Is jy ’n slagoffer van vooroordeel?
WAT het etniese geweld, rassisme, diskriminasie, segregasie en volksmoord in gemeen? Hulle is almal uitvloeisels van ’n menslike neiging wat algemeen voorkom—vooroordeel!
Wat is vooroordeel? Een ensiklopedie definieer dit as “’n mening wat gevorm word sonder dat ’n mens tyd neem of die moeite doen om regverdig te oordeel”. As onvolmaakte mense is ons geneig om in sekere mate bevooroordeeld te wees. Miskien kan jy aan gevalle dink toe jy iemand geoordeel het sonder dat jy al die feite gehad het. Die Bybel stel sulke bevooroordeelde neigings teenoor die manier waarop Jehovah God oordeel. Dit sê: “Nie wat die mens sien, sien God nie; want die mens sien aan wat voor oë is, maar die HERE sien die hart aan.”—1 Samuel 16:7.
Vooroordeel kan seermaak
Ons almal is ongetwyfeld al die een of ander tyd deur iemand verkeerd beoordeel. (Vergelyk Prediker 7:21, 22.) In algemene sin is ons almal slagoffers van vooroordeel. Maar wanneer bevooroordeelde gedagtes gou verdryf word, sal dit waarskynlik weinig of geen skade berokken. Dit is wanneer sulke gedagtes gekoester word dat dit slegte gevolge kan hê. Dit kan ons mislei om ’n leuen te glo. Byvoorbeeld, onder die invloed van vooroordeel glo party mense vas dat iemand gierig, lui, onnosel of trots kan wees bloot omdat hy aan ’n sekere godsdiens-, etniese of nasionale groep behoort.
In baie gevalle het sulke verkeerde beoordeling onregverdige, kwaadwillige of selfs gewelddadige behandeling van ander tot gevolg. Miljoene mense het hulle lewe in massamoorde, volksmoorde, etniese slagtings en ander vorme van uiterste vooroordeel verloor.
Regoor die aarde het regerings vooroordeel beveg deur die onskendbare reg op vryheid, veiligheid en gelykheid wetlik te waarborg. As jy die grondwet of vernaamste wette van jou land lees, sal jy ongetwyfeld ’n klousule of ’n wysiging vind wat bedoel is om die regte van alle burgers, ongeag hulle ras, geslag of godsdiens, te beskerm. Nogtans vier vooroordeel en diskriminasie wêreldwyd hoogty.
Is jy ’n slagoffer van vooroordeel? Is jy al as gierig, lui, onnosel of trots bestempel bloot as gevolg van jou ras, ouderdom, geslag, nasionaliteit of godsdiensopvattings? Word jy weens vooroordeel geleenthede tot behoorlike opvoeding, werk, behuising en gemeenskapsdienste ontsê? Indien wel, hoe kan jy daarmee saamleef?
[Prent op bladsy 3]
Wanneer vooroordeel gekoester word, stook dit rassehaat aan
[Erkenning]
Nina Berman/Sipa Press