Hierdie klas het die beste geestelike voedsel vir die gesalfde oorblyfsel sowel as vir die “groot menigte” op Jehovah se tafel voorgesit. Die groot menigte, wat nou meer as viermiljoen tel, het hulle by die gesalfde oorblyfsel geskaar ten gunste van die universele soewereiniteit van Jehovah God en sy Koninkryk waardeur hy sy heilige naam sal verheerlik.—Openbaring 7:9-17.
9. Watter instrument gebruik die diensknegklas om geestelike voedsel aan Jehovah se Getuies te voorsien, en hoe word hulle geestelike feesmaal profeties beskryf?
9 Hierdie getroue diensknegklas gebruik die Wagtoring- Bybel- en Traktaatgenootskap om geestelike voedsel aan al Jehovah se Getuies te voorsien. Terwyl die Christendom en die res van hierdie stelsel van dinge uitgehonger is weens die gebrek aan lewegewende geestelike voedsel, geniet Jehovah se volk ’n geestelike feesmaal (Amos 8:11). Dit is ter vervulling van die profesie in Jesaja 25:6: “Die HERE van die leërskare sal op hierdie berg vir al die volke berei ’n maaltyd van vetspyse, ’n maaltyd van ou wyn, van vetspyse vol murg, van gesuiwerde ou wyn.” Soos verse 7 en 8 toon, sal hierdie fees vir ewig voortduur. Wat ’n seën is dit tog nou vir almal in Jehovah se sigbare organisasie, en wat ’n seën sal dit steeds in die toekoms wees!
Pas op vir die giftige voedsel op die tafel van die duiwels
10. (a) Watter soort voedsel word deur die slegte diensknegklas voorsien, en wat is hulle beweegrede? (b) Hoe behandel die slegte diensknegklas hulle gewese medediensknegte?
10 Die voedsel op die tafel van die duiwels is giftig. Beskou byvoorbeeld die voedsel wat deur die slegte diensknegklas en die afvalliges voorsien word. Dit is nie voedsaam of opbouend nie en is nie heilsaam nie. Dit kan nie wees nie, want die afvalliges het opgehou om by Jehovah se tafel aan te sit. Alle eienskappe van die nuwe persoonlikheid wat hulle aangekweek het, het gevolglik verdwyn. Hulle word nie deur die heilige gees beweeg nie, maar deur hatige verbitterdheid. Hulle het net een obsessie—om hulle gewese medediensknegte te slaan, soos Jesus voorspel het.—Mattheüs 24:48, 49.
11. Wat het C. T. Russell oor ’n mens se keuse van geestelike voedsel geskryf, en hoe het hy dié beskryf wat Jehovah se tafel verlaat?
11 Reeds in 1909 het die destydse president van die Wagtoringgenootskap, C. T. Russell, byvoorbeeld oor dié geskryf wat Jehovah se tafel verwerp het en toe hulle gewese medediensknegte begin mishandel het. The Watch Tower van 1 Oktober 1909 het gesê: “Dit wil voorkom asof almal wat hulle van die Genootskap en sy werk afskei, pleks van self vooruitgang te maak of ander in die geloof en in die bevallighede van die gees op te bou, net die teenoorgestelde doen—hulle probeer die Saak wat hulle voorheen gedien het skade aandoen, en hulle sink, met meer of minder ophef, geleidelik weg in die vergetelheid en doen net hulleself en ander wat ’n soortgelyke twisgierige gees openbaar skade aan. . . . As party dink dat hulle net sulke goeie of beter voedsel aan ander tafels kan kry of dat hulle self net sulke goeie of beter voedsel kan voorsien—laat hulle hulle weg volg. . . . Maar hoewel ons ander hulle gang laat gaan om waar ook al voedsel en lig te vind wat hulle tevrede stel, slaan dié wat ons teenstanders word vreemd genoeg ’n heel ander weg in. Pleks van mans genoeg te wees om te sê: ‘Ek het iets gevind wat ek verkies; totsiens!’ openbaar hulle woede, kwaadwilligheid, haat en onenigheid, ‘werke van die vlees en van die duiwel’ soos ons nog nooit gesien het wêreldse mense openbaar nie. Dit lyk asof hulle besiel is met kranksinnigheid, met Sataniese hidrofobie [hondsdolheid]. Party van hulle val ons aan en beweer dan dat ons die aanvalwerk gedoen het. Hulle is bereid om veragtelike valshede kwyt te raak en te skryf en verlaag hulle tot gemeenheid.”
12. (a) Hoe slaan afvalliges hulle medediensknegte? (b) Waarom is dit gevaarlik om uit nuuskierigheid die afvalliges se lektuur te lees?
12 Ja, afvalliges publiseer lektuur wat van verdraaidhede, halwe waarhede en openlike leuens gebruik maak. Hulle staan selfs by die Getuies se streekbyeenkomste en probeer om die niksvermoedendes deur hulle slinksheid te vang. Daarom sal dit gevaarlik wees as ons toelaat dat ons nuuskierigheid ons daartoe beweeg om sulke lektuur te lees of na hulle lastertaal te luister! Hoewel ons dalk nie dink dat dit vir ons persoonlik gevaar inhou nie, loop ons nogtans ’n risiko. Waarom? Om maar een ding te noem, sommige van die afvalliges se lektuur bevat valshede wat deur middel van “mooipraatjies” en “verdigte woorde” aangebied word (Romeine 16:17, 18, NAV; 2 Petrus 2:3). Is dit nie wat jy van die tafel van die duiwels te wagte kan wees nie? En hoewel die afvalliges dalk ook sekere feite verkondig, word dit gewoonlik uit verband geruk met die doel om ander van Jehovah se tafel af weg te lok. Al hulle lektuur kritiseer net en is afbrekend! Niks daarvan is opbouend nie.
