Boodskappers van Goddelike vrede word gelukkig verklaar
“Die losgekooptes van die HERE sal teruggaan en na Sion kom met gejubel, en ewige vreugde sal op hulle hoof wees.”—JESAJA 35:10.
1. Wat het die wêreld dringend nodig?
DIE mensdom het ’n boodskapper van goeie nuus vandag nodiger as ooit tevore. Daar bestaan ’n dringende behoefte aan iemand om die waarheid aangaande God en sy voornemens te vertel, ’n onverskrokke getuie wat die goddeloses sal waarsku oor die komende vernietiging en wat regskapenes sal help om Goddelike vrede te vind.
2, 3. Hoe het Jehovah in die geval van Israel sy belofte in Amos 3:7 vervul?
2 In die dae van Israel het Jehovah belowe om daardie soort boodskappers te voorsien. Teen die einde van die negende eeu v.G.J. het die profeet Amos gesê: “Die Here HERE doen niks tensy Hy sy raadsbesluit aan sy knegte, die profete, geopenbaar het nie” (Amos 3:7). Jehovah het in die eeue nadat hy hierdie verklaring gedoen het talle magtige dade verrig. In 607 v.G.J. het hy byvoorbeeld sy uitverkore volk streng gedissiplineer omdat hulle opstandig en bloedskuldig was. Hy het ook die omliggende nasies gestraf wat hulle in Israel se lyding verlustig het (Jeremia, hoofstukke 46-49). Toe, in 539 v.G.J., het Jehovah die ondergang van die magtige Babiloniese wêreldmoondheid bewerkstellig, en gevolglik het ’n oorblyfsel van Israel in 537 v.G.J. na hulle land teruggekeer om die tempel te herbou.—2 Kronieke 36:22, 23.
3 Dit was wêreldskokkende gebeure, en in ooreenstemming met die woorde van Amos het Jehovah dit voor die tyd aan profete geopenbaar wat as boodskappers gedien het en Israel gewaarsku het oor wat voorlê. In die middel van die agtste eeu v.G.J. het hy Jesaja verwek. In die middel van die sewende eeu v.G.J. het hy Jeremia verwek. Toe, teen die einde van daardie eeu, het hy Esegiël verwek. Hulle en ander getroue profete het ’n deeglike getuienis aangaande Jehovah se voornemens gelewer.
Identifiseer vandag God se boodskappers
4. Wat toon dat die mensdom boodskappers van vrede nodig het?
4 Wat van vandag? Baie in die wêreld kry ’n nare voorgevoel wanneer hulle sien hoe die mensegemeenskap agteruitgaan. Diegene wat regverdigheid liefhet, is bedroef wanneer hulle die geveinsdheid en volslae boosheid van die Christendom sien. Soos Jehovah deur Esegiël voorspel het, “sug en steun [hulle] oor al die gruwels wat daarin gedoen word” (Esegiël 9:4). Maar baie besef nie wat Jehovah se voornemens is nie. Iemand moet hulle vertel.
5. Hoe het Jesus getoon dat daar in ons dag boodskappers sou wees?
5 Is daar enigiemand wat vandag met die onverskrokke gees van Jesaja, Jeremia en Esegiël spreek? Jesus het getoon dat iemand dit sou doen. Toe hy die gebeure van ons dag voorspel het, het hy gesê: “Hierdie goeie nuus van die koninkryk sal in die hele bewoonde aarde verkondig word tot ’n getuienis vir al die nasies; en dan sal die einde kom” (Matteus 24:14). Wie vervul vandag hierdie profesie deur as ’n boodskapper, ’n verkondiger van goeie nuus, te dien? Ooreenkomste tussen ons dag en die tyd van eertydse Israel help ons om daardie vraag te beantwoord.
6. (a) Beskryf die ondervindinge van “die Israel van God” gedurende die Eerste Wêreldoorlog. (b) Hoe is Esegiël 11:17 met betrekking tot eertydse Israel vervul?
