“Moenie vrees nie, klein kuddetjie”
“Moenie vrees nie, klein kuddetjie, want julle Vader het ’n welbehae daarin gehad om aan julle die koninkryk te gee.”—LUKAS 12:32.
1. Wat was die grondslag vir Jesus se woorde: “Moenie vrees nie, klein kuddetjie”?
“SOEK die koninkryk van God” (Lukas 12:31). Toe Jesus hierdie woorde teenoor sy dissipels geuiter het, het hy ’n beginsel genoem wat die denke van Christene van sy dag af tot in ons dag gerig het. Die Koninkryk van God moet die belangrikste plek in ons lewens inneem (Mattheüs 6:33). In Lukas se verslag het Jesus egter verder gegaan en liefdevolle en gerusstellende woorde teenoor ’n spesiale groep Christene gespreek. Hy het gesê: “Moenie vrees nie, klein kuddetjie, want julle Vader het ’n welbehae daarin gehad om aan julle die koninkryk te gee” (Lukas 12:32). As die Goeie Herder het Jesus geweet dat daar stormagtige tye vir sy intieme dissipels voorgelê het. Maar as hulle aangehou het om God se Koninkryk te soek, was daar geen rede vir hulle om te vrees nie. Jesus se vermaning was gevolglik nie ’n gevoellose bevel nie. Dit was eerder ’n liefdevolle belofte wat hulle met vertroue en moed vervul het.
2. Uit wie bestaan die klein kuddetjie, en waarom is hulle veral bevoorreg?
2 Jesus het met sy dissipels gepraat en hy het hulle ’n “klein kuddetjie” genoem. Hy het ook met diegene gepraat aan wie Jehovah ‘die koninkryk sou gee’. In vergelyking met die groot skares wat later vir Jesus sou aanneem, was hierdie groep inderdaad klein. Hulle is ook as kosbaar beskou omdat hulle gekies is vir ’n merkwaardige toekoms, om in koninklike diens gebruik te word. Hulle Vader, die Groot Herder, Jehovah, roep die klein kuddetjie om ’n hemelse erfenis in Christus se Messiaanse Koninkryk te ontvang.
Die klein kuddetjie
3. Watter glorieryke gesig het Johannes van die klein kuddetjie gesien?
3 Uit wie bestaan hierdie klein kuddetjie dan wat so ’n wonderlike vooruitsig het? Uit volgelinge van Jesus Christus wat met heilige gees gesalf word (Handelinge 2:1-4). Die apostel Johannes het hulle as hemelse sangers met siters in hulle hande gesien en het geskryf: “Ek het gesien, en kyk, die Lam staan op die berg Sion, en saam met hom honderd-vier-en-veertigduisend met sy Naam en die Naam van sy Vader op hulle voorhoofde geskrywe. Dit is hulle wat hulself met vroue nie besoedel het nie, want hulle is maagdelik rein; dit is hulle wat die Lam volg waar Hy ook heengaan; dit is hulle wat gekoop is uit die mense as eerstelinge vir God en die Lam. En in hulle mond is daar geen bedrog gevind nie; want hulle is sonder gebrek voor die troon van God.”—Openbaring 14:1, 4, 5.
4. Watter posisie beklee die klein kuddetjie vandag op die aarde?
4 Sedert Pinkster 33 G.J. dien hierdie gesalfde, geesverwekte persone as Christus se gesante op die aarde (2 Korinthiërs 5:20). Vandag is daar nog net ’n oorblyfsel wat saam as “die getroue en verstandige dienskneg”-klas dien (Mattheüs 24:45; Openbaring 12:17). Veral sedert die jaar 1935 het “ander skape” by hulle aangesluit, Christene met ’n aardse hoop, wat nou in die miljoene tel. Hulle help om die goeie nuus oor die hele aarde te verkondig.—Johannes 10:16.
5. Wat is die gesindheid van die oorblyfsel van die klein kuddetjie, en waarom hoef hulle nie te vrees nie?
5 Wat is die gesindheid van die oorblywende lede van hierdie klein kuddetjie wat nog op die aarde is? Omdat hulle weet dat hulle “’n onwankelbare koninkryk” gaan ontvang, lewer hulle hulle heilige diens met godvrugtige vrees en ontsag (Hebreërs 12:28). Hulle besef in alle nederigheid dat hulle ’n onskatbare voorreg het wat tot eindelose vreugde lei. Hulle het die “een baie kosbare pêrel” gevind waarna Jesus verwys het toe hy oor die Koninkryk gepraat het (Mattheüs 13:46). Terwyl die groot verdrukking nader kom, bly God se gesalfdes onverskrokke. Ten spyte van wat die mensdom binnekort gedurende “die groot en deurlugtige dag van die Here” gaan tref, het hulle geen morbiede vrees vir die toekoms nie (Handelinge 2:19-21). Waarom sou hulle?
