Hulle het vrede gevind in ’n wêreld vol beroeringe

DIE voorblad van hierdie tydskrif beeld ’n hewige oorlogstoneel in Bosnië en Herzegowina uit. Kan daar vrede in so ’n plek wees? Verbasend genoeg is die antwoord ja. Terwyl Rooms-Katolieke, Oosters-Ortodokse en Moslemgemeenskappe in daardie tragiese land om gebied veg, is daar baie mense wat graag vrede wil hê, en sommige het dit gevind.

Die Djorems het in Sarajevo gebly, en hulle was Getuies van Jehovah. Te midde van al die beroeringe in daardie stad het hulle gereeld hulle bure besoek om die goeie nuus van God se Koninkryk aan hulle te verkondig (Matteus 24:14). Waarom? Omdat die Djorem-gesin geweet het dat hierdie Koninkryk iets wesenliks is, dat dit reeds in die hemel opgerig is en dat dit die mensdom se beste en enigste hoop op vrede is. Jehovah se Getuies het volkome vertroue in dit wat die apostel Paulus “die goeie nuus van vrede” genoem het (Efesiërs 2:17). Danksy mense soos Bozo en Hena Djorem vind baie mense in Bosnië en Herzegowina vrede.

Ware vrede in die toekoms

Daar is nog meer om oor die Djorems te sê. Maar kom ons praat eers oor ’n ander paartjie wat vertroue in God se Koninkryk verkry het. Hulle name is Artur en Arina. Hulle en hulle jong seuns het eers in ’n republiek in die voormalige Sowjetunie gewoon. Toe ’n burgeroorlog uitgebreek het, het Artur vir een van die kante geveg. Maar kort voor lank het hy hom afgevra: ‘Waarom veg ek teen hierdie mense wat eers my bure was?’ Hy het die land verlaat en, ná baie probleme, saam met sy jong gesin in Estland aangekom.

Op ’n besoek aan St. Petersburg het Artur Getuies van Jehovah ontmoet, en hy was beindruk deur wat hy oor God se Koninkryk geleer het. Dit is Jehovah se wil dat God se Koninkryk binnekort die enigste heerskappy oor die mensdom sal wees (Daniël 2:44). Dan sal die aarde ’n vreedsame plek wees, met geen burgeroorloë of internasionale konflikte meer nie. Jesaja het oor daardie tyd geprofeteer: “Hulle sal geen kwaad doen of verderf aanrig op my hele heilige berg nie; want die aarde sal vol wees van die kennis van die HERE soos die waters die seebodem oordek.”—Jesaja 11:9.

Toe hy die kunstenaar se voorstelling van daardie toekomstige, vreedsame aarde in ’n Bybelstudiehulp sien wat ’n Getuie vir hom gewys het, het Artur gesê dat hy vantevore in ’n plek gebly het wat so gelyk het. Maar nou word dit deur ’n burgeroorlog verwoes. Terug in Estland leer Artur en sy gesin nou meer oor God se Koninkryk deur middel van ’n Bybelstudie met Jehovah se Getuies.

Vrede te midde van beroeringe

Psalm 37:37 sê: “Let op die vrome en kyk na die opregte, want daar is ’n toekoms vir die man van vrede.” Trouens, die vrede van iemand wat vroom en opreg in God se oë is, word nie tot sy toekoms beperk nie. Hy geniet dit nóú reeds. Hoe is dit moontlik? Neem byvoorbeeld die ondervinding van ’n man met die naam Paul.

Paul woon in ’n afgeleë vlugtelingkamp in die suidweste van Etiopië, hoewel hy eintlik van ’n buurland af kom. In sy tuisland het hy een van Jehovah se Getuies ontmoet wat vir ’n oliemaatskappy gewerk het, en hierdie man het vir hom ’n Bybelstudiehulp, Die waarheid wat lei tot die ewige lewe, gegee.a Paul het nooit weer die Getuie gesien nie, maar hy het die boek noukeurig bestudeer. Weens ’n burgeroorlog het hy na ’n vlugtelingkamp in Etiopië gevlug, en daar het hy met ander gepraat oor wat hy geleer het. ’n Klein groepie het dit as die waarheid aangeneem. Op grond van wat hulle geleer het, het hulle kort voor lank met ander in die kamp daaroor begin praat.

