“Al die nasies” ontvang ’n getuienis

“Hierdie goeie nuus van die koninkryk sal in die hele bewoonde aarde verkondig word tot ’n getuienis vir al die nasies; en dan sal die einde kom.”—MATTHEÜS 24:14, NW.

1. Waarom moes Jesus se woorde wat in Mattheüs 24:14 opgeteken is vir sy volgelinge ’n skok gewees het?

WAT ’n skok moes Jesus se woorde hierbo tog nie vir sy Joodse dissipels gewees het nie! Die blote gedagte daaraan dat geheiligde Jode met “onrein” nie-Jode, “heidene”, moet gaan praat, was vir ’n Jood vreemd, selfs afstootlik.a ’n Pligsgetroue Jood sou nie eers daaraan gedink het om in ’n nie-Joodse huis in te gaan nie! Daardie Joodse dissipels het nog so baie gehad om oor Jesus, sy liefde en sy opdrag te leer. En hulle het nog baie gehad om oor Jehovah se onpartydigheid te leer.—Handelinge 10:28, 34, 35, 45.

2. (a) Hoe uitgebreid is die Getuies se bediening? (b) Watter drie basiese faktore dra tot die Getuies se vooruitgang by?

² Jehovah se Getuies het die goeie nuus onder die nasies, met inbegrip van hedendaagse Israel, verkondig en hulle verkondig dit nou onder meer nasies as ooit tevore. In 1994 doen meer as vier en ’n half miljoen Getuies die predikingswerk in sowat 230 lande. Hulle hou ongeveer vier en ’n half miljoen tuisbybelstudies met belangstellendes. Dit word gedoen ten spyte van wêreldwye vooroordeel, dikwels vanweë onkunde oor die Getuies se leerstellings en beweegredes. Wat van die vroeë Christene gesê is, kan ook van hulle gesê word: “Wat hierdie sekte betref, is dit ons bekend dat oral daarteen gespreek word” (Handelinge 28:22). Waaraan kan ons hulle suksesvolle bediening dan toeskryf? Daar is ten minste drie faktore wat tot hulle vooruitgang bydra—hulle volg die leiding van Jehovah se gees, hulle volg Christus se praktiese metodes na en hulle gebruik die regte instrumente vir doeltreffende kommunikasie.

Jehovah se gees en die goeie nuus

3. Waarom kan ons nie spog oor wat vermag is nie?

³ Spog Jehovah se Getuies oor hulle sukses asof dit te danke is aan enige besondere vermoëns wat hulle besit? Nee, want Jesus se woorde is hier van toepassing: “Wanneer julle alles gedoen het wat julle beveel is, sê dan: Ons is onverdienstelike diensknegte, want ons het gedoen wat ons verplig was om te doen.” As toegewyde, gedoopte Christene het Jehovah se Getuies vrywillig die verantwoordelikheid aanvaar om God ongeag hulle persoonlike omstandighede te dien. Vir sommige beteken dit die voltydse diens as sendelinge of as vrywilligers in takkantore en fasiliteite waar Christelike publikasies gedruk word. Vir ander beteken hierdie Christelike gewilligheid om met die oprigting van godsdiensgeboue te help of om die predikingswerk voltyds as pionierbedienaars of deeltyds as verkondigers van die goeie nuus in plaaslike gemeentes te doen. Geeneen van ons kan tereg spog oor “wat ons verplig was om te doen” nie.—Lukas 17:10; 1 Korinthiërs 9:16.

4. Hoe word wêreldwye teenkanting teen die Christelike bediening oorkom?

⁴ Enige sukses wat ons behaal, kan aan Jehovah se gees, of werkende krag, toegeskryf word. Dit is vandag net so geldig soos in die dae van die profeet Sagaria om te sê: “Dit is die woord van die HERE aan Serubbabel, naamlik: Nie deur krag of deur geweld nie, maar deur my Gees, sê die HERE van die leërskare.” Die wêreldwye teenkanting teen die Getuies se predikingswerk word dus nie deur mensepogings nie, maar deur Jehovah se leiding en beskerming oorkom.—Sagaria 4:6.

