Jehovah se vreesinboesemende dag is naby
“Daar is ’n gedenkboek voor sy aangesig geskrywe vir die wat die HERE vrees en sy Naam eer.”—MALEAGI 3:16.
1, 2. Omtrent watter vreesinboesemende dag waarsku Maleagi vooruit?
VREESINBOESEMEND! Met dagbreek, 6 Augustus 1945, is ’n groot stad in ’n oogwink vernietig. Ongeveer 80 000 het gesterf! Tienduisende is noodlottig beseer! Brande het gewoed! Die atoombom het sy werk gedoen. Hoe het Jehovah se Getuies gedurende daardie katastrofe gevaar? Daar was net een Getuie in Hirosjima—hy was vanweë sy Christelike onkreukbaarheid agter die beskermende mure van ’n gevangenis opgesluit. Die gevangenis het ineengestort, maar ons broer is nie beseer nie. Hy is, soos hy dit gestel het, deur ’n atoombom uit die gevangenis bevry—miskien die enigste goeie nadraai wat die bom gehad het.
2 Hoe skrikwekkend daardie bomontploffing ook al was, dit is maar onbeduidend in vergelyking met “die groot en vreesinboesemende dag van Jehovah” wat reg voor die deur staan (Maleagi 4:5, NW). O ja, daar was al vreesinboesemende dae in die verlede, maar hierdie dag van Jehovah sal hulle almal oortref.—Markus 13:19.
3. Watter verskil is opmerkenswaardig tussen “alle vlees” en Noag se gesin voor die sondvloed?
3 In Noag se dag ‘het alle vlees hulle wandel op die aarde verderwe’, en God het gesê: “Die aarde is deur hulle vervul met geweld. En kyk, Ek gaan hulle saam met die aarde verdelg” (Genesis 6:12, 13). Soos opgeteken in Matteus 24:39 het Jesus gesê dat die mense “geen ag daarop geslaan [het] totdat die vloed gekom en hulle almal weggesleur het nie”. Maar die getroue Noag, “’n prediker van regverdigheid”, asook sy godvresende gesin, het daardie sondvloed oorleef.—2 Petrus 2:5.
4. Watter waarskuwende voorbeeld word deur Sodom en Gomorra voorsien?
4 “So ook”, sê Judas 7, “word Sodom en Gomorra en die stede om hulle, nadat hulle . . . uitermate hoerery gepleeg en vir onnatuurlike gebruik agter vlees aan geloop het, ons as ’n waarskuwende voorbeeld voorgehou deurdat hulle die regterlike straf van die ewige vuur ondergaan.” Daardie goddelose mense het vanweë hulle walglike vuil lewenswyse omgekom. Laat dit ’n waarskuwing wees vir die seksgeoriënteerde gemeenskappe van hierdie moderne wêreld! Maar let op dat die godvresende Lot en sy dogters deur daardie ramp behoue gebly het, net soos Jehovah se aanbidders gedurende die vinnig naderende groot verdrukking beskerm sal word.—2 Petrus 2:6-9.
5. Wat kan ons leer uit die oordele wat aan Jerusalem voltrek is?
5 Beskou ook die waarskuwende voorbeelde wat voorsien is toe Jehovah invallende leërs gebruik het om Jerusalem, die glorieryke stad wat eens “die vreugde van die hele aarde” was, te vernietig (Psalm 48:3). Hierdie tragiese gebeurtenisse het die eerste keer in 607 v.G.J. en toe weer in 70 G.J. plaasgevind omdat God se volk, wat bely het dat hulle hom dien, ware aanbidding versaak het. Gelukkig het lojale knegte van Jehovah dit oorleef. Die ramp van 70 G.J. (wat hieronder uitgebeeld word) word beskryf as “’n verdrukking . . . soos daar sedert die begin van die skepping wat God geskep het tot op daardie tyd nie plaasgevind het nie”. Dit het die afvallige Joodse stelsel van dinge eens en vir altyd uit die weg geruim, en in daardie opsig sal dit beslis ‘nie weer plaasvind nie’ (Markus 13:19). Maar selfs hierdie voltrekking van Goddelike oordeel was bloot ’n skaduwee van “die groot verdrukking” wat nou vir die hele wêreldstelsel van dinge voor die deur staan.—Openbaring 7:14.
