Ons het ware vriende nodig
JENNY en Sue gesels lustig. Hulle glimlag, hulle oë blink—hulle hele houding weerspieël ’n opregte belangstelling in wat die ander persoon te sê het. Hoewel hulle agtergrond verskil, het hulle klaarblyklik baie met mekaar gemeen asook baie respek vir mekaar.
Op ’n ander plek werk Eric en Dennis saam aan ’n projek, een van talle oor die jare. Hulle is ontspanne en lag lekker. Namate die gesprek ernstiger raak, wissel hulle openhartig menings uit. Hulle respekteer mekaar. Soos Jenny en Sue is Eric en Dennis ware vriende.
Hierdie beskrywings laat jou dalk ’n warm gevoel in jou hart kry en laat jou moontlik aan jou eie vriende dink. Aan die ander kant kan dit jou na sulke vriendskappe laat smag. Jy kan ook sulke vriendskappe geniet!
Waarom ons ware vriende nodig het
Gesonde vriendskappe is noodsaaklik vir ons verstandelike en fisiese welsyn. Dit beteken egter nie dat daar iets met ons fout is wanneer ons eensaam voel nie. Party navorsers sê dat eensaamheid ’n soort honger is, ’n natuurlike aanwyser dat ons kameraadskap nodig het. In alle geval, net soos voedsel honger laat afneem of stil, kan die regte soort vriendskappe eensaamheid laat afneem of dit selfs laat verdwyn. Daarbenewens is goeie vriende wat waardering vir ons het nie ’n onbekombare luuksheid nie.
Die mens is met ’n behoefte aan kameraadskap geskep (Genesis 2:18). Die Bybel sê dat ’n ware vriend, of metgesel, “gebore word vir die tyd wanneer daar benoudheid is” (Spreuke 17:17, NW). Ware vriende behoort mekaar dus om hulp te kan vra wanneer dit nodig is. Maar vriendskap behels meer as om net iemand te hê tot wie jy jou kan wend of om saam te werk of te ontspan. Goeie vriende bring die beste in mekaar na vore. Spreuke 27:17 sê: “Yster slyp yster, so slyp die een mens die persoon van die ander.” Net soos ’n stuk yster gebruik kan word om ’n lem wat van dieselfde metaal gemaak is te slyp, kan een vriend die verstandelike en geestelike toestand van ’n ander slyp. As teleurstellings ons ontmoedig, kan ’n vriend se simpatieke blik en skriftuurlike aanmoediging baie bemoedigend wees.
In die Bybel word vriendskap met liefde, gemeensaamheid, vertroulikheid en kameraadskap geassosieer. ’n Mens kan vriende met jou bure, werksmaats, ensovoorts wees. Party reken ook sekere familielede onder hulle intiemste vriende. Maar vandag is dit vir baie mense moeilik om ware vriende te vind en te behou. Waarom is dit so? Kan jy ware en blywende vriendskappe geniet?