Die nou pad na vryheid
MIN intelligente mense betwis die feit dat die heelal deur natuurwette beheer word. Hierdie wette beheer alles, van baie klein atome tot ontsaglike sterrestelsels wat miljarde sterre bevat. As dit nié die geval was nie, sou daar geen beplanning en geen begrip gewees het nie; die lewe self sou nie bestaan het nie. Deur die natuurwette te verstaan en in ooreenstemming daarmee te handel, kon die mens al verstommende prestasies behaal, soos om op die maan te loop en kleurbeelde van enige plek op aarde of selfs van buite die aarde se atmosfeer na die televisieskerms in ons huise te stuur.
Maar wat van sedewette? Is dit net so voordelig en lonend om daaraan gehoorsaam te wees? Baie meen blykbaar dat daar geen sedewette is nie en kies ’n permissiewe filosofie of godsdiens wat by hulle eie begeertes pas.
Daar is egter ’n paar wat ’n ander weg kies, die ‘nou weg wat na die lewe lei’, soos wat in die Bybel uiteengesit word. Dit moet ons nie verbaas dat dit die keuse van slegs die minderheid is nie, want Jesus het van die nou weg gesê: “Dié wat dit vind, is min” (Matteus 7:14). Waarom net ’n paar?
Want diegene op die nou pad word deur God se wette en beginsels ingeperk. Dit sal net vir iemand aantreklik wees wat ’n opregte begeerte het om volgens God se standaarde te lewe. In skerp teenstelling met die breë pad, wat die illusie van vryheid skep, maar wat in werklikheid slawe maak van diegene wat daarop is, stel die nou pad, wat beperkend lyk, ’n mens in elke belangrike opsig vry. Die grense daarvan word bepaal deur “die volmaakte wet . . . wat tot vryheid behoort”.—Jakobus 1:25.
Hoe die nou weg mense bevry
Dit is weliswaar nie altyd maklik om op die nou weg te bly nie. Alle mense is onvolmaak en het ’n oorgeërfde neiging om te oortree. Daarom is mens moontlik geneig om ’n bietjie af te dwaal. Die voordele daaraan verbonde om op ‘die smal pad’ te bly, is nietemin enige nodige selfdissipline of aanpassing werd, want God ‘leer ons om onsself te bevoordeel’.—Jesaja 48:17, NW; Romeine 3:23.
Ter toeligting: Verstandige ouers stel ’n dieetkundige ‘smal pad’ vir hulle kinders saam. Dit beteken dat daar tydens maaltye soms streng opgetree moet word. Maar wanneer die kinders ouer word, sal hulle hulle ouers se liefdevolle dissipline waardeer. As volwassenes sal hulle ’n smaak vir gesonde kos aangeleer het. En die groot verskeidenheid voedsame kos wat beskikbaar is, sal voorkom dat hulle ooit ingeperk voel.
In ’n geestelike sin doen God dieselfde met diegene op die nou pad wat na die lewe lei. Hy kweek in saggeaardes heilsame begeertes wat tot geluk en ware vryheid lei. Dit doen hy deur sy Woord, die Bybel, te voorsien. Daarbenewens nooi hy ons om te bid dat sy gees ons help, en hy beveel ons om te assosieer met mede-Christene wat ons kan aanmoedig om op die nou pad te bly (Hebreërs 10:24, 25). Ja, God is liefde, en sy oogmerke en al die maniere waarop hy te werk gaan, is op hierdie hoofeienskap gegrond.—1 Johannes 4:8.
As daar liefde, vrede, goedheid, selfbeheersing en ander vrugte van God se gees is, lyk die nou pad nie beperkend nie. Soos die teks sê: “Teen sulke dinge is daar geen wet nie” (Galasiërs 5:22, 23). “Waar die gees van Jehovah is, daar is vryheid” (2 Korintiërs 3:17). Ware Christene kry selfs nou ’n voorsmaak van hierdie vryheid. Hulle is vry van baie van die vrese wat mense vandag teister, soos vrees vir die toekoms en ’n bygelowige vrees vir die dood. Hoe opwindend is dit tog om aan die toekoms te dink wanneer “die aarde [vol sal] wees van die kennis van die HERE soos die waters die seebodem oordek”! (Jesaja 11:9). Dan sal daar nie eens meer vrees vir misdaad wees nie. Grendels en diefwering sal vir ewig tot die verlede behoort. Almal sal vry en veilig voel—dag en nag, binne en buite die huis. Dit sal inderdaad vryheid wees!
Ons is verseker van God se hulp
Om volgens God se standaarde te lewe, verg weliswaar inspanning, maar selfs vir onvolmaakte mense “is sy gebooie nie swaar nie” (1 Johannes 5:3). Namate ons ons by die nou weg aanpas en die voordele smaak wat meegebring word as ’n mens daarop wandel, ontwikkel ons ’n toenemende afkeer van die weë en die denke waardeur diegene op die breë pad gekenmerk word (Psalm 97:10). Gehoorsaamheid aan God se wet laat die beter natuur in ons almal na vore kom. Pleks van die “pyn in die hart” en “die verbreking van gees” wat soveel mense kenmerk, beloof God: “Kyk, my knegte sal jubel, omdat hulle hart vrolik is.” Ja, ’n hart wat deur Jehovah opgelei is, is vreugdevol en vry.—Jesaja 65:14.