6. Waarom laat Jehovah rampe toe?
6 Waarom sou God verskriklike rampe toelaat wat met die verlies van soveel lewens gepaardgaan? In die geval van Noag, Sodom en Gomorra en Jerusalem het Jehovah oordeel voltrek aan diegene wat hulle wandel op die aarde verderwe het, wat hierdie pragtige planeet met letterlike besoedeling en sedelike verdorwenheid verontreinig het en wat van ware aanbidding afvallig geraak het, of dit verwerp het. Vandag is ons aan die vooraand van ’n allesomvattende voltrekking van oordeel wat deur die hele wêreld ervaar sal word.—2 Tessalonisense 1:6-9.
“In die laaste dae”
7. (a) Waarvan was Goddelike oordele van die ou tyd profeties? (b) Watter wonderlike vooruitsig het ons?
7 Daardie vernietigings van die ou tyd was profeties van die vreesinboesemende groot verdrukking wat in 2 Petrus 3:3-13 beskryf word. Die apostel sê: “Dít weet julle allereers, dat daar in die laaste dae spotters sal kom met hulle spotterny, wat ooreenkomstig hulle eie begeertes handel.” Dan spits Petrus hom op Noag se dag toe en skryf: “Die wêreld van daardie tyd [is] vernietig toe dit met water oorstroom is. Maar deur dieselfde woord is die hemele en die aarde wat nou is vir die vuur weggelê en word hulle bewaar tot die dag van die oordeel en van die vernietiging van die goddelose mense.” Die langverwagte Koninkryksheerskappy van die Messias, wat onmiddellik op daardie grootste verdrukking van alle verdrukkings sal volg, sal ’n nuwe dimensie aanneem—“nuwe hemele en ’n nuwe aarde . . . , en in hulle sal regverdigheid woon”. Wat ’n vreugdevolle vooruitsig!
8. Hoe stuur wêreldgebeure op ’n klimaks af?
8 Wêreldgebeure stuur in ons 20ste eeu progressief op ’n klimaks af. Hoewel die vernietiging van Hirosjima nie deur God veroorsaak is nie, kan dit ingesluit word by die “vreesaanjaende gesigte” wat Jesus vir die tyd van die einde voorspel het (Lukas 21:11). Dit was die begin van ’n kernbedreiging wat steeds soos ’n onweerswolk oor die mensdom hang. Daarom lui ’n opskrif in The New York Times van 29 November 1993: “Die vuurwapens is dalk al ’n bietjie verroes, maar die kernwapens blink nog.” Intussen veroorsaak internasionale, rasse- en stamoorloë steeds ’n afgryslike slagting. In vroeër jare het die grootste aantal sterfgevalle onder die soldate voorgekom. Vandag vind 80 persent van die sterftes na berig word onder burgerlikes plaas, om nie eers te praat van die miljoene wat uit hulle geboorteland vlug nie.
9. Hoe toon godsdiensleiers dat hulle vriendskap met die wêreld voorstaan?
9 Aangesien godsdiensleiers daadwerklik betrokke raak by oorloë en bloedige revolusies, het hulle al dikwels getoon, en toon hulle steeds, dat hulle “vriendskap met die wêreld” voorstaan (Jakobus 4:4). Party heul met hebsugtige magnate van die handelswêreld wat groot hoeveelhede wapens produseer en dwelmryke opbou. ’n Berig in The New York Times oor die moord op ’n Suid-Amerikaanse dwelmbaas het byvoorbeeld gesê: “Hy het sy dwelmhandel verbloem deur bewerings dat sy rykdom deur wettige sakegebruike verkry is en deur hom as ’n weldoener voor te doen; hy het sy eie radioprogram gehad en is dikwels deur Rooms-Katolieke priesters vergesel.” The Wall Street Journal het berig dat hierdie dwelmbaas nie net miljoene wat dwelmslawe geword het se lewens verwoes het nie, maar ook persoonlik opdrag gegee het dat duisende vermoor word. The Times van Londen het gesê: “Die moordenaars betaal dikwels vir ’n spesiale mis om hulle dank te betuig . . . wat op dieselfde tyd as die slagoffer se begrafnismis elders gehou word.” Hoe goddeloos tog!