Die getal word kleiner
6, 7. (a) Waarom is die getal van die klein kuddetjie wat steeds op die aarde is nogal klein? (b) Hoe moet elkeen die hoop beskou wat hy koester?
6 In onlangse jare het die getal van die klein kuddetjie wat nog op die aarde is baie kleiner geword. Dit het duidelik geblyk uit die Gedenkmaalrapport vir 1994. In sowat 75 000 gemeentes van Jehovah se volk oor die hele wêreld was daar net 8 617 wat getoon het dat hulle bely om lede van die oorblyfsel te wees deur van die embleme te gebruik (Mattheüs 26:26-30). In teenstelling hiermee was die totale bywoningsyfer 12 288 917. Gesalfde Christene weet dat dit so moet wees. Jehovah het bepaal dat die klein kuddetjie uit ’n beperkte getal, 144 000, sal bestaan en hy samel hulle al sedert Pinkster 33 G.J. in. Dit is logies dat die roeping van die klein kuddetjie ten einde sou loop wanneer die getal amper vol is, en die bewyse toon dat die algemene insameling van hierdie besonder geseënde groep in 1935 geëindig het. Daar is egter voorspel dat die ander skape in die tyd van die einde sou groei tot “’n groot menigte wat niemand kon tel nie, uit alle nasies en stamme en volke en tale”. Sedert 1935 was dit die algemene insameling van hierdie groot menigte, wie se hoop die ewige lewe op ’n paradysaarde is, wat deur Jehovah verrig is.—Openbaring 7:9; 14:15, 16; Psalm 37:29.
7 Die meeste lede van die klein kuddetjie wat nog op die aarde is, is nou in die 70, 80 en 90. ’n Paar is al oor die 100. Almal van hulle, ongeag hulle ouderdom, weet dat hulle deur middel van ’n hemelse opstanding uiteindelik met Jesus Christus verenig sal word en saam met hom in sy glorieryke Koninkryk sal regeer. Die lede van die groot menigte sal aardse onderdane van Christus, die Koning, wees. Laat elkeen van ons ons nou verheug oor wat Jehovah vir diegene wat hom liefhet in die vooruitsig stel. Ons kan nie kies watter hoop ons wil koester nie. Dit is Jehovah wat dit bepaal. Albei groepe kan hulle in hulle hoop op ’n gelukkige toekoms verheug, of dit nou in die hemelse Koninkryk of op ’n paradysaarde onder daardie Koninkryk is.—Johannes 6:44, 65; Efesiërs 1:17, 18.
8. Hoe ver gevorderd is die verseëling van die 144 000, en wat sal gebeur wanneer dit afgehandel is?
8 Die klein kuddetjie van 144 000 maak “die Israel van God” uit, wat natuurlike Israel in God se voornemens vervang het (Galasiërs 6:16). Die oorblyfsel bestaan derhalwe uit die oorblywende lede van daardie geestelike nasie wat nog op die aarde is. Hierdie oorblywendes word verseël vir Jehovah se finale goedkeuring. Die apostel Johannes het dit in ’n gesig sien gebeur, en hy het gesê: “Ek het ’n ander engel sien opkom van die opgang van die son, met die seël van die lewende God; en hy het met ’n groot stem geroep na die vier engele aan wie dit gegee is om die aarde en die see te beskadig en gesê: Moenie die aarde of die see of die bome beskadig voordat ons die diensknegte van onse God op hulle voorhoofde verseël het nie. En ek het die getal van die verseëldes gehoor: honderd-vier-en-veertigduisend verseëldes uit al die stamme van die kinders van [geestelike] Israel” (Openbaring 7:2-4). Aangesien die werk om geestelike Israel te verseël klaarblyklik al ver gevorderd is, beteken dit dat opwindende dinge binnekort gaan gebeur. Om maar een ding te noem, “die groot verdrukking”, wanneer die vier winde van vernietiging oor die aarde losgelaat word, moet baie naby wees.—Openbaring 7:14.
9. Hoe beskou die klein kuddetjie die feit dat die groot menigte al hoe meer word?
9 Miljoene lede van die groot menigte is reeds ingesamel. Hoe verbly dit tog nie die harte van die oorblyfsel nie! Hoewel lede van die klein kuddetjie wat steeds op die aarde is al hoe minder word, het hulle bekwame manne van die groot menigte opgelei en voorberei om verantwoordelikhede met betrekking tot God se groeiende aardse organisasie te dra (Jesaja 61:5). Soos Jesus getoon het, sal daar oorlewendes van die groot verdrukking wees.—Mattheüs 24:22.
