Hulle verskuif na Puerto Rico
OP 9 MEI 1993 het die Spaanse Vertalingsdepartement, wat uit 20 lede bestaan, van die hoofkwartier van Jehovah se Getuies in Brooklyn, New York, na die Wagtoringgenootskap se nuwe takkantoor in Guaynabo, Puerto Rico, verskuif. Waarom het hulle verskuif? ’n Verantwoordelike lid van die skryfpersoneel by die hoofkwartier van Jehovah se Getuies verduidelik: “Ons het gevind dat vertalers beter werk lewer wanneer hulle woon waar die taal waarin hulle vertaal daagliks gepraat word. Daarbenewens bly hulle natuurlik op hoogte van enige veranderinge in daardie taal. Puerto Rico is gekies as ’n geskikte middelpunt van die Spaanssprekende wêreld.”
Die Spaanse Vertalingsdepartement is al sedert 1928 in Brooklyn, New York, en het ’n belangrike rol in die verspreiding van die Koninkryksboodskap gespeel deur te help om Bybellektuur aan nagenoeg 350 000 000 Spaanssprekendes wêreldwyd te voorsien. Die Wagtoring is in 1917 vir die eerste keer in Spaans vertaal. Vandag word daar met elke uitgawe bykans 3500 000 eksemplare van Die Wagtoring en bykans 3000 000 eksemplare van die Ontwaak! in Spaans gedruk. In onlangse jare het die Wagtoringgenootskap se takkantoor in Spanje ook waardevolle hulp met hierdie werk verleen, veral deur die Ontwaak! te vertaal. Daar is meer as 1100 000 Spaanssprekende Getuies van Jehovah in die wêreld, ongeveer 25 persent van al die Getuies wêreldwyd. Hierdie syfer sluit tienduisende immigrante in wat nou in nie-Spaanssprekende lande soos Australië, Duitsland, Swede en die Verenigde State dien.
Die verskuiwing na die groter en nuwer fasiliteite in Puerto Rico hou nog ’n voordeel in. Dit stel vertalers en proeflesers uit verskillende lande, soos Colombia, Mexiko, Puerto Rico, Spanje en Venezuela, in staat om op een sentrale plek verenig te wees sodat die internasionale geur van die Genootskap se publikasies in Spaans verder verbeter kan word. Dit sal help dat die Koninkryksboodskap op ’n duidelike en juiste manier aan Spaanssprekendes wêreldwyd oorgedra word. Ons sien uit na Jehovah se seën op hierdie nuwe verwikkeling.