Identifiseer die regte soort boodskapper
“Ek is die HERE . . . wat die woord van sy kneg vervul en die voorsegging van sy boodskappers volbring.”—JESAJA 44:24, 26.
1. Hoe identifiseer Jehovah die regte soort boodskappers, en hoe ontmasker hy valse boodskappers?
JEHOVAH GOD is die Grootse Identifiseerder van sy ware boodskappers. Hy identifiseer hulle deur die boodskappe te vervul wat hy deur hulle stuur. Jehovah is ook die Groot Openbaarder van valse boodskappers. Hoe ontmasker hy hulle? Hy verydel hulle tekens en voorspellings. Op hierdie manier toon hy dat hulle selfbenoemde voorspellers is, wie se boodskappe in werklikheid uit hulle eie valse redenering spruit—ja, uit hulle dwase, vleeslike denke!
2. Watter konflik was daar tussen boodskappers in die tyd van Israel?
2 Jesaja sowel as Esegiël het beweer dat hulle boodskappers van Jehovah God is. Was hulle? Laat ons sien. Jesaja het van omstreeks 778 v.G.J. tot die een of ander tyd ná 732 v.G.J. in Jerusalem geprofeteer. Esegiël is in 617 v.G.J. in ballingskap na Babilon weggevoer. Hy het vir sy Joodse broers daar geprofeteer. Albei profete het moedig bekend gemaak dat Jerusalem vernietig gaan word. Ander profete het gesê dat God nie sou toelaat dat dit gebeur nie. Wie was die regte soort boodskappers?
Jehovah ontmasker valse profete
3, 4. (a) Watter twee teenstrydige boodskappe is aan die Israeliete in Babilon oorgedra, en hoe het Jehovah ’n valse boodskapper ontmasker? (b) Wat het Jehovah gesê sou met valse profete gebeur?
3 Terwyl Esegiël in Babilon was, het hy ’n gesig ontvang van wat in Jerusalem se tempel plaasvind. Daar was 25 manne by die ingang van die oostelike poort daarvan. Onder hulle was twee vorste, Jaäsanja en Pelatja. Hoe het Jehovah hulle beskou? Esegiël 11:2, 3 (NW) antwoord: “Menseseun, dit is die manne wat skadelikheid beraam en slegte raad teen hierdie stad gee; wat sê: ‘Is die bou van huise nie op hande nie?’” Hierdie verwaande vredesboodskappers het gesê: ‘Jerusalem is nie in gevaar nie. Inteendeel, ons gaan binnekort meer huise daarin bou!’ God het dus vir Esegiël gesê om die teenoorgestelde as hierdie leuenprofete te profeteer. In vers 13 van hoofstuk 11 vertel Esegiël vir ons wat met een van hulle gebeur het: “Terwyl ek profeteer, het Pelatja, die seun van Benaja, gesterwe.” Dit het waarskynlik gebeur omdat Pelatja die mees vooraanstaande en invloedryke vors asook die vernaamste afgodedienaar was. Sy skielike dood het bewys dat hy ’n valse profeet was!
4 Jehovah se teregstelling van Pelatja het nie die ander valse profete verhinder om in God se naam leuens te vertel nie. Hierdie bedrieërs het hulle dwase weg voortgesit deur dinge te voorspel wat strydig met God se wil was. Jehovah God het dus vir Esegiël gesê: “Wee die dwase profete wat agter hulle eie gees aan wandel en agter dinge wat hulle nie gesien het nie.” Hulle sou, soos Pelatja, “nie meer” wees nie omdat hulle uittartend vir Jerusalem “gesigte van vrede sien, terwyl daar geen vrede is nie”.—Esegiël 13:3, 15, 16, vgl. NW.
5, 6. Hoe is daar bewys dat Jesaja ondanks al die valse boodskappers ’n ware profeet was?
5 Wat Jesaja betref, al sy Goddelike boodskappe oor Jerusalem is bewaarheid. In die somer van 607 v.G.J. het die Babiloniërs die stad verwoes en ’n Joodse oorblyfsel as gevangenes na Babilon teruggeneem (2 Kronieke 36:15-21; Esegiël 22:28; Daniël 9:2). Het al hierdie rampspoed daartoe gelei dat die valse profete opgehou het om God se volk met ydele praatjies te bombardeer? Nee, daardie leuenagtige boodskappers het daarmee aangehou!
6 Asof dit nie genoeg was nie, is die Israelitiese ballinge ook blootgestel aan Babilon se grootpraterige waarsêers, voorspellers en sterrewiggelaars. Maar Jehovah het bewys dat al hierdie valse boodskappers dwase was, wie se woorde kragteloos was en wat alles agterstevoor om gehad het. Mettertyd het hy getoon dat Esegiël sy ware boodskapper was, soos Jesaja dit ook was. Jehovah het al die woorde vervul wat hy deur hulle gespreek het, net soos hy beloof het: “Ek is die HERE . . . wat die tekens van die leuenprofete vernietig en die waarsêers tot dwase maak; wat die wyse agteruit laat wyk en hulle kennis domheid maak; wat die woord van sy kneg vervul en die voorsegging van sy boodskappers volbring.”—Jesaja 44:24-26.