5. Watter rol speel Jehovah daarin om die Koninkryksboodskap te laat bekend maak?

⁵ Van diegene wat die Koninkryksboodskap aanneem, het Jesus gesê: “Dit is geskrywe in die profete: En hulle sal almal deur God geleer wees. Elkeen dan wat dit van die Vader gehoor en geleer het, kom na My toe . . . niemand [kan] na My toe . . . kom as dit hom nie deur my Vader gegee is nie” (Johannes 6:45, 65). Jehovah kan harte en verstande lees, en hy ken dié wat waarskynlik gunstig op sy liefde sal reageer al ken hulle hom nog nie. Hy gebruik ook sy engele om hierdie unieke bediening te rig. Dit is waarom Johannes die engele se deelname in ’n visioen gesien en geskryf het: “Ek het ’n ander engel in die middel van die lug sien vlieg met ’n ewige evangelie om te verkondig aan die bewoners van die aarde en aan alle nasies en stamme en tale en volke.”—Openbaring 14:6.

Bewus van ’n geestelike behoefte

6. Watter gesindheid moet ’n mens hê om gunstig op die goeie nuus te reageer?

⁶ Nog ’n faktor wat daartoe bydra dat Jehovah ’n mens die geleentheid bied om die goeie nuus aan te neem, word deur Jesus genoem: “Gelukkig is dié wat bewus is van hulle geestelike behoefte, want die koninkryk van die hemele behoort aan hulle” (Mattheüs 5:3, NW). ’n Selfvoldane mens of iemand wat nie na die waarheid soek nie, sal nie van ’n geestelike behoefte bewus wees nie. Hy of sy dink net aan materiële, vleeslike dinge. Selfvoldaanheid word ’n hindernis. Wanneer baie van dié wat ons van huis tot huis teëkom die boodskap verwerp, moet ons dus die verskillende redes vir hulle reaksie in ag neem.

7. Waarom reageer baie nie gunstig op die waarheid nie?

⁷ Baie weier om te luister omdat hulle koppig vashou aan die godsdiens wat hulle geërf het en nie bereid is om aan ’n bespreking deel te neem nie. Ander word aangetrek deur ’n godsdiens wat by hulle persoonlikheid pas—party verkies mistisisme, ander hou van emosionaliteit en nog ander stel hoofsaaklik in die sosiale bedrywighede van hulle kerk belang. Baie kies vandag ’n lewenstyl wat in stryd met God se standaarde is. Hulle lei miskien ’n onsedelike lewe, en dit is waarom hulle sê: “Ek stel nie belang nie.” Nog ander, wat moontlik sê dat hulle geleerd en wetenskaplik is, verwerp die Bybel omdat dit volgens hulle te simplisties is.—1 Korinthiërs 6:9-11; 2 Korinthiërs 4:3, 4.

8. Waarom moet dit nie ons ywer laat verflou as ons boodskap verwerp word nie? (Johannes 15:18-20).

⁸ Moet die feit dat die meerderheid die boodskap verwerp ons geloof en ywer in die lewensreddende bediening laat verflou? Ons kan vertroosting uit Paulus se woorde aan die Romeine put: “Want wat maak dit as sommige ontrou geword het? Sal hulle ontrou miskien die getrouheid van God vernietig? Nee, stellig nie! Maar God moet waaragtig wees en elke mens leuenagtig, soos geskrywe is: Sodat U geregverdig kan word in u woorde en oorwin as U gerig hou.”—Romeine 3:3, 4.

9, 10. Watter bewyse is daar dat teenkanting in baie lande oorkom is?

⁹ Ons kan bemoediging put uit die baie voorbeelde oor die hele wêreld van lande waar die reaksie aanvanklik oënskynlik baie ongunstig was, maar waar presies die teenoorgestelde mettertyd gebeur het. Jehovah en die engele het geweet dat daar wel goedhartiges aangetref sou word—maar Jehovah se Getuies moes aanhou en in hulle bediening volhard. Neem byvoorbeeld ’n paar lande waar dit 50 jaar gelede gelyk het of Katolisisme ’n onoorkomelike hindernis is—Argentinië, Brasilië, Colombia, Ierland, Italië, Mexiko, Portugal en Spanje. In 1943 was daar maar min Getuies, net 126 000 oor die hele wêreld, en 72 000 van hulle was in die Verenigde State. Die onkunde en vooroordeel waarmee die Getuies te kampe gehad het, het soos ’n baksteenmuur gelyk wat nie afgebreek kon word nie. Tog word daar vandag van die beste resultate met die predikingswerk in hierdie lande behaal. Dieselfde kan van talle eertydse Kommunistiese lande gesê word. Die doop van 7 402 in 1993 by ’n byeenkoms in Kiëf, in die Oekraïne, is bewys hiervan.

