Geen vrede vir die valse boodskappers nie!
“Die kwaaddoeners sal uitgeroei word . . . Die ootmoediges daarenteen sal die aarde besit en hulle verlustig oor groot vrede.”—PSALM 37:9, 11.
1. Waarom moet ons verwag om ware en valse boodskappers in “die tyd van die einde” te vind?
BOODSKAPPERS—vals of waar? In Bybeltye het albei soorte bestaan. Maar wat van ons tyd? In Daniël 12:9, 10 lees ons dat ’n hemelse boodskapper vir God se profeet gesê het: “Die woorde bly verborge en verseël tot die tyd van die einde toe. Baie sal gereinig en gesuiwer en gelouter word, maar die goddelose sal goddeloos handel; en geeneen van die goddelose mense sal verstaan nie, maar die verstandiges [“dié wat insig het”, NW] sal verstaan.” Ons lewe nou in daardie “tyd van die einde”. Sien ons ’n skerp onderskeid tussen “die goddelose” en “dié wat insig het”? Ja, ongetwyfeld!
2. Hoe word Jesaja 57:20, 21 vandag vervul?
2 In hoofstuk 57, verse 20 en 21, lees ons die woorde van God se boodskapper Jesaja: “Die goddelose is soos ’n onstuimige see; want dit kan nie tot rus kom nie, en sy waters gooi slyk en modder op. Geen vrede, sê my God, vir die goddelose nie!” Hoe goed beskryf hierdie woorde tog hierdie wêreld wat nou die 21ste eeu nader! Party vra selfs: ‘Sal ons ooit daardie eeu bereik?’ Wat kan die boodskappers wat insig het ons meedeel?
3. (a) Watter teenstelling word in 1 Johannes 5:19 beskryf? (b) Hoe word “dié wat insig het” in Openbaring hoofstuk 7 beskryf?
3 Die apostel Johannes het Goddelik geïnspireerde insig gehad. In 1 Johannes 5:19 staan daar geskrywe: “Ons weet dat ons ons oorsprong by God het, maar die hele wêreld lê in die mag van die bose.” In teenstelling met hierdie wêreld is daar die 144 000 geestelike Israeliete, waarvan ’n bejaarde oorblyfsel nog by ons is. Vandag is daar saam met hulle “’n groot skare . . . uit alle nasies en stamme en volke en tale”, waarvan daar nou meer as vyfmiljoen is, wat ook insig het. “Hulle is dié wat uit die groot verdrukking kom.” En waarom word hulle beloon? Omdat hulle ook “hulle lang gewade gewas en dit wit gemaak [het] in die bloed van die Lam” deur geloof in Jesus se losprys te beoefen. As boodskappers van lig ‘verrig hulle ook dag en nag heilige diens aan God’.—Openbaring 7:4, 9, 14, 15.
Sogenaamde boodskappers van vrede
4. (a) Waarom is die sogenaamde boodskappers van vrede in Satan se wêreld tot mislukking gedoem? (b) Hoe is Efesiërs 4:18, 19 vandag van toepassing?
4 Maar wat van die sogenaamde boodskappers van vrede in Satan se wêreldstelsel? In Jesaja hoofstuk 33, vers 7, lees ons: “Kyk, die helde skreeu daarbuite, die boodskappers van vrede ween bitterlik.” Hoe waar is dit tog van diegene wat hulle koorsagtig van een wêreldhoofstad na die volgende haas om vrede te probeer bewerkstellig! Hoe tevergeefs! Waarom? Omdat hulle die simptome van die wêreld se kwale probeer behandel pleks van die grondoorsake aan te pak. In die eerste plek is hulle blind vir die bestaan van Satan, wat deur die apostel Paulus as “die god van hierdie stelsel van dinge” beskryf word (2 Korintiërs 4:4). Satan het sade van goddeloosheid onder die mensdom gesaai, met die gevolg dat die meerderheid, baie van die heersers inkluis, nou by die beskrywing van Efesiërs 4:18, 19 pas: ‘Hulle is verstandelik in duisternis en is vervreemd van die lewe wat tot God behoort, weens die onkunde wat in hulle is, weens die ongevoeligheid van hulle hart. Aangesien hulle alle sedelikheidsgevoel verloor het, het hulle hulle aan losbandige gedrag oorgegee om met gierigheid elke soort onreinheid te bedryf.’
