Waarom verkeer die wêreld in ’n greep van vrees?

WIE wil in vrees lewe? Die deursneemens begeer veiligheid, met geen bedreiging vir sy lewe of besittings nie. Daarom verlaat baie mense misdaadgeteisterde gebiede. Maar daar bestaan oral redes vir vrees.

Die gevare van kernwapens en reaktorongelukke laat die vrees ontstaan dat die mensdom vernietig gaan word. Geweld wat die hoogte inskiet, laat vrees toeneem. Baie mense vrees dat vigs die dodelikste epidemie van die eeu sal word. Die vernietiging van ons omgewing is nog ’n oorsaak van vrees. Is hierdie vrese besonder betekenisvol? En kan ons hoop om ooit in ’n wêreld sonder sulke vrees te leef?

Wêreldwye vrees is betekenisvol

Die wydverspreide vrees van vandag is betekenisvol vanweë dít wat in die Bybel voorspel is. In Jesus Christus se profesie oor die laaste dae het hy melding gemaak van toestande wat vrees sou veroorsaak. Hy het gesê: “Die een nasie sal teen die ander opstaan en die een koninkryk teen die ander; en daar sal hongersnode wees en pessiektes en aardbewings op verskillende plekke.” Jesus het ook gepraat van ‘die vermeerdering van ongeregtigheid’. Sedert 1914 het ongeëwenaarde oorloë, hongersnode, aardbewings en ongeregtigheid groot vrees en lewensverlies veroorsaak.—Mattheüs 24:7-14.

Selfs mense se gesindhede gee deesdae aanleiding tot vrees. In 2 Timotheüs 3:1-4 lees ons die apostel Paulus se profetiese woorde: “In die laaste dae [sal daar] swaar tye . . . kom. Want die mense sal liefhebbers van hulleself wees, geldgieriges, grootpraters, trotsaards, lasteraars, ongehoorsaam aan hulle ouers, ondankbaar, onheilig, sonder natuurlike liefde, onversoenlik, kwaadsprekers, bandeloos, wreed, sonder liefde vir die goeie, verraaiers, roekeloos, verwaand, meer liefhebbers van genot as liefhebbers van God.” Aangesien ons in hierdie laaste dae deur sulke mense omring word, is dit geen wonder dat daar soveel vrees is nie!

Wat hierdie wêreld kan verwag

Jesus het hierdie tydperk met die laaste dae van die wêreld van Noag se tyd vergelyk. Daar was toe ongetwyfeld groot vrees, want die Bybel se historiese verslag sê: “Die aarde was verdorwe voor die aangesig van God, en die aarde was vol geweld.” God het gevolglik vir Noag gesê: “Die einde van alle vlees het volgens my besluit gekom; want die aarde is . . . vervul met geweld” (Genesis 6:11, 13). Daardie bose wêreld was so gewelddadig dat God dit deur middel van die wêreldomvattende Vloed beëindig het. Maar uit liefde het Jehovah God die regverdige Noag en sy gesin bewaar.—2 Petrus 2:5.

Wat kan die huidige gewelddadige wêreld gevolglik verwag? Wel, God verafsku die gewelddadige minagting van ander se welstand. Dit blyk uit die woorde van die psalmis: “Die HERE toets die regverdige; maar sy siel haat die goddelose en die wat geweld liefhet” (Psalm 11:5). Jehovah het ’n einde gemaak aan die gewelddadige wêreld van Noag se dag. Moet ons dan nie verwag dat God ’n einde aan hierdie wêreld sal maak wat deur vreesaanjaende geweld geteister word nie?

God het die apostel Petrus geïnspireer om van Christus se teenwoordigheid te praat en onheil vir die huidige goddelose wêreld te voorspel. Hy het geskryf: “Aan die einde van die dae [sal daar] spotters . . . kom wat volgens hulle eie begeerlikhede wandel en sê: Waar is die belofte van sy wederkoms? Want vandat die vaders ontslaap het, bly alles soos dit was van die begin van die skepping af.” Petrus het toe die term “hemele” gebruik om die stelsel van onvolmaakte heerskappy oor die mensdom voor te stel en die woord “aarde” vir die onregverdige mensegemeenskap. “Want”, het hy gesê, “moedswillig vergeet hulle dat daar van lankal af hemele was en ’n aarde wat uit water en deur water ontstaan het deur die woord van God, waardeur die toenmalige wêreld [van Noag se dag] met water oorstroom is en vergaan het. Maar die teenswoordige hemele en die aarde is deur dieselfde woord as ’n skat weggelê en word vir die vuur bewaar teen die dag van die oordeel en die verderf van die goddelose mense.”—2 Petrus 3:3-7.

Paulus het in ’n soortgelyke trant daarop gewys dat Christus en sy magtige engele “wraak [sal] uitoefen op die wat God nie ken nie en op die wat aan die evangelie van onse Here Jesus nie gehoorsaam is nie. Hulle sal as straf ondergaan ’n ewige verderf” (2 Thessalonicense 1:6-9). Die laaste boek van die Bybel praat van die versameling van die nasies vir “die oorlog van daardie groot dag van die almagtige God” en verseker ons dat Jehovah “die verderwers van die aarde [sal] verderf”.—Openbaring 11:18; 16:14-16.

’n Tyd vir vreugde, nie vrees nie

Pleks van verskrik te wees oor wat die Bybel vir hierdie wêreld voorspel, het regskape mense rede tot vreugde. Jehovah sal binnekort ’n einde aan hierdie goddelose wêreld maak, maar dit sal gedoen word tot voordeel van diegene wat geregtigheid liefhet. Wat sal ná die Goddelike beëindiging van die huidige stelsel van dinge kom? ’n Nuwe stelsel onder die hemelse Koninkryk van God, waarvoor Jesus sy volgelinge geleer bid het! Hy het gesê: “Só moet julle dan bid: Onse Vader wat in die hemele is, laat u Naam geheilig word; laat u koninkryk kom; laat u wil geskied, soos in die hemel net so ook op die aarde” (Mattheüs 6:9, 10). Watter veranderinge kan ons verwag wanneer God se wil op die aarde gedoen word?