Jesus het gesterf om ware vryheid vir ons moontlik te maak. Die Bybel sê: “God het die wêreld so liefgehad dat hy sy enigverwekte Seun gegee het, sodat elkeen wat geloof in hom beoefen, nie vernietig sal word nie maar die ewige lewe kan hê” (Johannes 3:16). As die Koning van God se hemelse Koninkryk wend Jesus nou reeds die voordele van daardie offerande aan. Binnekort, ná “die groot verdrukking”, wanneer die breë pad en diegene daarop aan hulle einde kom, sal hy die gehoorsame mensdom geduldig begin lei langs die res van die nou weg tot by die einde daarvan, menslike volmaaktheid (Openbaring 7:14-17; Matteus 24:21, 29-31). Uiteindelik sal ons die verwesenliking van die grootse belofte ervaar: ‘Die skepping self sal ook van die slawerny van die verderflikheid vrygemaak word en die glorieryke vryheid van die kinders van God hê.’ Hierdie godgegewe vryheid kan nie oortref word nie. Selfs die dood sal nie meer daar wees nie.—Romeine 8:21; Openbaring 21:3, 4.
As ’n mens besef en duidelik verstaan waarheen die nou pad lei, is jy beter in staat om hierdie pad te kies en daarop te bly wandel. Veral jongmense word gehelp om nie kortsigtig te wees en verbitterd te raak oor wat hulle as beperkings beskou wat deur God se standaarde opgelê is nie. Hulle leer om dit as ’n bewys van God se liefde en ’n skild teen die euwels van die breë pad te beskou (Hebreërs 12:5, 6). ’n Mens moet natuurlik geduldig wees en onthou dat jy tyd nodig het om godvrugtige eienskappe en begeertes te ontwikkel, net soos ’n vrugteboom tyd nodig het om goeie vrugte voort te bring. Maar die boom sál dra as hy gesnoei en natgelei word.
Bestudeer dus God se Woord, assosieer met ander Christene en “bid onophoudelik” om heilige gees (1 Tessalonisense 5:17). Vertrou op God om jou te help om “jou paaie reguit [te] maak” (Spreuke 3:5, 6, NW). Maar is al hierdie dinge prakties? Werk dit regtig? Ja, in die geval van Tom sowel as Mary, wat in die vorige artikel gemeld is, het dit gewerk.
Hulle wandel nie meer op die breë pad nie
Tom skryf: “In die middel van die sewentigerjare het ons met Jehovah se Getuies in aanraking gekom toe een van hulle ons tuis besoek het. Die bespreking het tot ’n studie van die Bybel gelei. Stap vir stap het ek my lewe begin regkry. Ek is in 1982 gedoop en ek dien nou in die plaaslike gemeente. Ons seun is ook nou gedoop. Ek dank my vrou dat sy my al daardie jare verdra het voordat ek die waarheid geleer het. En bowenal dank ek Jehovah en sy Seun, Christus Jesus, vir alles wat hulle ons gegee het en vir die hoop wat ons nou vir die toekoms het.”
En wat van Mary? Wel, sy het geglo dat God haar nooit sal vergewe nie, maar sy wou ter wille van haar kinders van hom leer. Toe sy hoor dat Jehovah se Getuies haar buurvrou die Bybel leer, het sy ook om hulp gevra. Haar ingewortelde slegte gewoontes het haar vordering egter bemoeilik. Die studie het met horte en stote gevorder. Maar haar sewejarige dogtertjie het haar aangemoedig om voort te gaan. “Kom nou, Mamma. Mamma kan dit doen!” het sy altyd gesê. Dan het Mary harder probeer.
Toe die man saam met wie sy gelewe het, ook ’n dwelmgebruiker, huis toe gekom het, het hy by die studie aangesluit. Uiteindelik het hulle albei met hulle slegte gewoontes gebreek. Toe, nadat hulle wettig getroud is en hulle laat doop het, het hulle groot geluk gesmaak en vir die eerste keer soos ’n ware gesin gevoel. Ongelukkig het vigs uiteindelik Mary se lewe geëis, maar sy het gesterf met haar hart gerig op die Bybel se belofte van ’n opstanding en lewe op ’n paradysaarde sonder ’n spoor van die boosaardige breë pad.
Ja, dit is moontlik om die breë en wye pad wat na vernietiging lei te verlaat. Christus Jesus het gesê: “Dít beteken die ewige lewe, dat hulle kennis inneem van u, die enigste ware God, en van die een wat u uitgestuur het, Jesus Christus” (Johannes 17:3). Waarom neem jy jou dan nie voor om op die nou pad te loop wat na die lewe lei nie? Deur dit wat jy uit God se Woord leer ter harte te neem en toe te pas, kan jy persoonlik die Bybel se hartverblydende belofte ervaar: “Julle sal die waarheid ken, en die waarheid sal julle vrymaak.”—Johannes 8:32.