Studente van God se Woord gradueer
IN NAVOLGING van eerste-eeuse Christene is Jehovah se Getuies wêreldwyd bekend vir hulle predikingswerk van huis tot huis. Hierdie werk is op die voorgrond gestel in die openingsrede by die gradueringsprogram van die 102de klas van die Wagtoring-Bybelskool Gilead.
Op 1 Maart 1997 het Albert Schroeder, ’n lid van die Bestuursliggaam van Jehovah se Getuies, die aandag gevestig op ’n onlangse artikel in die Franse tydskrif Le Point. Dit het die Rooms-Katolieke se planne gemeld om die huis-tot-huis-predikingswerk in Italië te begin doen. “Sodat [die Vatikaanse sendelinge] nie met leë hande opdaag terwyl hulle op die terrein van Jehovah se Getuies meeding nie”, het die artikel gesê, “het die Vatikaan selfs so ver gegaan as om ’n miljoen kopieë van sint Markus se Evangelie te laat druk, want hulle verteenwoordigers het te doen met kenners [die Getuies] in die ‘verspreiding’ van die goeie woord van deur tot deur.”
Die 48 gegradueerdes is onder diegene wat Jesus se doeltreffende predikingsmetodes in die verkondiging van God se Woord navolg. Hulle het uit agt lande na die Wagtoring-onderrigsentrum in Patterson, New York, gekom. Gedurende die vyf maande van hulle opleiding het hulle die Bybel van voor tot agter bestudeer. Hulle kursus het ook die geskiedenis van God se organisasie, praktiese aspekte van sendinglewe en die vrugte van God se gees ingesluit. Dit was alles met een doel voor oë—om hulle voor te berei vir buitelandse sendingdiens in die 17 lande waarheen hulle gestuur is. By hulle graduering het ’n internasionale gehoor van 5015 in die vreugde van die geleentheid gedeel. Watter laaste praktiese raad het daardie Gileadstudente ontvang?
Tydige raad vir nuwe sendelinge
Ná die voorsitter se openingskommentare het Ralph Walls, ’n helper van die Personeelkomitee van die Bestuursliggaam, die eerste kort toespraak met praktiese raad vir die nuwe sendelinge gehou. Sy tema was “Onthou om lief te hê”. Hy het getoon dat die Bybel, in 2 Timoteus hoofstuk 3, voorspel het dat die wêreld al hoe liefdeloser sal word. Hy het, in ooreenstemming met die beskrywing van liefde in 1 Korintiërs 13:1-7, hierdie tydige herinnering aan die nuwe sendelinge gegee: “Julle sendelinge werk dalk meer ure as wat julle hoef te werk. Julle het miskien ’n skat van kennis weens julle Gileadopleiding. Of ons werk moontlik ywerig oortyd in ons takkantoortoewysing. Maar al ons pogings en opofferings sal tevergeefs wees as ons vergeet om lief te hê.”
Volgende op die program was Carey Barber, van die Bestuursliggaam, wat die onderwerp “Jehovah lei ons tot oorwinning” bespreek het. Jehovah God het sy getroue knegte, van hulle klein begin ná die Eerste Wêreldoorlog af, in die verkondiging van die goeie nuus van sy Koninkryk laat seëvier, ten spyte van vervolging. In 1931 het die Bybelstudente, soos hulle destyds bekend gestaan het, die naam Jehovah se Getuies aangeneem, tot ontsteltenis van die geestelikes van die Christendom. “Die 102de klas Gileadopgeleide sendelinge het nou die wonderlike voorreg om ’n groot aandeel aan die glorieryke werk te hê om aan soveel mense moontlik die geleentheid te gee om daardie heilige naam te leer”, het broer Barber gesê. Hulle sluit aan by ’n lang lys van 7131 sendelinge wat by die Gileadskool opgelei is en wat gehelp het om die verkondiging van God se Woord van 54 lande in 1943 tot 233 lande tans uit te brei.
