Diegene wat God vrees, kom bymekaar
“ORAL smag mense na vryheid van vrees—vrees vir geweld, vrees vir werkloosheid en vrees vir ernstige siekte. Ons deel daardie hunkering. . . . Waarom bespreek ons dan hoe ons vrees kan aankweek?” Daardie interessante vraag is deur die spreker geopper wat die programrede gehou het by elkeen van die “Godvrugtige Vrees”-Streekbyeenkomste, wat in Junie 1994 begin het.
Die miljoene wat dit bygewoon het—eers in Noord-Amerika en toe later in Europa, Sentraal- en Suid-Amerika, Afrika, Asië en die eilande van die see—was gretig om sulke vrees te leer aankweek. Waarom? Omdat ons slegs die seëninge wat Jehovah God op sy volk uitstort, kan geniet as ons godvrugtige vrees het. Dit was om van godvrugtige vrees te leer dat die byeenkomsgangers vergader het, en gedurende die driedaagse program het hulle baie omtrent hierdie noodsaaklike Christelike eienskap geleer.
“Vrees God en hou sy gebooie”
Dít was die tema van die eerste dag van die streekbyeenkoms, gebaseer op Prediker 12:13. Wat beteken dit om God te vrees? In die heel eerste deel op die program het die byeenkomsvoorsitter verduidelik dat godvrugtige vrees ontsag en diepe eerbied vir Jehovah weerspieël sowel as ’n gesonde vrees om hom te mishaag. Sulke godvrugtige vrees is nie morbied nie; dit is gesond en behoorlik.
Hoe strek hierdie gesonde vrees ons tot voordeel? Die volgende toespraak “Moenie moeg word en moed opgee nie”, het verduidelik dat godvrugtige vrees ons sal beweeg om God se gebooie met vreugde te onderhou. Tesame met liefde vir God en vir ons naaste, sal hierdie vrees ons met geestelike krag besiel. Ja, godvrugtige vrees kan ons help om nie traag te word in die wedloop om die ewige lewe nie.
Volgende op die program was onderhoude wat sprekende bewys gelewer het dat godvrugtige vrees ons kan onderskraag. Dié met wie daar ’n onderhoud gevoer is, het vertel hoe ’n eerbiedige vrees vir God hulle beweeg het om in die bediening voort te gaan ondanks onverskilligheid, ’n gebrek aan belangstelling of vervolging en hoe dit hulle gehelp het om selfs ten spyte van moeilike persoonlike beproewinge te volhard.
Maar waarom is dit so dat sommige mense godvrugtige vrees toon terwyl ander dit nie doen nie? In die toespraak “Kweek godvrugtige vrees aan en vind daarby baat”, het die spreker wat die programrede gehou het, verduidelik dat Jehovah in Jeremia 32:37-39 belowe het dat Hy Sy volk ’n godvresende hart sou gee. Jehovah plant godvrugtige vrees in ons harte. Hoe? Deur middel van sy heilige gees en sy geïnspireerde Woord, die Bybel. Dit is egter duidelik dat ons ons ywerig moet inspan om God se Woord te bestudeer en om die oorvloedige geestelike voorsienings wat hy gemaak het ten volle te benut. Dit sluit ons byeenkomste en gemeentelike vergaderinge in, wat ons help om hom te leer vrees.
Die middagprogram het geopen met die vermaning om op Jehovah en sy Woord te vertrou. Dit is gevolg deur ’n bespreking van die vernaamste maniere waarop die Koninkryk ’n invloed op ons lewe as Christene behoort te hê.
Daarna het die eerste van drie simposiums wat by die byeenkoms gehou is, gevolg. “Godvrugtige vrees beweeg ons om aan Goddelike vereistes te voldoen”, was die tema van hierdie simposium, wat die aandag op die gesin gevestig het. Hier volg ’n paar voorbeelde van die skriftuurlike—en praktiese—raad wat gegee is.
□ Vir mans: Godvrugtige vrees behoort ’n man te beweeg om sy vrou soos sy eie liggaam lief te hê (Efesiërs 5:28, 29). ’n Man maak nie sy eie liggaam opsetlik seer nie; hy verneder homself nie voor sy vriende of skinder oor sy eie tekortkominge nie. Hy behoort dus sy vrou met die waardigheid en respek te behandel wat hy aan homself toeken.