“Moenie vrees nie”
10. (a) Watter aanval gaan binnekort teen God se volk gerig word, en waartoe sal dit aanleiding gee? (b) Watter vrae word aan elkeen van ons gestel?
10 Satan en sy demone is tot die omgewing van die aarde verlaag. Hy en sy hordes word uitgelok om Jehovah se volk met al hulle mag aan te val. Hierdie aanval, wat in die Bybel voorspel is, word as die aanval van Gog van Magog beskryf. Teen veral wie rig die Duiwel sy aanval? Is dit nie teen die laaste lede van die klein kuddetjie, die geestelike Israel van God, wat vreedsaam “op die middelpunt van die aarde” woon nie? (Esegiël 38:1-12). Ja, maar die oorblyfsel van die getroue gesalfde klas, asook hulle lojale metgeselle, die ander skape, sal sien hoe Satan se aanval aanleiding gee tot ’n dramatiese reaksie deur Jehovah God. Hy sal ter verdediging van sy volk ingryp, en dit sal “die groot en vreesinboesemende dag van Jehovah” ontketen (Joël 2:31, NW). Die getroue en verstandige dienskneg verrig vandag ’n noodsaaklike, lewensreddende werk deur ’n waarskuwing tot mense te rig aangaande hierdie komende ingryping deur Jehovah (Maleagi 4:5; 1 Timotheüs 4:16). Is jy ’n bedrywige ondersteuner van daardie werk deur die goeie nuus van Jehovah se Koninkryk te verkondig? Sal jy as ’n onverskrokke Koninkryksverkondiger daarmee voortgaan?
11. Waarom is ’n moedige gesindheid vandag noodsaaklik?
11 Met die oog op die huidige wêreldtoestand is dit tog so tydig dat die klein kuddetjie op die woorde ag slaan wat Jesus tot hulle gerig het: “Moenie vrees nie, klein kuddetjie”! So ’n moedige gesindheid is noodsaaklik met die oog op alles wat nou ooreenkomstig Jehovah se voorneme plaasvind. Elke lid van die klein kuddetjie besef persoonlik hoe belangrik dit is om tot die einde toe te volhard (Lukas 21:19). Soos Jesus Christus, die Heer en Meester van die klein kuddetjie, tot die einde van sy aardse lewe toe volhard en getrou gebly het, so moet elkeen van die oorblyfsel volhard en getrou bly.—Hebreërs 12:1, 2.
12. Hoe het Paulus, soos Jesus, gesalfde Christene vermaan om nie te vrees nie?
12 Al die gesalfdes moet dieselfde beskouing as die apostel Paulus hê. Let op hoe sy woorde as ’n gesalfde openbare verkondiger van die opstanding in ooreenstemming met Jesus se vermaning is om nie te vrees nie. Paulus het geskryf: “Onthou dat Jesus Christus, uit die geslag van Dawid, uit die dode opgewek is volgens my evangelie, waarin ek verdrukking ly tot die boeie toe soos ’n kwaaddoener; maar die woord van God is nie gebonde nie. Daarom verdra ek alles ter wille van die uitverkorenes, sodat hulle ook die verlossing wat in Christus Jesus is, kan verkry met die ewige heerlikheid. Dit is ’n betroubare woord; want as ons met Hom gesterf het, sal ons ook met Hom lewe. As ons verdra, sal ons met Hom regeer. As ons Hom verloën, sal Hy ons ook verloën. As ons ontrou is, Hy bly getrou; Hy kan Homself nie verloën nie.”—2 Timotheüs 2:8-13.
13. Watter diep oortuiging huldig die lede van die klein kuddetjie, en wat beweeg dit hulle om te doen?
13 Soos die apostel Paulus is die oorblywende lede van die gesalfde klein kuddetjie gewillig om lyding te verduur terwyl hulle die kragtige boodskap verkondig wat in God se Woord uiteengesit is. Hulle oortuiging is diepgewortel terwyl hulle vashou aan die Goddelike beloftes van redding en die belofte dat hulle “die kroon van die lewe” sal ontvang as hulle getrou bly tot die dood toe (Openbaring 2:10). Deur ’n oombliklike opstanding en verandering sal hulle in eenheid met Christus gebring word om saam met hom as konings te regeer. Wat ’n oorwinning vir hulle onkreukbare handelswyse as wêreldoorwinnaars!—1 Johannes 5:3, 4.
’n Unieke hoop
14, 15. In watter opsig is die opstandingshoop van die klein kuddetjie uniek?
