“Julle moet die waarheid en die vrede liefhê”!
“Die woord van die HERE van die leërskare het tot my gekom en gesê: . . . Julle moet die waarheid en die vrede liefhê.”—SAGARIA 8:18, 19.
1, 2. (a) Wat toon die mensdom se geskiedenis oor vrede? (b) Waarom sal hierdie teenswoordige wêreld nooit ware vrede sien nie?
“DIE wêreld het nog nooit vrede gehad nie. Daar was nog altyd êrens—en dikwels op baie plekke tegelykertyd—oorlog.” Dit was die woorde van professor Milton Mayer van die Universiteit van Massachusetts, VSA. Wat ’n droewige opmerking oor die mensdom is dit tog! Mense wou weliswaar nog altyd vrede hê. Politici het allerhande maniere probeer om dit te handhaaf; van die Pax Romana in Romeinse tye tot die beleid van “Wedersyds Versekerde Vernietiging” gedurende die Koue Oorlog. Maar uiteindelik het al hulle pogings misluk. Soos Jesaja dit baie eeue gelede gestel het, ‘ween die boodskappers van vrede bitterlik’ (Jesaja 33:7). Waarom is dit die geval?
2 Dit is omdat blywende vrede uit die afwesigheid van haat en hebsug moet voortvloei; dit moet op die waarheid gegrond wees. Vrede kan nie op leuens gebou word nie. Dit is waarom Jehovah, toe hy herstelling en vrede vir eertydse Israel belowe het, gesê het: “Kyk, die vrede lei Ek na haar toe soos ’n rivier en die rykdom van die nasies soos ’n oorlopende stroom” (Jesaja 66:12). Die god van hierdie stelsel van dinge, Satan die Duiwel, is “’n mensemoordenaar” en “’n leuenaar en die vader van die leuen” (Johannes 8:44; 2 Korintiërs 4:4). Hoe kan ’n wêreld met so ’n god ooit vrede hê?
3. Watter merkwaardige gawe het Jehovah vir sy volk gegee ondanks die feit dat hulle in ’n wêreld vol probleme lewe?
3 Dit is egter opmerkenswaardig dat Jehovah vir sy volk vrede gee selfs terwyl hulle in Satan se oorloggeteisterde wêreld lewe (Johannes 17:16). In die sesde eeu v.G.J. het hy sy belofte, wat hy deur middel van Jeremia gegee het, vervul en “vrede en waarheid” vir sy spesiale nasie gegee toe hy hulle in hulle tuisland herstel het (Jeremia 33:6, NW). En in hierdie laaste dae gee hy “vrede en waarheid” vir sy volk in hulle “land”, of aardse geestelike staat, selfs al het hulle die moeilikste tyd deurgemaak wat hierdie wêreld tot nou toe gesien het (Jesaja 66:8; Matteus 24:7-13; Openbaring 6:1-8). Terwyl ons ons bespreking van Sagaria hoofstuk 8 voortsit, sal ons ’n dieper waardering verkry vir hierdie godgegewe vrede en waarheid, en ons sal sien wat ons moet doen om ons deel daarin te bewaar.
“Laat julle hande sterk wees”
4. Hoe het Sagaria Israel aangespoor om op te tree as hulle vrede wou ondervind?
4 Vir die sesde keer in Sagaria hoofstuk 8 hoor ons ’n opwindende verklaring deur Jehovah: “So sê die HERE van die leërskare: Laat julle hande sterk wees, julle wat in hierdie dae sulke woorde gehoor het uit die mond van die profete op die dag toe die fondament gelê is van die huis van die HERE van die leërskare, die tempel, om gebou te word. Want vóór hierdie dae het die mense geen loon getrek nie, ook vir die diere was daar geen loon nie; en vir die wat uit- en ingaan, was daar weens die teëstander geen veiligheid nie; want Ek het al die mense die een teen die ander losgelaat.”—Sagaria 8:9, 10.
5, 6. (a) Wat was die situasie in Israel weens die Israeliete se mismoedigheid? (b) Watter verandering het Jehovah Israel belowe as hulle sy aanbidding eerste sou stel?