6 Gedurende die donker dae van die Eerste Wêreldoorlog het Jehovah se hedendaagse volk, die oorblyfsel van die gesalfde “Israel van God”, in ’n soort ballingskap gegaan wat ooreenstem met dié van Israel in Babilon (Galasiërs 6:16). Hulle was in geestelike ballingskap in Babilon die Grote, die wêreldkonglomerasie van valse godsdienste, waarvan die Christendom die vernaamste en laakbaarste deel uitmaak. Jehovah se woorde aan Esegiël het nietemin getoon dat hulle nie versaak is nie. Hy het gesê: “Ek sal julle bymekaarmaak uit die volke en julle versamel uit die lande waarin julle verstrooi is, en Ek sal aan julle die land Israel gee” (Esegiël 11:17). Ten einde daardie belofte aan eertydse Israel na te kom, het Jehovah Kores die Pers verwek, wat die Babiloniese wêreldmoondheid omvergewerp het en die weg gebaan het vir ’n oorblyfsel van Israel om na hulle land terug te keer. Maar wat van vandag?
7. Watter gebeurtenis in 1919 het getoon dat Jesus teen Babilon die Grote opgetree het? Verduidelik.
7 Vroeër in hierdie eeu was daar kragtige bewyse dat ’n Grotere Kores bedrywig was. Wie was hy? Niemand anders nie as Jesus Christus, wat sedert 1914 in die hemelse Koninkryk as Koning regeer. Hierdie groot Koning het welwillendheid aan sy gesalfde broers op aarde betoon toe gesalfde Christene in die jaar 1919 uit geestelike ballingskap bevry is en na hulle “land”, hulle geestelike toestand, teruggekeer het (Jesaja 66:8; Openbaring 18:4). Op dié manier het Esegiël 11:17 ’n hedendaagse vervulling gehad. Destyds moes Babilon tot ’n val kom om die weg te baan vir Israeliete om na hulle land terug te keer. In hedendaagse tye was die herstel van die Israel van God ’n bewys dat die Grotere Kores Babilon die Grote tot ’n val gebring het. Hierdie val is deur die tweede engel van Openbaring hoofstuk 14 aangekondig, toe hy uitgeroep het: “Babilon die Grote het geval, sy wat al die nasies van die wyn van die toorn van haar hoerery laat drink het!” (Openbaring 14:8). Wat ’n ommekeer vir Babilon die Grote, veral vir die Christendom! En wat ’n seën vir ware Christene!
8. Hoe beskryf die boek Esegiël die vreugde wat God se volk ná hulle bevryding in 1919 gesmaak het?
8 In Esegiël 11:18-20 lees ons die profeet se beskrywing van die vreugde wat God se volk gesmaak het nadat hulle herstel is. Die eerste vervulling van sy woorde het die reiniging van Israel in die dae van Esra en Nehemia beteken. Die hedendaagse vervulling het iets soortgelyks beteken. Laat ons sien hoe. Jehovah sê: “Hulle sal [na hulle land] kom en al sy verfoeisels en al sy gruwels daaruit verwyder.” Net soos daar geprofeteer is, het Jehovah in 1919 begin om sy volk te reinig en hulle weer te versterk om hom te dien. Hulle het begin om al die Babiloniese gebruike en leerstellings wat hulle in sy oë besoedel het uit hulle geestelike omgewing te verwyder.
9. Watter betekenisvolle seëninge het Jehovah sy volk sedert 1919 gegee?
9 Dan sê Jehovah voorts in vers 19: “En Ek sal hulle een hart gee, en ’n nuwe gees in julle binneste gee; en Ek sal die hart van klip uit hulle vlees verwyder en hulle ’n hart van vlees gee.” In ooreenstemming met hierdie woorde het Jehovah sy gesalfde knegte in 1919 verenig, vir hulle as ’t ware “een hart” gegee, sodat hulle hom “skouer aan skouer” sou dien (Sefanja 3:9, NW). Jehovah het boonop vir sy volk heilige gees gegee om hulle te versterk om die predikingswerk te doen en om in hulle die voortreflike vrugte voort te bring wat in Galasiërs 5:22, 23 beskryf word. En in die plek van ’n ontoegeeflike, klipagtige hart, het Jehovah vir hulle ’n sagte, inskiklike, gehoorsame hart gegee, ’n hart wat op sy wil sou ag gee.