¹⁰ Watter metodes gebruik die Getuies om die goeie nuus aan hulle medemens te verkondig? Gebruik hulle materiële oorredingsmiddele om bekeerlinge te kry, soos sommige al beweer het? Besoek hulle net die armes en ongeletterdes, soos ander al beweer het?

Suksesvolle metodes om die goeie nuus oor te dra

11. Watter goeie voorbeeld het Jesus in sy bediening gestel? (Sien Johannes 4:6-26.)

¹¹ Jesus en sy dissipels het die voorbeeld gestel wat die Getuies tot vandag toe nog in hulle dissipelmaakwerk volg. Jesus het oral gegaan waar daar mense was, ryk of arm—na huise, openbare plekke, mere, berghange en selfs sinagoges.—Mattheüs 5:1, 2; 8:14; Markus 1:16; Lukas 4:15.

12, 13. (a) Hoe het Paulus vir Christene ’n voorbeeld gestel? (b) Hoe volg Jehovah se Getuies Paulus se voorbeeld?

¹² Die apostel Paulus kon tereg oor sy eie bediening sê: “Julle weet hoe ek, van die eerste dag af dat ek in Asië aangekom het, die hele tyd by julle gewees het en die Here gedien het . . . ; hoe ek niks agtergehou het van wat nuttig is nie, om dit aan julle te verkondig en julle te onderrig in die openbaar en in julle huise.”—Handelinge 20:18-20.

¹³ Jehovah se Getuies is wêreldwyd daarvoor bekend dat hulle die apostoliese voorbeeld van die huis-tot-huis-bediening volg. Pleks van hulle op ’n duur, oppervlakkige en onpersoonlike TV-bediening toe te lê, gaan die Getuies na die mense toe, ryk en arm, en praat van aangesig tot aangesig met die mense. Hulle gesels graag oor God en sy Woord.b Hulle probeer nie ryschristene maak deur aalmoese uit te deel nie. Aan die wat gewillig is om te luister, toon hulle dat heerskappy deur God se Koninkryk, wat die toestande op ons aarde ten goede sal verander, die enigste ware oplossing vir die mensdom se probleme is.—Jesaja 65:17, 21-25; 2 Petrus 3:13; Openbaring 21:1-4.

14. (a) Hoe het baie sendelinge en pioniers ’n vaste grondslag gelê? (b) Wat leer ons uit die ondervinding van Jehovah se Getuies in Japan?

¹⁴ Om die werk in soveel lande moontlik gedoen te kry, het sendelinge en pioniers die aanvoorwerk in baie lande gedoen. Hulle het ’n grondslag gelê, en dan het die plaaslike Getuies die leiding geneem. Dit verg dus nie groot getalle buitelandse Getuies om die predikingswerk aan die gang en goed georganiseerd te hou nie. ’n Uitstekende voorbeeld is Japan. Aan die einde van die veertigerjare het veral Australasiese en Britse sendelinge daarheen gegaan, die taal bestudeer, hulle by die ietwat primitiewe toestande van daardie naoorlogse era aangepas en begin om die getuieniswerk van huis tot huis te doen. Gedurende die Tweede Wêreldoorlog was die Getuies se werk in Japan verbied en is hulle vervolg. Toe die sendelinge daar aangekom het, het hulle derhalwe net ’n handjievol bedrywige Japannese Getuies daar aangetref. Maar vandag het hulle getalle toegeneem tot meer as 187 000 in meer as 3 000 gemeentes! Wat was die geheim van hulle vroeë sukses? ’n Sendeling wat meer as 25 jaar daar gedien het, het gesê: “Dit was baie belangrik om te leer om met die mense te gesels. Deur hulle taal te ken, kon ons ons in hulle plek stel en hulle lewenswyse verstaan en waardeer. Ons moes wys dat ons die Japannese liefhet. Ons het nederig probeer om ’n deel van die plaaslike gemeenskap te word sonder om natuurlik ons Christelike waardes prys te gee.”

