Die opstandingshoop—Wat beteken dit vir jou?

“U maak u hand oop en bevredig die begeerte van alles wat lewe.”—PSALM 145:16.

1-3. Watter hoop koester party vir die toekoms? Lig toe.

DIE negejarige Christopher en sy broer het die oggend saam met hulle oom, tante en twee neefs deurgebring deur in hulle Christelike bediening van huis tot huis te gaan naby Manchester, Engeland. Ons medetydskrif, die Ontwaak!, verduidelik wat gebeur het. “Die middag het hulle saam op ’n besigtigingsrit na Blackpool, ’n nabye strandoord, vertrek. Al 6 was onder 12 mense wat op slag dood is in ’n snelwegbotsing, wat deur die polisie as ‘’n absolute slagting’ beskryf is.”

² Die aand voor die tragedie het die gesin die Gemeentelike Boekstudie bygewoon, waar die dood die onderwerp van bespreking was. “Christopher was ’n seun wat altyd baie gedink het”, het sy vader vertel. “Daardie aand het hy duidelik omtrent ’n nuwe wêreld en sy hoop vir die toekoms gepraat. Toe het Christopher skielik in die loop van ons bespreking gesê: ‘Een ding van Jehovah se Getuies is dat, hoewel die dood seermaak, ons weet dat ons mekaar weer eendag op die aarde sal sien.’ Weinig het een van ons daar teenwoordig besef hoe onvergeetlik daardie woorde sou wees.”a

³ Jare vroeër, in 1940, het ’n Oostenrykse Getuie met die naam Franz teregstelling met ’n guillotine in die gesig gestaar omdat hy geweier het om dislojaal aan Jehovah te wees. Franz het uit ’n detensiesentrum in Berlyn aan sy moeder geskryf: “Met die kennis wat ek het, sou ek ’n sonde pleeg wat die dood verdien as ek die [militêre] eed geneem het. Dit sou, wat my betref, goddeloos wees. Ek sou geen opstanding kry nie. . . . En nou, my liewe Moeder en al my broers en susters, het ek vandag gehoor wat my vonnis is, en moenie verskrik wees nie, dit is die doodsvonnis, en ek gaan môre-oggend tereggestel word. Ek het my krag van God, soos dit nog altyd was met alle ware Christene in die verlede. . . . As julle tot die dood toe getrou bly, sal ons mekaar weer ontmoet in die opstanding. . . . Tot weersiens.”b

4. Watter uitwerking het die voormelde ondervindinge op jou, en wat sal ons volgende bespreek?

⁴ Die opstandingshoop het vir Christopher sowel as Franz baie beteken. Dit was vir hulle ’n werklikheid. Hierdie verslae roer beslis ons hart! Om ons waardering vir Jehovah te vergroot en ons hoop op die opstanding te versterk, gaan ons bespreek waarom die opstanding sal plaasvind en hoe dit ons persoonlik moet raak.

’n Visioen van die aardse opstanding

5, 6. Wat openbaar die visioen wat deur die apostel Johannes in Openbaring 20:12, 13 opgeteken is?

⁵ In ’n visioen van gebeure gedurende die Duisendjarige Heerskappy van Christus Jesus het die apostel Johannes die aardse opstanding sien plaasvind. “Ek het die dooies, groot en klein, [gesien]”, het hy vertel. “En die see het die dooies daarin gegee, en die dood en Hades het die dooies in hulle gegee” (Openbaring 20:12, 13). Ongeag hulle status of posisie—hetsy “groot” of “klein”—sal almal wat gevange gehou word in Hades (Sjeool), die gemeenskaplike graf van die mensdom, vrygelaat word. Diegene wat hulle lewe ter see verloor het, sal ook dan opgewek word. Hierdie wonderlike gebeurtenis is deel van Jehovah se voorneme.

