Van suksesvolle studente tot suksesvolle sendelinge

“EK KAN nog steeds nie glo dat ons hierdie voorreg geniet het nie!” het Will gesê, met verwysing na die opleiding wat hy en sy vrou, Patsy, pas voltooi het as studente van die 103de klas van die Wagtoring-Bybelskool Gilead. Zahid en Jeni het saamgestem. “Dit is vir ons ’n eer om hier te wees”, het hulle gesê. Al die studente het hard gewerk by die skool. Nou was hulle gretig om hulle loopbaan as sendelinge te begin. Maar hulle het eers, by die gradueringsprogram op 6 September 1997, liefdevolle raad ontvang wat hulle sal help om suksesvol te wees in hulle sendingtoewysing.

Die voorsitter van die program was Theodore Jaracz, ’n lid van die Bestuursliggaam. Hy het getoon dat daar—tesame met die Bethelgesin en verteenwoordigers van 48 van die Wagtoringgenootskap se takkantore—vriende en familielede uit Europa, Kanada, Puerto Rico en die Verenigde State teenwoordig was om die studente te verseker van hulle ondersteuning en hulle liefde. Broer Jaracz het daarop gewys dat die aandag van sendelinge wat deur die Christendom se kerke uitgestuur is al dikwels van sendingwerk afgelei is, en hulle het akademiese prestasies begin nastreef of selfs by die politiek betrokke geraak. Daarenteen doen Gileadgegradueerdes wat hulle opgelei is om te doen. Hulle leer mense die Bybel.

Robert Butler van die Genootskap se kantoor in Brooklyn het daarna die tema bespreek: “Maak jou weg suksesvol.” Hy het verduidelik dat mense sukses meet aan wat jy op finansiële of ander gebiede bereik het, maar wat werklik van belang is, is waaraan God sukses meet. Jesus se bediening was suksesvol, nie omdat hy groot getalle mense bekeer het nie, maar omdat hy getrou in sy toewysing was. Jesus het Jehovah verheerlik, en hy het sonder smet van die wêreld gebly (Johannes 16:33; 17:4). Dit is dinge wat elke Christen kan doen.

“Wees slawe van alle mense”, was die raad van Robert Pevy, wat voorheen ’n sendeling in die Ooste was. Die apostel Paulus was ’n suksesvolle sendeling. Wat was sy geheim? Hy het hom tot slaaf van almal gemaak (1 Korintiërs 9:19-23). Die spreker het verduidelik: “’n Gileadgegradueerde met daardie gesindheid sal nie die sendingdiens as ’n soort loopbaanbevordering, ’n stap tot belangriker posisies in die organisasie, beskou nie. ’n Sendeling gaan na sy toewysing met net een beweegrede—om te dien, want dít is wat slawe doen.”

Gerrit Lösch van die Bestuursliggaam het sy raad hoofsaaklik op 2 Korintiërs hoofstukke 3 en 4 gegrond en die studente aangespoor: “Weerkaats die heerlikheid van Jehovah soos spieëls.” Hy het hulle daaraan herinner dat die kennis van God soos ’n lig is wat ’n Christen verlig wanneer hy sy hart ontvanklik maak daarvoor. Ons weerkaats daardie lig deur die goeie nuus te verkondig en deur goeie gedrag te handhaaf. “Soms sal jy dalk onbevoeg voel”, het hy erken. “Wanneer jy sulke gevoelens ervaar, moet jy op Jehovah vertrou ‘sodat die krag wat bo die normale is God s’n kan wees’” (2 Korintiërs 4:7). In ooreenstemming met Paulus se woorde in 2 Korintiërs 4:1 het broer Lösch hierdie beroep op die studente gedoen: “Volhard in julle sendingtoewysing. Hou julle spieël blink!”