Ontstellende boodskappe oor Babilon en Jerusalem
7, 8. Watter geïnspireerde boodskap het Jesaja vir Babilon gehad, en wat het sy woorde beteken?
7 Juda en Jerusalem sou 70 jaar lank woes, sonder menslike inwoner, wees. Jehovah het egter deur Jesaja en Esegiël verklaar dat die stad herbou en die land bewoon sou word op die presiese tyd wat hy voorspel het! Dit was ’n ongelooflike voorspelling. Waarom? Omdat Babilon die reputasie gehad het dat hy nooit sy gevangenes vrylaat nie (Jesaja 14:4, 15-17). Maar wie was enigsins in staat om hierdie gevangenes te bevry? Wie kon die magtige Babilon, met sy ontsaglike mure en rivierverdedigingstelsel, tot ’n val bring? Jehovah die Almagtige kon! En hy het gesê dat hy sou: “Ek is die HERE . . . wat vir die diepte [dit wil sê die waterverdedigingstelsel van die stad] sê: Verdroog! en jou riviere sal Ek laat verdroog; wat van Kores sê: Hy is my herder, en hy sal alles volbring wat My behaag deurdat hy van Jerusalem sê: Dit moet gebou word, en die tempel moet gegrond word.”—Jesaja 44:24, 27, 28.
8 Dink net daaraan! Die Eufraatrivier, ’n ontsaglike versperring vir mense, was vir Jehovah soos ’n druppel water op ’n vuurwarm oppervlak. Die versperring sou eensklaps verdamp! Babilon sou val. Hoewel dit ongeveer 150 jaar voor die geboorte van Kores die Pers was, het Jehovah deur Jesaja voorspel hoe hierdie koning Babilon sou verower en hoe hy toestemming sou gee vir die vrylating van die Joodse gevangenes om Jerusalem en sy tempel te herbou.
9. Wie het Jehovah gesê sou sy instrument wees om Babilon te straf?
9 Ons vind hierdie profesie in Jesaja 45:1-3: “So sê die HERE aan sy gesalfde, aan Kores, wie se regterhand Ek gevat het om nasies voor hom neer te werp, . . . om voor hom deure oop te maak, en poorte sal nie gesluit bly nie: Ek self sal voor jou uit gaan en hoogtes gelykmaak; koperdeure sal Ek verbreek en ystergrendels stukkend slaan. En Ek sal jou die skatte gee wat in die donkerheid is en die verborge rykdomme, sodat jy kan weet dat Ek die HERE is wat jou by jou naam roep.”
10. Hoe is Kores ‘gesalf’, en hoe kon Jehovah meer as honderd jaar voor sy geboorte met hom praat?
10 Let op dat Jehovah met Kores praat asof hy reeds lewe. Dit is in ooreenstemming met Paulus se stelling dat Jehovah “die dinge wat nie is nie, roep asof hulle is” (Romeine 4:17). Daarbenewens identifiseer God Kores as “sy gesalfde”. Waarom het hy dit gedoen? Jehovah se hoëpriester het op stuk van sake nooit heilige salfolie op Kores se kop uitgegiet nie. Dit is weliswaar so, maar hierdie is ’n profetiese salwing. Dit dui op ’n bevestiging in ’n spesiale amp. God kon dus van sy vroeë aanstelling van Kores as ’n salwing praat.—Vergelyk 1 Konings 19:15-17; 2 Konings 8:13.
God vervul die woorde van sy boodskappers
11. Waarom het die inwoners van Babilon veilig gevoel?
11 Toe Kores teen Babilon opgetrek het, het die inwoners van daardie stad baie veilig en gerus gevoel. Hulle stad was omsluit deur ’n diep en wye beskermende grag, wat deur die Eufraatrivier gevorm is. Waar die rivier deur die stad gevloei het, was daar ’n ononderbroke kaai langs die oostelike oewer van die rivier. Om dit van die stad te skei, het Nebukadnesar gebou waarna hy verwys het as “’n groot muur, wat soos ’n berg nie beweeg kan word nie . . . Die bopunt daarvan het [hy] so hoog soos die berge gebou.”a Hierdie muur het poorte met groot koperdeure gehad. As ’n mens daar wou ingaan, moes jy teen die helling van die rivieroewer af opklim. Geen wonder nie dat Babilon se gevangenes alle hoop om bevry te word, opgegee het!