Oorlog en die gruwels daarvan sal tot die verlede behoort. Psalm 46:10 sê: ‘Jehovah God laat die oorloë ophou tot by die einde van die aarde, hy verbreek die boog en slaan die spies stukkend en verbrand die strydwaens met vuur.’ Dan sal die mense “sit elkeen onder sy wingerdstok en onder sy vyeboom, sonder dat iemand hulle verskrik”.—Miga 4:4.

Dodelike siektes sal nie meer vrees veroorsaak en lewens eis nie. Die Goddelike belofte is: “Geen inwoner sal sê: Ek is siek nie” (Jesaja 33:24). Wat ’n rede tot vreugde is dit tog!

Vrese wat met misdaad en geweld verband hou, sal ook tot die verlede behoort. Psalm 37:10, 11 beloof: “Nog ’n klein rukkie en die goddelose sal daar nie wees nie; ja, jy sal ag gee op sy plek, maar hy sal daar nie wees nie. Die ootmoediges daarenteen sal die aarde besit en hulle verlustig oor groot vrede.”

Hoe sal die hedendaagse vrese deur ware vrede en veiligheid vervang word? Deur middel van een regverdige regering—God se Koninkryk. Met verwysing na ons tyd sê Daniël 2:44: “In die dae van dié konings sal die God van die hemel ’n koninkryk verwek wat in ewigheid nie vernietig sal word nie, en die heerskappy daarvan sal aan geen ander volk oorgelaat word nie; dit sal al daardie koninkryke verbrysel en daar ’n einde aan maak, maar self sal dit vir ewig bestaan.” Jehovah se aangestelde Koning, Jesus Christus, ‘moet as koning heers totdat God al sy vyande onder sy voete gestel het’ (1 Korinthiërs 15:25). Jesus se Duisendjarige Heerskappy sal God se oorspronklike voorneme vervul dat ’n paradysaarde vir ewig deur vreugdevolle mense bewoon moet word.—Lukas 23:43, NW; Openbaring 20:6; 21:1-5.

Op daardie Paradysaarde sal daar een gesonde vrees wees. Dit sal “die vrees van die HERE” wees (Spreuke 1:7). Trouens, ons moet nou reeds hierdie vrees hê, want dit is diepe eerbied en ontsag tesame met ’n vrees om God te mishaag omdat ons sy liefderyke goedhartigheid en goedheid waardeer. Hierdie vrees vereis algehele vertroue op Jehovah en getroue gehoorsaamheid aan hom.—Psalm 2:11; 115:11.

Vreeswekkende gebeure bewys dat ons in die laaste dae leef. Maar as ons ons liefde vir God bewys, kan ons verheug wees pleks van te vrees. Bybelprofesieë toon dat die Goddelike beëindiging van hierdie wêreld op hande is. Dit sal deur Jehovah God se beloofde nuwe wêreld van geregtigheid vervang word (2 Petrus 3:13). Onder Koninkryksheerskappy sal daar inderdaad binnekort ’n wêreld sonder ongesonde vrees wees.

[Venster op bladsy 6]

DIE KRAG VAN NET ÉÉN EKSEMPLAAR

TOMASZ, ’n jong man van Pole, het by die gereg in die moeilikheid beland sodat hy uit die land gevlug het. Hy het ses maande lank deur die hele Europa geryloop terwyl hy in ’n tent geslaap en verskillende soorte werk gedoen het. Intussen het een vraag hom deurentyd gehinder: Wat is die doel van die lewe?

Tomasz se vraag is beantwoord toe hy ’n eksemplaar van Die Wagtoring in Pools ontvang het. Hy het dit verskeie kere gelees en besef dat hierdie tydskrif die waarheid bevat waarna hy gesoek het. Tomasz het 200 kilometer ver na die Wagtoringtakkantoor in Selters/Taunus, Duitsland, geryloop. Toe hy op ’n Maandagaand daar aankom, het hy sy Wagtoring uitgehou en gesê: “Ek sal graag wil hê dat iemand vir my meer moet verduidelik oor wat in hierdie tydskrif staan. Wat moet ek doen?”

Daardie aand het twee van Jehovah se Getuies met Tomasz oor die doel van die lewe gesels en die Bybel as grondslag vir hulle bespreking gebruik. Tomasz was gretig om meer te leer en het daardie week elke dag na die takkantoor teruggegaan om die Bybel en die boek Jy kan vir ewig in die Paradys op aarde lewe te bestudeer.

Tomasz het besluit om na Pole terug te keer, hoewel hy daar voor probleme te staan kon kom. Daarom het Tomasz Vrydag, net vier dae nadat hy by die takkantoor in Selters aangekom het, na sy vaderland vertrek. Hy het dadelik saam met Jehovah se Getuies in Pole begin studeer. Tomasz het vinnig vordering gemaak en ywerig met ander begin praat oor wat hy geleer het. In Oktober 1993, net vier maande ná sy eerste besoek aan Selters, is hy as een van Jehovah se Getuies gedoop.

Net één eksemplaar van Die Wagtoring het hierdie jong man gehelp om ondersoek in te stel na die doel van die lewe!

[Prent op bladsy 7]

Onder Koninkryksheerskappy deur Jesus Christus sal die wêreld nooit weer in ’n greep van vrees verkeer nie