Wat ‘instinktief wyse’ skepsele ons kan leer

LUGVERSORGING, vrieswering, ontsouting en sonar is uitvindings wat in die 20ste eeu algemeen bekend geraak het aan die mensdom. Tog het dit duisende jare gelede reeds in die dierewêreld bestaan. Ja, die mensdom trek voordeel uit ’n studie van sulke ‘instinktief wyse’ skepsele (Spreuke 30:24-28, NW; Job 12:7-9). Dit lyk asof party diere die mensdom se spraaklose onderrigters geword het, en dit kan baie interessant wees om hulle te ondersoek.

Kan ons daarby baat vind om die kenmerke van sekere diere te ondersoek? Wel, Jesus Christus het sy volgelinge met skape, slange, duiwe en selfs sprinkane vergelyk. Wat het hy in gedagte gehad toe hy sy volgelinge met hierdie diere vergelyk het? Laat ons sien.

“My skape luister na my stem”

Skape word meer as 200 keer in die Bybel gemeld. Soos Smith’s Bible Dictionary verduidelik, “is die skaap ’n simbool van sagmoedigheid, geduld en onderdanigheid”. In Jesaja hoofstuk 53 is Jesus self profeties met ’n skaap vergelyk. Hoe gepas tog dat hy sy volgelinge met dieselfde dier vergelyk het! Maar watter besondere kenmerke van skape het Jesus in gedagte gehad?

“My skape luister na my stem, en ek ken hulle, en hulle volg my”, het Jesus gesê (Johannes 10:27). Hy het dus die aandag gevestig op sy dissipels se sagmoedigheid en hulle gretigheid om hom te volg. Letterlike skape luister na hulle herder en volg hom gewilliglik. Die herder is ook baie geheg aan die kudde.

Wanneer ’n kudde wei, is hulle dalk oor ’n weiveld versprei, maar elke skaap bly waar hy die groep kan sien. Wanneer die diere dus onveilig of bang voel, “kan hulle vinnig groepeer”, sê die boek Alles für das Schaf (Alles vir die skaap). As skape weghardloop om uit gevaar te ontsnap, doen hulle dit as ’n kudde en elke nou en dan staan hulle stil om die situasie op te som. “Omdat hulle kort-kort gaan staan terwyl hulle vlug, kan die lammers en swakker diere bybly. Die kudde bied hulle selfs spesiale beskerming.” Wat kan ons uit hierdie optrede leer?

Ware Christene van vandag is nie onder die denominasies en sektes van die Christendom verstrooi nie. Hulle is eerder in een kudde versamel. Elke Christen is persoonlik geheg aan hierdie kudde van God, en dit dra by tot die eenheid van die organisasie van Jehovah se Getuies. Waar soek elke aanbidder leiding en beskerming wanneer daar ’n krisis ontstaan—hetsy dit ernstige siekte, oorlogvoering of ’n natuurramp is? In Jehovah se organisasie, wat geestelike beskerming voorsien.

Hoe word Bybelse raad beskikbaar gestel? Deur middel van publikasies soos Die Wagtoring en sy medetydskrif die Ontwaak! Hierdie tydskrifte en Christelike vergaderinge bied selfs spesiale hulp aan diegene wat ekstra sorg nodig het, soos die lammers en swakker skape in ’n kudde. Aandag word byvoorbeeld geskenk aan enkelouers en aan diegene wat aan depressie ly. Hoe verstandig is dit dus om elke tydskrif te lees, om elke vergadering van die gemeente by te woon en om toe te pas wat ons leer! Op hierdie wyse openbaar ons sagmoedigheid en ’n sterk gehegtheid aan die kudde van God.—1 Petrus 5:2.

“Versigtig soos slange en tog onskuldig soos duiwe”

Smith’s Bible Dictionary sê: “Oral in die Ooste is die slang as ’n simbool van die kwaad, van die gees van ongehoorsaamheid, gebruik”. Aan die ander kant was die woorde “my duif” ’n uiting van geneentheid (Hooglied 5:2). Wat het Jesus dus in gedagte gehad toe hy sy volgelinge aangespoor het om “versigtig soos slange en tog onskuldig soos duiwe” te wees?—Matteus 10:16.

Jesus het hier vir hulle gesê hoe om die predikings- en onderrigtingswerk te doen. Sy dissipels kon gemengde reaksies te wagte wees. Sommige sou belangstelling toon, terwyl ander die goeie nuus sou verwerp. Party sou selfs hierdie ware knegte van God vervolg (Matteus 10:17-23). Hoe moes die dissipels op vervolging reageer?

