Wanneer daar nie meer vooroordeel sal wees nie!

NA BEWERING het die wetenskaplike Albert Einstein eenkeer gesê dat dit in hierdie droewige wêreld moeiliker is om ’n vooroordeel te oorkom as om ’n atoom te splits. Edward R. Murrow, ’n joernalis wat gedurende die Tweede Wêreldoorlog beroemd geword het en later direkteur van die Amerikaanse Inligtingsagentskap was, het eweneens gesê dat “niemand vooroordele kan verwyder nie—dit kan net erken word”.

Is hierdie stelling waar? Is dit onmoontlik om diskriminasie en rassisme te verwyder? Hoe voel God oor vooroordeel?

God is nie partydig nie

Die Bybel veroordeel partydigheid (Spreuke 24:23; 28:21). Dit sê dat ‘die wysheid van bo allereers kuis is, dan vredeliewend, redelik, bereid om te gehoorsaam, vol barmhartigheid en goeie vrugte, nie partydige onderskeid maak nie, nie huigelagtig is nie’ (Jakobus 3:17). Die regters in eertydse Israel is sulke wysheid op die hart gedruk. “Julle mag geen onreg doen in die gereg nie”, is hulle beveel. “Jy mag vir die geringe nie partydig wees nie en die aansienlike nie voortrek nie.”—Levitikus 19:15.

Die Bybel se ferm standpunt teen partydigheid en vooroordeel is deur Jesus Christus en sy apostels Petrus en Paulus beklemtoon. Jesus was onpartydig teenoor diegene wat “gestroop en rondgegooi [was] soos skape sonder ’n herder” (Matteus 9:36). Hy het geleer: “Hou op om na die uiterlike te oordeel, maar oordeel met ’n regverdige oordeel.”—Johannes 7:24.

Petrus en Paulus verseker ons ook dat Jehovah God nie partydig is nie. Petrus het gesê: “Ek bemerk vir seker dat God nie partydig is nie, maar in elke nasie is die mens wat hom vrees en regverdigheid beoefen vir hom aanneemlik” (Handelinge 10:34, 35). Die apostel Paulus sê vir ons: “Daar is geen partydigheid by God nie.”—Romeine 2:11.

Die invloed van die Bybel

Die Bybel het die krag om die persoonlikhede te verander van diegene wat daardeur gelei word. Hebreërs 4:12 sê: “Die woord van God is lewend en oefen krag uit.” Met Jehovah se hulp kan ’n bevooroordeelde persoon selfs sy denkwyse verander en onpartydig word in die manier waarop hy ander behandel.

Beskou byvoorbeeld die geval van Saulus van Tarsus. Volgens die Bybelverslag het hy die Christengemeente ’n tyd lank gewelddadig teëgestaan omdat hy onbuigsame godsdienstradisies gevolg het (Handelinge 8:1-3). As gevolg van Joodse tradisie was hy vas oortuig dat alle Christene afvalliges en vyande van ware aanbidding was. Sy vooroordeel het daartoe gelei dat hy die moord op Christene ondersteun het. Die Bybel sê dat hy “dreiging en moord teen die dissipels van die Here geblaas het” (Handelinge 9:1). Terwyl hy dit gedoen het, het hy gedink dat hy ’n heilige diens aan God bewys.—Vergelyk Johannes 16:2.

Saulus van Tarsus was nietemin in staat om ontslae te raak van sy kwaai vooroordeel. Trouens, hy het self ’n Christen geword! Later het hy as Paulus, ’n apostel van Jesus Christus, geskryf: ‘Vroeër was ek ’n lasteraar en ’n vervolger en ’n onbeskaamde man. Nietemin is barmhartigheid aan my bewys, omdat ek onkundig was en in ongeloof opgetree het.’—1 Timoteus 1:13.

Paulus was nie die enigste een wat sulke ingrypende veranderinge in sy denkwyse aangebring het nie. In sy brief aan Titus, ’n mede-evangeliedienaar, het Paulus Christene vermaan “om van niemand kwaad te spreek nie, om nie strydlustig te wees nie, om redelik te wees en alle sagmoedigheid teenoor alle mense aan die dag te lê. Want selfs ons was eens onverstandig, ongehoorsaam, mislei, slawe van verskillende begeertes en genietinge, het in slegtheid en afguns gelewe, was afskuwelik, het mekaar gehaat.”—Titus 3:2, 3.

Verwyder die struikelblokke van vooroordeel

Vandag probeer ware Christene daardie raad volg. Hulle wil nie mense op grond van oppervlakkige indrukke oordeel nie. Dit verhinder hulle om “kwaad te spreek” van ander. Hulle maak deel uit van ’n internasionale broederskap wat oor al die nasionalistiese, etniese en rassegrense van hierdie wêreld strek.

Beskou die ondervinding van Henrique, ’n donker Brasiliaan. Omdat hy self ’n slagoffer van rassediskriminasie is, het hy ’n diepgewortelde haat teenoor wit mense ontwikkel. Hy verduidelik: “Twee Getuies met ligte velle het na my huis toe gekom om oor God se naam te praat. Aanvanklik wou ek nie na hulle luister nie omdat ek nie wit mense vertrou het nie. Maar ek kon gou die waarheid in hulle boodskap herken. Wel, ek het tot ’n Bybelstudie ingestem. My eerste vraag was: ‘Is daar baie swart mense in julle kerk?’ Hulle het ‘Ja’ geantwoord. Toe het hulle my die laaste prent in die boek My boek met Bybelverhalea gewys, wat jongmense van verskillende rasse uitbeeld. Daar was ook ’n swart seuntjie daarin, en dit het my aangemoedig. Later het ek na die Koninkryksaal van Jehovah se Getuies gegaan, waar ek mense van verskillende rasse gesien het wat mekaar met respek behandel. Dit was vir my baie belangrik.”