Karl Adams, ’n lid van die Gileadfakulteit, het die interessante tema “Waar is Jehovah?” bespreek. Die vraag verwys nie na God se ligging in die heelal nie, maar na hoe belangrik dit is om op Jehovah se beskouing van sake en tekens van sy leiding te let. “Onder druk”, het hy gesê, “kan selfs iemand wat Jehovah al lank dien dit uit die oog verloor” (Job 35:10). Wat van ons tyd? In 1942 het God se volk leiding nodig gehad. Het die predikingswerk ten einde geloop of was daar nog werk om te doen? Wat was Jehovah se wil vir sy volk? Namate hulle God se Woord bestudeer het, het die antwoord duidelik geword. “Voor die einde van die kalenderjaar”, het broer Adams gesê, “is planne vir die Wagtoring-Bybelskool Gilead gemaak.” Jehovah het beslis die werk geseën van die sendelinge wat deur daardie skool uitgestuur is.

Mark Noumair was die tweede instrukteur aan die woord. In sy toespraak met die titel “Hoe sal jy jou talent gebruik?” het hy die studente aangemoedig om die opleiding wat hulle by Gilead ontvang het so gou as moontlik in hulle nuwe toewysings te gebruik. “Toon belangstelling in ander”, het hy gesê. “Raak betrokke by hulle. Wees gretig om die gebruike, die geskiedenis, die humor van die land te leer ken. Hoe gouer jy die taal leer, hoe beter sal jy vaar.”

Ywerige studente put vreugde uit die bediening

Terwyl die studente by Gilead was, het hulle hulle nie net op hulle studies toegelê nie, maar individue is ook na 11 plaaslike gemeentes gestuur. Oor naweke het hulle ywerig aan die predikingswerk deelgeneem. Wallace Liverance van die Gileadfakulteit het ’n hele paar van hulle genooi om die gehoor party van hulle ondervindinge te vertel. Hulle vreugde was duidelik sigbaar terwyl hulle vertel het van hulle ondervindinge tydens getuieniswerk by winkelsentrums, in parkeerterreine, in sakegebied, op straat en van huis tot huis. Party van hulle het gesoek na maniere om in aanraking te kom met anderstaliges wat in hulle gemeente se gebied woon en werk. Die lede van die 103de klas het gedurende die vyf maande van hulle opleiding ten minste tien tuisbybelstudies begin en gehou.

Ervare sendelinge onthul die geheime van hulle sukses

Ná hierdie aangename deel van die program het Patrick Lafranca en William van de Wall sewe Takkomiteelede genooi om tot voordeel van die klas te sê watter lesse hulle tydens hulle sendingloopbaan geleer het. Hulle het die gegradueerdes aangespoor om hulle sendingtoewysing te beskou as iets wat van Jehovah kom en om vasbeslote te wees om in hulle toewysing te volhard. Hulle het melding gemaak van die positiewe uitwerking wat Gileadopgeleide sendelinge al op die werk in ander lande gehad het.

Wat het hierdie Takkomiteelede gehelp om dekades lank as gelukkige, produktiewe sendelinge te dien? Hulle het ten nouste met die plaaslike broers saamgewerk en by hulle geleer. Onmiddellik nadat hulle in hulle toewysing aangekom het, het hulle hulle daarop toegelê om die taal te leer. Hulle het geleer om aanpasbaar te wees en hulle na plaaslike gebruike te skik. Charles Eisenhower, ’n gegradueerde van die eerste Gileadklas wat al 54 jaar ’n sendeling is, het vyf “geheime” genoem wat suksesvolle sendelinge geleer het: (1) Bestudeer die Bybel gereeld, (2) bestudeer die taal, (3) wees bedrywig in die bediening, (4) streef vrede in die sendinghuis na en (5) bid gereeld tot Jehovah. Die studente was nie net beïndruk deur die praktiese raad wat hulle ontvang het nie, maar ook deur die duidelike vreugde wat hierdie ervare sendelinge in Jehovah se diens het. Dit is soos Armando en Lupe dit gestel het: “Hulle geniet dit om oor hulle lewe te praat.”

