Waarom wonderwerke as sodanig nie geloof voortbring nie
SIEN is glo. Dit is baie mense se beskouing. Party sê dat hulle in God sou glo as hy hom op ’n wonderdadige manier aan hulle openbaar. Dit is dalk so, maar sou hierdie oortuiging tot ware geloof lei?
Dink aan die Israeliete Korag, Datan en Abiram. Die Bybel toon dat hulle ooggetuies was van hierdie ontsagwekkende wonderwerke van God: die tien plae oor Egipte, die ontsnapping van die nasie Israel deur die Rooi See en die vernietiging van die Egiptiese Farao en sy leër (Exodus 7:19–11:10; 12:29-32; Psalm 136:15). Korag, Datan en Abiram het ook gehoor hoe Jehovah by die berg Sinai uit die hemel spreek (Deuteronomium 4:11, 12). Maar nie lank ná hierdie wonderwerke plaasgevind het nie, het die drie manne ’n opstand teen Jehovah en sy aangestelde knegte aangestig.—Numeri 16:1-35; Psalm 106:16-18.
Sowat 40 jaar later was ’n profeet met die naam Bileam ook ’n ooggetuie van ’n wonderwerk. Selfs die ingryping van engele het hom nie daarvan weerhou om God se vyande, die Moabiete, se kant te kies nie. Ondanks daardie wonderwerk het Bileam voortgegaan en hom teen Jehovah God en Sy volk verset (Numeri 22:1-35; 2 Petrus 2:15, 16). Bileam se gebrek aan geloof is egter nie te vergelyk met dié van Judas Iskariot nie. Ondanks die feit dat Judas ’n intieme metgesel van Jesus en ’n ooggetuie van ’n buitengewone reeks wonderwerke was, het hy Christus vir dertig silwerstukke verraai.—Matteus 26:14-16, 47-50; 27:3-5.
Die Joodse godsdiensleiers was ook bewus van die talle wonderwerke wat Jesus verrig het. Nadat hy Lasarus opgewek het, het hulle selfs erken: “Hierdie man doen baie tekens.” Maar het die feit dat hulle Lasarus nou lewendig gesien het hulle harte versag en hulle laat glo? Nee, glad nie. Pleks daarvan het hulle planne beraam om Jesus sowel as Lasarus dood te maak!—Johannes 11:47-53; 12:10.
Selfs direkte ingryping deur God het nie geloof in daardie goddelose manne voortgebring nie. Terwyl Jesus by een geleentheid in die tempelvoorhof was, het hy hardop gebid: “Vader, verheerlik u naam.” Jehovah het met ’n stem uit die hemel geantwoord: “Ek het dit verheerlik en sal dit weer verheerlik.” Hierdie wonderdadige gebeurtenis het nogtans nie geloof voortgebring in die harte van diegene wat daar teenwoordig was nie. Die Bybel sê: “Hoewel hy so baie tekens voor hulle gedoen het, het hulle nie geloof in hom gestel nie.”—Johannes 12:28-30, 37; vergelyk Efesiërs 3:17.
Waarom wonderwerke nie geloof voortgebring het nie
Hoe kon daar so ’n gebrek aan geloof wees ondanks hierdie wonderwerke? Dit is veral moeilik om te begryp waarom die Joodse godsdiensleiers Jesus verwerp het wanneer ’n mens in ag neem dat die Jode oor die algemeen juis in die tyd toe hy sy bediening begin het “in afwagting” verkeer het van “die Christus”, of die Messias (Lukas 3:15). Die probleem het egter gelê in wat daardie verwagtinge was. Die leksikograaf W. E. Vine haal ’n welbekende Bybelkenner aan wat blykbaar gesê het dat die Jode behep was met die idee van ’n Messias wat hulle “wêreldlike triomf” en “materiële voorspoed” sou gee. Hulle was gevolglik nie voorbereid op die nederige, niepolitiese Jesus van Nasaret, wat in 29 G.J. as die ware Messias in hulle midde verskyn het nie. Die godsdiensleiers was ook bang dat Jesus se leringe die bestaande toedrag van sake sou ontwrig en hulle vername posisies in gevaar sou stel (Johannes 11:48). Hulle vooropgesette menings en selfsug het hulle verblind vir die betekenis van Jesus se wonderwerke.
