Daar sal ’n opstanding van die regverdiges wees
“[Ek het] ’n hoop op God . . . dat daar ’n opstanding sal wees van die dode, regverdiges sowel as onregverdiges.”—HANDELINGE 24:15.
1. Voor watter situasie het alle mense sedert die sondeval van Adam en Eva te staan gekom?
“ALLES wat jou hand vind om te doen, doen dit met jou mag, want daar is geen werk of oorleg of kennis of wysheid in die doderyk waar jy heengaan nie” (Prediker 9:10). Met hierdie paar, goed gekose woorde beskryf wyse koning Salomo ’n situasie waarvoor elke geslag van die mensdom sedert die sondeval van ons eerste ouers, Adam en Eva, te staan gekom het. Die dood het mettertyd almal—rykes en armes, konings en burgers, getroues en ontroues—sonder uitsondering oorweldig. Die dood het waarlik “as koning geheers”.—Romeine 5:17, NW.
2. Waarom was sommige getroues gedurende hierdie tyd van die einde dalk teleurgesteld?
2 Ondanks die jongste vooruitgang in die mediese wetenskap heers die dood selfs vandag nog as koning. Hoewel dit glad nie verbasend is nie, was sommige dalk ietwat teleurgesteld toe hulle uiteindelik voor hierdie ou vyand te staan gekom het. Waarom? Wel, die Wagtoringgenootskap het in die twintigerjare reeds die boodskap verkondig: “Daar leef miljoene vandag wat nooit sal sterf nie.” Wie sou hierdie miljoene wees? Die “skape” in Jesus se bespreking oor die skape en die bokke (Mattheüs 25:31-46). Daar is voorspel dat hierdie skaapgeaardes gedurende die tyd van die einde sou verskyn, en hulle hoop sou die ewige lewe op ’n paradysaarde wees. Met verloop van tyd het God se volk ’n beter begrip verkry van die rol wat hierdie “skape” in Jehovah se voornemens sou speel. Hulle het besef dat hierdie gehoorsames van die hardnekkige “bokke” onderskei sou kon word en dat die skape, ná die vernietiging van die “bokke”, die aardse ryk van die Koninkryk wat vir hulle voorberei is, sou beërwe.
Die skaapgeaardes word versamel
3. Op watter werk lê God se volk hulle sedert 1935 toe?
3 Sedert 1935 lê ‘die getroue dienskneg’ hom daarop toe om sulke skaapgeaardes te vind en hulle in Jehovah se organisasie in te bring (Mattheüs 24:45; Johannes 10:16). Hierdie ontvanklike Christene het besef dat Jesus nou in Jehovah se hemelse Koninkryk regeer en dat die tyd vinnig nader kom wanneer hierdie goddelose stelsel van dinge tot ’n einde gebring gaan word en ’n nuwe wêreld waarin geregtigheid woon, ingelui gaan word (2 Petrus 3:13; Openbaring 12:10). In daardie nuwe wêreld sal hierdie bemoedigende woorde van Jesaja vervul word: “Hy sal die dood vir ewig vernietig.”—Jesaja 25:8.
4. Wat het met baie van die ander skape gebeur, hoewel hulle baie graag wou sien hoe Jehovah se soewereiniteit by Armageddon geregverdig word?
4 Aangesien die einde van Satan se wêreld so naby is, wil skaapgeaarde Christene baie graag leef tot Jehovah se soewereiniteit geregverdig word gedurende die komende verdrukking oor Babilon die Grote en die res van Satan se wêreld (Openbaring 19:1-3, 19-21). Vir talle het dit nie so uitgewerk nie. Baie wat gehoop het om onder die “miljoene” te wees wat nooit sal sterf nie, het wel gesterf. Party het ter wille van die waarheid in tronke en konsentrasiekampe of deur die toedoen van godsdiensfanatici ’n marteldood gesterf. Ander het weens ongelukke of sogenaamd natuurlike oorsake—soos siekte en ouderdom—gesterf (Psalm 90:9, 10; Prediker 9:11). Dit is duidelik dat nog meer sal sterf voor die einde kom. Hoe sal hulle die vervulling sien van die belofte van ’n nuwe wêreld waarin geregtigheid woon?
Die opstandingshoop
5, 6. Watter toekoms wag op diegene met ’n aardse hoop wat voor Armageddon sterf?
