Jehovah se Getuies in alle wêrelddele—Puerto Rico
TUSSEN die Karibiese See en die Atlantiese Oseaan lê die welig begroeide tropiese eiland Puerto Rico. Christopher Columbus het dit in 1493 vir Spanje gekoloniseer en dit San Juan Bautista genoem, ter herinnering aan Johannes die Doper. Sy grootste stad is lank Puerto Rico, of “Ryk Hawe”, genoem. Mettertyd het die hele eiland hierdie naam gekry, terwyl die stad later San Juan genoem is.
Puerto Rico is in baie opsigte ’n ryk hawe. Baie goud is onder Spaanse bewind in die vroeë jare hiervandaan verskeep. Die eiland voer nou suikerriet, koffie, meelpiesangs en sitrusvrugte uit, hoewel nywerhede en diensbedrywe vandag ’n groot deel van die ekonomie uitmaak. Puerto Rico is egter ’n ryk hawe in ’n baie belangriker opsig.
In die dertigerjare is daar begin om die goeie nuus oor God se Koninkryk hier te verkondig. Vandag is daar meer as 25 000 verkondigers van die goeie nuus in Puerto Rico. In 1993 het die personeel by hierdie tak van die Wagtoringgenootskap van 23 tot meer as 100 toegeneem. Hierdie vermeerdering was nodig sodat die tak oor die vertaling van Bybellektuur in Spaans kon toesig hou en hierdie publikasies wêreldwyd aan ongeveer 350 000 000 Spaanssprekendes beskikbaar kon stel.
’n Nuwe veld
Die takkantoor berig ook: “’n Nuwe veld het in Puerto Rico oopgegaan omdat ons pogings aanwend om die Koninkryksboodskap na die dowes te neem. Een suster vertel die volgende ondervinding: ‘Ek het onder die dowes gewerk en ’n vrou met twee klein kindertjies besoek. Toe sy besef dat ek ’n Getuie is, het sy my dadelik afgewys omdat haar man, wat ook doof is, nie van Jehovah se Getuies hou nie.
“‘’n Paar maande later het hierdie selfde dame ’n vriendin besoek wat die Bybel saam met die Getuies gestudeer het. Sy het bygesit tydens die studie en dit baie geniet. Ek het die vrou weer besoek en sy het herhaal dat haar man nie van die Getuies hou nie. Sy wou egter die Bybel verstaan en was moeg vir haar kerk omdat hulle haar niks geleer het nie. Ons het ’n studie begin deur ’n traktaat te gebruik. Eendag het sy vir my gesê om die Saterdag terug te kom omdat haar man daar sou wees. “Maar hy hou mos nie van ons nie, of hoe?” het ek gevra. Sy het geantwoord: “Hy wil uitvind waaroor dit alles gaan.”
“‘Die volgende dag het hulle albei aan my deur geklop! Aangesien die man baie vrae gehad het, het ek hulle na ons vergaderinge vir dowes genooi. Hy was voor my daar en het sedertdien nog nie een vergadering gemis nie. Hy preek vir ander dowe mense, het al ’n byeenkoms bygewoon en sien daarna uit om gedoop te word.’”
Die takkantoorverslag sê voorts: “By ons streekbyeenkoms vanjaar is die hele program in vingerspraak aangebied, en talle dowe mense het dit dus saam met hulle gesin bygewoon. Gedurende die laaste toespraak was daar ’n baie aandoenlike oomblik toe die spreker die werk gemeld het wat onder die dowes gedoen word en gesê het dat daar ongeveer 70 teenwoordig is. Daar was luide applous, maar soos die spreker opgemerk het, kon die dowes dit nie hoor nie. Die spreker het die dowes toe gevra om na die gehoor te kyk en die vraag herhaal: ‘Is julle bly om julle dowe broers hier by julle te hê?’ en toe het hy die gehoor gevra om hulle blydskap te toon deur met albei hande te wuif. Dit was ’n wonderlike gesig om te sien hoe 11 000 broers en susters hulle blydskap toon deur met hulle hande te wuif. Ons dowe broers en susters was verheug en het deel van die groot broederskap gevoel. Baie het vreugdetrane gestort.”
Terwyl Jehovah se Getuies aan die oeswerk in Puerto Rico deelneem, sal dit ongetwyfeld ’n ryk hawe bly. God se “skape”, wat hy “die skatte van al die nasies” noem, sal bly instroom sodat Jehovah se huis met heerlikheid vervul word.—Johannes 10:16; Haggai 2:7.
[Venster op bladsy 9]
OORSIG
1994-diensjaar
VERKONDIGERHOOGTEPUNT: 25 428
VERHOUDING: 1 Getuie vir elke 139
GEDENKMAALOPKOMS: 60 252
GEMIDDELDE PIONIERVERKONDIGERS: 2 329
GEMIDDELDE BYBELSTUDIES: 19 012
AANTAL GEDOOP: 919
AANTAL GEMEENTES: 312
TAKKANTOOR: GUAYNABO