5. (a) Waarom misluk instansies van mense as vredemakers? (b) Watter vertroostende boodskap bevat Psalm 37?
5 Geen instansie van onvolmaakte mense kan die gierigheid, die selfsug en die haat wat vandag so algemeen voorkom uit die mensehart verwyder nie. Net ons Skepper, die Soewereine Heer Jehovah, kan dit doen! Daarbenewens is dit slegs die sagmoediges, ’n handjievol onder die mense, wat bereid is om hulle aan sy leiding te onderwerp. Die gevolge vir hulle en vir die goddelose mense van die wêreld word in Psalm 37:9-11 gekontrasteer: “Die kwaaddoeners sal uitgeroei word; maar die wat die HERE verwag, hulle sal die aarde besit. En nog ’n klein rukkie en die goddelose sal daar nie wees nie . . . Die ootmoediges daarenteen sal die aarde besit en hulle verlustig oor groot vrede.”
6, 7. Hoe toon die naam wat die wêreld se godsdienste vir hulle gemaak het dat hulle as boodskappers van vrede misluk het?
6 Kan boodskappers van vrede dan in die godsdienste van hierdie siek wêreld gevind word? Wel, watter naam het godsdiens tot op hede gemaak? Die geskiedenis toon dat godsdiens deelgeneem het aan, ja, selfs die aanstigter was van baie van die bloedvergieting wat deur die eeue heen plaasgevind het. The Christian Century van die week van 30 Augustus 1995 het byvoorbeeld oor die onrus in die voormalige Joego-Slawië gesê: “In Bosnië, wat deur die Serwiërs beheer word, sit priesters in die voorste ry van die selfgevormde parlement, en hulle is ook aan die front, waar eenhede en selfs wapens voor gevegte geseën word.”
7 ’n Eeu van sendingwerk deur die Christendom in Afrika het geensins beter resultate opgelewer nie, soos goed toegelig is in Rwanda, ’n land waar 80 persent van die inwoners na bewering Katoliek is. The New York Times van 7 Julie 1995 het gesê: “Golias, ’n liberale, Katolieke leketydskrif wat in Lyon [Frankryk] gedruk word, is van voorneme om ’n bykomende 27 Rwandese priesters en vier nonne te identifiseer wat volgens die tydskrif verlede jaar aan die slagtings in Rwanda deelgeneem het of dit aangemoedig het.” African Rights, ’n menseregte-organisasie in Londen, het hierdie kommentaar gelewer: “Die kerke moet, selfs meer as vir hulle stilswye, verantwoording doen vir die aktiewe deelname van party van hulle priesters, pastore en nonne aan die volksmoord.” Dit kom ooreen met die situasie in Israel toe Jehovah se ware boodskapper Jeremia die “skande” van Israel, tesame met sy heersers, sy priesters en sy profete, beskryf het en bygevoeg het: “Aan jou some [is] die bloed gevind van die siele van onskuldige armes.”—Jeremia 2:26, 34.