10. Waarom het Jehovah sy herstelde volk sedert 1919 geseën?
10 Waarom het hy dit gedoen? Jehovah verduidelik self. Ons lees in Esegiël 11:20: “Sodat hulle in my insettinge kan wandel en my verordeninge kan hou en dit doen; en hulle sal vir my ’n volk wees, en Ek sal vir hulle ’n God wees”. Die Israel van God het geleer om Jehovah se wette te gehoorsaam en nie hulle eie kop te volg nie. Hulle het geleer om God se wil te doen sonder om mense te vrees. Hulle was dus opvallend anders as die naamchristene van die Christendom. Hulle was Jehovah se volk. As sodanig was Jehovah gereed om hulle te gebruik as sy boodskapper, sy “getroue en verstandige slaaf”.—Matteus 24:45-47.
Die vreugde van God se boodskappers
11. Hoe beskryf die boek Jesaja die vreugde van Jehovah se volk?
11 Kan jy jou hulle vreugde voorstel toe hulle besef watter bevoorregte posisie hulle geniet? As ’n groep was hulle dit eens met die woorde van Jesaja 61:10: “Ek is baie bly in die HERE, my siel juig in my God.” Die belofte in Jesaja 35:10 het in hulle geval waar geword: “Die losgekooptes van die HERE sal teruggaan en na Sion kom met gejubel, en ewige vreugde sal op hulle hoof wees; vreugde en blydskap sal hulle verkry, maar kommer en gesug vlug weg.” Dit was hierdie soort vreugde wat Jehovah se boodskappers van Goddelike vrede destyds in 1919 gesmaak het toe hulle die goeie nuus aan die hele mensdom begin verkondig het. Sedert daardie tyd tot vandag toe het hulle nie opgehou om hierdie werk te doen nie, en hulle vreugde het toegeneem. In sy Bergpredikasie het Jesus gesê: “Gelukkig is die vredemakers, want hulle sal ‘seuns van God’ genoem word” (Matteus 5:9, voetnoot in naslaanuitgawe). Die oorblyfsel van die gesalfde “seuns van God” het die waaragtigheid van daardie verklaring van 1919 af tot vandag toe ondervind.
12, 13. (a) Wie het by die Israel van God aangesluit in hulle diens aan Jehovah, en waarop het hulle hulle toegelê? (b) Watter groot vreugde het Jehovah se gesalfde knegte beleef?
12 Met verloop van jare het die aantal lede van die Israel van God toegeneem tot en met die dertigerjare, toe die insameling van die oorblywende lede van die gesalfdes voltooiing genader het. Het die vermeerdering van die aantal verkondigers van die goeie nuus toe opgehou? Glad nie. ’n Groot skare Christene met ’n aardse hoop het toe reeds hulle verskyning begin maak, en hulle het by hulle gesalfde broers in die predikingswerk aangesluit. Die apostel Johannes het hierdie groot skare in ’n visioen gesien, en die manier waarop hy hulle beskryf, is opmerkenswaardig: “Hulle [is] voor die troon van God . . . ; en hulle verrig dag en nag heilige diens aan hom” (Openbaring 7:15). Ja, die groot skare het God begin dien. Gevolglik is die getuieniswerk teen ’n versnelde tempo deur hierdie getroue metgeselle verrig toe die getal gesalfdes ná 1935 begin verminder het.
