Wagtoring – AANLYN BIBLIOTEEK
Wagtoring
AANLYN BIBLIOTEEK
Afrikaans
  • BYBEL
  • PUBLIKASIES
  • VERGADERINGE
  • w97 1/1 bl. 1-5
  • Waarom moet ons almal God loof?

Video nie beskikbaar nie.

Jammer, die video kon nie laai nie.

  • Waarom moet ons almal God loof?
  • Die Wagtoring kondig Jehovah se Koninkryk aan—1997
  • Onderhofies
  • Soortgelyke materiaal
  • ‘Net Jehovah kon my hoop gee’
  • ‘Hoewel ek blind is, kan ek sien’
  • Laat almal ‘Jah loof’
  • Wanneer jy voel dat jy nie kan voortgaan nie
    Die Wagtoring kondig Jehovah se Koninkryk aan (Publieke uitgawe) – 2019
  • Soeke na die waarheid beloon
    Die Wagtoring kondig Jehovah se Koninkryk aan—1985
  • Van depressie tot geluk
    Die Wagtoring kondig Jehovah se Koninkryk aan—1990
  • Sê vir hulle dat jy lief is vir hulle
    Ondervindinge van Jehovah se Getuies
Sien nog
Die Wagtoring kondig Jehovah se Koninkryk aan—1997
w97 1/1 bl. 1-5

Waarom moet ons almal God loof?

HALLELUJA! Hierdie woord is welbekend aan die meeste kerkgangers in die Christendom. Party van hulle sê dit hardop tydens hulle Sondagdienste. Maar hoeveel weet wat die woord werklik beteken? Dit is in der waarheid ’n Hebreeuse woord vir “Loof Jah!” Dit is ’n vreugdevolle, kragtige toejuiging van die Skepper, wie se naam Jehovah is.a

Die woord “halleluja” kom dikwels in die Bybel voor. Waarom? Omdat daar soveel redes is om God te loof. Jah (Jehovah) is die Skepper en Onderhouer van die uitgestrekte heelal (Psalm 147:4, 5; 148:3-6). Hy het die ekosisteme voortgebring wat lewe op aarde moontlik maak (Psalm 147:8, 9; 148:7-10). En hy stel veral in die mensdom belang. As ons sy wil doen, seën en ondersteun hy ons in hierdie lewe en bied hy ons die gewisse hoop op selfs ’n beter lewe in die toekoms (Psalm 148:11-14). Dit is Jah (Jehovah) wat dié woorde geïnspireer het: “Die regverdiges sal die aarde besit en vir ewig daarop woon.”—Psalm 37:29.

Gevolglik word almal aangespoor: “Halleluja!” of “Loof Jah!” (Psalm 104:35). Maar ongelukkig wil nie almal hierop reageer nie. Vandag kry mense swaar. Baie ly honger, is siek of word onderdruk. Heelparty ondervind baie droefheid weens dwelm- of alkoholmisbruik of weens die gevolge van hulle onsedelikheid of opstandigheid. Is daar enige rede waarom sulke mense God moet loof?

‘Net Jehovah kon my hoop gee’

Ja, daar is. Jehovah nooi almal sonder uitsondering om hom te leer ken, sy wil te leer doen en die seëninge te geniet wat mense beweeg om hom te loof. En baie reageer daarop. Beskou die voorbeeld van Adriana in Guatemala. Toe Adriana sewe was, is haar moeder oorlede. Kort daarna het haar vader haar verlaat. Toe sy tien was, het sy begin werk om ’n bestaan te maak. Aangesien haar moeder vir haar gesê het dat sy God en die kerk moet dien, het Adriana met verskeie Katolieke groepe omgegaan, maar teen die tyd dat sy 12 was, is sy ontnugter en het sy by ’n straatbende aangesluit. Sy het begin rook, dwelms gebruik en steel. Waarom sou ’n jong meisie in haar situasie God wou loof?

Adriana se suster het die Bybel saam met Jehovah se Getuies begin studeer, maar Adriana het haar uitgelag. Toe het hulle tante gesterf. By haar tante se begrafnis het Adriana met kwellende vrae geworstel. Waarheen het haar tante gegaan? Is sy in die hemel? Het sy na ’n brandende hel gegaan? Dit was baie verwarrend, en Adriana het na die kapel in die begraafplaas gegaan om te bid vir hulp, en sy het God se naam Jehovah gebruik, soos haar suster haar geleer het.