12, 13. Hoe is Jehovah se woorde wat deur sy boodskapper Jesaja gespreek is, bewaarheid toe Babilon deur Kores ingeneem is?
12 Maar dit was nie die geval met daardie Joodse gevangenes wat op Jehovah vertrou het nie! Hulle het goeie hoop gehad! God het deur sy profete belowe dat hy hulle sou bevry. Hoe het God sy belofte vervul? Kores het sy leërs beveel om die Eufraatrivier op ’n punt etlike kilometers noord van Babilon weg te keer. Die stad se vernaamste beskerming is sodoende in ’n ietwat droë rivierbedding verander. Daardie kritieke nag was fuiwers in Babilon nalatig en het hulle die twee deure langs die Eufraat se waterkant oopgelaat. Jehovah het nie die koperdeure letterlik verbreek nie; hy het ook nie die ystergrendels waarmee daardie poorte gesluit is letterlik stukkend geslaan nie, maar die ongelooflike wyse waarop hy dit bewerk het dat hulle oop en ongesluit gehou is, het dieselfde uitwerking gehad. Babilon se mure was nutteloos! Dit was nie vir Kores se troepe nodig om oor die mure te klim om in te gaan nie. Jehovah het voor Kores uitgegaan om die “hoogtes”, ja, alle hindernisse, uit die weg te ruim. Daar is bewys dat Jesaja God se ware boodskapper was.
13 Toe Kores algehele beheer oor die stad gehad het, het al die skatte daarvan in sy hande geval, ook dié wat in donker, verborge kamers weggesteek was. Waarom het Jehovah God dit vir Kores gedoen? Sodat hy sou weet dat Jehovah, ‘wat hom by sy naam roep’, die God van ware profesieë en die Soewereine Heer van die heelal is. Hy sou weet dat God beskik het dat hy aan bewind kom om Sy volk, Israel, te bevry.
14, 15. Hoe weet ons dat Kores sy verowering van Babilon aan Jehovah te danke gehad het?
14 Luister na Jehovah se woorde aan Kores: “Ter wille van Jakob, my kneg, en Israel, my uitverkorene, het Ek jou by jou naam geroep; Ek het jou ’n erenaam gegee, hoewel jy My nie geken het nie. Ek is die HERE, en daar is geen ander nie; buiten My is daar geen God nie; Ek omgord jou, hoewel jy My nie geken het nie, sodat hulle kan weet van die opgang van die son en van sy ondergang af dat daar buiten My geeneen is nie; Ek is die HERE, en daar is geen ander nie; wat die lig formeer en die duisternis skep, die heil bewerk [dit wil sê vir sy gevange volk] en die onheil skep [vir Babilon]: Ek, die HERE, is dit wat al hierdie dinge doen.”—Jesaja 45:4-7.
15 Kores het sy verowering van Babilon aan Jehovah te danke gehad, want dit was Hy wat hom versterk het sodat hy teen daardie goddelose stad kon volbring wat Hom behaag het en sodat hy Sy gevange volk kon verlos. God het dit gedoen deur ’n beroep op sy hemele te doen om regverdige invloede of magte te laat neerdaal. Hy het ’n beroep op sy aarde gedoen om oop te gaan en regverdige gebeure en heil vir sy gevange volk te bewerkstellig. En sy figuurlike hemele en aarde het op hierdie bevel gereageer (Jesaja 45:8). Meer as honderd jaar ná Jesaja se dood, is daar bewys dat hy Jehovah se ware boodskapper was!
Die boodskapper se goeie nuus vir Sion!
16. Watter goeie nuus kon in die verwoeste stad Jerusalem verkondig word toe Babilon verower is?
16 Maar daar is meer. Jesaja 52:7 vertel van goeie nuus vir Jerusalem: “Hoe lieflik is op die berge die voete van hom wat die goeie boodskap bring, wat vrede laat hoor, wat goeie tyding bring, wat verlossing uitroep; wat aan Sion sê: Jou God is Koning!” Stel jou voor hoe opwindend dit moes gewees het om ’n boodskapper te sien wat Jerusalem van die berge af nader! Hy moet nuus hê. Wat is dit? Dit is opwindende nuus vir Sion. Nuus van vrede, ja, nuus van God se welwillendheid. Jerusalem en sy tempel moet herbou word! En die boodskapper kondig met triomfantlike geesdrif aan: “Jou God is Koning!”
17, 18. Hoe het Kores se verowering van Babilon Jehovah se naam geraak?