13, 14. Watter vrugte bring die afvalliges en hulle propaganda voort?
13 Jesus het gesê: “Aan hulle vrugte sal julle hulle ken” (Mattheüs 7:16). Watter vrugte bring die afvalliges en hulle publikasies dan voort? Hulle propaganda word deur vier dinge gekenmerk. (1) Slimmigheid. Efesiërs 4:14 sê hulle is ‘listig om deur sluheid tot dwaling te bring’. (2) Trotse intelligensie. (3) Gebrek aan liefde. (4) Oneerlikheid in verskillende vorme. Dít is die bestanddele van die voedsel op die tafel van die duiwels, wat alles bedoel is om die geloof van Jehovah se volk te ondermyn.
14 En daar is nog ’n aspek. Waarheen het die afvalliges teruggekeer? In baie gevalle het hulle teruggekeer na die duisternis van die Christendom en sy leerstellings, soos die opvatting dat alle Christene hemel toe gaan. Daarbenewens neem die meeste nie meer ’n vaste skriftuurlike standpunt in ten opsigte van bloed, neutraliteit en die nodigheid daarvan om van God se Koninkryk te getuig nie. Ons het egter die duisternis van Babilon die Grote ontvlug, en ons wil nooit daarheen terugkeer nie (Openbaring 18:2, 4). Waarom sal ons, as lojale knegte van Jehovah, selfs net vlugtig wil kyk na die propaganda wat versprei word deur diegene wat nie by Jehovah se tafel wil aansit nie en wat nou dié deur wie ons gehelp word om “gesonde woorde” in te neem mondelings slaan?—2 Timotheüs 1:13.
15. Watter Bybelbeginsel help ons om die verstandige weg te kies wanneer ons hoor van aantygings wat die afvalliges maak?
15 Party is dalk nuuskierig oor die aantygings wat die afvalliges maak. Maar ons moet die beginsel in Deuteronomium 12:30, 31 ter harte neem. Hier het Jehovah die Israeliete deur Moses gewaarsku oor wat hulle moet vermy nadat hulle die heidense inwoners van die Beloofde Land uitgedryf het. “Neem jou dan in ag dat jy nie, agter hulle aan, verstrik word nadat hulle voor jou uit verdelg is nie, en dat jy nie na hulle gode vra en sê nie: Hoe het hierdie nasies hulle gode gedien?—dat ek ook so kan doen. So mag jy nie handel met die HERE jou God nie.” Ja, Jehovah God weet hoe die mens se nuuskierigheid werk. Dink aan Eva en ook aan Lot se vrou! (Lukas 17:32; 1 Timotheüs 2:14). Laat ons nooit gehoor gee aan wat die afvalliges sê of doen nie. Laat ons eerder besig wees om mense op te bou en om getrou by Jehovah se tafel aan te sit!
Slegs Jehovah se tafel sal oorbly
16. (a) Wat sal binnekort met Satan, sy demone en die figuurlike tafel gebeur waarby die wêreld se nasies aansit? (b) Wat sal met alle mense gebeur wat aanhou om by die tafel van die duiwels aan te sit?
16 Die groot verdrukking gaan binnekort uitbreek en vinnig tot ’n klimaks vorder in “die oorlog van daardie groot dag van die almagtige God” (Openbaring 16:14, 16). Dit sal ’n hoogtepunt bereik wanneer Jehovah hierdie stelsel van dinge en die figuurlike tafel vernietig waarby die wêreld se nasies aangesit het. Jehovah sal ook die hele onsigbare organisasie van Satan die Duiwel met sy hordes demone vernietig. Diegene wat aangehou het om by Satan se geestelike tafel, die tafel van die duiwels, aan te sit, sal gedwing word om by ’n letterlike maaltyd aan te sit, nee, nie as gaste nie, maar as die hoofgereg—tot hulle vernietiging!—Sien Esegiël 39:4; Openbaring 19:17, 18.
17. Watter seëninge sal diegene geniet wat slegs by Jehovah se tafel aansit?
17 Slegs Jehovah se tafel sal oorbly. Diegene wat met waardering daarby aansit, sal behoue bly en bevoorreg wees om vir ewig daarby aan te sit. Nooit weer sal hulle deur enige voedseltekorte bedreig word nie (Psalm 67:7; 72:16). Hulle sal Jehovah God in volmaakte gesondheid in die Paradys dien! Die aangrypende woorde van Openbaring 21:4 sal uiteindelik op ’n luisterryke manier in vervulling gaan: “God sal al die trane van hulle oë afvee, en daar sal geen dood meer wees nie; ook droefheid en geween en moeite sal daar nie meer wees nie, want die eerste dinge het verbygegaan.” Met teenkanting wat dan tot die verlede behoort, sal Jehovah God se universele soewereiniteit oral tot in alle ewigheid heers terwyl Goddelike guns sonder einde uitgestort word op die vrygekoopte mensdom wat die Paradysaarde bewoon. Om hierdie beloning te verkry, moet ons almal vasbeslote wees om slegs deel te hê aan Jehovah se tafel, waarop daar ’n oorvloed van die beste geestelike voedsel is!
Hoe sal jy antwoord?
◻ Hoe kan ons voorkom dat ons deur demoniese leringe mislei word?
◻ Waarom kan ons nie met goeie gevolg by Jehovah se tafel sowel as by die tafel van die duiwels aansit nie?
◻ Watter soort voedsel voorsien afvalliges?
◻ Waarom is dit gevaarlik om nuuskierig te wees oor die aantygings wat afvalliges maak?
◻ Watter vrugte bring die afvalliges voort?
[Prent op bladsy 10]
Daar is ’n oorvloed van die beste geestelike voedsel op Jehovah se tafel