Nie lank daarna nie het sy die Bybel saam met Jehovah se Getuies begin studeer en hulle Christelike vergaderinge bygewoon. Dit het haar ’n heel nuwe lewensbeskouing gegee, en sy het moedig haar bande met die straatbendes verbreek. Adriana, wat nou in haar middel-twintigerjare is, sê: “Slegs liefde vir Jehovah het my beweeg om so ’n slegte lewenswyse te verlaat. Net Jehovah kon my in sy groot barmhartigheid die hoop op ewige lewe gee.” Adriana het, ten spyte van haar moeilike begin in die lewe, uitstekende redes om God te loof.

Uit die Oekraïne is berig ontvang van ’n situasie wat selfs minder belowend gelyk het. ’n Man sit in die gevangenis en wag op sy teregstelling. Bejammer hy homself? Is hy neerslagtig? Nee, die teendeel is waar. Nadat Jehovah se Getuies onlangs met hom in aanraking gekom het en hy kennis van Jehovah opgedoen het, het hy hulle gevra om sy moeder te besoek. Nou skryf hy vir hulle omdat hy gehoor het dat hulle aan sy versoek voldoen het. Hy sê: “Dankie dat julle my moeder besoek het. Dit was die verblydendste nuus wat ek die afgelope jaar ontvang het.”

Hy skryf oor homself en die selmaats vir wie hy getuig het en sê: “Nou het ons geloof in God en probeer ons om volgens ons geloof op te tree.” Hy sluit sy brief af: “Dankie dat julle ons gehelp het om te leer wat liefde is en om geloof te verkry. As ek bly leef, sal ek julle ook help. Ek dank God dat julle daar is en dat julle ander help om God lief te kry en in hom te glo.” Hierdie man het appèl aangeteken teen sy doodsvonnis. Maar hetsy hy tereggestel word of baie jare in die gevangenis deurbring, dit is duidelik dat hy rede het om God te loof.

‘Hoewel ek blind is, kan ek sien’

Beskou nou ’n lewenslustige tienermeisie wat skielik haar gesig verloor. Dit is wat gebeur het met Gloria, wat in Argentinië woon. Gloria het skielik blind geword toe sy 19 was, en sy het haar gesig nooit teruggekry nie. Op 29-jarige ouderdom het sy ’n man se byvrou geword, en kort daarna was sy swanger. Nóú het sy gedink dat haar lewe betekenis het. Maar toe haar kind sterf, het sy vrae begin vra. Sy het gewonder: ‘Waarom gebeur dit met my? Wat het ek gedoen? Bestaan God werklik?’

Op hierdie tydstip het twee Getuies van Jehovah na haar deur toe gekom. Sy het die Bybel begin bestudeer en van die belofte daarin geleer dat die blindes in die nuwe wêreld weer sal sien (Jesaja 35:5). Wat ’n wonderlike vooruitsig vir Gloria! Sy was baie gelukkig, veral toe haar man ingestem het om hulle huwelik te wettig. Daarna het haar man ’n ongeluk gehad en ’n invalide geword, gekluister aan ’n rystoel. Vandag moet hierdie blinde vrou hard werk om die pot aan die kook te hou. Daarbenewens doen sy al die werk tuis en gee sy ook persoonlik aandag aan haar man. Tog loof Gloria Jehovah! Met die hulp van haar Christenbroers en -susters bestudeer sy die Bybel in braille, en sy word grootliks deur die Christelike vergaderinge by die Koninkryksaal bemoedig. Sy sê: “Dit is moeilik om te verduidelik, maar hoewel ek blind is, is dit asof ek kan sien.”

Soms word mense vervolg wanneer hulle God loof. ’n Vrou in Kroasië was bly toe sy van God geleer het, maar haar man het haar nuwe geloof teëgestaan, haar verstoot en hulle eenjarige dogtertjie by hom gehou. Haweloos, deur haar man en familie verlaat, sonder ’n tuiste, ’n werk of selfs haar kind, was sy aanvanklik verpletter. Maar haar liefde vir God het haar onderskraag, hoewel sy net beperkte kontak met haar dogtertjie gehad het totdat die kleintjie grootgeword het. Hierdie vrou het die “pêrel van groot waarde” gevind en wou dit nie prysgee nie (Matteus 13:45, 46). Hoe het sy haar vreugde in hierdie moeilike tye behou? Sy sê: “Vreugde is ’n vrug van God se gees. Dit kan ten spyte van eksterne omstandighede aangekweek word, net soos plante in ’n kweekhuis kan groei ongeag hoe die weer buite is.”