Die volgende spreker, Lloyd Barry, ook van die Bestuursliggaam, was ’n gegradueerde van die 11de klas van Gilead en het meer as 25 jaar as sendeling in Japan gedien. Hy het aanmoediging verskaf met sy tema: “Bly by hierdie dinge”. “Julle sal groot vreugde vind as julle volhard”, het hy vir die studente gesê. Watter belonings ontvang ’n mens as jy in die sendingwerk of in enige teokratiese toewysing volhard? “Ons volharding verbly bowenal Jehovah se hart . . . Dit verskaf ’n mens groot tevredenheid om jou onkreukbaarheid tydens beproewing te handhaaf . . . Maak die sendingdiens julle loopbaan . . . Julle beloning sal ’n hartverblydende ‘mooi so’ wees” (Matteus 25:21; Spreuke 27:11). Ter afsluiting van sy aanbieding het broer Barry die nuwe sendelinge hartlik aangemoedig om ‘by hierdie dinge te bly’ deur vasbeslote te wees om die sendingveld die middelpunt van hulle lewe te maak.—1 Timoteus 4:16.
“Wat sal julle sien?” was die vraag wat geopper is deur Karl Adams, wat al ’n aandeel aan die onderrigting van baie Gileadklasse gehad het. Hy het daarop gewys dat wat die nuwe sendelinge in hulle toewysings sal sien nie net van hulle fisiese gesigsvermoë sal afhang nie, maar ook van die oë van hulle hart (Efesiërs 1:18). Dit is toegelig deur wat die Israelitiese verkenners gesien het toe hulle die Beloofde Land verken het. Al 12 verkenners het dieselfde dinge uit ’n fisiese oogpunt gesien, maar net twee het die Beloofde Land uit God se oogpunt gesien. Sendelinge kan ook dinge op verskillende maniere beskou. In party lande waar hulle sal dien, gaan hulle dalk armoede, lyding en wanhoop sien. Maar hulle moet nie negatief reageer en die land verlaat nie. Broer Adams het van ’n sendeling van ’n onlangse klas vertel wat gesê het: “Hierdie ondervindinge het my laat besef dat ek hier moet bly. Hierdie mense het ’n hoop vir die toekoms nodig. Ek wil graag ’n verskil in hulle lewe maak.” Broer Adams het afgesluit deur die nuwe sendelinge aan te moedig om die lande waarheen hulle gestuur is te beskou as gebiede wat Jehovah hom voorgeneem het om deel van Sy aardse Paradys te maak en om die mense daar as voornemende lede van die nuwewêreld-gemeenskap te sien.
Die laaste toespraak in hierdie deel van die program is deur Wallace Liverance gehou, wat ’n aantal jare in die sendingveld gedien het voordat hy ’n Gileadinstrukteur geword het. “Handel met insig in God se wonderlike werke” was sy tema. Om met insig te handel, behels dat ’n mens verstandig, met goeie oordeel en met gesonde verstand optree. Dit is iets wat koning Saul van Israel nie gedoen het nie.—1 Samuel 13:9-13; 15:1-22.
Een manier waarop hulle met insig kan handel, is deur die uitdagings te aanvaar wat met die aanpassing by ’n nuwe lewenswyse gaan kom, onder meer om ’n nuwe taal aan te leer en die mense te leer ken. Die ondervindinge wat sendelinge het om uitdagings die hoof te bied en struikelblokke te oorkom, kan hulle geestelik versterk op die manier wat Josua en Kaleb versterk is terwyl hulle die land verower het wat God aan hulle toegeken het.