Joodse godsdiensleiers en ander het later die wonderdadige bewyse verwerp dat Jesus se volgelinge Goddelike guns geniet het. Toe sy apostels byvoorbeeld ’n man genees het wat van sy geboorte af kreupel was, het woedende lede van die Joodse hoërhof gevra: “Wat moet ons met hierdie mense doen? Want daar het inderdaad ’n merkwaardige teken deur hulle plaasgevind, een wat openbaar geword het aan al die inwoners van Jerusalem; en ons kan dit nie ontken nie. Maar laat ons, sodat dit nie verder onder die volk versprei nie, hulle met dreigemente aansê om nie meer in hierdie naam met ’n enkele mens te praat nie” (Handelinge 3:1-8; 4:13-17). Hierdie indrukwekkende wonderwerk het klaarblyklik nie geloof in die harte van daardie manne voortgebring nie.
Ambisie, trots en hebsug is faktore wat baie mense beweeg het om die deur van hulle hart te sluit. Dit was blykbaar die geval met Korag, Datan en Abiram, wat in die begin genoem is. Afguns, vrees en talle ander skadelike gesindhede was vir ander ’n struikelblok. Ons word ook herinner aan die ongehoorsame engele, die demone, wat vroeër die voorreg gehad het om die aangesig van God te aanskou (Matteus 18:10). Hulle twyfel nie aan die bestaan van God nie. Trouens, ‘die demone glo en sidder’ (Jakobus 2:19). Tog het hulle geen geloof in God nie.
Wat ware geloof beteken
Geloof behels meer as om bloot te glo. Dit is ook meer as ’n kortstondige emosionele reaksie op ’n wonderwerk. Hebreërs 11:1 sê: “Geloof is die gewaarborgde verwagting van dinge waarop gehoop word, die duidelike demonstrasie van werklikhede hoewel hulle nie gesien word nie.” Iemand wat geloof het, is in sy hart daarvan oortuig dat alles wat Jehovah God beloof beslis vervul sal word. Daarbenewens is die onbetwisbare bewys van onsigbare werklikhede so kragtig dat daar gesê word dat geloof gelykstaande aan daardie getuienis is. Ja, geloof is op getuienis gegrond. En in die verlede het wonderwerke ’n rol in die ontwikkeling of versterking van geloof gespeel. Die tekens wat Jesus gedoen het, het ander daarvan oortuig dat hy die beloofde Messias was (Matteus 8:16, 17; Hebreërs 2:2-4). Gawes van God se heilige gees, of werkende krag, soos wonderdadige genesing en talespraak het eweneens bewys dat die Jode nie meer Jehovah se guns geniet het nie, maar dat die Christengemeente, wat deur sy Seun, Jesus Christus, opgerig is, nou sy goedkeuring gehad het.—1 Korintiërs 12:7-11.
Een van die wonderdadige gawes van die gees was die vermoë om te profeteer. Toe ongelowiges hierdie wonderwerk gesien het, is party beweeg om Jehovah te aanbid en het verklaar: “God is werklik onder julle” (1 Korintiërs 14:22-25). Dit was egter nie Jehovah God se voorneme dat wonderwerke ’n permanente kenmerk van Christelike aanbidding moes wees nie. Gevolglik het die apostel Paulus geskryf: “Of daar nou gawes van profesie is—hulle sal weggedoen word; of daar nou tale is—hulle sal ophou” (1 Korintiërs 13:8). Hierdie gawes het blykbaar opgehou met die dood van die apostels en diegene wat sulke gawes deur middel van hulle ontvang het.
Sou mense dan sonder ’n grondslag vir geloof wees? Nee, want Paulus het gesê: “[God het] homself inderdaad nie sonder getuienis gelaat . . . nie deurdat hy goed gedoen het deur vir julle reëns uit die hemel en vrugbare tye te gee en julle harte geheel en al met voedsel en vrolikheid te vul” (Handelinge 14:17). Trouens, vir opregtes van hart wat bereid is om hulle verstand en hart ontvanklik te maak vir die getuienis wat om ons is, word Jehovah se “onsigbare eienskappe . . . van die wêreld se skepping af duidelik gesien, omdat hulle waargeneem word in die dinge wat gemaak is, ja, sy ewige krag en Godheid, sodat hulle [diegene wat God loën] onverskoonbaar is”.—Romeine 1:20.
