Wagtoring – AANLYN BIBLIOTEEK
Wagtoring
AANLYN BIBLIOTEEK
Afrikaans
  • BYBEL
  • PUBLIKASIES
  • VERGADERINGE
  • w95 11/15 bl. 24-25
  • Hulle lig het nie uitgegaan nie

Video nie beskikbaar nie.

Jammer, die video kon nie laai nie.

  • Hulle lig het nie uitgegaan nie
  • Die Wagtoring kondig Jehovah se Koninkryk aan—1995
  • Soortgelyke materiaal
  • Wees moedig soos Jeremia
    Die Wagtoring kondig Jehovah se Koninkryk aan—2004
  • “Ek sal die moeë siel verkwik”
    God se woord vir ons deur Jeremia
  • Jeremia—’n ongewilde profeet van God se oordele
    Die Wagtoring kondig Jehovah se Koninkryk aan—1988
  • “Ek het my woorde in jou mond gelê”
    God se woord vir ons deur Jeremia
Sien nog
Die Wagtoring kondig Jehovah se Koninkryk aan—1995
w95 11/15 bl. 24-25

Hulle lig het nie uitgegaan nie

DAAR was in Bybeltye getroue Getuies van Jehovah wat terugslae en probleme ondervind het. Hulle het met teenstand en skynbare mislukkings te kampe gehad. Nogtans het hulle nie weens ontmoediging moed opgegee nie. Hulle lig het as’ t ware nie uitgegaan nie.

Die profeet Jeremia het byvoorbeeld die opdrag ontvang om God se profeet vir die afvallige nasie Juda te wees. Hy het hulle gewaarsku dat Jerusalem vernietig gaan word (Jeremia 1:11-19). As gevolg hiervan was daar baie konfrontasies tussen Jeremia en sy landgenote, wat hom as ’n onheilsprofeet beskou het.

Die priester Pashur, die hoofopsigter in die huis van God, het Jeremia eenkeer geslaan oor wat hy geprofeteer het en hom in die blok gesit. Ten tye van hierdie oënskynlike terugslag het Jeremia gesê: “Ek was ’n belagging die hele dag, almal saam spot met my. Want elke keer as ek spreek, moet ek dit uitskreeu, moet ek roep: Geweld en verdrukking!—omdat die woord van die HERE vir my ’n smaad en spot geword het die hele dag.” Die profeet was so ontmoedig dat hy selfs gesê het: “Ek sal aan Hom [Jehovah] nie dink nie en in sy Naam nie meer spreek nie.”—Jeremia 20:1, 2, 7-9.

Jeremia het egter nie voor ontmoediging geswig nie. Hy het na “die woord van die HERE” verwys en gesê: “Dit [word] in my hart soos ’n brandende vuur, opgesluit in my gebeente. En ek het my moeg gemaak om uit te hou, maar kon nie” (Jeremia 20:8, 9). Omdat Jeremia kragtig gemotiveer was om God se oordele bekend te maak, is hy deur die heilige gees onderskraag en het hy sy opdrag uitgevoer.

Die apostel Paulus het ook baie redes gehad om mismoedig te raak, indien hy daarvoor wou swig. Hy het natuurrampe, skipbreuk, vervolging en slae verduur. Daarbenewens ‘het die besorgdheid vir al die gemeentes hom van dag tot dag bestorm’ (2 Korintiërs 11:23-28). Ja, Paulus het daagliks met probleme te kampe gehad en hom bekommer oor nuwe gemeentes wat hy help stig het. Hy was boonop onvolmaak en het “’n doring in die vlees” gehad, moontlik swak oë (2 Korintiërs 12:7; Romeine 7:15; Galasiërs 4:15). Party het selfs agter Paulus se rug van hom gepraat, en hy het dit te hore gekom.—2 Korintiërs 10:10.

Paulus het nietemin nie toegelaat dat ontmoediging hom oorweldig nie. Nee, hy was nie ’n supermens nie (2 Korintiërs 11:29, 30). Wat het die “vuur” in hom laat brand? Om maar een ding te noem, hy het metgeselle gehad wat hom bygestaan het, party het hom selfs tot in Rome vergesel waar hy in huisarres gehou is (Handelinge 28:14-16). Tweedens het die apostel ’n gebalanseerde beskouing van sy omstandighede gehad. Paulus se vervolgers en teenstanders was verkeerd, nie hy nie. Teen die einde van sy aardse lewe het hy ’n positiewe beskouing van sy bediening gehad en gesê: “Van nou af is die kroon van regverdigheid vir my weggelê, wat die Here, die regverdige regter, my . . . as beloning sal gee.”—2 Timoteus 4:8.

Paulus het hom bowenal gereeld in gebed tot Jehovah God gewend, en ‘die Here het naby hom gestaan en hom krag gegee’ (2 Timoteus 4:17). “Vir alles”, het Paulus gesê, “is ek sterk genoeg deur hom wat my krag gee” (Filippense 4:13). Kommunikasie met God en mede-Christene, asook ’n positiewe beskouing van sy bediening, het Paulus gehelp om in Jehovah se diens aan die gang te bly.

God het Paulus geïnspireer om te skryf: “Laat ons . . . nie ophou om te doen wat voortreflik is nie, want op die regte tyd sal ons maai indien ons nie moeg word nie” (Galasiërs 6:7-9). Wat sal ons maai? Die ewige lewe. Wees dus soos Jeremia, Paulus en die baie ander getroue getuies van Jehovah wat in die Skrif genoem word. Ja, wees soos hulle en moenie voor ontmoediging swig nie. Moenie jou lig laat uitgaan nie.—Vergelyk Matteus 5:14-16.

[Prente op bladsy 25]

Paulus en Jeremia het nie hulle lig laat uitgaan nie

    Afrikaanse publikasies (1975-2025)
    Meld af
    Meld aan
    • Afrikaans
    • Deel
    • Voorkeure
    • Copyright © 2025 Watch Tower Bible and Tract Society of Pennsylvania
    • Gebruiksvoorwaardes
    • Privaatheidsbeleid
    • Privaatheidsinstellings
    • JW.ORG
    • Meld aan
    Deel