Bly in die “vrystad” en lewe!
“Hy moet in sy vrystad bly tot die dood van die hoëpriester.”—NUMERI 35:28.
1. Wie is die Bloedwreker, en wat gaan hy binnekort doen?
JEHOVAH se Bloedwreker, Jesus Christus, staan op die punt om toe te slaan. Saam met sy engelemagte sal hierdie Wreker binnekort optree teen almal wat sonder berou bloedskuldig is. Ja, Jesus sal as God se Skerpregter dien tydens die vinnig naderende “groot verdrukking” (Matteus 24:21, 22; Jesaja 26:21). Die mensdom sal dan die gevolge van hulle bloedskuld moet dra.
2. Wat is die enigste ware toevlugsoord, en watter vrae moet beantwoord word?
2 Die weg na veiligheid is om op die pad na die antitipiese vrystad te kom en vir jou lewe te vlug! As ’n vlugteling in die stad toegelaat word, moet hy daar bly, want dit is die enigste ware toevlugsoord. Maar jy wonder dalk: ‘Is ons werklik bloedskuldig, aangesien die meeste van ons nog nooit iemand doodgemaak het nie? Waarom is Jesus die Bloedwreker? Wat is die hedendaagse vrystad? Kan enigeen dit ooit met veiligheid verlaat?’
Is ons werklik bloedskuldig?
3. Watter aspek van die Mosaïese Wet sal ons help om te sien dat die aarde se miljarde bewoners bloedskuldig is?
3 ’n Aspek van die Mosaïese Wet sal ons help om te sien dat die aarde se miljarde bewoners bloedskuldig is. God het die Israeliete gesamentlik vir bloedvergieting aanspreeklik gehou. As die lyk van ’n vermoorde gevind is en sy moordenaar onbekend was, moes regters die afstand na die omliggende stede meet om vas te stel wat die naaste stad was. Om skuld weg te neem, moes die oudstes van daardie vermoedelik bloedskuldige stad die nek van ’n jong koei waarmee nie gewerk is nie in ’n onbewerkte dal breek. Dit is voor Levitiese priesters gedoen ‘omdat Jehovah hulle uitgekies het om geskille oor gewelddade te besleg’. Die stad se oudstes het hulle hande oor die koei gewas en gesê: “Ons hande het hierdie bloed nie vergiet nie, en ons oë het dit nie gesien nie. Doen versoening vir u volk Israel wat U, o HERE, verlos het, en laat geen onskuldige bloed op u volk Israel rus nie” (Deuteronomium 21:1-9, vgl. NW). Jehovah God wou nie hê dat die land Israel met bloed bevlek moes wees of dat sy volk gemeenskaplike bloedskuld moes dra nie.
4. Watter geskiedenis van bloedskuld het Babilon die Grote?
4 Ja, daar is so iets soos gemeenskaplike bloedskuld. Dink aan die ontsaglike bloedskuld wat op Babilon die Grote, die wêreldryk van valse godsdiens, rus. Sy is immers dronk van die bloed van Jehovah se knegte! (Openbaring 17:5, 6; 18:24). Die Christendom se godsdienste beweer dat hulle die Vredevors volg, maar oorloë, godsdiensinkwisisies en dodelike kruistogte het haar bloedskuldig voor God gemaak (Jesaja 9:5; Jeremia 2:34). Trouens, sy dra beslis groot skuld vir die dood van miljoene in die twee wêreldoorloë van hierdie eeu. Gevolglik is die aanhangers van valse godsdiens sowel as die ondersteuners van en deelnemers aan menslike oorlogvoering bloedskuldig voor God.
