Koninkryksverkondigers berig

’n Ferm standpunt in die skool word beloon

DIE Bybel voorspel: “Al jou kinders sal deur die HERE geleer wees, en die vrede van jou kinders sal groot wees” (Jesaja 54:13). In ’n breër sin kan “al jou kinders” op al God se knegte op aarde, die kleintjies inkluis, toegepas word. Vandag maak Christenouers seker dat hulle kinders by die huis en by Christelike vergaderinge deur “die HERE geleer” word.

Maar wanneer jong Christene skool toe gaan, kom hulle voor moeilike uitdagings te staan. Dit is dikwels nodig dat hulle ’n ferm standpunt inneem op grond van wat hulle in die Bybel geleer het. Wanneer hulle dit doen, kan dit voordele vir die leerlinge sowel as die onderwysers inhou, soos die volgende ondervinding uit Mikronesië toon.

Op die klein Wes-Pasifiese eiland Tol in die Chuuk-eilande het die onderwysers in die plaaslike skool vir al die kinders gesê om vir ’n skoolviering van Allerheiligeaand voor te berei en daaraan deel te neem. Die Getuie-leerlinge het besef dat die viering versierings en kostuums kon insluit wat spoke, geeste en hekse uitbeeld—alles dinge wat met spiritistiese gebruike verband hou. Hierdie kinders se gewete sou hulle nie toelaat om deel te neem nie.a

Vanweë hulle Bybelse opleiding tuis en in die Christengemeente het hulle geweet dat sulke gebruike God mishaag, selfs wanneer dit bloot vir vermaak gedoen word. Om hulle standpunt duideliker te help stel, het die kinders Barak, een van die Getuie-sendelinge op die eiland, genooi om met hulle onderwysers te praat.

Nadat die onderwysers die verduideliking gehoor het, het hulle ’n tweede vergadering gereël, waartydens Barak met al die personeellede van die skool kon praat. Tydens hierdie vergadering het Barak feite genoem om te toon wat eintlik by Allerheiligeaand betrokke is. Hy het sy inligting uit verskeie Wagtoringpublikasies asook uit ander bronne gekry. Onderwysers en administratiewe personeel was verbaas oor wat hulle aangaande die oorsprong, geskiedenis en godsdienstige aard van die viering geleer het. Hulle het besluit om ’n personeelvergadering te hou om te besluit hoe die situasie opgelos kon word.

’n Paar dae later is ’n onverwagte besluit aangekondig. Alle voorbereidingswerk vir Allerheiligeaand word gekanselleer. Die skool sou Allerheiligeaand daardie jaar eenvoudig nie vier nie. Wat ’n gunstige resultaat as gevolg van hierdie jong Getuies se vasbeslotenheid om in die skool te doen wat reg is! Jongmense hoef nooit bang of skaam te wees om ’n ferm standpunt vir Bybelwaarheid in te neem nie.

Regoor die wêreld leer Jehovah se Getuies hulle kinders om hard te werk op skool. Jong Getuies word ook geleer om volgens Bybelbeginsels te lewe en om vir ander leerlinge van hulle hoop en opvattings te vertel wanneer hulle die geleentheid het. Selfs wanneer hulle nie sulke gunstige of onmiddellike resultate soos in hierdie geval geniet nie, kan jongmense die vertroue en bevrediging hê wat spruit uit die feit dat hulle doen wat reg is. Nog belangriker, hulle kan daarvan verseker wees dat dit hulle hemelse Vader behaag en dat hy hulle vir hulle getroue diens sal seën.

[Voetnoot]