Die Bybel—Wat is die werklike waarde daarvan?
“DIE Bybel is ’n verborgenheid, ’n boek wat nie bedoel is om verstaan te word nie”, sê ’n huisbewoner. Nog een merk op: “Ek weet dat die Bybel ’n belangrike boek is, maar ek weet nie veel daarvan nie. Dit is moeilik om te verstaan.”
“Baie Christene weet . . . min van die Bybel”, het The Toronto Star gesê. ’n Katolieke vrou het opgemerk: “Dit laat my goed voel om ’n Bybel te hê. Dit verskaf innerlike vrede.” “Die Bybel is soos ’n kompas wat ’n mens deur die ruwe, onstuimige see van die lewe na ’n veilige plek lei”, sê ’n visser. ’n Voormalige Hindoe het gesê: “Die Bybel is God se Woord en ’n gawe aan die mensdom en is genesing vir geestelike lyding.”
Daar bestaan talle uiteenlopende opinies oor die werklike waarde van die Bybel. Maar wat ís die werklike waarde daarvan?
Die Bybel is die belangrikste en wyds verspreide boek wat bestaan. Die bladsye van die Bybel bevat die antwoorde op die verwarrendste probleme wat die mens tot nog toe ondervind het of nog die hoof sal moet bied. Die praktiese waarde van die raad daarin is weergaloos. Die sedelike standaarde wat dit verkondig, is onoortreflik. Die boodskap daarin is kragtig en nuttig. Hierdie boek van onvergelyklike waarde moenie net op ons boekrak bly nie, maar dit verdien ons noukeurige aandag en navorsing.
Ons kan die Bybel oopmaak met die volle vertroue dat dit heeltemal akkuraat, betroubaar en eg is. Die geskiedkundige gebeure wat daarin opgeteken is, word deur die sekulêre geskiedenis bevestig. Argeologiese vondste staaf oor en oor dat die Bybel feitelik en waar is. Die openhartigheid van die sowat 40 Bybelskrywers lewer bewys van hulle eerlikheid en onkreukbaarheid. Die interne harmonie van die Bybel dui aan dat dit nie ’n menslike oorsprong het nie. Die gebeure wat daarin opgeteken is, het werklik plaasgevind. Die mense waarvan daar gepraat word, het werklik gelewe. Die plekke en liggings waarna dit verwys, het werklik bestaan. Daarbenewens bevat die Bybel buitengewone profesieë wat Jehovah God onmiskenbaar as die Outeur van die Bybel identifiseer.—2 Petrus 1:21.
Ons Grootse Onderrigter het seker gemaak dat kennis van sy wil en voornemens beskikbaar is vir diegene wat daarvan wil weet. Trouens, Jehovah sê baie duidelik vir ons dat dit sy wil is dat alle soorte mense sy Woord moet bestudeer en “tot juiste kennis van die waarheid moet kom” (1 Timotheüs 2:3, 4, NW; Spreuke 1:5, 20-33). Dit is een van die belangrikste dinge wat ons met ons lewe kan doen. Dit is ’n uitdaging wat ons móét aanvaar. Die vroeë Christene het dit besef. Een van hulle is beweeg om te sê: “Dit is wat ek aanhou bid, dat julle liefde steeds oorvloediger mag word met juiste kennis en volle onderskeidingsvermoë; dat julle seker kan maak van wat die belangriker dinge is.”—Filippense 1:9, 10, NW; Kolossense 1:9, 10.
Die Bybel is die belangrikste middel waardeur die Skepper sy wil en voorneme aan die mensdom bekend maak, en dit verduidelik hoe ons elkeen in daardie voorneme inpas. Gebeure wat in die verlede plaasgevind het, is daarin opgeteken, en dit verskaf ’n duidelike blik op die toekoms. Die Bybel sit ware leerstellings uiteen en toon wat ons moet glo en nie moet glo nie (Handelinge 17:11; 2 Timotheüs 3:16, 17). Dit voorsien gedragsreëls waarvolgens die mens moet lewe, en dit rig mense op die weg van sukses en geluk (Mattheüs, hoofstukke 5 tot 7). Dit beklemtoon dat God se Koninkryk die enigste hoop vir die hele mensdom is en toon hoe sy regering die instrument is waardeur sy naam geheilig en sy soewereiniteit geregverdig gaan word. Die Bybel verduidelik watter weg ons moet volg as ons ’n hegte, liefdevolle verhouding met ons Lewegewer, Jehovah, wil geniet.
Daarbenewens is die Bybel die enigste boek wat jou sal help om die grootste prys te verkry wat die mens ooit sal ontvang—die ewige lewe op ’n paradysaarde as volmaakte mense (Romeine 6:23). Jehovah se eniggebore Seun sê vir ons: “Dit is die ewige lewe, dat hulle U ken, die enige waaragtige God, en Jesus Christus wat U gestuur het” (Johannes 17:3). So ’n kosbare boek moet ons beslis beweeg om uit te vind wat ons moet doen om die ewige lewe as prys te verkry. Die Bybel is ’n boek wat bedoel is om verstaan te word, soos die volgende artikel sal toon.