5. Hoe is party mense soos die onopsetlike mensemoordenaar in Israel?
5 Party mense het mensedood opsetlik of weens nalatigheid veroorsaak. Ander het ’n aandeel aan grootskaalse slagtings gehad, terwyl hulle dalk deur godsdiensleiers oortuig is dat dit God se wil is. Nog ander het God se knegte vervolg en doodgemaak. Maar selfs al het ons nie sulke dinge gedoen nie, deel ons gemeenskapsaanspreeklikheid vir die verlies van menselewe omdat ons God se wet en sy wil nie geken het nie. Ons is soos die onopsetlike mensemoordenaar ‘wat sy naaste sonder opset doodgeslaan het, terwyl hy hom van gister en eergister af nie vyandig was nie’ (Deuteronomium 19:4). Sulke persone behoort God om barmhartigheid te smeek en moet in die antitipiese vrystad inhardloop. Andersins sal hulle ’n noodlottige ontmoeting met die Bloedwreker hê.
Jesus se noodsaaklike rolle
6. Waarom kan daar gesê word dat Jesus die mensdom se naaste familielid is?
6 In Israel was die bloedwreker die slagoffer se naaste familielid. Ten einde almal wat op die aarde doodgemaak is en veral die knegte van Jehovah wat vermoor is te wreek, moet die hedendaagse Bloedwreker ’n familielid van die hele mensdom wees. Daardie rol is deur Jesus Christus vervul. Hy is as ’n volmaakte mens gebore. Jesus het sy sondelose lewe as ’n losprysofferande in die dood afgestaan, en ná sy opstanding tot lewe in die hemel het hy die waarde daarvan vir God aangebied ten behoewe van sondige Adam se sterwende afstammelinge. Christus het dus die mensdom se Loskoper geword, ons naaste familielid—die regmatige Bloedwreker (Romeine 5:12; 6:23; Hebreërs 10:12). Jesus word as ’n broer van sy gesalfde voetstapnavolgers geïdentifiseer (Matteus 25:40, 45; Hebreërs 2:11-17). As die hemelse Koning word hy die “Ewige Vader” van diegene wat by sy offerande as sy aardse onderdane baat sal vind. Hulle sal vir ewig lewe (Jesaja 9:5, 6). Dit is dus gepas dat Jehovah hierdie Familielid van die mensdom as die Bloedwreker aangestel het.
7. Wat doen Jesus as die groot Hoëpriester vir mense?
7 Jesus is ook ’n sondelose, beproefde en simpatieke Hoëpriester (Hebreërs 4:15). In daardie hoedanigheid wend hy die voordele van sy soenofferande ten behoewe van die mensdom aan. Die vrystede is “vir die kinders van Israel en die vreemdeling en die bywoner onder hulle” opgerig (Numeri 35:15). Die groot Hoëpriester het die voordele van sy offerande dus eers ten behoewe van sy gesalfde volgelinge, “die kinders van Israel”, aangewend. Nou word dit ten behoewe van die ‘vreemdelinge’ en die ‘bywoners’ in die antitipiese vrystad aangewend. Hierdie “ander skape” van die Here Jesus Christus hoop om vir ewig op die aarde te lewe.—Johannes 10:16; Psalm 37:29, 34.
Die hedendaagse vrystad
8. Wat is die antitipiese vrystad?
8 Wat is die antitipiese vrystad? Dit is nie die een of ander geografiese gebied soos Hebron, een van die ses Levitiese vrystede en tuiste van Israel se hoëpriester, nie. Die hedendaagse vrystad is God se voorsiening om ons teen die dood te beskerm omdat ons sy gebod in verband met die heiligheid van bloed oortree het (Genesis 9:6). Hetsy hy opsetlik of onopsetlik is, elke oortreder van daardie gebod moet God se vergifnis en die kansellering van sy sonde deur geloof in die bloed van die Hoëpriester, Jesus Christus, probeer verkry. Gesalfde Christene met ’n hemelse hoop en die “groot skare” met aardse vooruitsigte maak gebruik van die voordele van Jesus se soenofferande en is in die antitipiese vrystad.—Openbaring 7:9, 14; 1 Johannes 1:7; 2:1, 2.
9. Hoe het Saulus van Tarsus God se gebod in verband met bloed oortree, maar hoe het hy ’n verandering van gesindheid geopenbaar?