10. Hoe behoort ons die verslegting van wêreldtoestande te beskou?
10 Wie weet watter verwoesting demoongeïnspireerde mense nog op hierdie aarde kan aanrig? Soos 1 Johannes 5:19 sê, ‘lê die hele wêreld in die mag van die bose’, Satan die Duiwel. Vandag is daar ‘weë vir die aarde en die see, want die Duiwel het na julle toe neergedaal en het groot toorn, omdat hy weet dat hy ’n kort tydperk het’ (Openbaring 12:12). Maar gelukkig gee Romeine 10:13 ons hierdie versekering: “Elkeen wat die naam van Jehovah aanroep, sal gered word.”
God se oordeel is naby
11. Watter toestande in Israel het tot Maleagi se profesie aanleiding gegee?
11 Wat die onmiddellike toekoms van die mens betref, werp die profesie van Maleagi lig op wat binnekort gaan gebeur. Maleagi is laaste op die lang lys van eertydse Hebreeuse profete. Israel het die vernietiging van Jerusalem in 607 v.G.J. ervaar. Maar Jehovah het 70 jaar later liefderyke goedhartigheid aan die dag gelê deur daardie nasie in hulle land te hervestig. Binne honderd jaar het Israel egter weer in afvalligheid en goddeloosheid verval. Die volk het Jehovah se naam oneer aangedoen, sy regverdige wette geïgnoreer en sy tempel besoedel deur blinde, lam en siek diere as offerandes te bring. Hulle het van die vrou van hulle jeug geskei sodat hulle met vreemde vroue kon trou.—Maleagi 1:6-8; 2:13-16.
12, 13. (a) Hoe moes die gesalfde priesterlike klas gereinig word? (b) Hoe vind die groot skare ook by reiniging baat?
12 ’n Reinigingswerk was nodig. Dit word in Maleagi 3:1-4 beskryf. Soos eertydse Israel, moes Jehovah se hedendaagse Getuies gereinig word, en daarom kan die reinigingswerk wat Maleagi beskryf op hulle toegepas word. Namate die Eerste Wêreldoorlog ten einde geloop het, het sommige Bybelstudente, soos die Getuies toe bekend gestaan het, nie streng neutraliteit in wêreldse aangeleenthede gehandhaaf nie. In 1918 het Jehovah Sy “boodskapper van die verbond” (NW), Christus Jesus, na Sy geestelike tempelreëling gestuur om Sy klein groepie aanbidders van wêreldse onreinhede te reinig. Jehovah het profeties gevra: “Wie kan die dag van [die boodskapper se] koms verdra? En wie kan standhou as Hy verskyn? Want Hy sal wees soos die vuur van die smelter en soos die loog van die wassers. En Hy sal sit: ’n smelter en reiniger van silwer, en Hy sal die seuns van Levi [gesalfde priesterlike groep] reinig en hulle louter soos goud en soos silwer, sodat hulle aan die HERE in geregtigheid ’n offer sal bring.” As ’n gereinigde volk is dit presies wat hulle gedoen het!
13 Daardie gesalfde priesterlike groep bestaan uit net 144 000 (Openbaring 7:4-8; 14:1, 3). Maar wat van ander toegewyde Christene van vandag? Hierdie groep, wat al in die miljoene tel, maak “’n groot skare” uit wat ook van wêreldse gebruike gereinig moet word deur ‘hulle gewade te was en dit wit te maak in die bloed van die Lam’ (Openbaring 7:9, 14). Deur derhalwe geloof te stel in die losprysofferande van die Lam, Christus Jesus, kan hulle ’n rein posisie voor Jehovah behou. Hulle het die belofte dat hulle deur die hele groot verdrukking, die vreesinboesemende dag van Jehovah, behoue sal bly.—Sefanja 2:2, 3.