8. Waarom kan daar gesê word dat Jeremia ’n boodskapper van vrede was?
8 Jeremia is al dikwels ’n doemprofeet genoem, maar hy kan ook God se boodskapper van vrede genoem word. Hy het net so dikwels na vrede verwys as wat Jesaja voor hom gedoen het. Jehovah het Jeremia gebruik om oordeel oor Jerusalem uit te spreek deur te sê: “’n Oorsaak vir my toorn en my grimmigheid was hierdie stad vir My van die dag af dat hulle dit gebou het tot vandag toe, sodat Ek dit van my aangesig moet verwyder, weens al die boosheid van die kinders van Israel en van die kinders van Juda wat hulle gedoen het om My te terg, hulle, hulle konings, hulle vorste, hulle priesters en hulle profete en die manne van Juda en die inwoners van Jerusalem” (Jeremia 32:31, 32). Dit het Jehovah se oordeel oor heersers en geestelikes in die Christendom in ons dag voorafgeskadu. Ware vrede kan net heers as hierdie aanstigters van boosheid en geweld uit die weg geruim is! Hulle is beslis nie boodskappers van vrede nie.
Die VN as vredemaker?
9. Hoe het die VN daarop aanspraak gemaak dat dit ’n boodskapper van vrede is?
9 Kan die Verenigde Nasies nie ’n ware boodskapper van vrede word nie? Die inleiding tot sy handves, wat in Junie 1945 ingedien is, net 41 dae voordat die atoombom Hirosjima vernietig het, het per slot van rekening gesê dat dit die VN se doel is “om die toekomstige geslagte van die plaag van oorlog te red”. Die 50 voornemende lede van die Verenigde Nasies sou hulle “kragte saamspan om internasionale vrede en veiligheid te handhaaf”. Vandag het die VN 185 lidlande, wat hulle almal glo vir dieselfde doel beywer.
10, 11. (a) Hoe het godsdiensleiers te kenne gegee dat hulle die VN steun? (b) Op watter manier het die pouse “die Goeie Nuus van God se Koninkryk” verkeerd voorgestel?
10 Deur die jare heen is die VN luidkeels geprys, veral deur godsdiensleiers. Op 11 April 1963 het pous Johannes XXIII sy pouslike sendbrief met die titel “Pacem in Terris” (Vrede op aarde) onderteken waarin hy gesê het: “Dit is ons opregte wens dat die Verenigde Nasies—wat sy struktuur en sy middele betref—in groter mate opgewasse sal word vir die grootsheid en edelheid van sy take.” Later, in Junie 1965, het godsdiensleiers, wat na bewering die helfte van die wêreldbevolking verteenwoordig het, die 20ste verjaarsdag van die VN in San Francisco gevier. Op ’n besoek aan die VN ook in 1965 het pous Paulus VI dit as “die laaste hoop op harmonie en vrede” beskryf. In 1986 het pous Johannes-Paulus II saamgewerk om die VN se Internasionale Jaar van Vrede te steun.
11 Die pous het weer gedurende sy besoek in Oktober 1995 verklaar: “Vandag vier ons die Goeie Nuus van God se Koninkryk.” Maar is hy werklik God se boodskapper van die goeie nuus van die Koninkryk? Aangaande wêreldprobleme het hy gesê: “Hoe kan ons voor hierdie enorme uitdagings staan en nie die rol van die Verenigde Nasies erken nie?” Pleks van God se Koninkryk is die VN die pous se keuse.
Redes om ‘bitterlik te ween’
12, 13. (a) Hoe het die VN ooreenkomstig die beskrywing in Jeremia 6:14 opgetree? (b) Waarom is die leiers van die VN ingesluit in die beskrywing in Jesaja 33:7?
12 Die viering van die 50ste herdenking van die VN het nie juis enige ware vooruitsig vir “vrede op aarde” geopenbaar nie. Een rede is deur ’n skrywer in The Toronto Star van Kanada aangegee, wat geskryf het: “Die VN is soos ’n leeu sonder tande, wat brul wanneer hy voor menslike wreedheid te staan kom, maar moet wag totdat sy lede sy vals tande insit voordat hy kan byt.” En alte dikwels was daardie byt te effentjies en te laat. Die boodskappers van vrede in die huidige wêreldstelsel, en veral dié in die Christendom, het die woorde van Jeremia 6:14 herhaal: “Hulle genees die verbreking van die dogter van my volk op die maklikste manier deur te sê: Vrede, vrede!—terwyl daar geen vrede is nie.”