5 Sagaria het hierdie woorde gespreek terwyl die herbouing van die tempel in Jerusalem aan die gang was. Die Israeliete wat uit Babilon teruggekeer het, het vroeër mismoedig geword en opgehou met die bouwerk aan die tempel. Aangesien hulle hulle aandag op hulle eie gerief gevestig het, het hulle geen seëninge en geen vrede van Jehovah ontvang nie. Selfs al het hulle hulle landerye bewerk en na hulle wingerde omgesien, was hulle nie voorspoedig nie (Haggai 1:3-6). Dit was asof hulle vir “geen loon” gewerk het nie.
6 Noudat hulle besig was om die tempel te herbou, het Sagaria die Jode aangespoor om ‘sterk te wees’ en Jehovah se aanbidding moedig eerste te stel. Wat sou gebeur indien hulle dit doen? “Nou sal Ek vir die oorblyfsel van hierdie volk nie wees soos in vroeër dae nie, spreek die HERE van die leërskare. Want die saad van vrede, die wingerdstok, sal sy vrug gee, en die aarde sy opbrings lewer, en die hemel sal sy dou skenk; en die oorblyfsel van hierdie volk sal Ek al hierdie dinge laat beërwe. En soos julle ’n vloek gewees het onder die nasies, o huis van Juda en huis van Israel, so sal Ek julle verlos, dat julle ’n seën kan wees. Wees nie bevrees nie, laat julle hande sterk wees” (Sagaria 8:11-13). As Israel met vasberadenheid opgetree het, sou hulle voorspoedig wees. Vroeër, as die nasies ’n voorbeeld van vervloeking wou noem, kon hulle na Israel verwys. Nou sou Israel ’n voorbeeld van ’n seën wees. Watter uitstekende rede om ‘hulle hande sterk te laat wees’!
7. (a) Watter opwindende veranderinge het Jehovah se volk ondervind, wat in die 1995-diensjaar ’n hoogtepunt bereik het? (b) Wanneer jy na die jaarverslag kyk, watter lande sien jy het ’n merkwaardige hoogtepunt in verkondigers, pioniers en gemiddelde ure bereik?
7 Wat van vandag? Wel, in die jare voor 1919 het dit Jehovah se volk ietwat aan ywer ontbreek. Hulle het nie ’n volkome neutrale standpunt tydens die Eerste Wêreldoorlog ingeneem nie, en hulle het die neiging gehad om eerder ’n mens te volg as hulle Koning, Jesus Christus. Gevolglik is party deur teenstand van binne en buite die organisasie ontmoedig. Toe, in 1919, het hulle met Jehovah se hulp hulle hande sterk laat wees (Sagaria 4:6). Jehovah het hulle vrede gegee en hulle was baie voorspoedig. Dit kan gesien word uit hulle bedrywighede van die afgelope 75 jaar, wat in die 1995-diensjaar ’n hoogtepunt bereik het. As ’n volk vermy Jehovah se Getuies nasionalisme, stamtrots, vooroordeel en alle ander oorsake van haat (1 Johannes 3:14-18). Hulle dien Jehovah met opregte ywer in sy geestelike tempel (Hebreërs 13:15; Openbaring 7:15). Verlede jaar alleen het hulle meer as ’n miljard uur daaraan bestee om met ander oor hulle hemelse Vader te praat! Hulle het elke maand 4 865 060 Bybelstudies gehou. Elke maand het gemiddeld 663 521 aan die pionierdiens deelgeneem. Wanneer geestelikes in die Christendom ’n voorbeeld wil gee van mense wat waarlik entoesiasties in hulle aanbidding is, verwys hulle soms na Jehovah se Getuies.
8. Hoe kan individuele Christene by “die saad van vrede” baat vind?
8 Weens hulle ywer gee Jehovah sy volk “die saad van vrede”. Elke individu wat daardie saad kweek, sal sien hoe vrede in sy hart en in sy lewe toeneem. Elke gelowige Christen wat vrede met Jehovah en met mede-Christene nastreef, deel in die waarheid en die vrede van Jehovah se naamvolk. (1 Petrus 3:11; vergelyk Jakobus 3:18.) Is dit nie wonderlik nie?