9 Voordat die apostel Paulus ’n Christen geword het, het hy die gebod in verband met bloed oortree. As Saulus van Tarsus het hy Jesus se volgelinge vervolg en selfs moord op hulle goedgekeur. “Nietemin”, sê Paulus, “is barmhartigheid aan my bewys, omdat ek onkundig was en in ongeloof opgetree het” (1 Timoteus 1:13; Handelinge 9:1-19). Saulus het ’n berouvolle gesindheid gehad, wat later deur baie werke van geloof bewys is. Maar meer as geloof in die losprys is nodig om die antitipiese vrystad binne te gaan.
10. Hoe kan ’n goeie gewete verkry word, en wat moet ons doen om dit te behou?
10 ’n Onopsetlike mensemoordenaar kon slegs in een van Israel se vrystede bly as hy kon bewys dat hy ’n goeie gewete voor God gehad het wat bloedvergieting betref. Om ’n goeie gewete te verkry, moet ons geloof in Jesus se offerande beoefen, berou toon oor ons sondes en ons lewenswandel verander. Ons moet om ’n goeie gewete vra wanneer ons deur Christus in gebed ons toewyding aan God maak, wat deur waterdoop gesimboliseer word (1 Petrus 3:20, 21). Hierdie goeie gewete laat ons toe om ’n rein verhouding met Jehovah te verkry. Die enigste manier waarop ons ’n goeie gewete kan behou, is deur God se vereistes na te kom en die werk te doen wat in die antitipiese vrystad aan ons opgedra is, soos vlugtelinge ook in die eertydse vrystede die Wet moes gehoorsaam en hulle werkstoewysings moes uitvoer. Vandag is die vernaamste werk vir Jehovah se volk die verkondiging van die Koninkryksboodskap (Matteus 24:14; 28:19, 20). As ons daardie werk doen, sal dit ons help om nuttige inwoners van die hedendaagse vrystad te wees.
11. Wat moet vermy word as ons veilig in die hedendaagse vrystad wil bly?
11 As ons die hedendaagse vrystad verlaat, stel ons ons bloot aan vernietiging, want die Bloedwreker gaan binnekort optree teen almal wat bloedskuldig is. Dit is nie nou die tyd om buite hierdie beskermende stad of in ’n gevaarlike gebied naby die buitenste grens van sy weiveld betrap te word nie. Ons sal buite die antitipiese vrystad beland as ons geloof verloor in die Hoëpriester se soenofferande (Hebreërs 2:1; 6:4-6). Ook sal ons nie veilig wees as ons wêreldse weë aanneem, naby die rand van Jehovah se organisasie beweeg of van ons hemelse Vader se regverdige standaarde afwyk nie.—1 Korintiërs 4:4.
Uit die vrystad bevry
12. Hoe lank moet mense wat vroeër bloedskuldig was in die antitipiese vrystad bly?
12 ’n Onopsetlike mensemoordenaar in Israel moes in ’n vrystad bly “tot die dood van die hoëpriester” (Numeri 35:28). Hoe lank moet mense wat vroeër bloedskuldig was dus in die antitipiese vrystad bly? Totdat hulle nie meer die dienste van die Hoëpriester, Jesus Christus, nodig het nie. “Hy [kan] ook dié wat deur hom tot God nader volkome red”, het Paulus gesê (Hebreërs 7:25). So lank as wat daar enige smet van sonde en vroeëre bloedskuld voortduur, is die dienste van die Hoëpriester nodig sodat onvolmaakte mense ’n regverdige posisie voor God kan hê.
13. Wie is die hedendaagse “kinders van Israel”, en hoe lank moet hulle in die “vrystad” bly?
13 Hou in gedagte dat die eertydse vrystede opgerig is vir “die kinders van Israel”, die vreemdelinge en die bywoners. “Die kinders van Israel” is geestelike Israeliete (Galasiërs 6:16). Hulle moet in die antitipiese vrystad bly so lank as wat hulle op die aarde lewe. Waarom? Omdat hulle steeds in die onvolmaakte vlees is en derhalwe die versoeningswaarde van hulle hemelse Hoëpriester nodig het. Maar wanneer hierdie gesalfde Christene sterf en tot geeslewe in die hemel opgewek word, het hulle nie meer die Hoëpriester se versoeningsdienste nodig nie; hulle sal die vlees en die bloedskuld wat daarmee gepaardgaan vir altyd agtergelaat het. Met betrekking tot sulke verrese gesalfdes sal die Hoëpriester gesterf het wat sy versoenings- en beskermende hoedanigheid betref.