5 Die apostel Paulus het die antwoord gegee toe hy voor die Romeinse goewerneur Felix gepraat het. Soos in Handelinge 24:15 opgeteken staan, het Paulus met vrymoedigheid gesê: “[Ek het] ’n hoop op God . . . dat daar ’n opstanding sal wees van die dode, regverdiges sowel as onregverdiges.” Die opstandingshoop gee ons moed om die kwaaiste beproewinge die hoof te bied. As gevolg van daardie hoop raak ons dierbare broers en susters wat siek word en besef dat hulle gaan sterf, nie mismoedig nie. Ongeag wat gebeur, hulle weet dat hulle die beloning vir getrouheid sal ontvang. Vanweë die opstandingshoop weet ons moedige broers en susters wat deur die toedoen van vervolgers voor die dood te staan kom dat daar hoegenaamd geen manier is waarop hulle vervolgers die oorwinning kan behaal nie (Mattheüs 10:28). Wanneer iemand in die gemeente sterf, is ons hartseer omdat ons daardie persoon verloor het. Maar as hy of sy een van die ander skape is, verheug ons ons terselfdertyd daaroor dat ons medegelowige tot die einde toe getrou gebly het en nou rus en verseker is van ’n toekoms in God se nuwe wêreld.—1 Thessalonicense 4:13.
6 Ja, die opstandingshoop is ’n uiters belangrike aspek van ons geloof. Maar waarom is ons geloof in die opstanding so sterk, en wie het almal daardie hoop?
7. Wat is die opstanding, en wat is ’n paar van die tekste wat die sekerheid daarvan beklemtoon?
7 Die Griekse woord vir “opstanding” is a·naʹsta·sis, wat letterlik “opstaan” beteken. Dit verwys basies daarna om uit die dode op te staan. Dit is interessant dat die woord “opstanding” nie in die Hebreeuse Geskrifte voorkom nie, maar die opstandingshoop word duidelik daarin voorgehou. Ons sien dit byvoorbeeld uit wat Job te midde van sy lyding gesê het: “Ag, as U my maar in die doderyk wou wegsteek . . . my ’n bepaalde tyd wou stel en dan aan my wou dink!” (Job 14:13). Ons lees eweneens in Hosea 13:14: “Uit die mag van die doderyk sal Ek hulle loskoop, Ek sal hulle verlos van die dood. Dood, waar is jou pestilensies? Doderyk, waar is jou verderf?” In 1 Korinthiërs 15:55 het die apostel Paulus hierdie woorde aangehaal en getoon dat die voorspelde oorwinning oor die dood deur die opstanding bewerkstellig word. (In daardie teks het Paulus natuurlik van die hemelse opstanding gepraat.)
Gelowiges word “regverdig verklaar”
8, 9. (a) Hoe kan onvolmaakte mense deel hê aan die opstanding van die regverdiges? (b) Wat is die grondslag vir ons hoop op ’n lewe wat nie deur die dood beëindig sal word nie?
8 In sy verdediging voor Felix, wat in paragraaf 5 aangehaal word, het Paulus gesê dat daar ’n opstanding van die regverdiges en die onregverdiges gaan wees. Wie is die regverdiges wat opgewek gaan word? Wel, geen mens is van nature regverdig nie. Ons is almal van geboorte af sondaars, en ons sondig ons hele lewe lank—twee redes waarom ons die dood verdien (Romeine 5:12; 6:23). Maar in die Bybel tref ons die uitdrukking “regverdig verklaar” aan (Romeine 3:28). Dit verwys na mense wat onvolmaak is, maar wie se sondes deur Jehovah vergewe word.
9 Die uitdrukking word veral gebruik met betrekking tot gesalfde Christene wat ’n hemelse hoop het. In Romeine 5:1 sê die apostel Paulus: ‘Noudat ons regverdig verklaar is as gevolg van geloof, geniet ons vrede met God deur ons Here Jesus Christus’ (NW). Alle gesalfde Christene word op grond van geloof regverdig verklaar. Geloof waarin? Soos Paulus breedvoerig in die boek Romeine verduidelik, is dit geloof in Jesus Christus (Romeine 10:4, 9, 10). Jesus het as ’n volmaakte man gesterf en is daarna uit die dood opgewek en het na die hemel opgevaar om die waarde van sy menselewe ten behoewe van ons aan te bied (Hebreërs 7:26, 27; 9:11, 12). Toe Jehovah daardie offerande aanvaar het, het Jesus die menseras in werklikheid uit slawerny aan sonde en die dood losgekoop. Diegene wat geloof in hierdie reëling beoefen, vind grootliks daarby baat (1 Korinthiërs 15:45). Dit is op grond hiervan dat getroue manne en vroue die hoop het om ’n lewe te beërwe wat nie deur die skrikwekkende vyand, die dood, beëindig sal word nie.—Johannes 3:16.
10, 11. (a) Watter opstanding wag op getroue gesalfde Christene? (b) Op watter soort opstanding het voor-Christelike aanbidders hulle hoop gestel?