□ Vir vrouens: Jesus se godvrugtige vrees het hom beweeg om ‘God altyd te behaag’ (Johannes 8:29, NW). Dit is ’n goeie gesindheid vir vrouens om na te volg in hulle handeling met hulle mans.
□ Vir ouers: Christenouers kan godvrugtige vrees toon deur ouerlike verantwoordelikhede ernstig op te neem en hulle kinders as ’n erfenis van Jehovah te beskou (Psalm 127:3). Ouers se hoofdoel moet wees om hulle kinders groot te maak om ware Christene te word.
□ Vir kinders: Jehovah beveel kinders om hulle ‘ouers gehoorsaam te wees in die Here’ (Efesiërs 6:1). Daarom beteken gehoorsaamheid aan hulle ouers gehoorsaamheid aan God.
Die slottoespraak van die dag het ’n teer onderwerp aangeraak, want dit het die diep gevoelens bespreek wat ons almal ondervind wanneer ons ’n geliefde aan die dood afstaan. Omtrent halfpad deur die toespraak was daar egter ’n verrassing. Die gehoor was verheug toe die spreker die vrystelling van die nuwe brosjure Wanneer ’n geliefde sterf, aangekondig het. Hierdie volkleurpublikasie met 32 bladsye sê baie dinge wat dié wat treur, kan help om die gevoelens en emosies wat ná die dood van ’n geliefde ontstaan, te verstaan en die hoof te bied. Was daar ooit tye dat jy nie geweet het wat om vir ’n bedroefde te sê nie? ’n Gedeelte van hierdie brosjure bespreek hoe ons dié wat treur, kan help. Terwyl hulle na die spreker geluister het, het baie in die gehoor aan iemand gedink wat by hierdie nuwe brosjure kan baat vind.
‘Verrig heilige diens met godvrugtige vrees en ontsag’
Dít was die tema van die tweede dag, gebaseer op Hebreërs 12:28 (NW). Gedurende die oggendprogram is die tweede simposium gehou: “Gemeentes wat in die vrees van Jehovah wandel.” Die eerste deel het oor vergaderingbywoning gehandel. Ons teenwoordigheid by vergaderinge getuig van ons eerbied vir God en sy geestelike voorsienings. Deur vergaderinge by te woon, toon ons dat ons sy naam vrees en dat ons gretig is om ons aan sy wil te onderwerp (Hebreërs 10:24, 25). Die tweede spreker het verduidelik dat, as die gemeente as ’n geheel in die vrees van Jehovah wil wandel, elke individu sy deel moet bydra om goeie gedrag te handhaaf. Die laaste spreker het gepraat oor ’n voorreg en plig wat alle Christene het—om die goeie nuus sonder ophou te verkondig. Hoe lank sal ons aanhou preek? Totdat Jehovah sê dit is genoeg.—Jesaja 6:11.
“Die vreugde van Jehovah is julle vesting” was die tema van die volgende toespraak, soos dit nou in die studie-artikels in hierdie tydskrif bespreek word (Nehemia 8:10, NW). Waarom is Jehovah se volk vreugdevol? Die spreker het ’n aantal redes uiteengesit. ’n Baie belangrike rede is dat ’n intieme verhouding met God ons die vreugdevolste volk op aarde maak. Dink net daaraan, het die spreker vir die byeenkomsgangers gesê, ons het die voorreg om onder die volk te wees wat deur Jehovah na Jesus Christus getrek is (Johannes 6:44). Wat ’n kragtige rede tot vreugde!
’n Hoogtepunt van elke byeenkoms is die doop, en die “Godvrugtige Vrees”-Streekbyeenkomste was geen uitsondering nie. In die toespraak “Toewyding en doop in die vrees van Jehovah” het die spreker verduidelik dat die persoonlike verpligtinge van alle gedoopte persone viervoudig is: (1) Ons moet God se Woord bestudeer met behulp van die publikasies wat ons help om dit te verstaan en toe te pas; (2) ons moet bid; (3) ons moet met medegelowiges by gemeentelike vergaderinge assosieer en (4) ons moet van Jehovah se naam en Koninkryk getuig.
