Vrae van lesers

Ons studie van Jesus se gelykenis van die skape en die bokke was opwindend. Kan ons, met die oog op die nuwe begrip wat in “Die Wagtoring” van 15 Oktober 1995 uiteengesit is, nog sê dat Jehovah se Getuies vandag aan ’n skeidingswerk deelneem?

Ja. Dit is te verstane dat baie hieroor gewonder het, aangesien Matteus 25:31, 32 sê: “Wanneer die Seun van die mens in sy heerlikheid kom, en al die engele saam met hom, dan sal hy op sy heerlike troon gaan sit. En al die nasies sal voor hom versamel word, en hy sal die mense van mekaar afskei, net soos ’n herder die skape van die bokke afskei.” Die Wagtoring van 15 Oktober 1995 het getoon waarom hierdie verse van toepassing is nadat die groot verdrukking begin het. Jesus sal in sy heerlikheid kom saam met sy engele en sal op sy oordeelstroon sit. Dan sal hy mense skei. In watter opsig? Hy sal beslissings gee op grond van wat mense voor daardie tyd gedoen of nie gedoen het nie.

Ons kan dit vergelyk met die stadiums van ’n regsproses wat tot ’n hofsaak lei. Die getuienis hoop oor ’n lang tydperk op voor die hofbeslissing gelewer en die vonnis uitgespreek word. Die getuienis aangaande mense wat nou lewe wat sal bepaal of hulle skape of bokke gaan wees, hoop al lank op. En dit word steeds meer. Maar wanneer Jesus op sy troon sit, sal die saak afgehandel wees. Hy sal gereed wees om oordeel te vel. Mense sal geskei word óf tot ewige afsnyding óf tot ewige lewe.

Maar die feit dat die skeiding van mense, tot die lewe of tot die dood, wat in Matteus 25:32 gemeld word eers in die toekoms sal plaasvind, beteken nie dat daar geen skeiding, of verdeling, voor daardie tyd plaasvind nie. Die Bybel, in Matteus hoofstuk 13, meld een skeidingswerk wat vroeër plaasvind. Dit is interessant dat die boek Verenig in die aanbidding van die enigste ware God, bladsye 179-80, dit bespreek onder die onderhofie “Die skeiding van mense”.a Die boek sê: “Daar is ook ander betekenisvolle gebeure wat Jesus duidelik met die voleinding van die wêreld geassosieer het. Een daarvan is die skeiding van die ‘kinders [“seuns”, NW] van die koninkryk’ en die ‘kinders [“seuns”, NW] van die Bose’. Jesus het hiervan gepraat in sy gelykenis van ’n saailand waarin ’n vyand onkruid gesaai het.”

Die boek het verwys na Jesus se gelykenis, soos uiteengesit in Matteus 13:24-30 en verduidelik in verse 36-43. Let op dat die goeie koringsaad in vers 38 die seuns van die Koninkryk voorstel, maar die onkruid verwys na die seuns van die bose. Vers 39 en 40 toon dat die onkruid in die ‘voleinding van die stelsel van dinge’—gedurende die tyd waarin ons nou lewe—bymekaargemaak word. Hulle word afgeskei en uiteindelik verbrand, vernietig.

Die illustrasie is van toepassing op die gesalfde Christene (wat in die gelykenis van die skape en die bokke Jesus se broers genoem word). Maar die punt is steeds duidelik dat ’n noodsaaklike skeiding gedurende ons tyd plaasvind, met die gesalfdes wat onderskei kan word van diegene wat voorgee dat hulle Christene is maar bewys dat hulle “seuns van die bose” is.

Jesus het ander voorbeelde voorsien van mense wat verdeel, of geskei, word. Onthou dat hy aangaande die breë pad wat na die vernietiging lei, gesê het: “Dié wat daardeur ingaan, is baie” (Matteus 7:13). Dit was nie ’n kommentaar wat net oor die finale afloop van gebeure gehandel het nie. Dit was ’n kommentaar oor ’n voortgesette verloop van sake, net soos dit nou die geval is met die min mense wat die smal pad vind wat na die lewe lei. Onthou ook dat Jesus, toe hy die apostels uitgestuur het, gesê het dat hulle sommige sou vind wat verdienstelik is. Ander sou nie verdienstelik wees nie, en die apostels moes die stof van hulle voete afskud “tot ’n getuienis teen” sulke mense (Lukas 9:5). Is dit nie waar dat iets soortgelyks plaasvind terwyl Christene hulle openbare bediening vandag uitvoer nie? Party reageer gunstig, terwyl ander die Goddelike boodskap wat ons bring, verwerp.

Die artikels in Die Wagtoring oor die skape en die bokke het gesê: “Hoewel die oordeel wat in die gelykenis beskryf word in die nabye toekoms sal plaasvind, vind daar nou al iets lewensbelangriks plaas. Ons as Christene is besig met ’n lewensreddende werk om ’n boodskap te verkondig wat ’n skeiding van mense veroorsaak (Matteus 10:32-39).” In daardie Skrifgedeelte in Matteus hoofstuk 10 lees ons dat Jesus gesê het dat dit tot verdeeldheid sou lei wanneer iemand sy volgeling word—vader teen seun, dogter teen moeder.

Laastens, Christus se geesgesalfde broers het die voortou geneem met die wêreldwye verkondiging van die Koninkryksboodskap. Namate mense dit hoor en gunstig of ongunstig daarop reageer, identifiseer hulle hulleself. As mense kan ons nie, en moet ons nie, sê: ‘Hierdie persoon is ’n skaap; daardie een is ’n bok’, in die sin van Matteus hoofstuk 25 nie. Maar wanneer ons mense aan die goeie nuus blootstel, bied dit hulle die geleentheid om te toon waar hulle staan—wat hulle is en hoe hulle teenoor Jesus se broers optree. Soos getuienis wat vir ’n hofsaak ophoop, word die skeiding tussen diegene wat Jesus se broers ondersteun en diegene wat weier om hulle te ondersteun dus baie duidelik (Maleagi 3:18). Soos Die Wagtoring getoon het, sal Jesus binnekort op sy troon sit en die vonnis uitspreek en mense in ’n finale sin geregtelik skei tot lewe of tot afsnyding.

[Voetnoot]