Meer as geloof in God se bestaan is nodig. Paulus het gemaan: “Hou op om na hierdie stelsel van dinge gevorm te word, maar word verander deur julle verstand te hervorm, dat julle julle van die goeie en aanneemlike en volmaakte wil van God kan vergewis” (Romeine 12:2). Dit kan gedoen word deur die Skrif ywerig te bestudeer met behulp van Christelike publikasies, soos hierdie tydskrif. Geloof wat juiste kennis van God se Woord, die Bybel, as grondslag het, is nie swak of oppervlakkig nie. Diegene wat geleer het wat God se wil is en dit in geloof doen, verrig heilige diens aan God.—Romeine 12:1.
Glo sonder om te sien
Dit was vir die apostel Tomas moeilik om geloof te stel in Jesus se opstanding uit die dood. “Tensy ek in sy hande die merk van die spykers sien en my vinger in die merk van die spykers steek en my hand in sy sy steek, sal ek beslis nie glo nie”, het Tomas gesê. Toe Jesus later in ’n gematerialiseerde liggaam verskyn het waarop die wonde van sy teregstelling gesien kon word, het Tomas gunstig op hierdie wonderwerk gereageer. Jesus het egter gesê: “Gelukkig is dié wat nie sien nie en nogtans glo.”—Johannes 20:25-29.
Vandag is daar miljoene Getuies van Jehovah wat “deur geloof wandel en nie deur aanskouing nie” (2 Korintiërs 5:7). Hoewel hulle nie die wonderwerke gesien het wat in die Bybel opgeteken is nie, glo hulle vas dat dit plaasgevind het. Die Getuies beoefen geloof in God en sy Woord. Met behulp van sy gees kan hulle die Bybel se leringe en die hooftema daarvan verstaan—die regverdiging van Jehovah God se soewereiniteit deur middel van sy hemelse Koninkryk (Matteus 6:9, 10; 2 Timoteus 3:16, 17). Hierdie ware Christene pas die Bybel se wyse raad in hulle lewe toe, en dit strek hulle tot groot voordeel (Psalm 119:105; Jesaja 48:17, 18). Hulle aanvaar die onweerlegbare bewyse dat Bybelprofesieë ons tyd as “die laaste dae” identifiseer, en hulle het geloof in die feit dat God se beloofde nuwe wêreld op hande is (2 Timoteus 3:1-5; Matteus 24:3-14; 2 Petrus 3:13). Dit verskaf hulle vreugde om die kennis van God aan ander uit te dra (Spreuke 2:1-5). Hulle weet dat dit net deur ’n studie van die Skrif is dat diegene wat God soek hom werklik kan vind.—Handelinge 17:26, 27.
Onthou jy vir Albert, wat in die vorige artikel genoem is? ’n Paar dae ná sy gebed om ’n wonderwerk onbeantwoord gebly het, is hy deur een van Jehovah se Getuies besoek, ’n bejaarde vrou wat Bybellektuur by hom gelaat het. Daarna het Albert ’n gratis tuisbybelstudie aanvaar. Namate hy beter vertroud geraak het met die Bybel se boodskap, het sy teleurstelling plek gemaak vir opgewondenheid. Hy het begin besef dat hy God wel gevind het.
Die Skrif spoor ons aan: “Soek die HERE terwyl Hy nog te vinde is; roep Hom aan terwyl Hy naby is” (Jesaja 55:6). Jy kan dit doen, nie deur op ’n hedendaagse wonderwerk van God te wag nie, maar deur juiste kennis van sy Woord op te doen. Dit is noodsaaklik, omdat wonderwerke as sodanig nie geloof voortbring nie.
[Prent op bladsy 5]
Selfs die wonderdadige opwekking van Lasarus het nie Jesus se vyande beweeg om geloof te beoefen nie
[Prent op bladsy 7]
Geloof moet op juiste kennis van die Bybel gegrond wees