Ná die onderhoude was daar nog een toespraak oor. Albert Schroeder, ’n lid van die Bestuursliggaam, het as sy tema gekies: “Getroue bestuurderskap van God se Woord bring kosbare juwele van waarheid aan die lig.” Aangesien die Bybel die vernaamste handboek van die Gileadskool is, het die studente belanggestel in wat hy daaroor sou sê. Broer Schroeder het daarop gewys dat die gesalfde lede van die New World Bible Translation Committee, toe hulle 50 jaar gelede aan die New World Translation of the Holy Scriptures begin werk het, nie die goedkeuring van mense probeer verkry het nie, maar op die leiding van die heilige gees vertrou het (Jeremia 17:5-8). In onlangse tye het sommige gesaghebbendes egter die hoë standaard van die New World Translation erken. In ’n brief aan die Genootskap het ’n geleerde geskryf: “Ek ken ’n kwaliteitspublikasie as ek een sien, en julle ‘New World Bible Translation Committee’ het hulle goed van hulle taak gekwyt.”

Ná hierdie toespraak het die studente hulle diplomas ontvang, en hulle toewysings is aan die gehoor bekend gemaak. Dit was ’n emosionele oomblik vir die lede van die klas. Terwyl ’n verteenwoordiger van die klas ’n brief van waardering gelees het, het baie ’n knop in hulle keel en trane in hulle oë gehad. Van die studente het hulle al jare lank vir sendingwerk voorberei. Aangesien hulle besef het dat die Gileadkursus in Engels gehou sou word, het ’n paar na Engelssprekende gemeentes verhuis om hulle taalvermoë te verbeter. Ander het verhuis na plekke waar pioniers nodig was, óf in hulle eie land óf in die buiteland. Nog ander het hulle voorberei deur ondervindinge te lees, navorsing te doen of oor en oor na die Genootskap se videokasset To the Ends of the Earth te kyk.

Will en Patsy, wat aan die begin genoem is, is oorweldig deur die persoonlike belangstelling wat daar in die studente getoon is. “Mense wat ons nie eers geken het nie, het ons omhels en foto’s van ons geneem. ’n Lid van die Bestuursliggaam het ons hand geskud en gesê: ‘Ons is trots op julle!’” Dit ly geen twyfel nie, die studente van die 103de klas is baie geliefd. Hulle is goed opgelei. Die opleiding wat hulle by Gilead ontvang het, sal hulle in staat stel om van suksesvolle studente tot suksesvolle sendelinge oor te gaan.

[Venster op bladsy 22]

Klasstatistiek

Aantal lande verteenwoordig: 9

Aantal lande waarheen gestuur: 18

Aantal studente: 48

Aantal egpare: 24

Gemiddelde ouderdom: 33

Gemiddelde jare in waarheid: 16

Gemiddelde jare in voltydse bediening: 12

[Prent op bladsy 23]

103de Gradueringsklas van die Wagtoring-Bybelskool Gilead

In die lys hieronder word rye van voor na agter genommer en name word van links na regs in elke ry aangegee.

(1) Bunn, A.; Dahlstedt, M.; Campaña, Z.; Boyacioglu, R.; Ogando, G.; Nikonchuk, T.; Melvin, S. (2) May, M.; Mapula, M.; Lwin, J.; Hietamaa, D.; Hernandez, C.; Boyacioglu, N.; Sturm, A.; Melvin, K. (3) Thom, J.; Mapula, E.; Nault, M.; Teasdale, P.; Wright, P.; Pérez, L.; Shenefelt, M.; Pak, H. (4) Murphy, M.; Campaña, J.; Stewart, S.; Cereda, M.; Reed, M.; Pérez, A.; Teasdale, W.; Pak, J. (5) Stewart, D.; Wright, A.; Cereda, P.; Nikonchuk, F.; Reed, J.; Hietamaa, K.; Ogando, C.; Shenefelt, R. (6) Murphy, T.; Hernandez, J.; Nault, M.; Bunn, B.; Thom, R.; Dahlstedt, T.; Lwin, Z.; May, R.; Sturm, A.

[Prent op bladsy 24]

Waarheen gaan ons?