14. Op watter woorde moet God se hedendaagse volk ag slaan terwyl hulle aanhou om die nuwe persoonlikheid aan te kweek?
14 Hierdie groot skare moet, tesame met die priesterlike oorblyfsel, op God se verdere woorde ag slaan: “Ek sal tot julle nader om strafgerig te hou, en Ek sal ’n haastige getuie wees teen die towenaars en teen die egbrekers en teen die meinediges en teen die wat die dagloner in sy loon, die weduwee en die wees verdruk; en teen die wat die vreemdeling wegstoot en My nie vrees nie . . . Want Ek, die HERE, het nie verander nie” (Maleagi 3:5, 6). Nee, Jehovah se standaarde verander nie, en daarom moet sy hedendaagse volk alle afgodediens in die vrees van Jehovah vermy en moet hulle waarheidliewend, eerlik en ruimhartig wees terwyl hulle aanhou om die Christelike persoonlikheid aan te kweek.—Kolossense 3:9-14.
15. (a) Watter barmhartige uitnodiging rig Jehovah? (b) Hoe kan ons dit vermy om Jehovah te “beroof”?
15 Jehovah rig ’n uitnodiging aan almal wat moontlik van sy regverdige weë afgewyk het deur te sê: “Keer terug na My, en Ek wil na julle terugkeer.” As hulle vra: “Waarin moet ons terugkeer?” antwoord hy: “Julle beroof My.” En in antwoord op die verdere vraag: “Waarin het ons U beroof?” sê Jehovah dat hulle hom beroof het deur te versuim om hulle allerbeste as offerandes vir sy tempeldiens te bring (Maleagi 3:7, 8). Wanneer ons deel van Jehovah se volk geword het, moet dit inderdaad ons begeerte wees om die beste deel van ons energie, vermoëns en materiële bates aan Jehovah se diens te wy. Ons moet God dus nie beroof nie, maar eerder ‘aanhou om eers die koninkryk en sy regverdigheid te soek’.—Matteus 6:33.
16. Watter aanmoediging tref ons in Maleagi 3:10-12 aan?
16 Daar is ’n groot beloning vir almal wat die selfsugtige, materialistiese weë van die wêreld verwerp, soos Maleagi 3:10-12 toon: “Beproef My tog hierin, sê die HERE van die leërskare, of Ek vir julle nie die vensters van die hemel sal oopmaak en op julle ’n oorvloedige seën sal uitstort [totdat daar geen gebrek meer is, NW] nie.” Jehovah belowe dat alle waarderende mense geestelik voorspoedig en vrugbaar sal wees. Hy voeg by: “Al die nasies sal julle gelukkig prys, omdat julle die land van welbehae sal wees.” En is dit nie vandag oor die hele aarde die geval onder die miljoene wat God se dankbare volk uitmaak nie?
Handhawers van onkreukbaarheid in die boek van die lewe
17-19. (a) Watter uitwerking het die beroeringe in Rwanda op ons broers daar gehad? (b) Met watter oortuiging het al hierdie getroues voortgegaan?
17 Ons kan nou oor die onkreukbaarheid van ons Rwandese broers en susters praat. Hulle het nog altyd die beste geestelike offerandes na Jehovah se geestelike huis van aanbidding gebring. By hulle “Goddelike Onderrigting”-Streekbyeenkoms in Desember 1993 het die 2 080 Koninkryksverkondigers daar ’n bywoningsyfer van 4 075 gehad. Daar is 230 nuwe Getuies gedoop, en van hulle het byna 150 die volgende maand as hulppioniers gedien.