14 Die opstandingshoop van die klein kuddetjie is uniek. In watter opsigte? Om maar een ding te noem, dit sal voor die algemene opstanding van die “regverdiges sowel as onregverdiges” plaasvind (Handelinge 24:15). Die opstanding van die gesalfdes vind in werklikheid in ’n sekere volgorde van belangrikheid plaas, soos hierdie woorde van 1 Korinthiërs 15:20, 23 baie duidelik toon: “Christus is opgewek uit die dode; Hy het die eersteling geword van die wat ontslaap het. Maar elkeen in sy eie orde: as eersteling Christus, daarna die wat aan Christus behoort by sy koms.” Omdat die klein kuddetjie dieselfde soort volharding en geloof as Jesus aan die dag lê, weet hulle wat op hulle wag terwyl hulle hulle aardse loopbaan voltooi, veral sedert die ware Heer in 1918 na sy tempel toe gekom het om te oordeel.—Maleagi 3:1.
15 Paulus gee ons nog ’n rede om hierdie opstanding as uniek te beskou. Soos in 1 Korinthiërs 15:51-53 opgeteken, het hy geskryf: “Kyk, ek deel julle ’n verborgenheid mee: Ons sal wel nie almal ontslaap nie, maar ons sal almal verander word, in ’n oomblik, in ’n oogwink, by die laaste basuin . . . Want hierdie verganklike moet met onverganklikheid beklee word, en hierdie sterflike moet met onsterflikheid beklee word.” Hierdie woorde is van toepassing op die lede van die klein kuddetjie wat gedurende Christus se teenwoordigheid sterf. Sonder dat hulle ’n lang tyd in die dood hoef te slaap, word hulle “in ’n oomblik, in ’n oogwink”, met onsterflikheid beklee.
16, 17. In watter opsig is gesalfde Christene vandag veral geseënd met betrekking tot hulle opstandingshoop?
16 In die lig van hierdie begrip kan ons die betekenis van die apostel Johannes se woorde in Openbaring 14:12, 13 verstaan. Hy het geskryf: “Hier kom die lydsaamheid van die heiliges te pas; hier is hulle wat die gebooie van God en die geloof in Jesus bewaar. En ek het ’n stem uit die hemel aan my hoor sê: Skryf—salig is van nou af die dode wat in die Here sterwe. Ja, sê die Gees, sodat hulle kan rus van hul arbeid, en hulle werke volg met hulle.”
17 Wat ’n unieke beloning wag daar tog nie op die oorblyfsel van die klein kuddetjie nie! Hulle opstanding sal gou kom, direk nadat hulle sterf. Wat ’n merkwaardige verandering ondergaan hulle dan wanneer hulle hulle werk in die geesteryk begin! Aangesien so ’n verheerliking van die klein kuddetjie nou plaasvind en die vervulling van belangrike Bybelprofesieë reeds so ver gevorderd is, hoef die oorblywende lede van die klein kuddetjie waarlik ‘nie te vrees nie’. En hulle onverskrokkenheid help ook om die lede van die groot menigte aan te moedig, wat ’n soortgelyke gesindheid van onverskrokkenheid moet aankweek terwyl hulle op verlossing wag gedurende hierdie tyd van ongekende probleme op die aarde.
18, 19. (a) Waarom is die tyd waarin ons lewe dringend? (b) Waarom moet die gesalfdes sowel as die ander skape nie vrees nie?
18 Deur ander van die bedrywighede van die klein kuddetjie te vertel, help dit hulle en die groot menigte om die ware God te bly vrees. Sy uur van oordeel het aangebreek, en die gunstige tyd wat oor is, is kosbaar. Daar is inderdaad min tyd oor vir ander om op te tree. Ons vrees egter nie dat God se voorneme sal faal nie. Dit sal beslis welslae behaal!
19 Daar is reeds gehoor hoe die groot hemelse stemme sê: “Die koninkryke van die wêreld het die eiendom van onse Here geword en van sy Christus, en Hy sal as Koning heers tot in alle ewigheid” (Openbaring 11:15). Die Groot Herder, Jehovah, lei beslis al sy skape in “die spore van geregtigheid, om sy Naam ontwil” (Psalm 23:3). Die klein kuddetjie word onfeilbaar na hulle hemelse beloning gelei. En die ander skape sal veilig deur die groot verdrukking heen gered word om die ewige lewe in die aardse ryk van God se glorieryke Koninkryk onder Christus Jesus se heerskappy te geniet. Hoewel Jesus se woorde derhalwe tot die klein kuddetjie gerig is, het al God se knegte op aarde beslis rede om na sy woorde te luister: “Moenie vrees nie.”
Kan jy verduidelik?
◻ Waarom moet ons verwag dat die oorblywende getal van die klein kuddetjie minder sal word?
◻ Wat is die situasie van die gesalfde oorblyfsel vandag?
◻ Waarom moet Christene nie vrees nie, ten spyte van die naderende aanval van Gog van Magog?
◻ Waarom is die opstandingshoop van die 144 000 veral vandag uniek?