13 Sodoende is Jesaja 60:3, 4 vervul: “Nasies sal trek na jou lig, en konings na jou stralende opgang. Slaan jou oë rondom op en kyk—hulle almal kom bymekaar, hulle kom na jou toe; jou seuns kom van ver, en jou dogters word op die heup gedra.” Die vreugde wat hierdie gebeurtenisse aan die Israel van God verskaf het, word pragtig beskryf in Jesaja 60:5, waar ons lees: “Dan sal jy dit sien en straal van vreugde, en jou hart sal ontroer en verruim word; want die rykdom van die see gaan na jou toe oor, die skatte van die nasies kom na jou toe aan.”
Jehovah se organisasie gaan vooruit
14. (a) Watter visioen van hemelse dinge het Esegiël gesien, en watter opdrag het hy ontvang? (b) Wat het Jehovah se volk in hedendaagse tye besef, en waartoe het hulle verplig gevoel?
14 In 613 v.G.J. het Esegiël ’n visioen gesien van Jehovah se hemelse, strydwa-agtige organisasie wat vooruitgaan (Esegiël 1:4-28). Jehovah het daarna vir hom gesê: “Mensekind, kom, gaan na die huis van Israel, en spreek hulle aan met my woorde” (Esegiël 3:4). In hierdie jaar 1997 besef ons dat Jehovah se hemelse organisasie nog onstuitbaar voortbeweeg om God se voornemens te vervul. Gevolglik word ons nog steeds beweeg om ander van daardie voornemens te vertel. In sy dag het Esegiël woorde gespreek wat direk deur Jehovah geïnspireer was. Vandag spreek ons woorde uit Jehovah se geïnspireerde Woord, die Bybel. En wat ’n boodskap het daardie boek tog vir die mensdom! Terwyl baie mense bekommerd oor die toekoms is, toon die Bybel dat dinge baie erger—en terselfdertyd baie beter—is as wat hulle dink.
15. Waarom is toestande erger as wat baie mense vandag dink?
15 Dinge is erger omdat die Christendom en alle ander valse godsdienste, soos ons in die vorige artikels geleer het, binnekort geheel en al vernietig gaan word, soos Jerusalem in 607 v.G.J. vernietig is. Daarbenewens gaan die hele wêreld se politieke stelsel, wat in die boek Openbaring as ’n wilde dier met sewe koppe en tien horings uitgebeeld word, binnekort vernietig word, net soos baie van Jerusalem se heidense bure vernietig is (Openbaring 13:1, 2; 19:19-21). In Esegiël se dag het Jehovah ’n duidelike beskrywing gegee van die angs wat die naderende vernietiging van Jerusalem veroorsaak het. Maar sy woorde sal baie groter betekenis hê wanneer mense besef dat die vernietiging van hierdie wêreld baie naby is. Jehovah het vir Esegiël gesê: “Jy, o mensekind, sug; sug voor hulle oë met verbreking van lendene en bitterheid. En as hulle vir jou sê: Waarom sug jy? dan moet jy antwoord: Oor die tyding, want dit kom; en elke hart sal versmelt, en al die hande sal slap word en elke gees sal verstomp en al die knieë sal wegvloei soos water. Kyk, dit kom, en dit sal gebeur, spreek die Here HERE” (Esegiël 21:6, 7; Matteus 24:30). Vreesinboesemende gebeure is op hande. Ons diep besorgdheid oor ons medemens beweeg ons om die waarskuwing te laat hoor, om die “tyding” van Jehovah se komende wraak bekend te maak.
16. Waarom is toestande vir sagmoedige mense beter as wat baie dink?
16 Terselfdertyd is dinge vir sagmoediges baie beter as wat die meeste mense dink. Hoe? Deurdat Jesus Christus vir ons sondes gesterf het en nou as Koning van God se Koninkryk heers (1 Timoteus 1:15; Openbaring 11:15). Die skynbaar onoplosbare probleme van die mensdom gaan binnekort deur daardie hemelse Koninkryk uit die weg geruim word. Die dood, siekte, korrupsie, honger en misdaad sal tot die verlede behoort, en God se Koninkryk sal sonder enige teenstand oor ’n paradysaarde heers (Openbaring 21:3, 4). Die mensdom sal Goddelike vrede geniet—’n vreedsame verhouding met Jehovah God en met mekaar.—Psalm 72:7.