14. Wat anders vereis dat diegene met hemelse vooruitsigte in die hedendaagse vrystad bly?
14 Die blote feit dat hulle mense is, vereis dat diegene wat hemelse “mede-erfgename met Christus” sal wees in die antitipiese vrystad moet bly totdat hulle hulle aardse loopbaan getrou voltooi het met hulle dood. Wanneer hulle sterf, sal hulle hulle menslike natuur vir ewig opoffer (Romeine 8:17; Openbaring 2:10). Jesus se offerande geld slegs vir mense. Die Hoëpriester sterf gevolglik met betrekking tot die lede van geestelike Israel wanneer hulle as geesskepsele opgewek word wat vir ewig in die hemel as “deelgenote in die goddelike natuur” sal woon.—2 Petrus 1:4.
15. Wie is die hedendaagse ‘vreemdelinge’ en ‘bywoners’, en wat sal die groot Hoëpriester vir hulle doen?
15 Wanneer sal die Hoëpriester met betrekking tot die hedendaagse ‘vreemdelinge’ en ‘bywoners’ “sterf”, wat hulle dan sal toelaat om die antitipiese vrystad te verlaat? Hierdie lede van die groot skare kan nie onmiddellik ná die groot verdrukking uit hierdie vrystad kom nie. Waarom nie? Omdat hulle nog steeds in hulle onvolmaakte, sondige vlees sal wees en onder die Hoëpriester se beskerming sal moet bly. As hulle gedurende sy duisendjarige koningskap en priesterskap van sy versoeningsdienste gebruik maak, sal hulle menslike volmaaktheid bereik. Jesus sal hulle dan aan God oorhandig vir ’n finale, beslissende toets van hulle onkreukbaarheid deur Satan en sy demone vir ’n klein rukkie los te laat. Aangesien hulle hierdie toets met Goddelike goedkeuring slaag, sal Jehovah hulle regverdig verklaar. So sal hulle die volheid van menslike volmaaktheid bereik.—1 Korintiërs 15:28; Openbaring 20:7-10.a
16. Wanneer sal die oorlewendes van die groot verdrukking nie meer die Hoëpriester se versoeningsdienste nodig hê nie?
16 Daarom sal oorlewendes van die groot verdrukking dan ’n goeie gewete moet behou deur in die antitipiese vrystad te bly tot aan die einde van Christus se Duisendjarige Heerskappy. As volmaakte mense sal hulle nie meer die Hoëpriester se versoeningsdienste nodig hê nie en sal hulle onder sy beskerming uitkom. Jesus sal dan as Hoëpriester met betrekking tot hulle sterf, want hy sal nie meer ten behoewe van hulle met die reinigende bloed van sy offerande hoef op te tree nie. Dan sal hulle die antitipiese vrystad verlaat.
17. Waarom sal dit vir diegene wat gedurende Christus se Duisendjarige Heerskappy opgewek word nie nodig wees om die antitipiese vrystad binne te gaan en daar te bly nie?
17 Moet diegene wat gedurende Jesus se Duisendjarige Heerskappy opgewek word die antitipiese vrystad binnegaan en daar bly tot die dood van die hoëpriester? Nee, omdat hulle deur hulle dood die straf vir hulle sonde ondergaan het (Romeine 6:7; Hebreërs 9:27). Die Hoëpriester sal hulle nogtans help om volmaaktheid te bereik. As hulle die finale toets ná die Millennium slaag, sal God hulle ook regverdig verklaar met ’n waarborg van ewige lewe op die aarde. ’n Versuim om God se vereistes na te kom, sal natuurlik ongunstige oordeel en vernietiging meebring vir enige mense wat nie die finale toets as handhawers van onkreukbaarheid slaag nie.