10 Danksy Jesus se losprysoffer het getroue gesalfdes die vaste hoop om soos Jesus as onsterflike geesskepsele opgewek te word, aangesien hulle regverdig verklaar is (Openbaring 2:10). Hulle opstanding word in Openbaring 20:6 gemeld, waar dit sê: “Salig en heilig is hy wat deel het aan die eerste opstanding; oor hulle het die tweede dood geen mag nie, maar hulle sal priesters van God en van Christus wees en sal saam met Hom as konings regeer duisend jaar lank.” Dit is die hemelse opstanding. Maar let op dat die Bybel dit “die eerste opstanding” noem, wat te kenne gee dat meer sal volg.
11 In Hebreërs hoofstuk 11 het Paulus van ’n lang lyn voor-Christelike knegte van God gepraat wat sterk geloof in Jehovah God geopenbaar het. Hulle het ook geloof in ’n opstanding gehad. In vers 35 van daardie hoofstuk praat Paulus van wonderdadige opstandings wat gedurende Israel se geskiedenis plaasgevind het en sê: “Vroue het hulle dode deur opstanding teruggekry, en ander is gefolter en wou geen bevryding aanneem nie, om ’n beter opstanding te kan verkry.” Daardie getroue eertydse getuies kon uitsien na ’n beter opstanding as byvoorbeeld dié waarby Elia en Elisa betrokke was (1 Konings 17:17-22; 2 Konings 4:32-37; 13:20, 21). Hulle het die hoop gehad om opgewek te word in ’n wêreld waar knegte van God nie vir hulle geloof gemartel sal word nie, ’n wêreld waar vroue nie hulle geliefdes aan die dood sal afstaan nie. Ja, hulle het daarna uitgesien om uit die dood op te staan in dieselfde nuwe wêreld waarop ons hoop (Jesaja 65:17-25). Jehovah het nie aan hulle soveel omtrent hierdie nuwe wêreld geopenbaar soos aan ons nie. Hulle het nietemin geweet dit kom, en hulle wou daar wees.
Die aardse opstanding
12. Is getroue persone uit voor-Christelike tye regverdig verklaar? Verduidelik.
12 Moet ons die opstanding van hierdie getroue voor-Christelike manne en vroue in die nuwe wêreld as deel van die opstanding van die regverdiges beskou? Klaarblyklik wel, want die Bybel noem hulle regverdig. Byvoorbeeld, die dissipel Jakobus meld ’n man en ’n vrou van die ou tyd wat regverdig verklaar is. Die man was Abraham, die stamvader van die Hebreeuse volk. Van hom lees ons: “Abraham het God geglo, en dit is hom tot geregtigheid gereken, en hy is ’n vriend van God genoem.” Die vrou was Ragab, ’n nie-Israeliet wat geloof in Jehovah beoefen het. Sy is “regverdig verklaar” en het deel van die Hebreeuse nasie geword (Jakobus 2:23-25, vgl. NW). Manne en vroue van die ou tyd wat sterk geloof in Jehovah en sy beloftes beoefen het en tot die dood toe getrou gebly het, is dus op grond van hulle geloof deur Jehovah regverdig verklaar, en hulle sal ongetwyfeld deel hê aan die ‘opstanding van die regverdiges’.
13, 14. (a) Hoe weet ons dat Christene met ’n aardse hoop regverdig verklaar kan word? (b) Wat beteken dit vir hulle?
13 Maar wat van hedendaagse skaapgeaardes—dié met ’n aardse hoop wat hulle aan Jehovah toewy en wat gedurende hierdie tyd van die einde getrou sterf? Sal hulle deel hê aan die opstanding van die regverdiges? Klaarblyklik wel. Die apostel Johannes het ’n groot menigte van sulke getroues in ’n gesig gesien. Let op hoe hy hulle beskryf: “Ek [het] gesien, en kyk, daar was ’n groot menigte wat niemand kon tel nie, uit alle nasies en stamme en volke en tale; hulle het gestaan voor die troon en die Lam, bekleed met wit klere en met palmtakke in hulle hande; en hulle het met ’n groot stem geroep en gesê: Heil aan onse God wat op die troon sit, en aan die Lam!”—Openbaring 7:9, 10.