Paul het aan die Wagtoringgenootskap se hoofkwartier geskryf en om hulp gevra. ’n Bedienaar wat van Addis Ababa gestuur is, was verbaas om 35 mense te vind wat vir hom gewag het, gereed om meer oor God se Koninkryk te leer. Reëlings is getref sodat hulp op ’n gereelde grondslag gegee kon word.

Hoe kan daar gesê word dat mense soos Paul vrede geniet? Hulle lewe is nie maklik nie, maar hulle het geloof in God. Wanneer hulle deur die beroeringe van hierdie wêreld geraak word, pas hulle die Bybel se raad toe: “Moet oor niks besorg wees nie, maar laat julle versoeke in alles deur gebed en smeking tesame met danksegging by God bekend word.” Hulle ondervind gevolglik ’n gevoel van tevredenheid wat vandag iets skaars is. Die apostel Paulus se woorde aan die gemeente in Filippi is op hulle van toepassing: “Die vrede van God wat alle denke te bowe gaan, sal julle harte en julle verstandelike vermoëns deur middel van Christus Jesus bewaak.” Hulle het inderdaad ’n hegte verhouding met Jehovah, “die God van vrede”.—Filippense 4:6, 7, 9.

Huidige vrede

Die gekroonde Koning van God se Koninkryk is Jesus Christus, wat in die Bybel die “Vredevors” genoem word (Jesaja 9:5). ’n Profeet van die ou tyd het van hom gesê: “Hy [sal] aan die nasies vrede verkondig, en sy heerskappy sal wees van see tot see, en van die Eufraat tot aan die eindes van die aarde” (Sagaria 9:10). Geïnspireerde woorde soos dié het ’n diepgaande uitwerking op die lewe van ’n man met die naam José gehad.

José was vroeër in die tronk. Hy was ’n terroris en is in hegtenis geneem toe hy polisiebarakke wou opblaas. Hy het gedink dat slegs geweld die regering sou dwing om toestande in sy land te verbeter. Terwyl hy in die tronk was, het Jehovah se Getuies die Bybel met sy vrou begin studeer.

Nadat José vrygelaat is, het hy ook die Bybel bestudeer, en kort daarna was die woorde van Psalm 85:9 op hom van toepassing: “Ek wil hoor wat God die HERE spreek. Ja, Hy spreek vrede vir sy volk en vir sy gunsgenote.” Daardie vers sluit egter met ’n waarskuwing af: “Laat hulle nie tot dwaasheid [“selfvertroue”, NW] terugkeer nie.” Iemand wat dus Jehovah se vrede soek, sal nie op aanmatigende wyse onafhanklik of in stryd met Sy wil optree nie.

Vandag is José en sy vrou Christenbedienaars. Hulle rig ander na Jehovah se Koninkryk as die oplossing vir probleme wat José vroeër met tuisgemaakte bomme wou oplos. Hulle is bereid om op die Bybel te vertrou wat sê: “Ook gee die HERE die goeie” (Psalm 85:13). Trouens, José het onlangs die barakke besoek wat hy van plan was om te vernietig. Waarom? Om met die gesinne daar oor God se Koninkryk te praat.

Vreedsame mense

Die Bybel sê in Psalm 37:10, 11: “Nog ’n klein rukkie en die goddelose sal daar nie wees nie; ja, jy sal ag gee op sy plek, maar hy sal daar nie wees nie. Die ootmoediges daarenteen sal die aarde besit en hulle verlustig oor groot vrede.” Wat ’n wonderlike vooruitsig tog!

Let egter daarop dat Jehovah se vrede net vir “die ootmoediges” is. Diegene wat vrede nastreef, sal dalk moet leer om vreedsaam te wees. Dit was die geval met Keith wat in Nieu-Seeland woon. Keith is beskryf as “fors gebou met ’n sterk persoonlikheid, aggressief en twisgierig”. Hy was lid van ’n bende en het in ’n huis gewoon wat ’n regte fort was, met tuine wat deur drie waghonde gepatrolleer is om indringers uit te hou. Sy vrou, die moeder van sy ses kinders, het van hom geskei.