13 Opeenvolgende sekretarisse-generaal van die VN het hard gewerk, ongetwyfeld met opregte bedoelings, om die VN te laat slaag. Maar die 185 lede met hulle verskillende doelstellings wat aanhoudend stry oor hoe om oorlogvoering te verhoed, beleide te bepaal en finansies te hanteer, het die kanse op sukses verminder. In sy jaarverslag vir 1995 het die destydse sekretaris-generaal geskryf dat die wykende “spookbeeld van ’n wêreldomvattende kernramp” die weg baan vir “nasies om hulle vir ekonomiese en sosiale vooruitgang vir die hele mensdom te beywer”. Maar hy het bygevoeg: “Ongelukkig het die verslag van wêreldaangeleenthede oor die afgelope paar jaar daardie optimistiese verwagtinge weerspreek.” Ja, hierdie sogenaamde boodskappers van vrede “ween bitterlik”.
14. (a) Waarom kan daar gesê word dat die VN finansieel sowel as sedelik bankrot is? (b) Hoe word Jeremia 8:15 vervul?
14 ’n Opskrif in The Orange County Register van Kalifornië lui: “Die VN is finansieel, sedelik bankrot.” Die artikel het gesê dat daar tussen 1945 en 1990 meer as 80 oorloë was, wat meer as 30 miljoen lewens geëis het. Dit het ’n skrywer vir die Reader’s Digest se nommer van Oktober 1995 aangehaal wat “die VN se krygsverrigtinge beskryf as gekenmerk deur ‘onbevoegde bevelvoerders, ongedissiplineerde soldate, verdrae met aggressors, die onvermoë om wandade te verhoed en soms selfs deur die aanstigting van die afgryslikhede’. Daarbenewens ‘is die omvang van vermorsing, bedrog en misbruik oorweldigend’.” In ’n deel met die titel “Die VN op 50” het The New York Times hierdie opskrif gehad: “Wanbestuur en vermorsing ondermyn die VN se beste bedoelings.” The Times van Londen, Engeland, het ’n artikel gehad met die opskrif “Swak op vyftig—Die VN het ’n fiksheidsprogram nodig om weer in goeie toestand te kom.” Dit is inderdaad soos ons in Jeremia hoofstuk 8, vers 15, lees: “Hulle wag op vrede, maar daar is niks goeds nie; op ’n tyd van beterskap, maar kyk, daar is verskrikking.” En die bedreiging van ’n kernslagting hang nog bo die mensdom se kop. Dit is duidelik dat die VN nie die boodskapper van vrede is wat die mensdom nodig het nie.
15. Hoe het eertydse Babilon en sy afgodiese nageslag getoon dat hulle vernietigend sowel as bedwelmend is?
15 Wat sal die uiteinde hiervan wees? Jehovah se profetiese Woord laat ons in geen twyfel nie. Wat wag in die eerste plek op die wêreld se valse godsdienste wat so dikwels alte vriendelik met die VN was? Hulle het almal een afgodiese oorsprong, eertydse Babilon. Hulle word gepas in Openbaring 17:5 beskryf as “Babilon die Grote, die moeder van die hoere en van die walglike dinge van die aarde”. Jeremia het die ondergang van hierdie skynheilige organisasie beskryf. Soos ’n hoer het hulle die aarde se politici verlei, die VN gevlei en ongeoorloofde verhoudings met sy politieke lidlande aangeknoop. Hulle was vername deelnemers aan die oorloë van die geskiedenis. Een kommentator het na aanleiding van die godsdiensoorlogvoering in Indië geskryf: “Karl Marx het na godsdiens verwys as die opium van die massas. Maar daardie stelling kan nie heeltemal waar wees nie, want opium is ’n depressiewe middel, wat ’n mens bedwelmd maak. Nee, godsdiens is meer soos crack-kokaïen. Dit veroorsaak verskriklike geweld en is ’n uiters vernietigende krag.” Daardie skrywer is ook nie heeltemal reg nie. Valse godsdiens is bedwelmend sowel as vernietigend.