⁶ Aan die begin van Christus se heerskappy van duisend jaar word Satan gebind en in die afgrond gewerp. Niemand wat opgewek word of wat die groot verdrukking oorleef, sal gedurende daardie heerskappy deur Satan mislei word nie, want hy sal onbedrywig wees (Openbaring 20:1-3). Duisend jaar klink dalk vir jou na ’n lang tyd, maar in Jehovah se oë is dit in werklikheid “soos een dag”.—2 Petrus 3:8.

7. Wat sal as grondslag dien vir die oordeel gedurende Christus se Duisendjarige Heerskappy?

⁷ Volgens die visioen sal Christus se Duisendjarige Heerskappy ’n oordeelstyd wees. Die apostel Johannes het geskryf: “Ek het die dooies, groot en klein, voor die troon sien staan, en boekrolle is oopgemaak. Maar ’n ander boekrol is oopgemaak; dit is die boekrol van die lewe. En die dooies is geoordeel na dié dinge wat in die boekrolle geskrywe staan, volgens hulle dade. . . . En elkeen van hulle is volgens hulle dade geoordeel” (Openbaring 20:12, 13). Let daarop dat die grondslag vir hierdie oordeel nie is wat die persoon voor sy dood gedoen het of nie gedoen het nie (Romeine 6:7). Dit hou eerder verband met die “boekrolle” wat oopgemaak sal word. Die dade wat ’n persoon verrig nadat hy die inhoud van die boekrolle geleer het, sal as grondslag dien vir die besluit of sy naam in “die boekrol van die lewe” geskryf word.

“’n Opstanding van die lewe” of “’n opstanding van oordeel”

8. Op watter twee maniere kan dit afloop vir dié wat opgewek word?

⁸ Vroeër in Johannes se visioen word gesê dat Jesus “die sleutels van die dood en van Hades” het (Openbaring 1:18). Hy dien as Jehovah se “Hoofbewerker van die lewe”, wat die mag gegee is om “die lewendes en die dooies” te oordeel (Handelinge 3:15; 2 Timoteus 4:1). Hoe sal hy dit doen? Deur diegene wat in die dood slaap, op te wek. “Moet julle nie hieroor verwonder nie”, het Jesus vir die skares gesê vir wie hy gepreek het, “want die uur kom waarin almal wat in die gedenkgrafte is, sy stem sal hoor en sal uitkom.” Hy het toe bygevoeg: “Dié wat goeie dinge gedoen het, tot ’n opstanding van die lewe, dié wat veragtelike dinge beoefen het, tot ’n opstanding van oordeel” (Johannes 5:28-30). Watter toekoms wag daar dan op getroue manne en vroue van die ou tyd?

9. (a) Wat sal baie wat in die opstanding terugkeer, ongetwyfeld leer? (b) Watter ontsaglike opvoedkundige werk sal onderneem word?

⁹ Wanneer hierdie getroue mense van die ou tyd in die opstanding terugkeer, sal hulle gou uitvind dat die beloftes waarin hulle vertroue gestel het, nou ’n werklikheid is. Hoe interessant sal dit tog vir hulle wees om te leer wie die Saad van God se vrou is, wat in die eerste profesie in die Bybel, in Genesis 3:15, gemeld word! Hoe bly sal hulle tog wees om te hoor dat hierdie beloofde Messias, Jesus, tot die dood toe getrou gebly het en sodoende sy lewe as ’n losprysoffer gegee het! (Matteus 20:28). Dit sal vir diegene wat hulle uit die dood terugverwelkom, groot vreugde verskaf om hulle te help verstaan dat hierdie losprysvoorsiening ’n blyk van Jehovah se onverdiende goedhartigheid en barmhartigheid is. Wanneer dié wat opgewek word, uitvind wat God se Koninkryk doen ter vervulling van Jehovah se voorneme vir die aarde, sal hulle harte ongetwyfeld oorloop van lofbetuigings aan Jehovah. Hulle sal baie geleenthede hê om hulle toegewydheid aan hulle liefdevolle hemelse Vader en sy Seun te bewys. Almal wat dan lewe, sal dit geniet om deel te neem aan die ontsaglike opvoedkundige werk wat nodig sal wees om die miljarde te onderrig wat uit die graf terugkeer en wat ook God se losprysvoorsiening sal moet aanvaar.