Christelike gedrag ook ’n getuienis

15. Hoe toon die Getuies dat hulle hulle Christelik gedra?

¹⁵ Maar mense reageer nie net gunstig op ’n Bybelboodskap nie. Hulle sien ook die ware Christelike godsdiens in aksie. Hulle sien die liefde, harmonie en eenheid van die Getuies selfs onder die mees beproewende situasies, soos burgeroorloë, stamtwiste en etniese vyandigheid. Die Getuies handhaaf ’n duidelike standpunt van Christelike neutraliteit in alle konflikte en vervul Jesus se woorde: “’n Nuwe gebod gee Ek julle, dat julle mekaar moet liefhê; soos Ek julle liefgehad het, moet julle ook mekaar liefhê. Hieraan sal almal weet dat julle my dissipels is, as julle liefde onder mekaar het.”—Johannes 13:34, 35.

16. Watter ondervinding lig praktiese Christelike liefde toe?

¹⁶ Naasteliefde is toegelig deur die geval van ’n bejaarde man wat aan ’n plaaslike koerant oor “Mnr. en mev. Gaaf” geskryf het. Hy het verduidelik dat sy bure goed vir hom was toe sy vrou op sterwe gelê het. “Sedert haar dood . . . is hulle wonderlik”, het hy geskryf. “Hulle het my sedertdien ‘aangeneem’ . . . , en hulle doen vir my allerhande werkies en help om die probleme van ’n 74-jarige afgetredene op te los. Wat dit selfs merkwaardiger maak, is dat hulle swart is en ek wit. Hulle is Jehovah se Getuies en ek is ’n onbedrywige Katoliek.”

17. Watter weg moet ons vermy?

¹⁷ Hierdie ondervinding toon dat ons op baie maniere ’n getuienis kan gee; ook deur ons gedrag van dag tot dag. Trouens, tensy ons gedrag Christelik is, sal ons bediening Farisees, ondoeltreffend, wees. Ons wil nie wees soos diegene wat deur Jesus beskryf is nie: “Alles wat hulle dan vir julle mag sê om te onderhou, onderhou en doen dit; maar volgens hulle werke moet julle nie doen nie, want hulle praat en doen nie.”—Mattheüs 22:37-39; 23:3.

Die diensknegklas voorsien die regte instrumente

18. Hoe rus Bybellektuur ons toe om opregtes van hart te help?

¹⁸ Nog ’n belangrike faktor in die verkondiging van die goeie nuus aan al die nasies is die beskikbaarheid van Bybellektuur wat deur die Wagtoring- Bybel- en Traktaatgenootskap gedruk word. Ons het boeke, brosjures, traktate en tydskrifte wat feitlik elke opregte mens se vrae sal beantwoord. As ons ’n Moslem, ’n Hindoe, ’n Boeddhis, ’n Taoïs of ’n Jood teëkom, kan ons die boek Die mensdom se soeke na God of ’n verskeidenheid traktate en boekies gebruik om ’n gesprek en moontlik ’n Bybelstudie te begin. As ’n evolusionis vrae oor die skepping vra, kan ons die boek Lewe—Hoe het dit hier gekom? Deur evolusie of deur die skepping? gebruik. As ’n jongmens vra: ‘Wat is die doel van die lewe?’ kan ons hom na die boek Vrae wat jongmense vra—Antwoorde wat werk verwys. As iemand ernstig geraak word deur persoonlike probleme—depressie, uitputting, verkragting, egskeiding—het ons tydskrifte wat hierdie onderwerpe op ’n praktiese wyse behandel. Die getroue diensknegklas wat Jesus voorspel het die “voedsel op tyd” sou gee, vervul waarlik hulle rol.—Mattheüs 24:45-47.

19, 20. Hoe het die tempo van die Koninkrykswerk in Albanië versnel?

¹⁹ Maar om die nasies te bereik, moes hierdie lektuur in baie tale voorsien word. Hoe was dit moontlik om die Bybel en skriftuurlike lektuur in meer as 200 tale te vertaal? ’n Kort kykie na een voorbeeld, Albanië, lig toe hoe die “getroue en verstandige dienskneg”-klas die goeie nuus kon bevorder ten spyte van groot probleme en sonder ’n hedendaagse Pinkster om hulle onmiddellike toegang tot tale te gee.—Handelinge 2:1-11.