Nou is Henrique, as een van Jehovah se Getuies, verheug om aan ’n ware Christenbroederskap te behoort. Hy besef dat die eer nie enige mens toekom nie. Hy sê: “Vandag is ek dankbaar teenoor Jehovah en Jesus vir alles wat hulle ten behoewe van my gedoen het. Ek werk saam met miljoene van Jehovah se lojale knegte van alle rasse, kleure en agtergronde, in een doel verenig.”

Dario was ook terwyl hy grootgeword het ’n slagoffer van vooroordeel. Toe hy 16 was, het hy die Bybel saam met Jehovah se Getuies begin studeer. Hy het gesê: “Onder die Getuies het ek geen gevoel van rassewaan gevind nie.” Hy is deur die gees van ware liefde beïndruk. Hy het veral opgelet dat mense van verskillende rasse in verantwoordelike posisies in die gemeente dien. Elke keer as Dario aan die een of ander vorm van vooroordeel of diskriminasie deur mense buite die gemeente onderwerp word, onthou hy dat Jehovah mense van alle nasies, stamme en tale liefhet.

Hoe om daarmee saam te leef

Ons almal hou daarvan om met waardigheid en respek behandel te word. Dit is waarom dit nie maklik is om ’n slagoffer van vooroordeel te wees nie. Die Christengemeente beskerm ons nie teen alle blootstelling aan die bevooroordeelde gesindhede van hierdie goddelose wêreld nie. Solank Satan die Duiwel wêreldaangeleenthede beheer, sal daar onregverdighede wees (1 Johannes 5:19). Openbaring 12:12 waarsku ons: “Wee die aarde en die see, want die Duiwel het na julle toe neergedaal en het groot toorn, omdat hy weet dat hy ’n kort tydperk het.” Sy oogmerk is nie bloot om dinge vir ons moeilik te maak nie. Hy word met ’n roofdier vergelyk. Die apostel Petrus sê vir ons: “Julle teenstander, die Duiwel, loop rond soos ’n brullende leeu en is daarop uit om iemand te verslind.”—1 Petrus 5:8.

Die Bybel sê ook vir ons: “Onderwerp julle dus aan God; maar staan die Duiwel teë, en hy sal van julle wegvlug” (Jakobus 4:7). Iets wat ’n mens baie sal help om met vooroordeel saam te leef, is om jou tot God te wend om beskerming, soos koning Dawid gedoen het: “My God, red my uit die hand van die goddelose, uit die mag van hom wat onreg doen, en van die geweldenaar” (Psalm 71:4). Ons kan selfs soos die psalmis bid: “Wees my genadig, o God, want mense vertrap my; hy wat my beveg, verdruk my die hele dag.”—Psalm 56:2.

Hoe sal God op sulke gebede reageer? Die Bybel antwoord: “Hy sal die behoeftige red wat daar roep om hulp, en die ellendige en wie geen helper het nie. Hy sal hom ontferm oor die arme en behoeftige, en die siele van die behoeftiges sal hy red” (Psalm 72:12, 13). Hoe goed is dit tog om te weet dat Jehovah op sy bestemde tyd verligting sal bring vir almal wat slagoffers van onregverdigheid is!

‘Hulle sal geen kwaad doen nie’

Die regerings van hierdie wêreld hou dalk aan om vooroordeel met hulle wette en programme te beveg. Hulle gaan dalk voort om gelykheid en regverdigheid te belowe. Maar hulle kan nie sukses behaal nie (Psalm 146:3). Net God kan en sal alle bevooroordeelde behandeling verwyder. Hy sal die mensdom in een verenigde familie omskep. “’n Groot skare, wat geen mens kon tel nie, uit alle nasies en stamme en volke en tale” sal die einde van hierdie goddelose stelsel oorleef en dit geniet om in vrede te lewe.—Openbaring 7:9, 10.

Jehovah sal al die skade wat deur rasse- en sosiale vooroordeel berokken is ongedaan maak. Dink net, niemand sal onregverdig behandel word nie! “Hulle sal sit elkeen onder sy wingerdstok en onder sy vyeboom, sonder dat iemand hulle verskrik” (Miga 4:4). En Jesaja 11:9 sê: ‘Hulle sal geen kwaad doen nie.’

Indien jy nou ’n slagoffer van vooroordeel is, sal hierdie wonderlike hoop vir die toekoms jou verhouding met Jehovah versterk. Dit sal jou help om die onregverdighede van hierdie goddelose stelsel te verduur. Terwyl jy met vooroordeel saamleef en vorentoe kyk, moet jy die Bybel se wyse raad volg: “Wees sterk, en laat julle hart sterk wees, almal wat op die HERE wag!”—Psalm 31:25.

[Voetnoot]

[Foto-erkenning op bladsy 4]

U.S. National Archives photo