“Wees nie bevrees nie”
9. Watter verandering in sy handelinge met sy volk het Jehovah belowe?
9 Nou lees ons ’n sewende verklaring deur Jehovah. Wat is dit? “So sê die HERE van die leërskare: Soos Ek My voorgeneem het om julle kwaad aan te doen, toe julle vaders My vertoorn het, sê die HERE van die leërskare, en Ek daar geen berou van gehad het nie—so het Ek My weer voorgeneem om in hierdie dae goed te doen aan Jerusalem en die huis van Juda. Wees nie bevrees nie.”—Sagaria 8:14, 15.
10. Wat toon dat Jehovah se Getuies nie bevrees was nie?
10 Al is Jehovah se volk gedurende die Eerste Wêreldoorlog in geestelike sin verstrooi, wou hulle in hulle hart graag doen wat reg is. Gevolglik het Jehovah, nadat hy hulle gedissiplineer het, die manier waarop hy met hulle gehandel het, verander (Maleagi 3:2-4). Vandag kyk ons terug en dank hom van harte vir wat hy gedoen het. Ons was weliswaar “vir al die nasies voorwerpe van haat” (Matteus 24:9). Baie is gevange geneem en party het selfs vir hulle geloof gesterf. Ons kom dikwels voor onverskilligheid of vyandigheid te staan. Maar ons is nie bevrees nie. Ons weet dat Jehovah sterker is as enige opposisie, sigbaar of onsigbaar (Jesaja 40:15; Efesiërs 6:10-13). Ons sal nie ophou om op die woorde ag te slaan nie: “Hoop op Jehovah; wees moedig en laat jou hart sterk wees.”—Psalm 27:14, NW.
“Spreek die waarheid met mekaar”
11, 12. Wat moet elkeen van ons in gedagte hou as ons die seëninge wat Jehovah vir sy volk gee ten volle wil geniet?
11 Om die seëninge wat Jehovah gee ten volle te geniet, is daar sekere dinge wat ons moet onthou. Sagaria sê: “Dit is die dinge wat julle moet doen: Spreek die waarheid met mekaar; beoefen waarheid en ’n regspraak van vrede in julle poorte! En julle moet nie mekaar se onheil in jul hart versin nie, en nie die valse eed liefhê nie. Want dit alles haat Ek, spreek die HERE.”—Sagaria 8:16, 17.
12 Jehovah spoor ons aan om die waarheid te spreek (Efesiërs 4:15, 25). Hy verhoor nie die gebede van diegene wat skadelike planne beraam, wat die waarheid vir eie gewin verberg of wat valse ede aflê nie (Spreuke 28:9). Aangesien hy afvalligheid haat, wil hy hê dat ons aan Bybelwaarheid moet vashou (Psalm 25:5; 2 Johannes 9-11). Ouer manne wat regterlike sake hanteer, moet ook, soos die oudstes by die stadspoorte in Israel, hulle raad en besluite op Bybelwaarhede baseer en nie op persoonlike menings nie (Johannes 17:17). Jehovah wil hê dat hulle “’n regspraak van vrede” moet nastreef, deur as Christenherders die vrede te probeer herstel wanneer daar onenigheid tussen persone is en deur berouvolle sondaars te help om vrede met God te herwin (Jakobus 5:14, 15; Judas 23). Terselfdertyd bewaar hulle die vrede van die gemeente deur moedig op te tree en diegene uit te sit wat daardie vrede versteur omdat hulle moedswillig volhou om verkeerde dade te beoefen.—1 Korintiërs 6:9, 10.
“’n Vreugde en blydskap”
13. (a) Watter verandering met betrekking tot vaste het Sagaria voorspel? (b) Watter vaste is in Israel gehou?