Onderhoude
Die volgende deel op die program het ’n reeks onderhoude ingesluit. Harold Jackson het ’n onderhoud gevoer met Ulysses Glass, die registrateur en ’n jare lange instrukteur van die Gileadskool, wat nou 85 jaar oud is. Baie sendelinge wat nog in die veld is, onthou sy jare van getroue onderrigting en opleiding nog goed. Die volgende was Mark Noumair, ’n Gileadinstrukteur wat etlike jare in buitelandse diens in Afrika deurgebring het voordat hy ’n lid van die Gileadskool se personeel geword het. Hy het onderhoude gevoer met studente oor hulle bediening gedurende die vyf maande van hulle opleiding. Hulle ondervindinge het duidelik getoon dat daar mense in die plaaslike gebied is wat in God se Woord belangstel.
Robert Ciranko en Charles Molohan het daarna met ervare manne gepraat wat ’n ander skool by die sentrum bygewoon het, ’n skool vir takkantoorpersoneel. Hulle raad aan die graduerende klas was onder meer die belangrikheid daarvan om nederig te wees en tot die eenheid van die gemeente by te dra. Hulle het die gegradueerdes aangeraai om nie vooropgesette idees te hê van wat in die sendingwerk sal gebeur nie, maar eerder net gewillig te wees om te aanvaar wat ook al gebeur. Die toepassing van hierdie raad sal die nuwe sendelinge ongetwyfeld help om hulle toewysings as onderrigters van God se Woord te vervul.
Laastens het Theodore Jaracz, ’n lid van die Bestuursliggaam, die gehoor toegespreek oor die onderwerp “Wie of wat het die grootste invloed?” Hy het verduidelik dat ons as Christene ’n goeie invloed op ander mense kan hê as ons die vrugte van die gees aan die dag lê. “Sendelinge wat deur Jehovah se organisasie uitgestuur word, het ’n lofwaardige naam opgebou as mense wat ’n heilsame, geestelike invloed op ander uitoefen”, het hy gesê. Hy het toe ’n paar opmerkings aangehaal van individue wat gehelp is om God te dien deur die goeie voorbeelde wat sendelinge gestel het. “Mag julle die goeie naam hooghou wat Jehovah se volk verkry het en aanhou klop aan die deure in julle buitelandse toewysing, op soek na verdienstelikes . . . Weerstaan ook die gees van hierdie wêreld deur julle onberispelike, rein gedrag en oefen ’n goeie invloed op ander uit tot lof en eer van Jehovah”, het hy afgesluit.
Ter opsomming van die program het die voorsitter groete van heinde en ver oorgedra en toe die diplomas oorhandig en die sendingtoewysings aangekondig. Daarna het een van die gegradueerdes ’n klasresolusie voorgelees waarin hulle hulle dank betuig het vir die onderrigting wat voorsien is. Die gradueringsprogram van die 102de klas het ongetwyfeld al die aanwesiges meer vasbeslote gemaak om vooruit te gaan in die verkondiging van God se Woord.
[Prent op bladsy 31]
102de Gradueringsklas van die Wagtoring-Bybelskool Gilead
In die lys hieronder word rye van voor na agter genommer en name word van links na regs in elke ry aangegee.
(1) Duffy, C.; Alexis, D.; Harff, R.; Lee, J.; Corey, V.; Nortum, T.; Mora, N.; Journet, F. (2) Djupvik, L.; Singh, K.; Hart, B.; Kirkoryan, M.; Lee, S.; Rastall, S.; Zoulin, K.; Kollat, K. (3) Singh, D.; Pitteloud, J.; Pitteloud, F.; Bokoch, N.; Torma, C.; Muxlow, A.; Richardson, C.; Nortum, D. (4) Harff, J.; Journet, K.; Barber, A.; Loberto, J.; Loberto, R.; Muxlow, M.; Mora, R.; Hart, M. (5) Torma, S.; Rastall, A.; Diaz, R.; Diaz, H.; Weiser, M.; Weiser, J.; Kirkoryan, G.; Zoulin, A. (6) Alexis, R.; Barber, D.; Djupvik, H.; Duffy, C.; Kollat, T.; Richardson, M.; Bokoch, S.; Corey, G.