²⁰ Skaars ’n paar jaar gelede is Albanië nog as die enigste waarlik ateïstiese Kommunistiese land beskou. Die tydskrif National Geographic het in 1980 gesê: “Albanië verbied [godsdiens], en hulle het hulleself in 1967 as ‘die eerste ateïstiese staat ter wêreld’ verklaar. . . . Albanië se nuwe geslag ken niks anders as ateïsme nie.” Noudat Kommunisme gekwyn het, reageer Albaniërs wat bewus is van hulle geestelike behoefte gunstig op die predikingswerk wat deur Jehovah se Getuies gedoen word. ’n Klein vertaalspan wat uit jong Getuies bestaan wat Italiaans en Engels ken, is in 1992 in Tiranë gevorm. Gekwalifiseerde broers wat hulle uit ander lande besoek het, het hulle geleer om inligting met behulp van skootrekenaars in Albanees in te tik. Hulle het begin om traktate en Die Wagtoring te vertaal. Namate hulle ondervinding opdoen, vertaal hulle ander kosbare Bybelpublikasies. Tans is daar sowat 200 bedrywige Getuies in daardie klein landjie (met ’n bevolking van 3 262 000), en 1 984 het die Gedenkmaal in 1994 bygewoon.

Ons almal het ’n verantwoordelikheid

21. In watter soort tydperk leef ons?

²¹ Wêreldgebeure bereik ’n klimaks. Met die toename in misdaad en geweld, die slagting en verkragting in plaaslike oorloë, die heersende losse sedes en die gevolglike seksueel oordraagbare siektes asook die minagting van wettige gesag lyk dit of die wêreld anargisties, onregeerbaar, word. Ons bevind ons in ’n tydperk wat ooreenstem met die tyd voor die Vloed wat in Genesis beskryf word: “Toe die HERE sien dat die boosheid van die mens op die aarde groot was en al die versinsels wat hy in sy hart bedink, altyddeur net sleg was, het dit die HERE berou dat Hy die mens op die aarde gemaak het, en daar was smart in sy hart.”—Genesis 6:5, 6; Mattheüs 24:37-39.

22. Watter Christelike verantwoordelikheid het alle Getuies van Jehovah?

²² Net soos in Noag se dag sal Jehovah optree. Maar in sy geregtigheid en liefde wil hy hê dat die goeie nuus en die waarskuwingsboodskap eers aan al die nasies verkondig moet word (Markus 13:10, NW). In hierdie opsig het Jehovah se Getuies ’n verantwoordelikheid—om diegene te vind wat God se vrede waardig is en hulle in sy weë van vrede te onderrig. Die predikingsopdrag sal binnekort, op God se bestemde tyd, suksesvol vervul wees. “Dan sal die einde kom.”—Mattheüs 10:12, 13; 24:14; 28:19, 20.

[Voetnote]

Onthou jy?

◻ Watter sukses het hedendaagse Getuies in hulle bediening behaal?

◻ Waarom verwerp baie die Christelike boodskap?

◻ Watter apostoliese predikingsmetode gebruik die Getuies?

◻ Watter instrumente het ons vir ’n doeltreffende bediening?

◻ Wat moet ons almal in ooreenstemming met Markus 13:10 doen?

[Venster op bladsy 19]

LAND GETUIES BEDRYWIG IN 1943 IN 1993

Argentinië 374 102 043

Brasilië 430 366 297

Chili 72 44 668

Colombia ?? 60 854

Filippyne Tweede Wêreldoorlog—geen rekord 116 576

Frankryk Tweede Wêreldoorlog—geen rekord 122 254

Ierland 150? 4 224

Italië Tweede Wêreldoorlog—geen rekord 201 440

Mexiko 1,565 380 201

Peru Geen rekord van bedrywigheid 45 363

Pole Tweede Wêreldoorlog—geen rekord 113 551

Portugal Geen rekord van bedrywigheid 41 842

Spanje Geen rekord van bedrywigheid 97 595

Uruguay 22 9 144

Venezuela Geen rekord van bedrywigheid 64 081

[Prent op bladsy 17]

Jehovah se Getuies se getalle neem in baie Katolieke lande, soos Spanje, toe

[Prente op bladsy 18]

Jehovah se Getuies is bedrywig in lande regoor die aardbol