13 Ons hoor nou die agtste plegtige verklaring: “So sê die HERE van die leërskare: Die vasdag in die vierde en die vasdag in die vyfde en die vasdag in die sewende en die vasdag in die tiende maand moet vir die huis van Juda ’n vreugde en blydskap wees en vrolike feestye, maar julle moet die waarheid en die vrede liefhê” (Sagaria 8:19). Onder die Mosaïese Wet het die Israeliete op die Versoendag gevas om oor hulle sondes berou te toon (Levitikus 16:29-31). Die vier vaste waarvan Sagaria gepraat het, is waarskynlik gehou om gebeure in verband met die verowering en vernietiging van Jerusalem te betreur (2 Konings 25:1-4, 8, 9, 22-26). Maar nou was hulle besig om die tempel te herbou en Jerusalem weer te bevolk. Rou is in vreugde verander, en die vaste kon feestye word.
14, 15. (a) Hoe was die Gedenkmaalviering ’n groot rede tot blydskap, en waaraan behoort dit ons te laat dink? (b) Watter lande het volgens die jaarverslag uitstekende bywoningsyfers vir die Gedenkmaal gehad?
14 Vandag hou ons nie die vaste waarvan Sagaria gepraat het of dié wat in die Wet voorgeskryf is nie. Aangesien Jesus sy lewe vir ons sondes geoffer het, geniet ons die seëninge van ’n groter Versoendag. Ons sondes word nie net op ’n sinnebeeldige wyse bedek nie, maar geheel en al (Hebreërs 9:6-14). Uit gehoorsaamheid aan die opdrag van die hemelse Hoëpriester, Jesus Christus, vier ons die herdenking van sy dood as die enigste plegtige viering op die Christelike kalender (Lukas 22:19, 20). Ondervind ons nie “’n vreugde en blydskap” wanneer ons elke jaar vir daardie viering byeenkom nie?
15 Verlede jaar het 13 147 201 vergader om die Gedenkmaal te vier, 858 284 meer as in 1994. Wat ’n menigte! Stel jou die blydskap voor in die 78 620 gemeentes van Jehovah se Getuies toe buitengewoon groot getalle hulle Koninkryksale binnegestroom het vir die viering. Al die aanwesiges is ongetwyfeld beweeg om ‘die waarheid en die vrede lief te hê’ terwyl hulle gedink het aan die dood van die Een wat “die weg en die waarheid en die lewe” is en wat nou as Jehovah se groot “Vredevors” heers! (Johannes 14:6; Jesaja 9:5). Daardie viering het spesiale betekenis gehad vir diegene wat dit gehou het in lande wat deur beroeringe en oorlog geteister word. Party van ons broers het onbeskryflike gruweldade gedurende 1995 sien plaasvind. En tog het ‘die vrede van God wat alle denke te bowe gaan, hulle harte en hulle verstandelike vermoëns deur middel van Christus Jesus bewaak’.—Filippense 4:7.
‘Laat ons die aangesig van Jehovah versag’
16, 17. Hoe kan mense van die nasies ‘die aangesig van Jehovah versag’?
16 Maar waar het al daardie miljoene wat die Gedenkmaal bygewoon het vandaan gekom? Die negende aankondiging van Jehovah verduidelik: “So sê die HERE van die leërskare: Nog sal volke aankom en die inwoners van baie stede. En die inwoners van die een stad sal gaan na die ander en sê: Kom, laat ons heengaan om die aangesig van [Jehovah te versag, NW] en die HERE van die leërskare te soek. Ek wil ook gaan! So sal dan baie volke en magtige nasies kom om die HERE van die leërskare in Jerusalem te soek en die aangesig van [Jehovah te versag, NW].”—Sagaria 8:20-22.
17 Mense wat die Gedenkmaal bygewoon het, wou ‘die HERE van die leërskare soek’. Baie van hulle was sy toegewyde, gedoopte knegte. Miljoene ander aanwesiges het nog nie daardie stadium bereik nie. In party lande was die Gedenkmaalbywoningsyfer vier of vyf keer groter as die getal Koninkryksverkondigers. Al hierdie talle belangstellendes het hulp nodig om aan te hou vooruitgang maak. Laat ons hulle leer om hulle te verheug in die kennis dat Jesus vir ons sondes gesterf het en nou in God se Koninkryk regeer (1 Korintiërs 5:7, 8; Openbaring 11:15). En laat ons hulle aanspoor om hulle aan Jehovah God toe te wy en hulle aan sy aangestelde Koning te onderwerp. Op hierdie manier sal hulle ‘die aangesig van Jehovah versag’.—Psalm 116:18, 19; Filippense 2:12, 13.