17 Toe Jehovah die Babiloniërs toegelaat het om sy sinnebeeldige troon waarop die konings in Dawid se geslagslyn gesit het, omver te werp, het dit dalk gelyk asof Hy nie meer Koning is nie. Dit het eerder gelyk asof Mardoek, Babilon se hoofgod, koning is. Maar toe Sion se God Babilon tot ’n val gebring het, het hy sy universele soewereiniteit geopenbaar—dat hy die grootste Koning is. En om hierdie feit te onderstreep, sou Jerusalem, “die stad van die groot Koning”, asook die tempel, herstel word (Matteus 5:35). Al was die voete van die boodskapper wat hierdie goeie nuus gebring het vol stof, vuil en seer, was hulle in die oë van diegene wat Sion en sy God liefgehad het, o, so lieflik!
18 In profetiese sin het die val van Babilon beteken dat God se koninkryk opgerig is, en die draer van goeie nuus was ’n verkondiger van daardie feit. Daarbenewens het hierdie eertydse boodskapper, wat deur Jesaja voorspel is, ’n boodskapper van veel groter goeie nuus voorafgeskadu—groter vanweë die verhewe inhoud en Koninkrykstema daarvan, met wonderlike gevolge vir alle mense van geloof.
19. Watter boodskap oor die land van Israel het Jehovah deur Esegiël gegee?
19 Ook aan Esegiël is wonderlike herstellingsprofesieë gegee. Hy het voorspel: “So sê die Here HERE: . . . Ek [sal] die stede laat bewoon, en die puinhope sal opgebou word. En hulle sal sê: Hierdie land wat verwoes was, het geword soos die tuin van Eden.”—Esegiël 36:33, 35.
20. Watter vreugdevolle aansporing kon Jesaja profeties aan Jerusalem gee?
20 In Babiloniese gevangenskap het God se volk oor Sion gerou (Psalm 137:1). Nou kon hulle hulle verheug. Jesaja het hulle aangespoor: “Breek uit, jubel almal saam, puinhope van Jerusalem! Want die HERE het sy volk getroos, Jerusalem verlos. Die HERE het sy heilige arm ontbloot voor die oë van al die nasies, en al die eindes van die aarde sal sien die heil van onse God.”—Jesaja 52:9, 10.
21. Hoe is die woorde van Jesaja 52:9, 10 ná die verowering van Babilon vervul?
21 Ja, Jehovah se uitverkore volk het groot rede tot vreugde gehad. Hulle sou nou weer daardie eens verlate plekke bewoon en dit soos die tuin van Eden laat word. Jehovah het vir hulle “sy heilige arm ontbloot”. Hy het as ’t ware sy mou opgerol, sodat hy werk daarvan kon maak om hulle na hulle geliefde tuisland terug te bring. Dit was nie ’n geringe, onopvallende gebeurtenis in die geskiedenis nie. Nee, al die mense wat toe geleef het, het gesien hoe God se ‘ontblote arm’ krag uitoefen in menseaangeleenthede om die verstommende verlossing van ’n nasie te bewerk. Hulle het onweerlegbare bewys ontvang van die feit dat Jesaja en Esegiël Jehovah se ware boodskappers was. Niemand kon daaroor twyfel dat Sion se God die enigste lewende en ware God in die hele aarde is nie. In Jesaja 35:2 lees ons: “Hulle dáár sal sien die heerlikheid van die HERE, die sieraad van onse God.” Diegene wat hierdie bewys van Jehovah se Godheid aanvaar het, het hom begin aanbid.
22. (a) Waaroor kan ons vandag dankbaar wees? (b) Waarom moet ons veral dankbaar wees dat Jehovah valse boodskappers ontmasker?
22 Hoe dankbaar moet ons tog wees dat Jehovah sy ware boodskappers identifiseer! Dit is inderdaad hy “wat die woord van sy kneg vervul en die voorsegging van sy boodskappers volbring” (Jesaja 44:26). Die herstellingsprofesieë wat hy aan Jesaja en Esegiël gegee het, verheerlik sy groot liefde, onverdiende goedhartigheid en barmhartigheid teenoor sy knegte. Jehovah is hiervoor beslis al ons lof waardig! En vandag moet ons veral dankbaar wees dat hy valse boodskappers ontmasker. Dit is omdat daar nou baie van hulle op die wêreldtoneel is. Hulle indrukwekkende boodskappe neem nie Jehovah se verklaarde voornemens in ag nie. Die volgende artikel sal ons help om daardie valse boodskappers te identifiseer.
[Voetnote]
a The Monuments and the Old Testament, deur Ira Maurice Price, 1925.
Kan jy verduidelik?
◻ Hoe identifiseer Jehovah sy ware boodskappers?
◻ Wie het Jehovah deur middel van Jesaja gesê, sou sy instrument wees om Babilon te verower?
◻ Hoe is Jesaja se profesieë vervul wat die verowering van Babilon voorspel het?
◻ Watter goeie gevolge het die verowering van Babilon vir Jehovah se naam gehad?
[Prent op bladsy 9]
Vir die nasies in Esegiël se dag het dit gelyk of Babilon onoorwinlik is