18. Wat omtrent Jesus se koningskap en priesterskap sal vir ewig by die mensdom bly?
18 Israelitiese hoëpriesters het uiteindelik gesterf. Maar Jesus het “vir ewig ’n hoëpriester volgens die wyse van Melgisedek geword” (Hebreërs 6:19, 20; 7:3). Wanneer Jesus dus ophou om in die amp van Hoëpriester as middelaar vir die mensdom op te tree, is dit nie die einde van sy lewe nie. Die goeie resultate van sy diens as Koning en Hoëpriester sal vir ewig by die mensdom bly, en mense sal tot in ewigheid dank aan hom verskuldig wees omdat hy in hierdie hoedanighede gedien het. Bowendien sal Jesus tot in alle ewigheid die leiding in die rein aanbidding van Jehovah neem.—Filippense 2:5-11.
Waardevolle lesse vir ons
19. Watter les in verband met haat en liefde kan ons uit die voorsiening van die vrystede leer?
19 Ons kan verskeie lesse uit die voorsiening van die vrystede leer. Geen mensemoordenaar met moorddadige haat vir sy slagoffer is byvoorbeeld toegelaat om in ’n vrystad te woon nie (Numeri 35:20, 21). Hoe kan enigiemand in die antitipiese vrystad dus toelaat dat haat vir ’n broer in sy hart ontwikkel? “Elkeen wat sy broer haat, is ’n mensemoordenaar”, het die apostel Johannes geskryf, “en julle weet dat die ewige lewe in geen mensemoordenaar bly nie.” Laat ons derhalwe “aanhou om mekaar lief te hê, want die liefde kom van God”.—1 Johannes 3:15; 4:7.
20. Wat moet diegene in die antitipiese vrystad vir beskerming teen die Bloedwreker doen?
20 Vir beskerming teen die bloedwreker moes onopsetlike mensemoordenaars in ’n vrystad bly en nie verder as die weiveld daarvan dwaal nie. Wat van diegene in die antitipiese vrystad? Vir veiligheid teen die groot Bloedwreker moet hulle nie die stad verlaat nie. Trouens, hulle moet waak teen versoekings om as ’t ware tot by die grens van die weiveld te gaan. Hulle moet versigtig wees om nie liefde vir Satan se wêreld in hulle hart te laat posvat nie. Dit vereis dalk gebed en inspanning, maar hulle lewe hang daarvan af.—1 Johannes 2:15-17; 5:19.
21. Watter lonende werk doen diegene in die hedendaagse vrystad?
21 Onopsetlike mensemoordenaars in die eertydse vrystede moes produktiewe werkers wees. Die gesalfde “kinders van Israel” stel eweneens ’n goeie voorbeeld as werkers in die oes en Koninkryksverkondigers (Matteus 9:37, 38; Markus 13:10). As ‘vreemdelinge’ en ‘bywoners’ in die hedendaagse vrystad het Christene met aardse vooruitsigte die voorreg om hierdie lewensreddende werk saam met die gesalfdes wat nog op die aarde is te doen. En wat ’n lonende werk is dit tog! Diegene wat getrou in die antitipiese vrystad werk, sal ewige dood deur die toedoen van die Bloedwreker vryspring. Hulle sal eerder ewige voordele van sy diens as God se groot Hoëpriester geniet. Sal jy in die vrystad bly en vir ewig lewe?
[Voetnoot]
Hoe sal jy antwoord?
◻ Waarom kan daar gesê word dat die aarde se miljarde bewoners bloedskuldig is?
◻ Watter rolle vervul Jesus Christus met betrekking tot die mensdom?
◻ Wat is die antitipiese vrystad, en hoe gaan ’n mens dit binne?
◻ Wanneer sal mense bevry word uit die antitipiese vrystad?
◻ Watter waardevolle lesse kan ons uit die voorsiening van die vrystede leer?
[Prente op bladsy 16]
Weet jy watter noodsaaklike rolle deur Jesus Christus vervul word?