In die geval van die sesjarige Markus, van Finland, is daar vasgestel dat hy ’n ongeneeslike spiersiekte het. Hy was weldra aan ’n rolstoel gekluister. ’n Paar jaar later het sy moeder hom na ’n lid van die Pinksterkerk geneem wat oral bekendheid verwerf het deur te beweer dat hy siekes kan genees. Maar daar het nie ’n wonderdadige genesing plaasgevind nie. Markus het derhalwe belangstelling in God verloor en het in die wetenskap en ander sekulêre rigtings begin studeer. Toe, ongeveer vyf jaar gelede, het ’n vrou in ’n rolstoel vergesel van ’n jong man die huis besoek waar Markus woon. Hulle was Getuies van Jehovah. Markus was toe ’n ateïs, maar hy het geen beswaar daarteen gehad om godsdiens te bespreek nie en het hulle ingenooi.

Later het ’n egpaar hom besoek, en ’n Bybelstudie is begin. Uiteindelik het die krag van Bybelwaarheid Markus se beskouing van sake verander, en hy het besef dat hy ten spyte van sy gestremdheid werklik redes het om God te loof. Hy het gesê: “Ek voel baie gelukkig omdat ek die waarheid gevind het, asook die organisasie wat Jehovah gebruik. My lewe het nou rigting en betekenis. Nog ’n verlore skaap is gevind, wat nie Jehovah se kudde wil verlaat nie!”—Vergelyk Matteus 10:6.

Laat almal ‘Jah loof’

Dit is net ’n paar van die tallose ondervindinge wat vertel kan word om te toon dat mense vandag, ongeag hulle omstandighede, rede kan hê om God te loof. Die apostel Paulus het dit soos volg verduidelik: “Godvrugtige toegewydheid is voordelig vir alles, aangesien dit belofte inhou vir die teenswoordige en die toekomstige lewe” (1 Timoteus 4:8). As ons God se wil doen, sal hy die ‘belofte vir die teenswoordige lewe’ vervul. Hy sal natuurlik nie in hierdie stelsel van dinge die armes ryk maak of die siekes gesond maak nie. Maar hy gee sy gees aan diegene wat hom dien sodat hulle vreugde en tevredenheid vind ongeag die situasie waarin hulle is. Ja, selfs in ‘die teenswoordige lewe’ kan die siekes, die verdruktes en die armes rede hê om God te loof.

Maar wat van die “toekomstige lewe”? Die blote gedagte daaraan behoort ons te beweeg om God met die grootste ywer te loof! Dit is opwindend om te dink aan die tyd wanneer armoede onbekend sal wees; wanneer “geen inwoner sal sê: Ek is siek nie” en wanneer Jehovah God ‘elke traan van hulle oë sal afvee, en die dood nie meer daar sal wees nie, en ook verdriet en geskreeu en pyn nie meer daar sal wees nie. Die vorige dinge het verbygegaan’ (Jesaja 33:24; Openbaring 21:3, 4; Psalm 72:16). Hoe beskou jy hierdie beloftes van God?

’n Jong man in El Salvador het ’n Bybeltraktaat geneem wat party van hierdie dinge verduidelik. Hy het vir die Getuie wat dit vir hom gegee het, gesê: “Dame, wat hierdie traktaat sê, is te goed om te glo.” Baie reageer op dié wyse. En tog is dit die beloftes van die Een wat die heelal geskep het, wat die natuurlike kringlope van ons aarde tot stand gebring het en wat selfs die armes en die siekes help om vreugde te vind. Ons kan glo wat hy sê. Die voorgemelde jong man het gevind dat dit waar is toe hy die Bybel saam met Jehovah se Getuies begin studeer het. As jy dit nie reeds doen nie, moedig ons jou aan om dieselfde te doen. Mag jy dan daar wees wanneer hierdie huidige stelsel van dinge verbygegaan het en die hele skepping saam uitroep: “Halleluja!” “Loof Jah!”—Psalm 112:1; 135:1, vgl. NW.

[Voetnoot]

a In die Engelse Bybel word “Jehovah” soms tot “Jah” afgekort.

[Prent op bladsy 1]

Mag jy daar wees wanneer die hele skepping saam uitroep: “Halleluja!”

    Afrikaanse publikasies (1975-2025)
    Meld af
    Meld aan
    • Afrikaans
    • Deel
    • Voorkeure
    • Copyright © 2025 Watch Tower Bible and Tract Society of Pennsylvania
    • Gebruiksvoorwaardes
    • Privaatheidsbeleid
    • Privaatheidsinstellings
    • JW.ORG
    • Meld aan
    Deel