10, 11. (a) Watter geleenthede sal die Millennium vir almal op aarde bied? (b) Watter uitwerking moet dit op ons hê?

¹⁰ Wanneer Abraham opgewek word, sal hy groot vertroosting daaruit put om die werklikheid te ondervind van die lewe onder die heerskappy van die “stad” waarna hy uitgesien het (Hebreërs 11:10). Hoe opwindend sal dit tog vir getroue Job van ouds wees wanneer hy leer dat sy lewensweg ander knegte van Jehovah versterk het wat voor toetse van hulle onkreukbaarheid te staan gekom het! En hoe gretig sal Daniël tog wees om te hoor van die vervulling van die profesieë wat hy geïnspireer is om neer te skryf!

¹¹ Ja, almal wat lewe verkry in die regverdige nuwe wêreld, hetsy deur ’n opstanding of deur die groot verdrukking te oorleef, sal baie hê om te leer van Jehovah se voorneme vir die aarde en sy bewoners. Die vooruitsig om vir ewig te lewe en Jehovah tot in alle ewigheid te loof, sal ongetwyfeld die opvoedkundige program gedurende die Millennium ’n groot genot maak. Maar wat die belangrikste sal wees, is wat ons persoonlik sal doen wanneer ons uitvind wat die inhoud van die boekrolle is. Sal ons toepas wat ons leer? Sal ons peins oor en ag slaan op die lewensbelangrike inligting wat ons sal versterk om Satan se finale poging te weerstaan om ons van die waarheid te laat afwyk?

12. Wat sal almal help om ’n volle aandeel te hê aan die opvoedkundige werk sowel as aan die taak om die aarde in ’n paradys te omskep?

¹² Iets wat nie vergeet moet word nie, is die wonderlike seëninge wat dit sal meebring wanneer die voordele van Christus se losprysoffer aangewend word. Dié wat in die opstanding opgewek word, sal nie die soort kwale of gebreke hê wat mense vandag teister nie (Jesaja 33:24). ’n Gesonde liggaam en die vooruitsig op volmaakte gesondheid sal al die bewoners van die nuwe wêreld in staat stel om ’n volle aandeel te hê aan die opvoedkundige werk om die miljarde wat opgewek word, in die weg van die lewe te onderrig. Daardie inwoners sal ook help met die grootste taak wat nog ooit op die aarde aangepak is—om die hele planeet in ’n paradys te omskep tot lof van Jehovah.

13, 14. Waarom word Satan by die finale toets vrygelaat, en hoe kan dit vir ons afloop?

¹³ Wanneer Satan vir die finale toets uit die afgrond vrygelaat word, sal hy mense weer eens probeer mislei. Volgens Openbaring 20:7-9 sal ’n oordeel van vernietiging voltrek word aan al die ‘misleide nasies’, of groepe mense, wat voor Satan se goddelose invloed swig: ‘Vuur sal uit die hemel neerdaal en hulle verteer.’ Vir diegene onder hulle wat gedurende die Millennium opgewek is, sal hierdie vernietiging hulle opstanding ’n opstanding van veroordeling maak. Daarenteen sal dié wat opgewek is en hulle onkreukbaarheid gehandhaaf het, die ewige lewe as gawe ontvang. Hulle opstanding sal inderdaad “’n opstanding van die lewe” wees.—Johannes 5:29.

¹⁴ Hoe kan die hoop op die opstanding ons selfs nou vertroos? En wat moet ons doen om te verseker dat ons die voordele daarvan in die toekoms ontvang?