In Das Evangelium des Matthäus (Die Evangelie van Matteus) sê Fritz Rienecker aangaande Matteus 10:16: “Skerpsinnigheid . . . moet hand aan hand gaan met onkreukbaarheid, opregtheid en openhartigheid sodat niks sou gebeur om vyande gegronde redes vir klagtes te gee nie. Die ambassadeurs van Jesus het te kampe met wrede teenstanders wat minagtend optree en die apostels genadeloos en by elke geleentheid aanval. Dit is derhalwe nodig om—net soos ’n slang—’n waaksame ogie oor teenstanders te hou, en die situasie met gespitste aandag in oënskou te neem; om sonder bedrog of misleiding die situasie onder beheer te hê, om vlekkeloos en eerlik in woord en daad te wees en sodoende te toon dat hulle soos duiwe is.”

Wat kan God se hedendaagse knegte leer uit Jesus se woorde in Matteus 10:16? Mense reageer vandag op die goeie nuus op baie dieselfde wyse as wat hulle in die eerste eeu daarop gereageer het. Wanneer ware Christene voor vervolging te staan kom, moet hulle die skerpsinnigheid van die slang asook die vlekkeloosheid van die duif aan die dag lê. Christene wend hulle nooit tot bedrog of oneerlikheid nie, maar is onbedorwe, opreg en eerlik wanneer hulle die Koninkryksboodskap aan ander verkondig.

Ter toeligting: Medewerkers, jongmense by die skool of selfs lede van jou eie gesin maak dalk bitsige aanmerkings oor jou opvattings as ’n Getuie van Jehovah. Die onmiddellike reaksie is dalk om iemand met gelyke munt te betaal deur net so snydend oor sy geloof te praat. Maar is jy dan onskuldig? Nouliks. As jou kritici sien dat hulle aanmerkings geen uitwerking op jou goeie gedrag het nie, verander hulle dalk net ten goede. Jy sal dan skerpsinnig en onberispelik wees—‘versigtig soos ’n slang, tog so onskuldig soos ’n duif’.

“Die sprinkane het gelyk soos perde wat regstaan vir oorlog”

Die tydskrif GEO sê dat Suid-Afrika in 1784 deur “die grootste swerm [sprinkane geteister] is wat nog in die geskrewe geskiedenis opgeteken is”. Die swerm het ’n gebied van 5 200 vierkante kilometer gedek, wat ongeveer vyf keer so groot soos Hongkong is. Smith’s Bible Dictionary sê dat die sprinkaan “verskriklike verwoesting aan die plantegroei aanrig in die lande wat daardeur geteister word”.

In sy godgegewe openbaring van dinge wat gedurende “die dag van die Here” sou plaasvind, het Jesus ’n visioen van ’n swerm sprinkane gebruik. Daar is aangaande hulle gesê: “Die sprinkane het gelyk soos perde wat regstaan vir oorlog” (Openbaring 1:1, 10; 9:3-7, NAV). Wat het hierdie simboliek beteken?

Jehovah se Getuies het lank reeds besef dat die sprinkane van Openbaring hoofstuk 9 die gesalfde knegte van God op aarde in hierdie eeu afbeeld.a Hierdie Christene is ’n sekere taak opgedra—om die Koninkryksboodskap wêreldwyd te verkondig en dissipels te maak (Matteus 24:14; 28:19, 20). Dit vereis dat hulle hindernisse oorkom en in hulle werk volhard. Wat kon dit beter toelig as die onoorwinlike sprinkaan?

Hoewel die sprinkaan nie veel langer as vyf sentimeter is nie, lê dit gewoonlik tussen 100 en 200 kilometer per dag af. Die woestynsprinkaan kan selfs tot 1 000 kilometer aflê. GEO verduidelik dat “sy vlerke 18 keer per sekonde en tot 17 uur per dag klap—iets wat geen ander insek kan doen nie”. Wat ’n ontsaglike taak vir so ’n klein diertjie!

As ’n groep is Jehovah se Getuies onwrikbaar in die verkondiging van die goeie nuus van die Koninkryk. Hulle doen die predikingswerk nou in meer as 230 lande. Hierdie knegte van God oorkom talle struikelblokke sodat hulle ’n aandeel aan die uitvoering van die werk kan hê. Met watter soort probleme het hulle te kampe? Vooroordeel, wetlike beperkings, siekte, ontmoediging en teenstand van familielede is net ’n paar. Maar niks kon hulle vooruitgang stuit nie. Hulle volhard in hulle godgegewe werk.

Hou aan om Christelike eienskappe aan die dag te lê

Ja, Jesus het sy volgelinge met skape, slange, duiwe en sprinkane vergelyk. Dit is werklik gepas vir ons dag. Waarom? Omdat die einde van hierdie stelsel van dinge op hande is en probleme ons onder groter druk as ooit tevore plaas.

Met Jesus se illustrasies in gedagte, bly ware Christene na aan die kudde van God en aanvaar hulle sagmoedig raad van Jehovah se organisasie. Hulle bly wakker en is op hulle hoede vir situasies wat hulle Christelike bedrywighede kan kniehalter, terwyl hulle onberispelik in alle dinge bly. Daarbenewens volhard hulle in die uitvoering van God se wil ondanks hindernisse. En hulle hou aan om by sommige ‘instinktief wyse’ diere te leer.

[Voetnoot]