Die Saterdagmiddagprogram het begin met die gerusstellende onderwerp “’n Volk wat nie deur Jehovah verlaat is nie”. Vyf-en-dertig eeue gelede, toe die nasie Israel voor moeilike tye te staan gekom het, het Jehovah ’n versekering deur middel van Moses gegee en gesê: ‘Jehovah jou God sal jou nie begewe of verlaat nie’ (Deuteronomium 31:6). Jehovah het getrou gebly aan daardie versekering deur die Israeliete te beskerm toe hulle die Beloofde Land binnegegaan en in besit geneem het. Wanneer ons vandag voor beproewinge te staan kom, kan ons ook die volle vertroue hê dat Jehovah ons nie sal verlaat nie, mits ons na aan hom bly en op die raad in sy Woord ag slaan.
Hoe kan ons vreugde uit ons Bybellees put? In die toespraak “Lees God se Woord, die Heilige Bybel, daagliks”, het die spreker aan die hand gedoen dat ons met ’n ondersoekende gees lees en vrae soos die volgende vra: Wat leer hierdie verslag my omtrent Jehovah se eienskappe en weë? Hoe kan ek in hierdie opsigte meer soos Jehovah wees? As jy die Bybel op hierdie manier lees, is dit ’n aangename en lonende ondervinding.
Die aandag is vervolgens gevestig op die derde simposium op die program: “Voorsienings om diegene te help wat Jehovah vrees.” Hoewel Jehovah miskien nie wonderwerke ten behoewe van sy hedendaagse knegte verrig nie, kom hy diegene wat hom vrees beslis te hulp (2 Petrus 2:9). Hierdie simposium het vier voorsienings van Jehovah bespreek wat ons in hierdie kritieke tye kan help: (1) Deur middel van sy gees stel Jehovah ons in staat om werke te doen wat ver bo ons eie vermoë is. (2) Deur middel van sy Woord voorsien hy ons van raad en leiding. (3) Deur middel van die losprys gee hy ons ’n rein gewete. (4) Deur middel van sy organisasie, met inbegrip van die ouere manne, voorsien hy ons van leiding en beskerming (Lukas 11:13; Efesiërs 1:7; 2 Timotheüs 3:16; Hebreërs 13:17). Deur hierdie voorsienings ten volle te benut, sal ons in staat wees om te volhard en sodoende Jehovah se goedkeuring verkry.
Die slottoespraak Saterdagmiddag was getiteld “Jehovah se vreesinboesemende dag is naby”, gebaseer op Maleagi se profesie. Daar was al vreesinboesemende dae in die geskiedenis, soos toe oordeel in 70 G.J. aan Jerusalem voltrek is. Maar die vreesinboesemendste dag in die hele mensegeskiedenis sal Jehovah se komende dag wees wanneer ‘wraak uitgeoefen word op die wat God nie ken nie en op die wat aan die evangelie van onse Here Jesus nie gehoorsaam is nie’ (2 Thessalonicense 1:6-8). Hoe gou gaan dit gebeur? Die spreker het gesê: “Die einde is naby! Jehovah ken dié dag en uur. Hy gaan nie sy rooster verander nie. Daar word van ons verwag om geduldig te volhard.”
’n Mens kon skaars glo dat twee dae reeds verby was. Wat sou die laaste dag inhou?
“Vrees God en gee Hom heerlikheid”
Die tema van die derde dag was op Openbaring 14:7 gebaseer. Gedurende die oggendprogram het ’n reeks toesprake die aandag gevestig op party van die leerstellings wat Jehovah se Getuies van alle ander godsdiensorganisasies onderskei.
In die toespraak “Daar sal ’n opstanding van die regverdiges wees”, het die spreker ’n interessante vraag geopper: “Wanneer gedurende daardie duisendjarige Oordeelsdag sal diegene opgewek word wat gedurende hierdie finale jare van Satan se stelsel getrou gesterf het?” Die antwoord? “Die Bybel sê nie”, het die spreker verduidelik. “Maar is dit nie logies nie dat diegene wat in ons dag sterf vroeg opgewek sal word sodat hulle saam met die groot menigte Armageddon-oorlewendes kan deelneem aan die ontsaglike onderrigtingswerk wat gedurende die hele Oordeelsdag sal plaasvind? Ja, beslis!” Sal daar oorlewendes wees? Daar sal ongetwyfeld wees. Bybelleringe en -voorbeelde wat ons hiervan verseker, is duidelik uiteengesit in die volgende toespraak: “Deur die groot verdrukking heen gered.”