Lesse om nou te leer

15. Hoe kan geloof in die opstanding jou nou help?

¹⁵ Jy het dalk onlangs ’n geliefde aan die dood afgestaan en sukkel moontlik nog met die groot aanpassing wat deur so ’n geweldige verlies meegebring word. Die opstandingshoop help jou om ’n innerlike kalmte en krag te verkry wat mense wat nie die waarheid ken nie, nie het nie. “Ons wil nie hê dat julle onkundig moet wees aangaande dié wat ontslaap nie”, het Paulus die Tessalonisense vertroos, “sodat julle nie treur soos die res wat geen hoop het nie” (1 Tessalonisense 4:13). Sien jy jou in die nuwe wêreld waar jy die opstanding aanskou? Vind nou vertroosting deur te peins oor die vooruitsig om jou geliefdes weer te sien.

16. Hoe sal jy moontlik voel wanneer die opstanding plaasvind?

¹⁶ Miskien ervaar jy nou die fisiese gevolge van Adam se opstand, dalk in die vorm van swak gesondheid. Moenie dat die angs wat dit veroorsaak, jou laat vergeet van die vreugdevolle vooruitsig om persoonlik die opstanding te ondervind en met hernieude gesondheid en krag in die nuwe wêreld opgewek te word nie. Dan, wanneer jy jou oë oopmaak en verwelkomende gesigte sien wat gretig is om jou te vertel hoe verheug hulle oor jou opstanding is, sal jy God ongetwyfeld vir sy liefderyke goedhartigheid bedank.

17, 18. Watter twee belangrike lesse moet ons ter harte neem?

¹⁷ Kyk intussen na twee lesse wat ons ter harte moet neem. Een is die belangrikheid daarvan om Jehovah nóú heelhartig te dien. Ons lewe van selfopoffering, in navolging van ons Heer, Christus Jesus, toon dat ons Jehovah en ons naaste liefhet. As teenstand of vervolging ons van ons lewensonderhoud of ons vrede beroof, neem ons ons voor om standvastig in die geloof te bly ongeag watter beproewinge ons verduur. As teenstanders ons met die dood dreig, dan vertroos en versterk die opstandingshoop ons om lojaal te bly aan Jehovah en sy Koninkryk. Ja, ons ywer vir die Koninkrykspredikings- en dissipelmaakwerk laat ons in ’n posisie bly om die ewige seëninge te ontvang wat Jehovah vir die regverdiges in die vooruitsig stel.

¹⁸ ’n Tweede les hou verband met hoe ons versoekings van die gevalle vlees die hoof bied. Ons kennis van die opstandingshoop en ons waardering vir Jehovah se onverdiende goedhartigheid versterk ons voorneme om standvastig in die geloof te bly. “Moenie die wêreld of die dinge in die wêreld liefhê nie”, het die apostel Johannes gewaarsku. “As iemand die wêreld liefhet, is die liefde vir die Vader nie in hom nie; want alles wat in die wêreld is—die begeerte van die vlees en die begeerte van die oë en die spoggerige vertoon van ’n mens se lewensmiddele—het nie hulle oorsprong by die Vader nie, maar het hulle oorsprong by die wêreld. Wat meer is, die wêreld gaan verby en so ook sy begeerte, maar hy wat die wil van God doen, bly vir ewig” (1 Johannes 2:15-17). Die wêreld se aanloklikheid wanneer dit by materialisme kom, sal vir ons min aantrekkingskrag hê wanneer ons dit met “die werklike lewe” vergelyk (1 Timoteus 6:17-19). As ons in die versoeking kom om ons aan onsedelikheid skuldig te maak, sal ons dit kragtig weerstaan. Ons besef dat, as ons in ’n weg volhard wat Jehovah mishaag en ons voor Armageddon sou sterf, dit ons in dieselfde posisie kan plaas as diegene wat geen hoop op ’n opstanding het nie.