“Tien man uit al die tale van die nasies”
18, 19. (a) Wie is “’n Joodse man” in die hedendaagse vervulling van Sagaria 8:23? (b) Wie is vandag die “tien man” wat “die slip van ’n Joodse man gryp”?
18 Ons lees vir die laaste keer in die agtste hoofstuk van Sagaria: “So sê die HERE van die leërskare.” Wat is Jehovah se finale verklaring? “In dié dae sal tien man uit al die tale van die nasies die slip van ’n Joodse man gryp en dit vashou en sê: Ons wil met julle saamgaan, want ons het gehoor dat God met julle is” (Sagaria 8:23). In Sagaria se dag was natuurlike Israel God se uitverkore volk. In die eerste eeu het Israel egter Jehovah se Messias verwerp. Gevolglik het ons God “’n Joodse man”—’n nuwe Israel—as sy spesiale volk gekies, “die Israel van God” wat uit geestelike Jode bestaan (Galasiërs 6:16; Johannes 1:11; Romeine 2:28, 29). Hulle volle getal is 144 000, wat uit die mensdom gekies is om saam met Jesus in sy hemelse Koninkryk te regeer.—Openbaring 14:1, 4.
19 Die meeste van hierdie 144 000 het reeds getrou gesterf en hulle hemelse beloning ontvang (1 Korintiërs 15:51, 52; Openbaring 6:9-11). ’n Paar van hulle is nog op die aarde oor en hulle is verheug om te sien dat die “tien man” wat kies om saam met die “Joodse man” te gaan inderdaad “’n groot skare . . . uit alle nasies en stamme en volke en tale” is.—Openbaring 7:9; Jesaja 2:2, 3; 60:4-10, 22.
20, 21. Hoe kan ons in vrede met Jehovah bly namate die einde van hierdie wêreld nader kom?
20 Namate die einde van hierdie wêreld al hoe nader kom, is die Christendom soos Jerusalem in Jeremia se dag: “Hulle wag op vrede, maar daar is niks goeds nie; en op ’n tyd van beterskap, maar daar is verskrikking” (Jeremia 14:19). Daardie verskrikking sal ’n hoogtepunt bereik wanneer die nasies valse godsdiens aanval en dit tot ’n gewelddadige einde bring. Kort daarna sal die nasies self in God se finale oorlog, Armageddon, vernietig word (Matteus 24:29, 30; Openbaring 16:14, 16; 17:16-18; 19:11-21). Wat ’n tyd van opskudding sal dit tog wees!
21 Deur dit alles heen sal Jehovah diegene beskerm wat die waarheid liefhet en “die saad van vrede” kweek (Sagaria 8:12; Sefanja 2:3). Laat ons dan veilig in die land van sy volk bly en hom ywerig in die openbaar loof en soveel mense moontlik help om “die aangesig van Jehovah te versag”. As ons dít doen, sal ons altyd Jehovah se vrede geniet. Ja, ‘Jehovah sal sy volk sterkte gee, Jehovah sal sy volk seën met vrede’.—Psalm 29:11.
Kan jy verduidelik?
◻ Hoe het God se volk ‘hulle hande laat sterk wees’ in Sagaria se dag? Vandag?
◻ Hoe reageer ons op vervolging, vyandigheid en onverskilligheid?
◻ Wat behels dit om ‘die waarheid met mekaar te spreek’?
◻ Hoe kan ’n mens ‘die aangesig van Jehovah versag’?
◻ Watter groot rede tot blydskap word gesien in die vervulling van Sagaria 8:23?
[Prent op bladsy 18]
Verlede jaar het Jehovah se Getuies 1 150 353 444 uur daaraan bestee om met mense oor God se Koninkryk te praat