Toe Keith Jehovah se Getuies ontmoet het, het die goeie nuus ’n diep indruk op hom gemaak. Kort daarna het hy en sy kinders saam met die Getuies vergaderinge bygewoon. Hy het sy hare, wat tot by sy middellyf gehang het, afgesny en met sy eertydse metgeselle oor God se Koninkryk begin praat. Party van hulle het ook die Bybel begin bestudeer.

Keith het, soos miljoene regskapenes oor die hele wêreld, die woorde van die apostel Petrus begin toepas: “Wie die lewe wil liefhê en goeie dae wil sien, . . . laat hy hom afkeer van wat sleg is en doen wat goed is; laat hom vrede soek en dit nastreef” (1 Petrus 3:10, 11). Keith se gewese vrou het ingestem om weer met hom te trou, en hy leer nou om ‘vrede te soek en dit na te streef’.

Jehovah se vrede het al baie mense se lewe gered, onder andere ’n eertydse atleet wat in die voormalige USSR gebore is. Hierdie man het medaljes by die Olimpiese Spele gewen, maar hy het ontnugterd geraak en hom aan dwelms en alkohol oorgegee. Ná ’n veelbewoë 19 jaar, wat ’n drie jaar lange vonnis in ’n strafkamp in Siberië ingesluit het, asook ’n skeepsreis as ’n verstekeling na Kanada en twee nabydood-ervarings weens sy dwelmgewoonte, het hy tot God gebid om hom te help om ’n ware doel in die lewe te vind. ’n Bybelstudie, wat Russiessprekende Getuies van Jehovah met hom gehou het, het hom gehelp om die antwoorde op sy vrae te vind. Vandag het hierdie man, soos miljoene ander, vrede met God en met homself gevind.

Die opstandingshoop

Kom ons keer ten slotte terug na Bozo en Hena Djorem in Sarajevo. Hierdie egpaar het ’n vyfjarige dogtertjie, Magdalena, gehad. Verlede Julie het hulle drie hulle huis verlaat om weer eens aan hulle predikingswerk deel te neem toe hulle almal in ’n ontploffing gesterf het. Wat van die vrede wat hulle aan ander verkondig het? Het die ontploffing wat hulle lewe geneem het, getoon dat dit nie ware vrede was nie?

Beslis nie! In hierdie stelsel van dinge vind tragedies plaas. Mense sterf weens bomontploffings. Ander sterf aan siekte of in ongelukke. Baie sterf weens ouderdom. Diegene wat God se vrede geniet, is nie hierteen immuun nie, maar die moontlikheid van sulke gebeure laat hulle nie sonder hoop nie.

Jesus het vir sy vriendin Marta belowe: “Ek is die opstanding en die lewe. Wie geloof in my beoefen, sal lewend word, selfs al sterf hy” (Johannes 11:25). Die Djorems het dit geglo, net soos al Jehovah se Getuies. En die Djorems het geloof gehad dat, as hulle sou sterf, hulle op ’n aarde opgewek sal word wat dan ’n waarlik vreedsame plek sal wees. Jehovah God “sal elke traan van hulle oë afvee, en die dood sal daar nie meer wees nie, en ook verdriet en geskreeu en pyn sal daar nie meer wees nie. Die vorige dinge het verbygegaan.”—Openbaring 21:4.

Net voordat Jesus gesterf het, het hy vir sy volgelinge gesê: “Ek gee julle my vrede. . . . Moenie dat julle hart verontrus word” nie (Johannes 14:27). Ons verbly ons saam met die Djorems wat daardie vrede gehad het en wat dit sekerlik in ’n groter mate in die opstanding sal geniet. Ons is verheug oor almal wat Jehovah, die God van vrede, aanbid. Sulke mense het gemoedsrus. Hulle geniet vrede met God. Hulle jaag vrede met ander na. En hulle het vertroue in ’n vreedsame toekoms. Ja, hulle het vrede gevind, al lewe hulle in ’n wêreld vol beroeringe. Ja, almal wat God in gees en waarheid aanbid, geniet vrede. Mag jy ook sulke vrede vind.

[Voetnoot]

[Prente op bladsy 7]

Hulle het vrede gevind, ondanks die feit dat hulle in ’n wêreld vol beroeringe lewe