16. Waarom moet opregtes van hart nou uit Babilon die Grote vlug? (Sien ook Openbaring 18:4, 5.)
16 Wat moet opregtes van hart dus doen? God se boodskapper Jeremia gee ons die antwoord: “Vlug uit Babel uit, en red elkeen sy lewe; . . . want dit is die tyd van wraak vir die HERE.” Ons is verheug dat miljoene uit die greep van Babilon die Grote, die wêreldryk van valse godsdiens, gevlug het. Is jy een van hulle? Dan verstaan jy goed hoe Babilon die Grote die nasies van die aarde beïnvloed het: “Die nasies het van sy wyn gedrink; daarom het die nasies rasend geword.”—Jeremia 51:6, 7.
17. Watter oordeel gaan binnekort aan Babilon die Grote voltrek word, en wat gaan daarna gebeur?
17 Binnekort sal Jehovah dit so bewerk dat ‘rasende’ lede van die VN valse godsdiens aanval, soos in Openbaring 17:16 beskryf word: “Hulle sal die hoer haat en sal haar verwoes en naak maak, en hulle sal haar vlesige dele opeet en haar heeltemal met vuur verbrand.” Dit sal die begin wees van die groot verdrukking waarna daar in Matteus 24:21 verwys word en wat tydens Armageddon, die oorlog van die groot dag van God die Almagtige, ’n hoogtepunt sal bereik. Soos eertydse Babilon, sal Babilon die Grote die oordeel ontvang wat in Jeremia 51:13, 25 uitgespreek is: “Jy wat by die groot waters woon, wat skatryk is, jou einde het gekom, die maat waarop jy afgesny word. Kyk, Ek het dit teen jou, o berg wat verwoes, spreek die HERE; jy wat die hele aarde verwoes. En Ek sal my hand teen jou uitstrek en jou van die rotse afrol en sal jou maak ’n afgebrande berg.” Verdorwe, oorlogsugtige nasies sal ná valse godsdiens vernietig word wanneer Jehovah se dag van wraak hulle ook oorval.
18. Wanneer en hoe moet Jesaja 48:22 nog vervul word?
18 In 1 Tessalonisense 5:3 word daar aangaande die goddelose gesê: “Wanneer hulle ook al sê: ‘Vrede en veiligheid!’ dan gaan skielike vernietiging oombliklik oor hulle kom net soos die barenswee oor ’n swanger vrou; en hulle sal hoegenaamd nie ontkom nie.” Dit is hulle van wie Jesaja gesê het: “Kyk, . . . die boodskappers van vrede ween bitterlik” (Jesaja 33:7). Trouens, soos ons in Jesaja 48:22 lees, is daar “geen vrede, sê die HERE, vir die goddelose nie”. Maar watter toekoms wag op die ware boodskappers van Goddelike vrede? Ons volgende artikel sal ons daarvan vertel.
Vrae ter hersiening
◻ Met watter sterk woorde het God se profete valse boodskappers ontmasker?
◻ Waarom misluk instansies van mense wat blywende vrede probeer bewerkstellig?
◻ Hoe verskil ware boodskappers van vrede van voorstanders van die VN?
◻ Wat moet ootmoediges doen om hulle in Jehovah se beloofde vrede te verlustig?
[Prent op bladsy 15]
Jesaja, Jeremia sowel as Daniël het die mislukking voorspel van blote mensepogings om vrede te bewerkstellig
[Prent op bladsy 16]
“Die hele wêreld lê in die mag van die bose.”—Die apostel Johannes
[Prent op bladsy 17]
‘Hulle is verstandelik in duisternis.’—Die apostel Paulus