18 Toe etniese haat in April 1994 uitgebars het, is ten minste 180 Getuies, waaronder die stadsopsiener in Kigali, die hoofstad, en sy hele gesin, vermoor. Die ses vertalers by die Wagtoringgenootskap se kantoor in Kigali, van wie vier Hutu’s en twee Tutsi’s was, het etlike weke lank te midde van hewige dreigemente aangehou werk, totdat die Tutsi’s moes vlug en toe tog by ’n kontrolepunt vermoor is. Uiteindelik het die oorblywende vier al hulle rekenaartoerusting wat oor was, geneem en na Goma, in Zaïre, gevlug waar hulle lojaal aanhou om Die Wagtoring in Kinyarwanda te vertaal.—Jesaja 54:17.
19 Hoewel hierdie vlugtelinggetuies hulle in verskriklike omstandighede bevind het, het hulle altyd eerder geestelike voedsel as materiële voorsienings gevra. Met groot opoffering kon liefdevolle broers uit verskeie lande voorrade by hulle kry. Hierdie vlugtelinge het mondelings asook deur hulle ordelikheid te midde van spanning ’n wonderlike getuienis gegee. Hulle hou inderdaad aan om van hulle beste na Jehovah se aanbidding te bring. Hulle het dieselfde oortuiging aan die dag gelê as dié waarvan Paulus in Romeine 14:8 gepraat het: “As ons lewe, lewe ons vir Jehovah, en ook as ons sterf, sterf ons vir Jehovah. Of ons dan lewe en of ons sterf, ons behoort aan Jehovah.”
20, 21. (a) Wie se name is nie in Jehovah se gedenkboek opgeskryf nie? (b) Wie se name verskyn in die boek, en waarom?
20 Jehovah hou verslag van almal wat hom met onkreukbaarheid dien. Maleagi se profesie sê voorts: “Toe het die wat die HERE vrees, met mekaar gespreek; en die HERE het dit opgemerk en gehoor, en daar is ’n gedenkboek voor sy aangesig geskrywe vir die wat die HERE vrees en sy Naam eer.”—Maleagi 3:16.
21 Hoe belangrik is dit tog vandag dat ons godvrugtige vrees aan die dag lê deur Jehovah se naam te eer! As ons dit doen, sal ons nie ’n ongunstige oordeel ontvang, soos diegene wat hierdie wêreld se stelsels met bewondering ondersteun nie. Openbaring 17:8 sê “hulle name is . . . nie op die boekrol van die lewe geskryf nie”. Die voortreflikste naam wat in Jehovah se boek van die lewe geskryf staan, is natuurlik dié van die Hoofbewerker van die lewe, God se eie Seun, Jesus Christus. Matteus 12:21 sê: “Ja, nasies sal op sy naam hoop.” Jesus se losprysofferande waarborg die ewige lewe vir almal wat geloof daarin stel. Wat ’n voorreg is dit tog dat ons eie naam by dié van Jesus in daardie boekrol gevoeg kan word!
22. Watter onderskeid sal duidelik wees wanneer Jehovah sy oordeel voltrek?
22 Hoe sal God se knegte gedurende die oordeel vaar? Jehovah antwoord in Maleagi 3:17, 18: “Ek sal met hulle medelyde hê soos ’n man medelyde het met sy seun wat hom dien. Dan sal julle weer die onderskeid sien tussen die regverdige en die goddelose, tussen die wat God dien en die wat Hom nie dien nie.” Die onderskeid sal vir almal duidelik wees: die goddeloses, afgeskei vir die ewige afsnyding, en die regverdiges, goedgekeur vir die ewige lewe onder die heerskappy van die Koninkryk (Matteus 25:31-46). ’n Groot skare skaapgeaarde mense sal dus die groot en vreesinboesemende dag van Jehovah oorleef.
Onthou jy?
◻ Watter oordele het Jehovah in Bybeltye voltrek?
◻ Hoe stem toestande vandag ooreen met toestande in die ou tyd?
◻ Watter reiniging het ter vervulling van Maleagi se profesie plaasgevind?
◻ Wie se name is in God se gedenkboek opgeskryf?