19. Watter onskatbare voorreg moet ons nie vergeet nie?

¹⁹ Bowenal moet ons nooit die onskatbare voorreg vergeet wat ons het om Jehovah se hart nou en vir ewig bly te maak nie (Spreuke 27:11). Ons getrouheid tot die dood of ons volgehoue onkreukbaarheid tot die einde van hierdie goddelose stelsel toon vir Jehovah aan wie se kant van die geskil oor universele soewereiniteit ons is. Watter vreugde sal dit ons dan tog verskaf om in die aardse Paradys te woon, hetsy deur die groot verdrukking te oorleef of deur ’n wonderdadige opstanding te ondervind!

Ons begeertes word bevredig

20, 21. Wat sal ons help om getrou te bly al het ons onbeantwoorde vrae oor die opstanding? Verduidelik.

²⁰ Ons bespreking van die opstanding laat sekere vrae onbeantwoord. Hoe sal Jehovah sake reël vir diegene wat getroud was toe hulle gesterf het? (Lukas 20:34, 35). Sal opstandings plaasvind in die omgewing waar mense gesterf het? Sal dié wat opgewek word, naby hulle families opstaan? Daar is ’n magdom ander vrae oor die reëlings vir die opstanding. Maar ons moet Jeremia se woorde in gedagte hou: “Jehovah is goed vir die een wat op hom hoop, vir die siel wat hom bly soek. Dit is goed dat ’n mens wag, ja, in stilte, op die redding van Jehovah” (Klaagliedere 3:25, 26). Alles sal op Jehovah se bestemde tyd tot ons algehele bevrediging geopenbaar word. Hoe kan ons hiervan seker wees?

²¹ Dink aan die psalmis se geïnspireerde woorde toe hy van Jehovah gesing het: “U maak u hand oop en bevredig die begeerte van alles wat lewe” (Psalm 145:16). Namate ons ouer word, verander ons begeertes. Wat ons as kind wou hê, begeer ons nie vandag nie. Ons lewensbeskouing word deur ons ondervindinge sowel as ons verwagtinge beïnvloed. Maar watter gepaste begeertes ons ook al in die nuwe wêreld sal hê, Jehovah sal dit beslis bevredig.

22. Waarom het ons goeie rede om Jehovah te loof?

²² Wat nóú vir elkeen van ons belangrik is, is om getrou te wees. “Wat . . . van bestuurders verwag word, is dat ’n man getrou bevind word” (1 Korintiërs 4:2). Ons is bestuurders van die glorieryke goeie nuus van God se Koninkryk. Ons ywer in die verkondiging van hierdie goeie nuus aan almal wat ons teëkom, help ons om in ’n posisie te bly om die lewe te verkry. Moet nooit die feit oor die hoof sien dat “tyd en onvoorsiene gebeurtenisse” ons almal tref nie (Prediker 9:11). Om enige onnodige angs teë te werk wat deur die onsekerhede van die lewe veroorsaak word, moet jy vashou aan die wonderlike hoop op die opstanding. As dit lyk of jy voor die begin van Christus se Duisendjarige Heerskappy gaan sterf, moet jy onthou dat jy vertroosting kan put uit die wete dat verligting gewis sal kom. Op Jehovah se tyd sal jy Job se woorde kan herhaal wat hy tot die Skepper gerig het: “U sal roep, en ek sal u antwoord.” Alle lof kom Jehovah toe, wat vurig verlang om almal op te wek wat in sy geheue is!—Job 14:15.

[Voetnote]

Onthou jy?

• Op grond waarvan sal mense gedurende die Millennium geoordeel word?

• Waarom sal party “’n opstanding van die lewe” en ander “’n opstanding van oordeel” hê?

• Hoe kan die opstandingshoop ons nou vertroos?

• Hoe help die woorde van Psalm 145:16 ons om onbeantwoorde vrae oor die opstanding te verwerk?

[Prente op bladsy 21]

Hoe kan geloof in die opstanding ons nou help?