’n Hoofman dink oor sy toekoms
HIERDIE hoofman uit Wes-Afrika was ’n baie geliefde en hoogs geëerde leier in sy gemeenskap. Op sy 78ste verjaarsdag het sy vriende, familie en ander welwillende mense byeengekom om hom geluk te wens. Die hoofman het in ’n toespraak ’n ongewone onderwerp vir so ’n geleentheid gekies. Hy het sy idees oor lewe ná die dood bespreek.
Hy het gesê dat daar anderkant die graf “’n nuwe wêreld sonder bedrog, jaloesie en hebsug is”. Hy het dit beskryf as ’n wêreld “gehul in geheimsinnigheid”, een waarin slegs die regverdiges woon en interaksie met God het.
Sulke opvattings is algemeen onder mense regoor Afrika. Volgens tradisionele Afrikagodsdienste is die dood nie ’n einde van die lewe nie, maar bloot ’n verandering, ’n oorgang na lewe in die geesteryk. Daar word gesê dat ’n persoon, wanneer hy sterf, van die sigbare wêreld na die onsigbare oorgaan. As ’n gees gaan die individu dan ’n domein binne wat deur sy of haar voorouers bewoon word.
Baie Wes-Afrikane glo dat die voorouers, of voorvaderlike geeste, die welsyn van hulle families op aarde verseker. Die boek West African Traditional Religion sê: “Daar is geen skerp onderskeid tussen die invloed van gemeenskapslede wat nog hier op die aarde is en diegene wat in die lewe hiernamaals is nie. Toe [die voorouers] hier op aarde was, was hulle die oudstes van hulle familie. Noudat hulle vir ons oë verberg is, is hulle steeds oudstes in die geestewêreld. Hulle hou nie op om in die algemene welsyn van hulle families belang te stel nie.”
Die bejaarde hoofman wat aan die begin genoem is, het gevolglik verwag om by sy voorouers aan te sluit en saam met hulle in die geesteryk te werk. Hy het gesê: “Ek het ’n sterk oortuiging dat daar lewe ná die dood is en dat dit vir my moontlik sal wees om my diens voort te sit—selfs ná die dood.”
Die Sunday Times het egter opgemerk dat die hoofman, na aanleiding van wat hy vervolgens gesê het, “nie absoluut oortuig geklink het” van lewe anderkant die graf nie. Hy het vir die vergaderde skare gesê dat hy van ’n boek gehoor het wat lewe ná die dood bespreek. Die hoofman het al vyf jaar lank na die boek gesoek. Hy was so gretig om dit te lees dat hy die ekwivalent van ongeveer R5 500 aangebied het vir enigeen wat vir hom ’n eksemplaar kon bring.
Die hoofman kon hom die moeite gespaar het deur ’n boek te raadpleeg wat nie moeilik is om te vind nie. Dit is ’n boek wat algemeen beskikbaar is en nie deur ’n mens nie, maar deur die Skepper van alle mense, voortgebring is (1 Tessalonisense 2:13). Daardie boek is die Bybel. Wat sê dit aangaande lewe ná die dood?