14 Let op dat hierdie sagmoediges heeltemal oortuig is van hulle verlossing, en hulle skryf dit aan Jehovah en Jesus, “die Lam”, toe. Daarbenewens staan hulle voor Jehovah en voor die Lam, en hulle is almal in wit geklee. Waarom in wit? ’n Hemelse skepsel sê vir Johannes: “Hulle het hul klere gewas en hul klere wit gemaak in die bloed van die Lam” (Openbaring 7:14). In die Bybel is wit ’n simbool van reinheid, regverdigheid (Psalm 51:9; Daniël 12:10; Openbaring 19:8). Die feit dat die groot menigte wit klere dra, beteken dat Jehovah hulle as regverdig beskou. Hoe is dit moontlik? Omdat hulle hulle klere as ’t ware in die bloed van die Lam gewas het. Hulle beoefen geloof in die vergote bloed van Jesus Christus en word derhalwe regverdig verklaar as vriende van God met die hoop om die groot verdrukking te oorleef. Daarom kan enige getroue, toegewyde Christen wat nou deel van die “groot menigte” is en voor die groot verdrukking sterf seker wees dat hy aan die aardse opstanding van die regverdiges deel sal hê.
15. Watter voordeel hou die opstanding van die regverdiges in, aangesien regverdiges sowel as onregverdiges opgewek gaan word?
15 Daardie opstanding word in hierdie woorde in Openbaring hoofstuk 20, vers 13, beskryf: “Die see het die dode gegee wat daarin was, en die dood en die doderyk het die dode gegee wat daarin was; en hulle is geoordeel, elkeen volgens sy werke.” Gedurende Jehovah se groot duisendjarige Oordeelsdag sal almal wat in God se geheue is dus opgewek word—die regverdiges sowel as die onregverdiges (Handelinge 17:31). Maar hoeveel beter sal dit tog nie vir die regverdiges wees nie! Hulle het reeds lewens van geloof gelei. Hulle het reeds ’n intieme verhouding met Jehovah en vertrou dat hy sy voornemens sal verwesenlik. Regverdige getuies wat voor die Christelike Era gelewe het, sal uit die dood opstaan en gretig wees om te leer hoe Jehovah se beloftes in verband met die Saad vervul is (1 Petrus 1:10-12). Die lede van die ander skape wat in ons dag deur Jehovah as regverdig beskou word, sal uit die graf opstaan en gretig wees om die Paradysaarde te sien waaroor hulle gepraat het toe hulle die goeie nuus in hierdie stelsel van dinge verkondig het. Wat ’n vreugdevolle tyd sal dit tog nie wees nie!
16. Wat kan ons sê omtrent die Oordeelsdag-opstanding van diegene wat in ons dag sterf?
16 Presies wanneer gedurende daardie duisendjarige Oordeelsdag sal diegene opgewek word wat gedurende hierdie finale jare van Satan se stelsel getrou gesterf het? Die Bybel sê nie. Maar is dit nie logies dat diegene wat regverdig verklaar is en wat in ons dag sterf vroeg opgewek sal word en sodoende saam met die groot menigte Armageddon-oorlewendes sal kan deelneem aan die verwelkomingswerk van vroeëre geslagte uit die dood nie? Ja, beslis!
’n Hoop wat vertroosting bied
17, 18. (a) Watter vertroosting bied die opstandingshoop? (b) Wat word ons beweeg om aangaande Jehovah te verklaar?
17 Die opstandingshoop bied krag en vertroosting aan alle hedendaagse Christene. As ons getrou bly, kan geen onvoorsiene gebeurtenis en geen vyand ons van ons beloning beroof nie! Byvoorbeeld, in die 1992 Yearbook of Jehovah’s Witnesses, op bladsy 177, verskyn die foto’s van moedige Christene in Ethiopië wat eerder gesterf het as om hulle geloof prys te gee. Die byskrif sê: “Gesigte wat ons verwag om in die opstanding te sien.” Wat ’n voorreg sal dit tog wees om hulle en talle ander te leer ken wat soortgelyke getrouheid getoon het met die dood voor oë!
18 Wat van ons geliefdes en broers en susters wat weens ouderdom of siekte nie lewend deur die groot verdrukking kom nie? In ooreenstemming met die opstandingshoop sal hulle ’n wonderlike toekoms hê as hulle getrou bly. En as ons ook moedig geloof in Jesus se losprysoffer beoefen, sal ons ’n wonderlike toekoms hê. Waarom? Omdat ons, soos Paulus, die hoop het van die ‘opstanding van die regverdiges sowel as die onregverdiges’. Ons dank Jehovah van harte vir hierdie hoop. Dit beweeg ons beslis om die psalmis se woorde ons eie te maak: “Vertel onder die nasies [God se] eer, onder al die volke sy wonders. Want [Jehovah] is groot en baie lofwaardig.”—Psalm 96:3, 4.
Kan jy verduidelik?
◻ Watter tekste help ons om ons hoop op ’n aardse opstanding te bevestig?
◻ Op grond waarvan word Christene nou regverdig verklaar?
◻ Hoe gee die opstandingshoop ons moed en vasberadenheid?
[Prent op bladsy 9]
Gesalfde Christene hoop, soos Paulus, op die hemelse opstanding