17. Watter vermeerderings vervul die harte van boodskappers van Goddelike vrede met vreugde?
17 In party dele van die wêreld reageer merkwaardige groot skares sagmoediges op hierdie boodskap van Goddelike vrede. Om maar net ’n paar voorbeelde te noem: verlede jaar het die Oekraïne ’n vermeerdering van 17 persent in verkondigers gehad. Mosambiek het ’n vermeerdering van 17 persent gerapporteer, Litaue ’n vermeerdering van 29 persent. Rusland het ’n vermeerdering van 31 persent gehad, terwyl Albanië ’n vermeerdering van 52 persent in verkondigers gehad het. Hierdie vermeerderings verteenwoordig tienduisende opregtes van hart wat Goddelike vrede wil geniet en wat hulle standpunt vir regverdigheid ingeneem het. Sulke vinnige groei verskaf vreugde aan die hele Christenbroederskap.
18. Of mense nou luister of nie, wat sal ons gesindheid wees?
18 Reageer mense so geredelik waar jy woon? Indien wel, verheug ons ons saam met jou. In party gebiede verg dit egter baie, baie ure van harde werk voordat selfs een belangstellende gevind word. Word diegene wat in sulke gebiede dien traag of moedeloos? Nee. Jehovah se Getuies onthou God se woorde aan Esegiël toe Hy die jong profeet die opdrag gegee het om vir sy Joodse landgenote te preek: “Of hulle nou al luister of nie—want hulle is ’n wederstrewige huis—hulle sal moet erken dat daar ’n profeet in hulle midde gewees het” (Esegiël 2:5). Soos Esegiël hou ons aan om vir die mense aangaande Goddelike vrede te vertel, hetsy hulle daarop ag slaan of nie. Wanneer hulle luister, is ons verheug. As hulle hulle rug op ons draai, ons bespot, ons selfs vervolg, volhard ons. Ons het Jehovah lief, en die Bybel sê: “Die liefde . . . verduur alles” (1 Korintiërs 13:4, 7). Omdat ons in die predikingswerk volhard, weet mense wie Jehovah se Getuies is. Hulle ken ons boodskap. Wanneer die einde kom, sal hulle weet dat Jehovah se Getuies hulle probeer help het om Goddelike vrede te geniet.
19. As knegte van die ware God, watter groot voorreg beskou ons as iets kosbaars?
19 Is daar enige groter voorreg as om Jehovah te dien? Nee! Ons grootste vreugde spruit uit ons verhouding met God en die wete dat ons sy wil doen. “Gelukkig is die volk wat die gejuig ken. O Jehovah‚ in die lig van u aangesig bly hulle wandel” (Psalm 89:15, NW). Mag ons altyd die vreugde om God se boodskappers van vrede vir die mensdom te wees as iets kosbaars beskou. Mag ons ywerig ons deel in hierdie werk bydra totdat Jehovah sê dat dit voltooi is.
Onthou jy?
◻ Wie is vandag God se boodskappers van vrede?
◻ Hoe weet ons dat Babilon die Grote in 1919 geval het?
◻ Wat is vir die “groot skare” van die grootste belang?
◻ Waarom is die vooruitsigte vir die toekoms droewiger as wat die meeste mense vandag dink?
◻ Waarom kan die toekoms vir regskapenes beter wees as wat hulle dink?
[Prente op bladsy 21]
Baie kry ’n nare voorgevoel wanneer hulle sien hoe die mensegemeenskap agteruitgaan
[Prente op bladsy 23]
Die boodskappers van Goddelike vrede is vandag die gelukkigste mense op die aarde