Vrae van lesers

In Filippense 2:9 het Paulus van Jesus gesê: ‘God het hom tot ’n hoër posisie verhef en hom goedgunstig die naam gegee wat bo elke ander naam is.’ Wat is hierdie nuwe naam? En as Jesus aan Jehovah ondergeskik is, hoe is Jesus se naam bo elke ander naam?

Filippense 2:8, 9 sê: “Wat meer is, toe hy [Jesus] hom in gestalte as ’n mens bevind het, het hy homself verneder en gehoorsaam geword tot in die dood, ja, die dood aan ’n folterpaal. Juis om dié rede het God hom ook tot ’n hoër posisie verhef en hom goedgunstig die naam gegee wat bo elke ander naam is.”

Hierdie teks beteken nie dat Jesus dieselfde persoon as Jehovah moet wees aangesien dit net Jehovah is wat ’n naam heeltemal bo elke ander naam het nie. Soos die konteks in Filippense hoofstuk 2 toon, het Jesus sy verhewe naam ná sy opstanding ontvang. Hy het dit nie voor daardie tyd gehad nie. Jehovah was daarenteen nog altyd oppermagtig, en sy posisie het nooit verander nie. Die feit dat Jesus ’n naam ontvang het wat hoër is as die naam wat hy gehad het voordat sy aardse diens begin het, bewys dat hy nie dieselfde persoon as Jehovah is nie. Toe Paulus gesê het dat Jesus ’n naam bo elke ander naam gegee is, het hy bedoel dat Jesus nou die hoogste naam van al God se skepsele het.

Wat is Jesus se verhewe naam? Jesaja 9:6 help ons om daardie vraag te beantwoord. In ’n profesie aangaande die komende Messias, Jesus, sê daardie vers: “Die vorstelike heerskappy sal op sy skouer wees. En sy naam sal genoem word: Wonderbare Raadgewer, Magtige God, Ewige Vader, Vredevors” (NW). Hier het Jesus se “naam” te doen met sy hoë posisie en gesag, en dit is ook hoe ons “die naam . . . wat bo elke ander naam is”, verstaan wat in Filippense 2:9 genoem word. Daar word beveel dat elke knie voor Jesus moet buig ter erkenning van die hoë posisie van gesag wat Jehovah hom gegee het—’n posisie van gesag wat hoër is as wat aan enige ander skepsel gegee is. Die woord “ander” in hierdie vertaling verskyn nie regstreeks in die onderliggende Griekse teks nie, maar word deur die sin van die vers geïmpliseer. Jesus se “naam” is nie bo sy eie naam nie, maar bo die naam van elke ander skepsel.

Hoe bly is ons tog om by al die getroue engele en mense aan te sluit wat die knie buig ter erkenning van Jesus se naam! Ons doen dit deur ons aan Jesus te onderwerp weens die verhewe en magtige posisie wat deur Jehovah aan hom gegee is—“tot die heerlikheid van God die Vader”.—Filippense 2:11; Matteus 28:18.