Jehovah se Getuies verstaan lank reeds dat die Bybel twee bestemmings bied—die ewige lewe op ’n paradysaarde vir tallose miljoene en onsterflike hemelse lewe vir ’n beperkte getal wat saam met Christus in sy Koninkryk sal regeer. Die hemelse hoop is in die toespraak “Moenie vrees nie, klein kuddetjie” bespreek (Lukas 12:32). Met die oog op die huidige wêreldtoestand moet die klein kuddetjie onverskrokke wees; elkeen van hulle moet tot die einde toe volhard (Lukas 21:19). “Hulle onverskrokkenheid”, het die spreker gesê, “help ook om die lede van die groot menigte aan te moedig. Hulle moet ook ’n gesindheid van onverskrokkenheid aankweek terwyl hulle op verlossing wag gedurende hierdie tyd van ongekende probleme op die aarde.”
Aan die einde van die oggendprogram het die gehoor die Bybeldrama Die keuses waarvoor jy te staan kom, geniet. In die dae van Josua, en ook van die profeet Elia, het die Israeliete voor ’n keerpunt te staan gekom. ’n Keuse moes gemaak word. Elia het gesê: “Hoe lank hink julle op twee gedagtes? As [Jehovah] God is, volg Hom na; en as Baäl dit is, volg hom na” (1 Konings 18:21). Die mensdom kom vandag ook voor ’n keerpunt te staan. Daar is nie tyd om op twee verskillende gedagtes te hink nie. Wat is die regte keuse? Dieselfde keuse wat Josua van die ou tyd gemaak het. Hy het gesê: “Ek en my huis, ons sal [Jehovah] dien.”—Josua 24:15.
Dit was asof Sondagmiddag skielik aangebreek het en dit was tyd vir die openbare toespraak getiteld “Waarom ons die ware God nou moet vrees”. In Openbaring 14:6, 7 word alle mense aangespoor: “Vrees God en gee Hom heerlikheid.” Waarom is dit dringend om God nou te vrees? Want, soos die teks verder sê, “die uur van sy oordeel het gekom”. Deur middel van sy Seun, wat nou as Koning van God se hemelse Koninkryk op die troon sit, gaan Jehovah die teenswoordige onreine, rebelse stelsel van dinge tot ’n einde bring. Die spreker het verduidelik dat dit die enigste manier is om verligting te bring vir dié wat God vrees en ook om ons aardse tuiste te red en te beskerm. Aangesien ons in die laaste dae van hierdie stelsel lewe, is dit dringend dat ons die ware God nou vrees!
Ná ’n opsomming van die Wagtoring-studiemateriaal vir daardie week, het die laaste spreker op die verhoog verskyn. As gevolg van die byeenkomsprogram het godvrugtige vrees groter betekenis vir die byeenkomsgangers aangeneem, het hy verduidelik. Hy het die baie voordele beklemtoon wat dit meebring vir dié wat God vrees. Die spreker het die vrystelling van ’n nuwe video aangekondig—United by Divine Teaching. Dit vestig die aandag op die unieke aspekte van die “Goddelike Onderrigting”-Internasionale Byeenkomste wat in 1993-94 gehou is. Namate die toespraak ten einde geloop het, het baie gewonder: ‘Waarna kan ons volgende jaar uitsien?’ Driedaagse streekbyeenkomste op baie plekke.
Die spreker het ten slotte na Maleagi 3:16 verwys, wat sê: “Toe het dié wat Jehovah vrees met mekaar gespreek, elkeen met sy metgesel, en Jehovah het bly aandag skenk en luister. En daar is begin om ’n gedenkboek voor hom op te skryf vir dié wat Jehovah vrees en vir dié wat aan sy naam dink” (NW). Die byeenkomsgangers het weggegaan met die duidelike en vaste voorneme om aan Jehovah se naam te dink en hom met godvrugtige vrees te dien.
[Prent op bladsy 24]
Doopkandidate moet voortdurend godvrugtige vrees openbaar
[Prent op bladsy 25]
Die drama, “Die keuses waarvoor jy te staan kom”, het die luisteraars getref met die belangrikheid daarvan om ’n besluit te neem oor ’n mens se diens aan Jehovah
[Prent op bladsy 26]
Byeenkomsgangers was verheug om die nuwe brosjure “Wanneer ’n geliefde sterf” te ontvang